Todje Akambo Woleki Ohomba Lo Dihole Dia Ntondo
1 Naa akambo amɔtshi w’ohomba wahombama dia lonyuma laso ndowana? L’atei wa akambo asɔ mbele: wekelo w’onto ndamɛ, wɔtwɛlɔ wa lo nsanganya, etete lo dɔmbɛlɔ, angɛnyi w’ɔlɔlɔ ndo olimu aso w’Akristo. Hatokoke monga la lonyuma l’ɔlɔlɔ naka hatodje akambo asɔ w’ohomba lo dihole dia ntondo lo lɔsɛnɔ laso.
2 Koko, sho tshɛ tekɔ lo ndɔ ta la nsaki ya demba ndo tekɔ l’ohomba w’ohokwelo. (Ngal. 5:17) Tatɔfɔnyake pondjo ɔnɛ tayokondja wahɔ oma l’oyango wa diangɔ dia l’emunyi. (Jer. 17:9) Ɔnkɔnɛ, naka sho kombolaka nama otema aso ndo mbewɔ kesama, kete ekɔ ohomba efula ndjâsɛdingolaka nshi tshɛ.—Tuk. 4:23; 2 Kor. 13:5.
3 Tɔsɛdingole Otema Aso: Dia sala ngasɔ, sho kokaka ndjambola wembola ɛnɛ l’otema ɔtɔi: Onde dimi lekɔ la saki ka wolo ka mbadia Dui dia Nzambi? (1 Pet. 2:2) Onde dimi mbeyaka ohomba wa mbɔtɔka lo nsanganya tshɛ ya l’etshumanelo? (Heb. 10:24, 25) Onde dimi lekɔ l’etete lo dɔmbɛlɔ? (Romo 12:12) Onde dimi nyangaka dia mbokana l’anto wayasha l’akambo wa lo nyuma? (Romo 1:11, 12) Onde dimi mɛnaka dia lekɔ l’ɔkɛndɛ wa mbewoya anto lokumu l’ɔlɔlɔ? (1 Kor. 9:16) Naka sho kadimola ɔnɛ eelo, kete tekɔ la saki ka mbidja akambo woleki ohomba lo dihole dia ntondo.
4 Tɔsɛdingole Ekongelo Kaso ka Lushi Tshɛ: Dia sho ndjaɔtɔnganyiya l’ɔsɛdingwelo wa nsaki ya l’otema aso, ekɔ ohomba sho menda akambo wa mbetsha la ntondo lo ekongelo kaso ka wenya. Kɛdikɛdi, sho la dia ndjaombɛ etena ka mbadiaka Bible nshi tshɛ ndo oseka numɛlɔ tshɛ ka Tshoto y’Etangelo la Réveillez-vous ! kâmɛ ndo etena ka nɔngɔsɔlaka nsanganya. Pombaka momba ndo wenya wa mbekaka lo nkumbo ndo nɔmbaka kâmɛ. Toshikikɛ yema ya wonya yayotetshaka lo menda televiziɔ kana kɛnya l’ɔrdinatɛrɛ. Tosalake tshɛ dia mbɔtɔka lo nsanganya tshɛ ya l’etshumanelo ndo ndjietsha la ntondo k’akambo akina tshɛ. Toyalɔngɔsɔlake dia nkumbo k’otondo sambishaka kâmɛ lomingu tshɛ.
5 Aha la tamu, naka sho mbidja akambo woleki ohomba lo dihole dia ntondo lo lɔsɛnɔ laso, kete tayonga l’ɔngɛnɔngɛnɔ oma lo dikambo sɔ.