Toleke Sambisha nɛ dia Ekomelo Aya Suke
1 Eleko ka dinela ekɔ etena k’ɔngɛnɔngɛnɔ. Tɔ kekɔ nto ndo etena k’olimu efula. Etena ka tshumanya mbo ya dinela kekɔ l’ekomelo. Ekambi hawokoke mbidja sawosawo kânga yema l’olimu awɔ.
2 Lam’akandatɛkɛtaka lo wɛɛla, Yeso akɛdika ‘ekomelo ka dikongɛ dimɔtshi di’akambo’ la etena ka dinela. (Mat. 13:39) Tekɔ lo sɛna lo nshi y’ekomelo ka dikongɛ di’akambo nɛ. Ɔnkɔnɛ, etena ka sambisha lo ‘nkɛtɛ k’otondo’ kambotshikala yema tshitshɛ. (Mat. 24:14) Lam’ele ekomelo kamboleka sukana, sho pombaka nyomoleka kamba olimu wa Nzambi. Lande na na? Yeso akate ate: “Diango dia dinela dieko efula, keli ekambi mbeli tshitshe.”—Mat. 9:37, 38; Romo 12:11.
3 Ɔnɛ Bu Etena ka Kɔmɔla Demba: Lam’akamɛ Yeso olimu ande wa woke wa sambisha, akôtshikalɛ paka ɛnɔnyi esato l’etenyi dia nde shidiya olimu wakawawosha. Nde akasambisha l’etete, ata ate: “Dieli la mi dia nsambisha lukumu l’ololo la diulelu dia [Nzambi] . . . , ne dia dimi lakatumama dia dikambu diako.”—Luka 4:43.
4 Yeso akadje etete ka woho ɔsɔ l’etema w’ambeki ande. (Mako 13:32-37) Diɔ diakɔ diele ‘lushi tshɛ, lo tɛmpɛlɔ ndo lo luudu la luudu, vɔ wakatetemalaka ndakanya ndo sambisha lokumu l’ɔlɔlɔ lendana la Kristo, Yeso.’ (Etsha 5:42) Vɔ kombidjaka elimu wele bu ohomba efula lo dihole dia ntondo lo nsɛnɔ yawɔ. Kânga mbakiwɔ komonga efula, vɔ wakasambisha lokumu l’ɔlɔlɔ ‘l’etongelo tshɛ ka l’ɛse olongo.’—Kol. 1:23.
5 Sho tekɔ l’ɔkɔkɔ woleki woke dia sho monga l’etete ka ngasɔ nshi nyɛ lam’ele “ekumelu k’akambu tshe kaya suki.” (1 Pet. 4:7) Jehowa akashikikɛ lushi la wonya wahomba dikongɛ di’akambo nɛ komɛ. (Mat. 24:36) Olimu w’esambishelo wayoshila l’etena kɛnɛ kambotshikala. Diɔ diakɔ diatetemalaso ndjâketembola lo yɛdikɔ yoleki dia mbewoya anto efula lokumu l’ɔlɔlɔ.
6 Naka sho fudia ekambelo kaso l’olimu wa sambisha l’etena kɛnɛ kambosukana ekomelo, kete tayonga l’ɔlɔ wa mbutɛ Jehowa, oko akawotɛ Yeso, ɔnɛ: ‘Tamboshidiya olimu wakayatosha.’—Joa. 17:4.