Tewoya Akina Sheke Y’ɔngɛnɔngɛnɔ Wa Lo Nkumbo
1 Nkumbo ekɔ kiɔkɔ ya tshunda di’anto, ndo oma lo nkumbo mbatomba esomba wa totshitshɛ, esomba wa weke ndo wedja tshɛ. Nshi nyɛ mbamboleka osukusuku lo nkumbo. Tɔsɛngiya ta wolo tekɔ lo nanga ndo pandjola lɔsɛnɔ la nkumbo. Ande lowando lele laso le Jehowa, Otungi wa nkumbo, dia nde têtsha woho wa sho monga l’ɔngɛnɔngɛnɔ lo nkumbo! Wanɛ wayela alako ande mɛnaka dia ekakatanu kitakitaka ndo nkumbo yawɔ mongaka kâmɛ. Lo Ngɔndɔ ka Dikumi, tekɔ l’ɔngɛnɔngɛnɔ wa dianganya dibuku Sheke y’Ɔngɛnɔngɛnɔ wa lo Nkumbo. Tome tɛkɛtsha anto dia sawola dikambo dia lɔsɛnɔ la nkumbo. Tonge l’elongi ka lɔngɛnyi, mɛna akambo la sso di’ɔlɔlɔ, ndo tonge la shɛnɔdi. Ayotokoka mbuta na?
2 Wɛ mbeyaka mboka dimbola dimɔtshi oko nɛ:
◼ “Onde wɛ mɛnaka dia nkumbo efula mbokaka wolo mbikikɛ ekakatanu wa lo lɔsɛnɔ? [Tshikande akadimole.] Mɛnamaka dia anto efula wekɔ l’ekakatanu lo nkumbo yawɔ. Oko le yɛ, ayokoka kimanyiya nkumbo dia yɔ nshikimala wolo ndo monga l’ɔngɛnɔngɛnɔ efula? [Tshikande akadimole.] Lam’ele Nzambi mbele Otungi wa nkumbo, kema sunganaka sho sɛdingola alako watoshande lo dikambo sɔ? [Adia 2 Timote 3:16, 17.] Wetshelo ɔsɔ wele di’ɔlɔlɔ aso fundama lo dibuku nɛ: Sheke y’Ɔngɛnɔngɛnɔ wa lo Nkumbo.” L’ɔkɔngɔ, mbolande kɛnɛ kɛnande, le nde, ɔnɛ ekɔ okakatanu watanema lo nkumbo tshɛ, ɛnyande tshapita yatɛkɛta dikambo diakɔ, ko wɛ mbosha dibuku.
3 Lam’ayoyowenda nto, l’oyango wa tatɛ mbeka la nde Bible, wɛ mbeyaka mbuta wate:
◼ “Lakatokanyiya lo kɛnɛ kakayambutɛ lo dikambo dia lɔsɛnɔ la nkumbo, ko lambokela yangɔ mɔtshi yafɔnyami nte wɛ ayoyingɛnangɛna mɛtɛ. [Ɛnyande biukubuku Katɔlɔmba, fola lo lɛkɛ 16, ko wɛ mbadia wembola esamalo wele la diko.] Lo menda mɛtɛ, onto tshɛ l’atei a nkumbo pombaka kotsha ɔkɛndɛ ande dia ɔngɛnɔngɛnɔ monga lo nkumbo. Naka wɛ ekɔ kânga la yema ya wonya tshitshɛ, kete dimi kɛnya woho wokokiyɛ kondja wahɔ oma lo kɛnɛ kotami lanɛ.” L’ɔkɔngɔ ko wɛ tatɛ mbeka la nde wekelo 8.
4 Yoho kina ya tatɛ sawo ele mbuta dikambo dimɔtshi kânga ɔnɛ:
◼ “Kânga mbalanga onto tshɛ mboka ɔlɔ ndo ngɛnangɛna, ndjâka oko nkumbo efula hayonge ngasɔ. Oko le yɛ, kakɔna kokoki mbâkimanyiya dia vɔ monga l’ɔngɛnɔngɛnɔ wa mɛtɛ? [Tshikande akadimole.] Aya edja, Bible akɛnya weho w’ekakatanu wayonga lo nkumbo nshi nyɛ. [Adia 2 Timote 3:1-3.] Koko, Bible mɛnyaka ase nkumbo woho wa vɔ sala dia kandola ekakatanu awɔ ndo monga l’ɔngɛnɔngɛnɔ wa pondjo. Awui akɔ fundama lo dibuku nɛ: Sheke y’Ɔngɛnɔngɛnɔ wa lo Nkumbo.” L’ɔkɔngɔ diko, ɛnyande wembola w’ovuswelo l’ekomelo ka tshapita mɔtshi yasungana, ko wɛ mbadia wembola akɔ, ko mbosha dibuku.
5 Lam’ayoyowenda nto, kamba la biukubuku “Katɔlɔmba” dia tatɛ wekelo. Wɛ kokaka mbuta ɔnɛ:
◼ “Lakangɛnangɛna heyama woho wakiyɛ la saki ka sɛdingola awui wa lo Bible wendana la lɔsɛnɔ la nkumbo. Lo menda akambo weta, sho mɛnaka dia anto kondjaka etombelo w’ɔlɔlɔ lam’ayelawɔ awui w’eshika wele lo Bible. Wekɔ lo tɛnya yema lanɛ bonde kahombaso sala ngasɔ.” Adia odingɔ wa ntondo wa wekelo 1 lo biukubuku Katɔlɔmba, kâmɛ ndo Osambu 1:1-3 kana Isaya 48:17, 18. Naka kokaka, nyɔsɛdingole wekelo w’otondo. Tɛnde dia wɛ kalola dia ndjeka la nde wekelo wayela.
6 Lo Dikambo dia Ekanda Aso: Lam’eyaso ɔnɛ ekanda aso wekɔ ohomba efula ndo otondjelo awɔ nɔmbaka falanga efula, onde sho tengengaka dia mbisha anto wahomana la so periodikɛ, tobukubuku kana abuku? Ngande wokokiso shikikɛ ɔnɛ hatotshiki ekanda aso l’anya w’anto wahângɛnangɛna? Yoho mɔtshi ele mumbola onto akɔ dia nde toshikikɛ ɔnɛ nde ayadia okanda akɔ wawoshaso.
7 Ɛnyɛlɔ, lam’ashayɛ onto dibuku “Ɔngɛnɔngɛnɔ wa lo Nkumbo,” wɛ kokaka mbuta wate:
◼ “Naka wɛ mbutɛmi wate wɛ ayadia dibuku nɛ, kete dimi kotshikɛdiɔ ko wɛ mbishami yema ya oshasha ya tshitshɛ. Ondo wɛ nangaka mbeya bonde kasalaso ngasɔ. Sho salaka ngasɔ nɛ dia olimu aso kambemaka la weshasha wakimɔ anto la lolango lawɔ. Weshasha anyu tokimanyiyaka paka dia futa wɛmbɛlɔ w’ekanda. Ɔnkɔnɛ, layonga l’ɔngɛnɔngɛnɔ dia kotshikɛ dibuku nɛ diayokokimanyiya dia wɛ mbeya sheke y’ɔngɛnɔngɛnɔ wa lo nkumbo naka wɛ mbishami yema ya woshasha ya . . . [Towote oshinga.]”
8 Totshe la wolo aso tshɛ dia mbewoya akina sheke y’ɔngɛnɔngɛnɔ wa lo nkumbo: okitanyielo w’alako wofundami lo Dui dia Nzambi.—Osam. 19:7-10.