Toyele nsaki kakɛnya anto diɛsɛ oma lo Nkumu ya Diolelo No. 36
1 Onde wɛ amboshidiya la kahanya nambo ka Nkumu ya Diolelo No. 36 kakawakosha? Tɔ mimbolaka wombola ɔmɔtshi wahomba anto tshɛ sɛdingola l’etena kɛnɛ: “Ɛnɔnyi Kinunu w’Eyoyo: Kakɔna Katokongɛ lo Nshi Yayaye Na?” Lam’akayasukanaka ɔnɔnyi wa 2000, anto efula wakalongamɛka dia ɛnɔnyi kinunu w’eyoyo ɛsɔ ayowaela akambo efula wotshikitanyi. Nkumu ya Diolelo No. 36 mɛnyaka akambo amɔtshi wakalongamɛka anto ndo toholaka dia akambo weta l’andja ɔnɛ mɛnyaka dia ndoko di’ɔlɔ diakokaso nongamɛ. Ɛnɔnyi kinunu wayela wɔladi la lutui tshitshi wakongɛ anto efula ko Diolelo di’Ɛnɔnyi Kinunu diaki Yeso Kristo. Eshikikelo kele laso k’ɔnɛ Diolelo diande sɔ diekɔ dia mɛtɛ totshutshuyaka dia sho kahanya Nkumu ya Diolelo No. 36 le onto tshɛ lakokaso mbisha.
2 Etombelo w’oma lo Nkumu ya Diolelo: Okahanyelo wakete wa Nkumu ya Diolelo akonge la shɛngiya y’efula le so lo kɛnɛ kendana l’olimu aso. Lo dikambo dia Nkumu ya Diolelo No. 36, Bɛtɛlɛ ka la Canada akafunde ate: “Apandjudi ndo ambatshi mboka wakasukɛ okahanyelo wa laande ɔnɛ la wangasanu tshɛ ndo okahanyelo akɔ wakonge l’etombelo efula washa ekeketshelo.” Aha la tamu ndo nyu lawɔ nyekɔ lo mɛnya woho wa wangasanu ɔsɔ l’okahanyelo wa Nkumu ya Diolelo No. 36.
3 Okahanyelo wa Nkumu ya Diolelo wa mbala kɛnɛ wayokomɛ lo Ngɔndɔ ka Dikumi l’Ɔtɔi 17, 2000. Onde nyamboshila la kindjakindja ɛtshi ka nkɛtɛ k’etshumanelo kanyu? Naka bu, kete dikumanyi kokaka nyɔlɔmba dia nyu tetemala l’okahanyelo ɔsɔ polo ndo l’ekomelo ka Ngɔndɔ ka Dikumi l’Ɔtɔi.
4 Anto wa lo ngelo kanyu atawɔ wonya wâkahɛnyu Nkumu ya Diolelo No. 36 na? Tɔtɔi t’anto toto mbayofunda nkombo yawɔ lo tshenyi ya dikatshi yele la koma ya traktɛ dia nɔmba biukubuku Katɔlɔmba kana wekelo wa Bible. Koko, ondo efula l’atei a wanɛ wɛnya nsaki mbala ka ntondo kɛnawɔ ɔtɛ a dui watɛkɛta dikambo di’ɛnɔnyi kinunu wayoyɔsa yɛdikɔ ya mbeka Bible paka etena kayokalola Ɔmɛnyi wa Jehowa ɔmɔtshi dia ndjôwenda nto. Diɔ diakɔ diahombaso nyomotshɔ dia tenda wanɛ tshɛ wakɛnya nsaki. Lâsɔ, etena kakɔna koleki ɔlɔlɔ sala dikambo sɔ na? Waendelo w’eyoyo pombaka salema aha la tshimbatshimba.
5 Tênde bɛnyɛlɔ diɛnya etombelo wakatombe lam’akawakawola dia tenda wanɛ wakawakahɛ Nkumu ya Diolelo No. 35. Ombatshi mboka ɔmɔtshi wa lo wodja wa Irlande akatshikɛ kanga rɛstora ɔmɔtshi Nkumu ya Diolelo. Womoto ɔsɔ akangɛnangɛna losango laki lɔkɔ ndo akalɔmbɛ kadiyɛso kɛsɔ dia nyomoyowenda mbala kekina. Kadiyɛso akakawola l’ɔkɔngɔ wa nshi hiende ko wekelo wa Bible wakatatɛ. Lo wodja wa Danemark, wakatshike dikatshi ɔtɔi dia Nkumu ya Diolelo lo lokombo lakiwɔ kotana ndoko onto. Lushi lakɔ lâmɛ, womoto lakadjasɛka lo luudu lɔsɔ akatomɛ Bɛtɛlɛ tshenyi ya dikatshi yahembolawɔ l’ekomelo (coupon), ko Bɛtɛlɛ akewoya etshumanelo kaki suke la womoto ɔsɔ. La ntondo k’ekomelo ka lomingu, akadiyɛso ahende wakatshu dia tenda womoto akɔ ko wekelo wa Bible wakatatɛ ndo womoto akɔ akɔtɔ lo losanganya mbala ka ntondo lo Mbalasa ka Diolelo!
6 Kɛnɛ kakokayɛ mbuta lam’ayoyokalola: Bu wolo efula sala waendelo w’eyoyo l’ahole wakatatshike Nkumu ya Diolelo ndo ɔsɔ ekɔ etenyi kɛmɔtshi k’ɔngɛnɔngɛnɔ efula ka l’olimu aso. Lam’akalolayɛ dia tenda onto nto, wɛ la dia monga la dikatshi dimɔtshi dia Nkumu ya Diolelo No. 36, nɛ dia ɔtɛkɛtshi ayɛ mbeyaka monga ko bu la dikatshi diande. Wɛ koka pemba l’alako wayela anɛ:
7 L’ɔkɔngɔ wa wɛ mbohola onto akɔ lokombo layɛ, wɛ kokaka mbuta wate:
◼ “Lakakotshikɛ dikatshi nɛ diele l’ɔtɛ ate: ‘Ɛnɔnyi Kinunu w’Eyoyo: Kakɔna Katokongɛ lo Nshi Yayaye Na?’ Kema aki dikambo di’ekeketshelo dia mbeya ɔnɛ kem’edja Diolelo di’Ɛnɔnyi Kinunu diaki Kristo Yeso diayanga la ntatɛ mbolɛ ndo mbela Paradiso lanɛ la nkɛtɛ? [Ɛnyande esato wa Paradiso wele lo Nkumu ya Diolelo No. 36.] Ko wɛ kotsha wate, l’ɛse ka dikatshi di’ekomelo, vɔ kɔlɔmbaka dia wɛ nɔmba biukubuku Kakɔna Katɔlɔmba Nzambi?” Ɛnyande biukubuku yakɔ ndo folayɔ lo wekelo 5, adia wombola wa ntondo ndo odingɔ 1 la 2 ndo lɔmba ɔtɛkɛtshi ayɛ dia nde mbuta kɛnɛ kokinde. Adia divɛsa ɔtɔi kana ahende ndo nyɔkɛtshanya. Naka kokaka, adia wombola okina ndo odingɔ okina, oma lâsɔ ko wɛ mbokana la nde lushi la nyu ndjohomana nto dia ndjotetemala la sawo.
8 Lam’ele tayokahɛ anto biukubuku “Katɔlɔmba” kana dibuku “Ewo,” lo Ngɔndɔ ka Dikumi l’Ɔtɔi, wɛ kokaka mbuta wate:
◼ “Mbala k’ekomelo kakamaye dia ndjokenda, lakakotshikɛ dikatshi diele l’ɔtɛ ate: ‘Ɛnɔnyi Kinunu w’Eyoyo: Kakɔna Katokongɛ lo Nshi Yayaye Na?’ Lɔkɔ vɔ tɔlɔmbaka dia mbeka Bible ofele. Diakɔ diamomokawola dia ndjokɛnya kɛnɛ kakamba laso dia mbeka Bible. [Ɛnyande biukubuku Katɔlɔmba ndo ɛnyande kɛnɛ kele l’ɛse ka dikatshi di’ekomelo dia traktɛ, kana ɛnyande dibuku Ewo, ko wɛ difola lo lɛkɛ 188-189.] Kotsha wate, Ɛnɔnyi Kinunu watɛkɛtama lo Bible wayela akambo wa woho wɛnayɛ lo sango nɛ. Lâsɔ dia sho monga l’akoka wa ndjɔsɛna lo Paradiso, sho pombaka kondja ewo ka shikaa kaki Nzambi. Lam’alangɛ dimi nangaka kɛnya lo tshena pe woho wekaso Bible.”
9 Okahanyelo wa Nkumu ya Diolelo No. 36 wambototshutshuya dia ndjasha efula l’olimu aso, lo sambisha efula. Ondo dikambo sɔ diambemula nsaki k’anto efula wa l’ɛtshi kaso ka nkɛtɛ. Oma l’ekimanyielo ka Jehowa, welo wadjaso sho tshɛ dia memula nsaki k’anto wayotela ɔngɛnɔngɛnɔ efula lam’ayotɛna anto efula wɔsa yɛdikɔ ya mbôkambɛ oko wôkambɛso.—Mat. 10:11; Etsha 13:48, 49, 52.