Tokimanyiya Akina Dia Vɔ Kondja Esambelo
1 Anto efula wambɔlɛmba dia mbokaka nsango ya mpokoso wonya tshɛ, ata, odiakanelo ndo asui. Kânga mbele esambelo hayokɛ lo nsango yatama nshi nyɛ, anto wekɔ mɛtɛ l’ohomba atɔ. Keketsha onto, kana mbosamba, kɛdikɛdi mbosha wolo ndo mbɛnya bonde kahombande monga l’elongamelo, mbokimanyiya dia nde mbikikɛ ehemba. Ɛmɛnyi wa Jehowa wekɔ l’akoka wa kimanyiya anto lo yoho shɔ. (2 Kor. 1:3, 4) Tobukubuku taso toki etshina lo Bible, tayotosha anto lo Loseketanya la lo Lovula, tekɔ la nsango y’akambo wa mɛtɛ ndo yasamba anto. (Romo 15:4) Alako amɔtshi anɛ wayotokimanyiya dia sho tiɛnyanya lo tena diotshikitanyi:
2 Ɔkɔndɔ wa losango lɔmɔtshi la kɔlɔ kokaka tosha diaaso dia sho sambisha ndo samba anto l’ɛtɛkɛta wa woho ɔnɛ:
◼ “Etena kasalema akambo wa ngasɔ, anto amɔtshi toyambolaka dia kana mɛtɛ Nzambi ekɔ, ko naka nde ekɔ, kana nde tokanɛka. Wɛ akanayɛ? [Tshikande akadimole.] Yoho mɔtshi ya sho mbeya ɔnɛ kana Nzambi ekɔ ele mbuta dui dimɔtshi dieya anto tshɛ.” Adia Heberu 3:4. Ɛnyande diangɔ dikina diotodingi ndo diakahombe mɛtɛ tongama. Ko wɛ ndjotetemala wate: “Lekɔ la biukubuku mɔtshi yayokosha esambelo. Yɔ yekɔ l’ɔtɛ a dui w’ɔnɛ Onde na Nzambi Tokaneka Mete Ondo? [Adia wembola wele lo lohoso.] Tolembetelo t’eshika tekɔ lɔkɔ tɛnya ɔnɛ Nzambi ekɔ ndo kem’edja nde ayokomiya pâ tshɛ yɛnaso shi nyɛ. Onde wɛ ayolanga ndjiala?” Oma lâsɔ ko wɛ mbokana la nde lushi la wɛ ndjowenda nto.
3 Lo diendelo di’oyoyo, wɛ mbeyaka mbuta ɔnɛ:
◼ “Takatɛkɛta dikambo dia djembetelo yɛnya ɔnɛ Nzambi ekɔ ndo lakakotshikɛ biukubuku Onde na Nzambi Tokaneka Mete Ondo? Ondo wɛ akɛnyi kanyi nyɛ lo lɛkɛ 7. [Ɛnyande osato ndo ɔmbɔla odingɔ 15 lo tshena pe.] Ɔnɛ ekɔ paka ɛnyɛlɔ ɔtɔi keto l’atei wa diɛnyɛlɔ efula di’ɛnya ɔnɛ mɛtɛ Nzambi kɛmɔtshi katokanɛ ekɔ. [Adia odingɔ 27 lo lɛkɛ 8.] Wekelo wekami Bible dimɛ kimanyiyakami dia shidiya ekakatanu wa lo lɔsɛnɔ wa lushi la lushi nɛ dia oma lo wekelo akɔ mbeyami kanyi yele la Nzambi l’akambo akɔ.” Tɛnde dia wɛ mbɛ̂nya woho wekawɔ Bible.
4 Esambishelo ka lo telefɔnɛ l’ekimanyielo ka biukubuku “ Quel est le but de la vie ? Comment le découvrir? “ Wɛ kokaka ndjalowola ndo mbuta ɔnɛ:
◼ “Lekɔ lo keta lo dikambo dia losango lɔmɔtshi l’ohomba efula nɛ dia hakoke ndja dimɛ dia ndjokenda lengo.” Adia odingɔ wa ntondo wa lo lɛkɛ 4 la biukubuku, oko onto latɛkɛta la nde elundji l’elundji. Mbolande kanyi yande ndo totshike akadimule. “Lakafudi Bible kami lo Isaya 45:18. Divɛsa diakɔ mɛnyaka ɔnɛ nkɛtɛ yakatongama lo dikambo diaso. Dimi kokaka kadiɛdɔ?” L’ɔkɔngɔ, lembetshiyande oyango wa biukubuku yakɔ ndo mbolande kana wɛ kokaka mbêla miɔtshi.
5 Lam’ayowelɛ mbala kekina, wɛ kokaka pemba yoho nyɛ dia tatɛ mbeka la nde:
◼ “Nte totetemale la sawo diaso dia mbala ketshi l’ɛnyɛlɔ kɛmɔtshi kɛnya le na ahombaso nyanga ekadimwelo lo dikambo di’oweso wa lɔsɛnɔ. [Tɛkɛta awui wa l’odingɔ 1 la 2 wa lo lɛkɛ 6 la biukubuku But de la vie lo tshena pe.] Enyelo 4:11 nembetshiyaka ɔnɛ Jehowa Nzambi mbele Otungi aso. [Adia divɛsa diakɔ.] Nde aki mɛtɛ l’ɔkɔkɔ ɔmɔtshi wakandatotonge. Anto efula walanga mbeya ɔkɔkɔ akɔ wêka Bible, Dui dia Nzambi diakafundama lofundama. Dimi nangaka kosha diaaso sɔ dia wɛ mbekaka Bible.” Lembetshiyande woho wekaso l’anto Bible ofele la ngelo ndo okana la nde lushi la ndjotatɛ wekelo.
6 Sawo di’ɔlɔlɔ nɛ mbeyaka keketsha wanɛ wambovusha onto ɔmɔtshi lalangawɔ:
◼ “Lekɔ lo takimanyiya anto tshɛ wambovusha onto ɔmɔtshi lalangawɔ. Ɔsɔ ekɔ mɛtɛ dikambo dimɔtshi dioleki wolo mbohɛ. Diɔ diakɔ diakawalɔngɔsɔla biukubuku nyɛ yele l’ɔtɛ a dui ɔnɛ Etena Kavɔ Onto Ɔmɔtshi Lalangayɛ. . . . Yɔ yambokimanyiya miliyɔ y’anto. Nte kɛnya kɛnɛ katawɔ lɔkɔ lo dikambo dia daka dia dimɛna efula diakasha Yeso Kristo. [Adia odingɔ wa tanu lo lɛkɛ 26, ndo Joani 5:21, 28, 29.] Enda osato ɔnɛ lo lɛkɛ 29: vɔ wekɔ lo mɛnya woho wakolola Yeso Lazaro oko akawakɔndɔla lo wa Evanjiliyɔ. Naka wɛ nangaka mbadia biukubuku nyɛ yakeketshana, kete layɔngɛnangɛna kotshikɛyɔ.”
7 Etena kayoyokalola wɛ kokaka mbɛnya nto osato wa lo lɛkɛ 29 la biukubuku “Etena Kavɔ Onto Ɔmɔtshi Lalangayɛ. . . ,” ko wɛ mbuta wate:
◼ “Mbala ketshi takasawola dikambo dia eolwelo ka Lazaro. [Adia ɛtɛkɛta w’osato akɔ lo lɛkɛ 28, ndo sɛdingola tokanyi tɔmbwami l’ɛse k’ɔtɛ a dui wahɔnyi w’ɔnɛ “Onde Mɛtɛ Dui sɔ Diakatshama?”] Naka otema ayɛ nomɔlomɔka dia wɛ mbetawɔ ɔnɛ lushi lɔmɔtshi wɛ ayokoka nyomɛna onto lakavu, kete layolanga kokimanyiya dia wɛ monga la mbetawɔ l’elongamelo ka eolwelo.” L’ɔkɔngɔ, sɛngɔlande dia wɛ mbekaka la nde Bible.
8 Nyɛsɔ tosale la wolo aso tshɛ lo ngɔndɔ yayaye dia sho mbokoya Yeso ko ‘sambaka wanɛ tshɛ wele l’ɔkɛi.’—Is. 61:2.