Waa na wayoleka mendana la sawo nɛ?
1. Etena kaadiaso Tshoto y’Etangelo kana Réveillez-vous !, kakɔna kahombaso tendji la ntondo, ndo lande na?
1 Tshoto y’Etangelo ndo Réveillez-vous ! yakalɔngɔswama dia nsambisha weho w’anto tshɛ wa l’andja w’otondo. Diakɔ diele asawo wa lɔkɔ wekɔ l’awui efula wotshikitanyi. Etena kaadiaso asawo asɔ lo wekelo aso w’onto ndamɛ, sho pombaka menda weho w’anto wayoleka mendana la wɔ, ko oma laasɔ sho ntshɔ dia towasha.
2. Akambo akɔna wa lo periodikɛ yaso wakoka ngɛnyangɛnya anto wa l’ɛtshi kaso ka nkɛtɛ?
2 Onde Tshoto y’Etangelo yeke katomba tɛkɛtaka dikambo dimɔtshi dia lo Bible diakayasawola l’osekayɛ ɔmɔtshi kana onto okina? Onde ndoko sawo dimɔtshi dia lɔkɔ diendana la lɔsɛnɔ la lo nkumbo diakoka nkimanyiya ewotɔ ayɛ? Onde wɛ mbeyaka onto ɔmɔtshi lasangoya ntshɔ otsha l’ɛtshi ka nkɛtɛ kɛmɔtshi katɛkɛtawɔ lo Réveillez-vous ! akɔ? Onde periodikɛ kele la yɛ tɛkɛtaka di’amundji w’okanda, di’aseka lɛɛta kana di’elimu ɛmɔtshi wakambawɔ l’ɛtshi kanyu ka nkɛtɛ? Ɛnyɛlɔ, naka wɛ ekɔ la periodikɛ katɛkɛta dikambo di’ekakatanu wendana la lotshundu l’osombe, kete ondo tɔ mbeyaka monga ohomba efula le anto wadjasɛ lo mvudu yalamawɔ esombe. Ndo nto, anto wakamba lo atshunda amɔtshi wele l’oyango wa mbidja wɔladi mbeyaka ngɛnangɛna periodikɛ katɛkɛta di’awui wa ngala kana wa diakatanelo.
3. Sha bɛnyɛlɔ dimɔtshi diɛnya etombelo w’amɛna waya lo kahɛ anto periodikɛ yɛnaso ɔnɛ yayoleka mendana la wɔ.
3 Etombelo w’amɛna: L’ɔkɔngɔ wa nde nongola Réveillez-vous ! wa Ngɔndɔ ka dikumi 2011 waki l’ɔtɛ a dui ɔnɛ: “Faites de vos enfants des adultes responsables,” wadi l’omi amɔtshi wa lo wodja wa Afrique du Sud wakatelefɔnɛ embetsha ndo ewandji wa kalasa 25 wa l’ɛtshi kawɔ ka nkɛtɛ. Akumi ahende l’ahende l’atei awɔ waketawɔ periodikɛ kɛsɔ ndo wakakahɛ ambeki awɔ. Wadi l’omi akina wa lo wodja akɔ waamɛ wakasale woho akɔ waamɛ lo kahɛ ewandji wa kalasa wa l’ɛtshi kawɔ ka nkɛtɛ. Embetsha wa lo kalasa mɔtshi wakɔshi yɛdikɔ ya kambaka la periodikɛ kɛsɔ lomingu tshɛ dia ndakanyaka ndo mbadiɛka ambeki. Atshukanyi asɔ wakayosawolaka l’omendji w’otshimbedi awui asɔ dia nde nkeketsha tshumanelo dia l’otshimbedi ande dia vɔ nkamba la toho t’esambishelo tɔsɔ dia nsambisha ewandji wa kalasa wa lo bɛtshi diawɔ dia nkɛtɛ. Filialɛ lo wodja ɔsɔ wakalongola mikanda efula wakalɔmbaka anto dia vɔ mfudia otondjelo wa numɛlɔ ka periodikɛ kɛsɔ.
4. Lande kahombaso nkahanya periodikɛ yaso le weho w’anto tshɛ?
4 Periodikɛ yaso efula mɛnyaka lande na kasalema akambo wa kɔlɔ ndo yɔ kotolaka yambalo y’anto oya lo Bible ndo mbewoyaka Diolelo diaki Nzambi. Periodikɛ yaso mbele ehomɔ kakɔ kaamɛ la nkɛtɛ ‘kɛnya woho wakoka anto ndjokondja panda.’ (Is. 52:7) Ɔnkɔnɛ, nyɛsɔ toyikahanya le weho w’anto tshɛ. Yoho ya dimɛna ya nsala dui sɔ lo ele lo ndjambola ɔnɛ: ‘Waa na wayoleka mendana la sawo nɛ?’