“Onde Anto Tshɛ Wokokana Ngandji Lushi Lɔmɔtshi?”

¹ Losango la dimɛna efula, ndo langɛnyangɛnya asolo ndo lasha ekeketshelo laya suke la mbewoyama l’andja w’otondo l’ɛtɛkɛta 169. Atawɔ lo losango lakɔ lɔsɔ na? Woho akɔna wayolewoyama?

² Ekɔ losango lendana la ngandji ka onyaso onto. Lɔ tanemaka lo Nkumu ya Diolelo No. 35 ndo lekɔ l’ɔtɛ a dui ɔnɛ: “Onde Anto Tshɛ Wokokana Ngandji Lushi Lɔmɔtshi?” Nkumu ya Diolelo shɔ mɛnyaka lo tshena pe nganɛ waya akambo nshi nyɛ l’andja ɔnɛ ndo nembetshiyaka ɔnɛ nɛ dia anto hawoyokana ngandji l’asawɔ mbɛnawɔ pâ la shɔkɔ nyɛ tshɛ. Yɔ mɛnyaka nto bonde kambɔ̂la ngandji ka onyaso onto, djekoleko nshi yaso nyɛ, ndo kitshimudi ya dikambo sɔ lo nshi yayaye.

³ Ndo nto, Nkumu ya Diolelo No. 35 mɛnyaka ɔnɛ ngandji ka mɛtɛ ka onyaso kekɔ l’atei wa miliyɔ y’anto wasɛna nshi nyɛ l’andja ɔnɛ. Yɔ mɛnyaka anto akɔna wôlola Lokristo laki nshi ya ntondo, ɔtɛmwɛlɔ waki l’eleko ka ntondo wakeyamaka oma lo ngandji ka onyaso onto oko akakilakanya Yeso Kristo.​—⁠Luka 10:​25-37.

⁴ Nkumu ya Diolelo No. 35 komɛ l’olembetshiyelo wa woho wayanga mbokana anto wa l’andja w’otondo ngandji onto la onyande l’ɛse k’ɛlɔmbwɛlɔ ka Diolelo diaki Nzambi diakandasha Kristo. Wanɛ wayadia losango lɔsɔ keketshamaka dia vɔ monga la biukubuku Kakɔna Katɔlɔmba Nzambi? ndo mbeya woho wa kondja wahɔ oma lo tɛdikɔ tɔsɔ toludi la ngandji tɔkɔndwami lo Dui dia Nzambi.

⁵ Ayodianganya Losango Lɔsɔ Na? Lo ngɔndɔ ka Dikumi l’Ɔtɔi la ka Dikumi l’Ahende, Ɛmɛnyi wa Jehowa wa l’andja w’otondo wayewoya asukanyi awɔ ndo ase nkumbo kawɔ losango lɔsɔ la mboka onyaso onto ngandji. Anto tshɛ wakotsha kɛnɛ kalɔmbama wambokeketshama dia dianganya Nkumu ya Diolelo No. 35 le anto.   

⁶ Oyango w’odianganyelo ɔsɔ ele dia nomialomia saki k’anto dia vɔ mbeka Bible lo biukubuku Katɔlɔmba kana lo dibuku Ewo. Ndo nto, weolo wayodja ekambi wa Jehowa l’otema ɔtɔi ayokimanyiya dia anto mbeya Jehowa, Nzambi ka ngandji ndo Ɔnande, Yeso Kristo.