Nsanganya Totshutshuyaka L’elimu W’ɔlɔlɔ
1 Ɔtɛmwɛlɔ aso ekɔ l’akambo ahende w’ohomba: wɔtwɛlɔ wa lo nsanganya ya l’etshumanelo la olimu w’esambishelo. Vɔ akɔ ahende nsanga ɔnɔngɔ ndo kimanɛ. Nsanganya totshutshuyaka l’elimu w’ɔlɔlɔ; ko wɔnɛ woleki ɔlɔlɔ l’elimu akɔ ele sambisha la mbetɛ anto ambeki. (Heb. 10:24) Naka tayotshika mbɔtɔ lo nsanganya, kete sho mbeyaka tshika sambisha esadi eto nɛ dia hatototshutshuyama nto dia disala.
2 Lo nsanganya ya lomingu la lomingu, sho kondjaka wetshelo wa lo nyuma wakalɔngɔsɔma dia totshutshuya lo sambisha. Wetshelo ɔsɔ toholaka ɔnɛ tekɔ lo sɛna lo tena dia wolo, ndo dikambo sɔ tosokoyaka dia sho mbewoya anto losango lele lo Bible lasha lɔsɛnɔ. Nsanganya tokeketshaka nto dia mbikikɛ awui weta l’esambishelo. (Mat. 24:13, 14) Lo kambaka la waaso wa mbisha kɔmatɛrɛ lo nsanganya mbayotekɛ mbutaka mbetawɔ kaso lo sɛkɛ. (Heb. 10:23) Ndo lo fundjaka nkombo yaso lo Kalasa k’Olimu wa Teokrasi mbayoteka dia koma ekambi wa tomanamana ndo nyomoleka mbeya ndakanya.—2 Tim. 4:2.
3 Woho Watotshutshuya Nsanganya y’Olimu dia Sambisha: Onto tshɛ l’atei aso pombaka tokaki sso la ntondo lo kɛnɛ kofundami l’Olimu Aso wa Diolelo. Ngasɔ mbayotokimɛ awui akɔ lo yimba lam’ayotoyowaɛna nto lo losanganya l’olimu ndo lo diɛnyɛlɔ diayowosala lo lɔyɛnga. Ko lam’ayotonga l’olimu w’esambishelo, tayokoka kanyiya Olimu Aso wa Diolelo nto ko mbohɔ diɛnyɛlɔ, lo ndjela dikambo diambohomana la so, ko sambisha dimɛna efula. Apandjudi efula salaka ngasɔ.
4 L’etenyi kekina ka losanganya l’olimu, apandjudi amɔtshi mbokanaka dia sambisha kâmɛ. Etena kekewɔ l’alako akɔ lo yimba etondo eto, vɔ tshutshuyamaka ndo mongaka la saki ka tohemba nɛ dia nsanganya yakâkeketsha dia vɔ sambishaka lomingu tshɛ.
5 Ndoko ɛngɔ kokoki mbɔsa dihole dia nsanganya yaso y’Akristo. Lo nsanganya mbokokiso monga la anyaso kâmɛ, ndo lo nsanganya mbatshutshuyamaso l’elimu w’ɔlɔlɔ. Onde sho nangaka olimu aso monga l’etombelo? Lâsɔ kete tɔtɔke lo nsanganya yakɔ tena tshɛ. Tɛnya lowando laso le Jehowa dia yɛdikɔ shɔ ya dimɛna efula lo tetemala “nsangana kame.”—Heb. 10:25.