Toyange Ambatshi Mboka Wa Tshanda 100000
Onde Wɛ Kokaka Monga Ombatshi Mboka wa Tshanda lo Asase a Ndjoko? lo Mɔmbi? lo Yitshu?
1 “Toyange Esambisha 1000.” Ɔsɔ aki ɔtɛ a dui wa sawo dimɔtshi diakafundama lo Tshoto y’Etangelo ya Mɔmbi 1881. Diɔ diakalɔmbaka apami la amato tshɛ wakayakimɔ le Nzambi, “wanɛ wele Nkumadiɔndjɔ akawasha ewo k’akambo ande wa mɛtɛ,” dia vɔ kamba la wenya awɔ tshɛ dia dianganya akambo wa mɛtɛ wele lo Bible. Wanɛ waki l’akoka wa mbetsha kânga etenyi ka l’ahende ka wenya awɔ l’olimu wa Nkumadiɔndjɔ oto wakakeketshama dia vɔ ndjasha la lolango lawɔ dia koma esambisha wa lokumu l’ɔlɔlɔ lo luudu la luudu—wanɛ welamɛ ɛlɔ kɛnɛ ɔnɛ ambatshi mboka.
2 Naka tena diakatshikitana oma ko ɛnɔnyi wa 1800, dikambo ɔtɔi diahatshikitana diekɔ: ekambi wa Nzambi wakayakimɔ le nde mbeyaka ohomba wa tetemala mbetsha wenya awɔ tshɛ lo mbewoya anto lokumu l’ɔlɔlɔ. Lo mongaka ambatshi mboka wa tshanda, apandjudi wa l’etshumanelo ndjatshutshuyaka dia mbetsha wenya efula l’olimu wa Diolelo, dui sɔ mbâkimanyiya dia vɔ ndeka monga tomanamana.—Kol. 4:17; 2 Tim. 4:5.
3 Tamba akatɔngɔ olimu w’ombatshi mboka wa tshanda, anangɛso l’akadiyɛso nunu kama kondjaka ɔngɛnɔngɛnɔ oma lɔkɔ. Yoho shɔ y’olimu w’ombatshi mboka akasha anto ohetoheto wa mamba, lo yɛdikɔ yele lo Mɔmbi 1985, lofulo l’ambatshi mboka wa tshanda lakakome 100 000 l’États-Unis! Oma l’etena kɛsɔ, aya mbala shato y’etondo yonga apandjudi ndekana 100 000 ambatshi mboka wa tshanda lo ngɔndɔ ka Mɔmbi: lo 1988, lo 1989 la lo 1992. Lo Burundi, lo Congo la lo Zaïre, sho kokotsha ndo kondekanya shifidi ya l’ɔnɔnyi w’olimu wa 1995. Koko tekɔ lo takitakita la shifidi ya 100 lo Burundi, 359 lo Congo ndo 6016 lo Zaïre l’ɔnɔnyi w’olimu wa 1996. Kema tamu dia kokaka nyomodja wolo w’ɔlɔlɔ ɔsɔ nto lo ngɔndɔ ka Asase a Ndjoko, Mɔmbi ndo Yitshu. Yoho yoleki ɔlɔlɔ ya mbotsha anto saki ka monga ambatshi mboka nɔmbaka dia dikumanyi mbisha ɛnyɛlɔ, oyadi lo kamba olimu akɔ vamɛ, kana lo sambishaka efula l’etena kakɔ.
4 Tambokokeketsha dia wɛ ndjadjɛ oyango wa monga ombatshi mboka wa tshanda ngɔndɔ ɔtɔi kana efula lo Asase a Ndjoko, lo Mɔmbi la lo Yitshu. Lande na Asase a Ndjoko? Nɛ dia ɔnɔnyi ɔnɛ, Eohwelo ka nyɔi ka Kristo kayosalema Lushi la Lomingu, Asase a Ndjoko 23. Shi dui dioleki ɔlɔlɔ sho sala ele kamba wolo lo mingu yele la ntondo ka dikambo sɔ dia ndjasha l’etete l’olimu w’esambishelo ka Diolelo wakahɔhɔla Nkumɛso ndo Oshimbedi aso Yeso Kristo? Naka tayosambisha l’ohetoheto lo Asase a Ndjoko, kete tayokoka mbelɛ anto efula walanga dia vɔ ndjosangana la so dia mbohɔ nyɔi ka Kristo. Lo wedi okina, ngɔndɔ kɛnɛ kekɔ la Nshi ya Samalo tshanu la ya Mingu tshanu, dui sɔ kimanyiyaka apandjudi dia ndjasha tshɛ l’esambishelo lo wikɛndɛ. Mɛtɛ, naka sho tetemala la kamba olimu l’ohetoheto lo ngɔndɔ ka Mɔmbi la ka Yitshu, kete tayɔhɛtshahɛtsha saki kakatotsha anto ko tatɛ mbeka la wɔ Bible lawakawɔ l’ekimanyielo ka biukubuku Kakɔna Katɔlɔmba Nzambi? Sho kindjakindjaka nto etenyi kaso ka ngelo k’otondo, djekoleko lo wikɛndɛ, lo tashanaka numɛlɔ yeke ka tomba ndo yasungana ya Tshoto y’Etangelo la Réveillez-vous!
5 Akɔna Okoki Monga Ombatshi Mboka wa Tshanda? Dibuku Organisés pour bien remplir notre ministère shikikɛka lo lɛkɛ 114 ɔnɛ: “Oyadi akambo akɔna wele layɛ, naka wɛ ambobatizamaka, mbeyamaka lo lɔkɛwɔ layɛ l’ɔlɔlɔ ndo ekɔ l’akoka wa sambisha wenya 60 lo ngɔndɔ, ko wɛ nangaka kamba ngɔndɔ ɔtɔi kana efula oko ombatshi mboka wa tshanda, kete dikumanyi dia l’etshumanelo kanyu diayɔngɛnangɛna mbetawɔ dɛmandɛ diayɛ dia wɛ monga la diɛsɛ dia kamba olimu ɔsɔ.” Onde wɛ ayolanga monga la diɛsɛ sɔ lo Asase a Ndjoko? lo Mɔmbi? lo Yitshu?
6 Naka dikumanyi mɛna akambo la sso di’ɔlɔlɔ ko ndo apandjudi akina tshɛ sukɛ yɛdikɔ yakɔ l’otema ɔtɔi, kete leeta lɔsɔ la ambatshi mboka wa tshanda 100000 layokotshama. (Heb. 13:7) Ewandji tshɛ wa nkumbo wambokeketshama dia vɔ kanyiya l’atei wa wanɛ wele, lo mvudu yawɔ, wakoka mbɔtɔ l’ɔnɔngɔ w’ambatshi mboka wa tshanda lo ngɔndɔ kɛmɔtshi kayaye.—Osam. 148:12, 13; enda lo Etsha 21:8, 9.
7 Totake esadi eto ɔnɛ wɛ kema l’akoka wa kamba olimu w’ombatshi mboka wa tshanda l’ɔkɔkɔ w’olimu ayɛ wa l’emunyi wa wonya w’otondo, ekongelo kayɛ ka wenya wa kalasa, ɛkɛndɛ ayɛ wa lo nkumbo kana ɛkɛndɛ ekina wɔtɔnɛ la Bible. Le amɔtshi, ondo honga wɔdu dia vɔ kamba olimu akɔ; koko, naka vɔ monga l’ekongelo ka dimɛna ndo kondja ɔtshɔkɔ wa Jehowa kete vɔ koka. (Osam. 37:5; Tuk. 16:3) Tshika saki ka kamba olimu w’ombatshi mboka konge la shɛngiya l’akambo wele layɛ; koko totshikake akambo wele layɛ monga la shɛngiya lo saki kayɛ ka monga ombatshi mboka. (Tuk. 13:19a) Ɔnkɔnɛ, oma lo ngandji ka mamba kokawɔ Jehowa la onyawɔ onto, efula wayokoka nɔngɔsɔla ekongelo kawɔ ka wenya ka lomingu la lomingu dia vɔ fudia olimu awɔ ngɔndɔ ɔtɔi. (Luka 10:27, 28) Ɛtshɔkɔ efula wekɔ lo kongɛ wanɛ wadja weolo wa mamba l’olimu wa Diolelo.—1 Tim. 4:10.
8 Kɛnɛ Katomba oma l’Olimu w’Ombatshi Mboka wa Tshanda: Weolo wadja nunu di’ekambi wa Nzambi l’otema awɔ tshɛ lo mongaka ambatshi mboka wa tshanda ekɔ lembo la mamba la lotombo le Jehowa. Lam’ele apandjudi asɔ ndjashaka dia mbewoya lokema l’anto lokumu l’ɔlɔlɔ, vɔ sukanaka efula la Jehowa. Mɛtɛ, vɔ mbekaka woho wa ndeka ndjaɛkɛ le nde dia kondja nyuma kande ndo dia tshɔkwama.
9 Wôngelo w’ambatshi mboka wa tshanda, wa pondjo ndo wa lânde wakamba suke la so mbishaka ohetoheto wa woho okina l’atei w’etshumanelo. Lam’ele vɔ mbutaka awui wahomana la wɔ l’esambishelo, ohetoheto awɔ sambiyamaka le anto akina. Dui sɔ keketshaka akina dia vɔ nyomenda awui wetshawɔ la ntondo, kâmɛ ndo akoka awɔ wa nyomoleka ntsha lotumu loleki ohomba l’olimu aso. Kadiyɛso kɛmɔtshi kakabatizama l’ɛnɔnyi 70 kotshimbatshimba la monga ombatshi mboka wa tshanda lo yoho ya pondjo. L’ɔkɔngɔ w’ɛnɔnyi ɛmɔtshi, wakawombola bonde katetemalande ndjasha efula l’olimu, l’ɛnɔnyi waya lande ɛnɛ, lo mongaka ombatshi mboka wa tshanda ngɔndɔ tshɛ. Ko nde akakadimola ate nde mɛnaka di’oko nde aketsha wenya anyanya ɛnɔnyi 70 wa ntondo wa lɔsɛnɔ lande ndo nde halange dikambo sɔ salema nto l’ɛnɔnyi wambôtshikalɛ lo lɔsɛnɔ!
10 Opandjudi tshɛ wele ombatshi mboka wa tshanda mongaka la yewo efula l’olimu. Ɔmɛnyi ɔmɔtshi weke ɔlɔngɔlɔngɔ aketawɔ ate: ‘Lam’akimi leke dikɛnda, laki la mbekelo ka tshindɛka ambutshi ami l’elimu awɔ w’esambishelo. Lakɔsaka dikambo sɔ oko kɛnyɔ y’ɔlɔ efula. Koko, l’edjedja ka wonya, lakayɛnaka dia lakatshikitanaka l’anto akina la kalasa. Ko lakatatɛ mboka kɔlɔ sambisha angɛnyi ami akambo wa mɛtɛ. Esambishelo ka lo luudu la luudu akambishaka wɔma wa mamba la kanyi y’ɔnɛ latokotohomana l’ose kalasa ɔmɔtshi. Dimi kanaka dia wɔma w’anto mbakamɛnyaka pâ. [Tuk. 29:25] L’ɔkɔngɔ a dimi shidiya kalasa, lakalange pemba monga ombatshi mboka lo tshanda mɔtshi. Etombelo wakayala ele, lakatatɛ mɛna esambishelo woho okina otshikitanyi la woho wakamakiɔsaka ntondo. Dimi kokiɔsa nto oko olimu ɔmɔtshi wa takɛnyaka kânga oko oshikɔ wa wotsho. Lo mɛna woho watahame wanɛ weka la mi Bible lo mɛtɛ, dimi lakoke ɔlɔ wa mamba dia mɛna ɔnɛ Jehowa Nzambi akasukɛka weolo ami.’ Ɔlɔngɔlɔngɔ ɔsɔ akatetemala kamba oko ombatshi mboka wa pondjo.
11 Lo yoho yokosalemaka, naka ambatshi mboka wa tshanda wekɔ efula l’etshumanelo, kete etenyi ka ngelo kokaka kindjakindjama dimɛna dimɛna. Ɔnangɛso lakaha tenyi dia ngelo kokaka nɔmba ekimanyielo ka ambatshi mboka wa tshanda dia vɔ sambisha l’ahole wahaleke kindjakindjama. Naka vɔ mɛmba diangɔ dia ndɛ ndo kamba olimu lushi l’otondo, kete wayokoka sambisha kânga lo tenyi dia ngelo dia ka tshuku.
12 Dikumanyi Mbɔsaka Tɛdikɔ: Lo ngɔndɔ ka Asase a Ndjoko, ka Mɔmbi ndo ka Yitshu, ayonga ɔlɔlɔ nɔngɔsɔla weho efula w’esambishelo lo tena diotshikitanyi dia lo lomingu, mbidja ndo la dikɔlɔ ndo la tshotsho, woho w’apandjudi efula sambisha. Lâdiko dia esambishelo kôkosalemaka ka lo luudu la luudu, kawɔlɔngɔsɔlɛ tena dia sambishaka l’ɔsɛsɛ, lo tenyi dia ngelo diandawɔ ekanda ndo mɛnana la wanɛ waki komonga lawɔ. Lo mbɔsaka tɛdikɔ ta ngasɔ, dikumanyi diayokimanyiya ambatshi mboka dia vɔ kamba l’etshumanelo l’etena koleki sungana le wɔ. Pombaka mbewoya etshumanelo tɛdikɔ tambɔsama di’esambishelo. Nsanganya y’esambishelo pombaka nɔngɔsɔma dimɛna. Ndo nto, pombaka monga la tenyi dia ngelo efula, ndo mbidja yimba dia tayangi periodikɛ efula l’ekanda ekina la ntondo.
13 Sala Ekongelo Kayɛ Wɛmɛ k’Olimu: Ɔnangɛso ɔmɔtshi lakakandakandaka ntondo dia monga ombatshi mboka wa tshanda akate ate: “Ekɔ mɛtɛ wɔdu wa mamba wakimi kokanaka. Ohomba ele monga l’ekongelo ka dimɛna.” Lo lɛkɛ la komelo la dikatshi di’okotsha nɛ, onde wɛ ambɛna ɛnyɛlɔ kɛmɔtshi k’ekongelo ka wenya k’ombatshi mboka wa tshanda kokoki sungana le yɛ? Dia wɛ kotsha, ohomba ele sambishaka wenya 15 lomingu tshɛ.
14 Amato wa lo luudu la anto wakamba l’olui la dikɔlɔ kokaka monga ambatshi mboka wa tshanda naka vɔ sambishaka la pindju. Ɛlɔngɔlɔngɔ watshɔ la kalasa ndo apandjudi wakamba l’otsho kokaka vɔ lawɔ sambishaka la dikɔlɔ. Amɔtshi, wanɛ wakamba wonya w’otondo, wakɛnyi dia vɔ kokaka mbɔsaka dikimɔ lushi l’otondo lo lomingu, kana mbetshaka wikɛndɛ w’etondo tshɛ l’esambishelo, lo sambishaka efula la dikɔlɔ. L’atei a wanɛ wakoka sambisha paka lo wikɛndɛ, efula sɔnaka ngɔndɔ yele la wikɛndɛ etanu kokele. Ɔnɔnyi ɔnɛ ngɔndɔ ka Asase a Ndjoko ayonga ngasɔ, ndo ka Loseketanya la ka Tshaka Fudu. L’ekimanyielo ka ekongelo keke hwe kele lo lɛkɛ 6, kana yimba dimɛna ndo dja lo dɔmbɛlɔ dia wɛ sɔna ekongelo kayosungana dimɛna lo ndjela akambo wele layɛ wɛmɛ.
15 Ɔlɔlɔ ɔmɔtshi w’olimu w’ombatshi mboka wa tshanda ele woho wakokawɔ sɛkɔlama. Wɛ kokaka sɔna ngɔndɔ kayoyonga ombatshi mboka, ndo wɛ kokaka monga mbala efula oko alangayɛ. Ondo wɛ nangaka monga ombatshi mboka wa tshanda pondjo, koko wɛ hadja. Bonde kahayonge ngɔndɔ tshɛ keyɛ la diaaso? Koko, amɔtshi kokaka monga ambatshi mboka wa tshanda ngɔndɔ la ngɔndɔ etena k’otale.
16 Nna dia Fumbɔ ko Monga Ombatshi Mboka wa Tena Tshɛ: Efula ka wanɛ wele la yimba ya monga ombatshi mboka kombolaka monga ambatshi mboka wa pondjo koko vɔ ndjambolaka kana akambo wele lawɔ mbashaka diaaso ndo kana wayonga l’etena efula ndo etetemalo dia mbidja olimu akɔ. Aha la tamu, efula ka wanɛ wele ɛlɔ kɛnɛ ambatshi mboka wa pondjo wakonge ntondo ambatshi mboka wa tshanda dia menda kana wayokoka kamba olimu wa lo tena tshɛ. Naka onto kotsha wonya ɔtɔi oto lo lushi l’ekongelo kande k’ombatshi mboka wa tshanda, kana kotsha lushi l’otondo lo lomingu, kete nde ayokoka monga ombatshi mboka wa pondjo. Dia menda kana wɛ kokaka sala ɔsɔku, lande na kahayahembe sambisha wenya 90 lo ngɔndɔ kânga ɔtɔi keyɛ ombatshi mboka wa tshanda na? Lo diaaso diakɔ diamɛ, wɛ ayonga la waendelo w’eyoyo ndo ambeki wa Bible, dui diayotshikitanyaka olimu ayɛ w’ombatshi mboka weho weho ndo monga lo wɛdimo.
17 Kadiyɛso kɛmɔtshi akangɛnangɛna monga ombatshi mboka wa tshanda ngɔndɔ la ngɔndɔ l’edja k’ɛnɔnyi esamalo. Oyango ande aki wa monga ombatshi mboka wa pondjo. Ɔnkɔnɛ, nde akahembe elimu ɛnɛi wotshikitanyi ɔnɛ kana akondjaka diaaso dimɔtshi diayowokimanyiya dia nde kotsha oyango w’ambatshi mboka wa pondjo, wa wenya 90. Ngɔndɔ tshɛ, nde akasalaka ekongelo ɔtɔi kana pende woho wa nde mbɛdika kana kokaka. Koko, lam’akandakanaka yimba lɔkɔ, nde akataka ate nde bu l’akoka wa kamba olimu wa tena tshɛ. Koko, nde akatetemala nɔmba ɛlɔmbwɛlɔ ka Jehowa. Ɔnkɔnɛ, lushi lɔmɔtshi, lam’akandalɔngɔsɔlaka losanganya lande l’olimu, nde akale l’Olimu Aso wa Diolelo wa Yâta Afusa 1992 sawo dimɔtshi diakataka ɔnɛ: “Lo dihole dia ndeka mbidja yimba lo dikambo di’oyango wa wenya, lande na kahatadje yimba lo dikoka di’efula diatosha olimu ɔsɔ dia kamba lo dinela na?” (Joa. 4:35, 36) Nde ekɔ lo kɔndɔla ate: “Dimi lakadia etelo kɛsɔ mbala tshanu kana shamalo ndo lakayashikikɛ mɛtɛ dia aki okadimwelo w’oma le Jehowa. Ɔnkɔnɛ dimi lakɔshi yɛdikɔ dia monga ombatshi mboka wa pondjo.” Kânga mbaki ekongelo ka wenya w’olimu ande wa lo tshanda kɔmbɔtɔnɛka dimɛna, nde akalodja dɛmandɛ di’ombatshi mboka wa pondjo. L’ɔkɔngɔ wa lomingu ɔtɔi, ekongelo kande ka wenya kakatshikitana ndo wenya wakawawosha akasungana mɛtɛ le nde. Nde akayodihiya ate: “Shi lonya la Jehowa lɔsɔ?” Ndo akakotsha ate: “Naka wɛ ambɔlɔmba Jehowa ɛlɔmbwɛlɔ kande ko nde ambokoshatɔ, tokitonake: etawɔtɔ.” Naka mɛtɛ wɛ ekɔ la saki ka monga ombatshi mboka wa pondjo, l’ɔkɔngɔ a wɛ monga ombatshi mboka wa tshanda ngɔndɔ shato lo Asase a Ndjoko, Mɔmbi la Yitshu ondo wɛ ayɛna dia ndo wɛ lawɔ kokaka kamba olimu wa tena tshɛ.
18 Hatodje tamu dia Jehowa ayɔtshɔkɔla etete k’ekambi ande ndo ɔnɛ nde ayosukɛ weolo awɔ wa mbewoya lokumu l’ɔlɔlɔ la panda l’etena kɛnɛ k’olimu wa lânde wayomɛ oma lo Asase a Ndjoko polo lo Yitshu. (Is. 52:7; Romo 10:15) Onde wɛ mbetawɔka leeta l’ambatshi mboka 100 000 lo kamba olimu ɔsɔ lo Asase a Ndjoko? lo Mɔmbi? lo Yitshu?
[Caption on page 3]
[Box on page 3]
Kɛnɛ Kahombayɛ Sala dia Monga Ombatshi Mboka wa Tshanda
■ Ɛnaka akambo la sso di’ɔlɔlɔ
■ Lɔmba Jehowa dia nde tshɔkɔla weolo ayɛ
■ Sɛngɔla opandjudi okina dia nyu monga ambatshi mboka nyu ahende
■ Sala ekongelo k’olimu ka dimɛna
■ Lɔmba periodikɛ efula
■ Sukɛ tɛdikɔ tɔsa etshumanelo di’esambishelo
■ Yangaka waaso wa sambisha lo tshakitudi
[Caption on page 6]
[Programmes on page 6]
Ekongelo Ka Wenya Dia Monga Ombatshi Mboka Wa Tshanda
Diɛnyɛlɔ dia Sambisha Wenya 15 lo Lomingu
Pindju—Oma lo Lushi l’Ɔtɔi Polo la Samalo
Lushi la Lomingu mbeyaka mbɔtɔ lo dihole dia lushi tshɛ
[Caption on page 6]
[Caption on page 6]
Lushi Etena Lofulo la Wenya
Lushi l’Ɔtɔi Pindju 2 h 30
Lushi la Hende Pindju 2 h 30
Lushi la Sato Pindju 2 h 30
Lushi la Nɛi Pindju 2 h 30
Lushi la Tanu Pindju 2 h 30
Lushi la Samalo Pindju 2 h 30
Wenya Tshɛtshɛ: 15
Nshi Hiende y’Etondo
Nshi hiende yalangayɛ l’atei a lomingu
Lushi Etena Lofulo la Wenya
Lushi la Sato Lushi l’Otondo 7 h 30
Lushi la Samalo Lushi l’Otondo 7 h 30
Wenya Tshɛtshɛ: 15
Akɔlɔ Ahende la Wikɛndɛ
Akɔlɔ ahende walangayɛ l’atei a lomingu
Lushi Etena Lofulo la Wenya
Lushi l’Ɔtɔi Dikɔlɔ 1 h 30
Lushi la Sato Dikɔlɔ 1 h 30
Lushi la Samalo Lushi l’Otondo 8
Lushi la Lomingu Tshenyi ya Lushi 4
Wenya Tshɛtshɛ: 15
L’Ɔkɔngɔ a Midi l’Atei a Lomingu la Lushi la Samalo
Lushi la Lomingu kokaka mbɔtɔ lo dihole dia lushi tshɛ
Lushi Etena Lofulo la Wenya
Lushi l’Ɔtɔi L’Ɔkɔngɔ a Midi 2
Lushi la Hende L’Ɔkɔngɔ a Midi 2
Lushi la Sato L’Ɔkɔngɔ a Midi 2
Lushi la Nɛi L’Ɔkɔngɔ a Midi 2
Lushi la Tanu L’Ɔkɔngɔ a Midi 2
Lushi la Samalo Lushi l’Otondo 5
Wenya Tshɛtshɛ: 15
Ekongelo Kami Dimɛ k’Esambishelo
Nshikikɛ lofulo la wenya wayoyosalaka l’etena l’etena
Lushi Etena Lofulo la Wenya
Lushi l’Ɔtɔi
Lushi la Hende
Lushi la Sato
Lushi la Nɛi
Lushi la Tanu
Lushi la Samalo
Lushi la Lomingu
Wenya Tshɛtshɛ: 15