Woho Wakimanɛ Ase Nkumbo dia Ndjasha Tshɛ—Lo Nsanganya ya l’Etshumanelo
1 Nkumbo y’Akristo la dia kitanyiya didjango dia sanganaka kâmɛ lo nsanganya ya l’etshumanelo. (Heb. 10:24, 25) Lo kimanɛ dimɛna, vɔ tshɛ kokaka nɔngɔsɔlaka nsanganya dimɛna, ndjiɔtɔka, ndo mbishaka kɔmatɛrɛ lɔkɔ. Akambo wa lo nkumbo tshikitanaka, koko ekɔ akambo amɔtshi wakoka omi kana wadi lele Okristo, kana ombutshi wodia ana ndamɛ ntsha dia nkumbo mongaka kâmɛ l’akambo wa lo nyuma oyadi lofulo l’ana la ngande lele lande ndo ɛnɔnyi wele lawɔ.—Tuk. 1:8.
2 Nyotshungole Etena ka Ndjalɔngɔsɔlaka: Ase nkumbo kambaka kâmɛ dia menda kana onto tshɛ amboyalɔngɔsɔla dimɛna lo kɛnɛ kendana la nsanganya ya l’etshumanelo. Efula sɛdingolaka kâmɛ sawo dia wekelo wa Tshoto y’Etangelo wêkama oseka lomingu tshɛ. Amɔtshi ndjalɔngɔsɔlaka dikambo dia wekelo wa Dibuku wa l’Etshumanelo kana mbadiaka Bible kâmɛ lomingu tshɛ lo nkumbo. Oyango wa dui sɔ ele kimɛ akambo woleki ohomba lo yimba la ntondo ka ntshɔ lo nsanganya. Ngasɔ kete onto tshɛ layokondja wahɔ efula lo kɛnɛ kayondoka ndo ayosha kɔmatɛrɛ kam’ayondokondja diaaso.—1 Tim. 4:15.
3 Yalɔngɔsɔla dia Mbisha Kɔmatɛrɛ: Ose nkumbo tshɛ la dia monga l’oyango wa mbuta elongamelo kande la ntondo k’akina lo mbisha kɔmatɛrɛ lo nsanganya. (Heb. 10:23) Onde ose nkumbo ɔmɔtshi ekɔ l’ohomba w’ekimanyielo kana ekeketshelo lo dikambo sɔ? Ekimanyielo kakɔna kahomba kondja onto lalɔngɔsɔla sawo lo Kalasa k’Olimu wa Teokrasi na? Amato wotshukami ngɛnangɛnaka dia waomɛwɔ mbakimanyiya dia vɔ ndjalɔngɔsɔla kana woho wawashawɔ kanyi mɔtshi dia vɔ mbeya sɔna wɛɛla wasungana kamba lawɔ lo sawo, ko kana dia mbeya yoho y’ɔlɔlɔ ya disala. Ambutshi hawohombe fɔnya ɔnɛ vɔ mbahomba nɔngɔsɔlɛka anawɔ woleki akɛnda asawo awɔ. Naka vɔ ntsha ngasɔ kete wayosha ana ɛnɛndɛ. Koko ambutshi kokaka kimanyiya anawɔ watotshitshɛ ndo mbahokamɛ wonya wavusolawɔ sawo diawɔ la doyi dia wolo.—Ef. 6:4.
4 Yalɔngɔsɔla dia Mbɔtɔ lo Losanganya: Kokaka mbetsha ana oma ko totshitshɛ tawɔ dia ndɔtaka dimɛna ndo ntshɔka la wonya wakashikikɛma otsha lo nsanganya. Ase nkumbo la dia kimanɛ dia shidiya elimu wa la ngelo di’aha monga l’ɔkɔngɔ.—Enda alako wele lo dibuku Ɔngɛnɔngɛnɔ wa lo Nkumbo, lɛkɛ 112, ndo lo Les jeunes s’interrogent, lɛkɛ 316-17.
5 Ndo ambutshi ndo ana kokaka kana yimba ɔlɔlɔ l’ɛtɛkɛta waki Jashua lakate ate: ‘Kele dimi la wa lo luudu lami, tayokambɛka paka Jehowa.’ Ɔnkɔnɛ, nyɔshi yɛdikɔ dia kimanɛka dia ndjashaka tshɛ lo nsanganya ya l’etshumanelo.—Jas. 24:15.