Toyale la Mposa ka Wolo ka Sambisha Lokumu l’Ɔlɔlɔ
1 “Dimi latukumbulaka nyena . . . Dimi la pusa efula dia ndjunyusambisha lukumu l’ololo ndu nyu.” Ngasɔ mbakate ɔpɔstɔlɔ Paulo l’etatelo ka mukanda wakandafundɛ anango wa la Rɔmɔ. Lande na kaki Paulo la mposa ka wolo ka ntshɔ dia tɛnana la wɔ na? Nde akate ate: “Dia dimi ndjala la elua emotshi ndu l’atei anyu, . . . Dimi haluki lukumu l’ololo sonyi, ne dia lo mbeli wulu wa [Nzambi] utsha lu panda.”—Romo 1:11-16.
2 Woho wa mposa ka wolo ka ngasɔ mbaki la Paulo lam’akandatɛkɛtaka la dikumanyi dia l’Ɛfɛsɔ. Nde akawaohola ate: ‘Oma ko lushi la ntondo lakamakamɛ nkɛtɛ y’Asiya . . . , dimi kondjakimɛ dia nyolakanya lo sɛkɛ ndo lo luudu la luudu. Lakasambisha Ase Juda ndo Ase Ngirika dimɛna dimɛna.’ (Etsha 20:18-21) Lo lɛtshi la nkɛtɛ tshɛ lakawawosha dia nde kamba olimu, Paulo akayasha la tshondo dia pandjola lokumu l’ɔlɔlɔ la panda ko kondja elowa wa Diolelo. Ɔsɔ mɛtɛ ekɔ yimba y’ɔlɔlɔ yahombaso mbokoya!
3 Toyambole yema ɔnɛ: ‘Onde ndo dimi lawɔ lekɔ la mposa ka wolo ngasɔ ka mbewoya lokumu l’ɔlɔlɔ lo dihole diodjashimi? Lo dihole dia mbɔsa olimu wa sambisha paka oko lotumu lɔmɔtshi la lohika, onde lekɔ la mposa ka wolo ka mbewoya lokumu l’ɔlɔlɔ le efula k’anto kakokami mɛna? Onde lakɛdikola awui wa lo lɔsɛnɔ lami lo dɔmbɛlɔ? Onde lambohembaka sala kɛnɛ tshɛ kakoka ntshama lo lɛtshi laso la nkɛtɛ, ɛnyɛlɔ oko sambisha lo soko la soko, l’etadimbo, l’ahole w’amundji w’ekanda, lo telefɔnɛ la lo tshakitudi?’
4 Toyale la Mposa ka Wolo ka Sambisha lo Ngɔndɔ ka Nɛi: Ngɔndɔ ka Nɛi ekɔ etena ka dimɛna ka sho nyomoleka sambisha efula. Anto akina wayokoka mbɔsa olimu w’ombatshi mboka wa tshanda nɛ dia wambokitshakitsha lofulo la wenya lâlɔmbawɔ. Ondo wɛ ayonga la diaaso dia kamba oko ombatshi mboka wa tshanda lo Ngɔndɔ ka Nɛi la ka Tanu. Wɛ mbeyaka nto mbɔsa olimu w’ombatshi mboka wa pondjo lam’ele wambokitshakitsha lofulo la wenya lalɔmbama. Ko naka wɛ ekɔ opandjudi, onde wɛ ayokoka kamba efula ngɔndɔ kɛnɛ la kayaye, ko sukɛ wanɛ wakoka kamba oko ambatshi mboka? Dui sɔ mɛtɛ diayɔngɛnyangɛnya otema wa Jehowa!
5 Apandjudi wa Diolelo pombaka tetemala mɛnya mposa ka wolo kele lawɔ, oko Paulo, dia nyangaka woho wa fudia ekambelo kawɔ l’olimu w’esambishelo. Tayonga l’ɔngɛnɔngɛnɔ wa mɛtɛ naka sho salaka kɛnɛ tshɛ kakokaso ntsha l’olimu wa sambisha. Paulo aki l’ɔngɛnɔngɛnɔ wa ngasɔ l’olimu ande w’ekila. Ekɔ ɔlɔlɔ sho ndjela ɛnyɛlɔ kande ka dimɛna efula.—Romo 11:13; 1 Kor. 4:16.