“Tambokindjakindja Mbilo Kaso Esangɔ Efula!”

¹ Onde wɛ atɛnaka di’oko nyamboshila kindjakindja mbilo kanyu esangɔ efula ko aya ndoko anto wele oko ɛkɔkɔ wakakoke tanema lɔkɔ? Ondo wɛ kanyiyaka ɔnɛ: ‘Ka dimi mbeyaka woho wayokadimola anto. Bonde kahombami tetemala kalola dia tenda anto wahɛnya saki na?’ Ekɔ mɛtɛ dia mbilo efula yambokindjakindjama esangɔ efula. Koko, dikambo sɔ pombaka mbɔsama lo yoho ya dimɛna koko aha ya kɔlɔ. Lande na ngasɔ na? Tende ɛkɔkɔ ɛnɛi woshawɔ l’ɛse ɛnɛ.

² Alɔmbɛlɔ Aso Wakokɛma: Yeso akate ate: “Dinela dieko efula, keli ekambi mbeli tshitshe; okone nyolombe uwandji a dinela, dia nyutumela ekambi lu dinela diandi.” (Luka 10:⁠2) L’edja k’ɛnɔnyi akumi, takasɛngasɛngaka Jehowa dia kondja ekimanyielo k’efula. L’ahole efula, taya kakianɛ l’ekambi ekina wahombama ndo tekɔ lo kindjakindja mbilo kaso esangɔ efula. Onde woho wamboka Jehowa alɔmbɛlɔ aso hatosha ɔngɛnɔngɛnɔ?

³ Etete Tɔshaka Elowa w’Amɛna: Kânga lo mbilo yasambishama esangɔ efula, anto wekɔ lo mbetawɔ losango la Diolelo ndo wekɔ lo kondja ewo k’akambo wa mɛtɛ. Ɔnkɔnɛ, sho pombaka tshɔka esangɔ l’esangɔ l’elongamelo ka tana anto amɔtshi w’etema ɔlɔlɔ. (Is. 6:​8-11) L’ɛnyɛlɔ k’ambeki waki Yeso wa ntondo, ‘totetemale la ntshɔ’ le anto wa lo mbilo kakawatosha ndo tosale la wolo dia memula nsaki yawɔ oya lo Diolelo diaki Nzambi.​—⁠Mat. 10:​6, 7.

⁴ Lo wodja wa Portugal tshumanelo efula kindjakindjaka mbilo yawɔ lomingu tshɛ, koko vɔ wekɔ lo tetemala la tana anto wele oko ɛkɔkɔ. Lo yoho ya lânde, kadiyɛso kɛmɔtshi aki la kanyi y’ɔlɔlɔ. Nde mbutaka ate: “Pindju tshɛ, la ntondo ka dimi tatɛ sambisha, dimi nɔmbaka Jehowa dia kimanyiyami dia tana onto ɔmɔtshi lele la nsaki ka mbeka Bible.” Lushi lɔmɔtshi nde akamɛ mbeka l’ase olimu wa lo luudu lɔmɔtshi lanyawɔ kana lalɔngɔsɔlawɔ anto avo. Koko, l’ɔkɔngɔ diko paka onto ɔtɔi oto mbakayɛnyaka nsaki k’oshika ka mbeka. Onto ɔsɔ akate ate: “Anto akina kema la nsaki koko dimi lekɔ latɔ.” Lo ngɔndɔ ɔtɔi nde akalɔmbɔlaka wekelo wa Bible ehende ndamɛ. Ndo l’ɔkɔngɔ diko nde akayobatizamaka ndo akayokambaka olimu w’ombatshi mboka.

⁵ Olimu Wekɔ lo Tatetemala: Lokumu l’ɔlɔlɔ lekɔ lo sambishama paka oko wakataditshi Yeso. (Mat. 24:14) Oyadi kânga l’ahole wele anto ‘hawolange tohokamɛ,’ vɔ wekɔ lo mbewɔma oma lo tshimbo y’olimu w’esambishelo. Sho nongamɛka di’anto amɔtshi hawotetawɔ kana wayotona akambo wa mɛtɛ. Koko, anto asɔ pombaka mbewɔma lo yoho yahombama lo kɛnɛ kendana l’oyelo w’elombwelo k’oma le Jehowa.​—⁠Ezek. 2:​4, 5; 3:​7, 8, 19.

⁶ Tatashidiya Olimu: Aha sho mbahomba shikikɛ etena kahomba olimu w’esambishelo komɛ. Jehowa mbeyaka dimɛna etena kahombawɔ komɛ. Nde mbeyaka dia kana anto wekekɔ lo mbilo kaso wakoka mbetawɔ lokumu l’ɔlɔlɔ. Ɛlɔ kɛnɛ, anto amɔtshi mbutaka ɔnɛ vɔ bu la nsaki, koko etshikitanu ɛmɔtshi wa weke walo nsɛnɔ yawɔ, ɛnyɛlɔ oko oshishelo w’olimu, hemɔ ka wolo, nyɔi k’onto ɔmɔtshi lalangawɔ mbeyaka ndjâtshutshuya dia mbetawɔ losango la Diolelo mbala kekina. L’ɔtɛ wa dikanyiyakanyiya kana w’elimu wele lawɔ, anto efula mbeyaka monga ko watokaka ndoko lushi kɛnɛ kasambishaso. Wendelo wa la lɔngɛnyi w’esangɔ l’esangɔ koka mbatshutshuya dia monga la yambalo ndo pokamɛ losango laso.

⁷ Wanɛ wokomi epalanga paka l’ɛnɔnyi weke ka mbeta ndo waya kakianɛ la nkumbo yawɔ hita hawoyɔkɛnya la nsɛnɔ yawɔ ndo wekɔ lo mboka wembola wele paka Ɔtɛkɛta waki Nzambi mbakoka kadimola. Osekaseka ɔmɔtshi wambota akete akadiyɛso ahende lakande ndo akate ate: “Lam’akimi leke dikɛnda, dimi kokoka mboka kânga yema lande na kakatonaka mama kami di’Ɛmɛnyi wa Jehowa sawola la nde ndo kakandawatɛka dia nde bu la nsaki etena kele kɛnɛ tshɛ kakawalangaka sala ele sawola la nde awui wa lo Bible. Dimi lakɔshi yɛdikɔ oma lâsɔ dia lam’ayomola ndo wayomotshukama ko laya la ngelo kami hita, layɔlɔmba Ɛmɛnyi wa Jehowa dia vɔ ndja dia ndjonembetshiya Bible.” Kɛsɔ mbakandasale mɛtɛ ndo dikambo sɔ diakangɛnyangɛnya akadiyɛso wakatshu dia towenda.

⁸ Onde Wɛ Koka Kondja Etombelo w’Ɔlɔlɔ Efula? Aha mbala tshɛ mbɛnamande di’anto wembolaso mbatodjɛ wekamu dia sho sambishaka esangɔ l’esangɔ lo mbilo kaso. Mbala mɔtshi shamɛ mbele lo kiɔkɔ ya dikambo sɔ. Onde sho tatɛka la kanɛ anto kɔlɔ? Dikambo sɔ koka monga la shɛngiya lo dionga diakiso ndo ondo l’ɔtɛkɛta ndo l’elungi kaso. Ɛnya dia wɛ hakanɛ onto kɔlɔ ndo onga l’elungi k’ɔmɔnɔmɔnɔ. Hemba shambo mɔtshi y’oyoyo. Tshikitola mbɔtwɛlɔ yayɛ y’asawo ndo sala la wolo dia ndjilɔngɔsɔla. Ondo wɛ koka tshikitola dimbola diayɛ dia mbɔtwɛlɔ kana kamba l’avɛsa w’otshikitanyi lo sawo. Mbola anangɛso l’akadiyɛso akina kɛnɛ kakawɛnyi ɔnɛ tɔ tondjaka etombelo w’ɔlɔlɔ lam’akambawɔ lo mbilo yawɔ. Sambishaka kamɛ l’apandjudi ndo l’ambatshi mboka wotshikitanyi ndo lembetɛ kɛnɛ kasalawɔ dia kondja etombelo w’ɔlɔlɔ.

⁹ Jehowa mbasukɛ ndo mbatshɔkɔla olimu w’esambishelo ka Diolelo, ndo woho wakambaso olimu ɔsɔ mɛnyaka dia tekɔ la ngandji le nde ndo le wonyaso onto. (Mat. 22:​37-39) Ɔnkɔnɛ, nyɛsɔ tokambe olimu aso polo ndo l’ekomelo kawɔ ndo tatohekɔke dia kamba lo mbilo kaso esangɔ l’esangɔ.