Tosambishake Mɛtɛ Lushi La Lushi Oko Yeso
1 Lam’akaye Yeso lanɛ la nkɛtɛ, nde aki l’olimu wa lânde wa kamba. Vɔ waki wɔdu efula: “mvuta akambu wa mete.” (Joa. 18:37) Nde akasambisha mɛtɛ k’endana la waonga w’ɔlɔlɔ efula ndo asangwelo wa She. Le nde olimu ɔsɔ aki oko mma; lɔsɛnɔ lande l’otondo laki paka lo lotumu lande. (Joa. 4:34) Luka akakɔndɔla ɔnɛ Yeso “aketshaka anto lushi la lushi lo tɛmpɛlɔ.” (Luka 19:47, NW) Yeso akakambe olimu l’etena tshɛ kaki lande. (Joa. 9:4) Yema la ntondo ka nyɔi kande, nde akakoke mbutɛ She ate: “Dimi lakakutumbula la kete, lakashidiya ulimu wakayambisha wa ntsha.”—Joa. 17:4.
2 Woho akɔ wâmɛ, naka otema aso ambolola la lowando lo kɛnɛ tshɛ kakasale Jehowa, kete tayosokoyama dia mbuta akambo ande lushi la lushi. Lâsɔ kete tayonga oko ambeki wa Yeso wakate la dihonga vate: “Hatokoke ntshika dia mbuta akambo wakatɛnyi ndo wakatoke.” (Etsha 4:20, NW) Vɔ wakatetemala la tɛkɛta akambo wa Jehowa, nɛ dia ɔkɔndɔ akɔ wekɔ lo shikikɛ ɔnɛ ‘La lushi la lushi . . . vɔ wakatetemala aha la mpekɔ.’ (Etsha 5:42) Sho pombaka ndjambola ɔnɛ: ‘Onde dimi mbokoyaka Yeso, Ombetsha ami?’
3 Tosambisha Aha Tshimbatshimba: Yeso akate ɔnɛ lam’ayosambishama losango la Diolelo lo nkɛtɛ k’otondo, “l’okongo diku, ekumelu kayuya.” (Mat. 24:14) Dikambo sɔ pombaka totshutshuya dia sho mbeya ɔnɛ olimu aso wekɔ ohomba ndo pombaka salema esadi esadi. Lam’eyaso ɔnɛ lɔsɛnɔ la miliyɔ y’anto lekɔ lo wâle, sho mbetawɔka ɔnɛ ndoko ɛngɔ koleki sambisha ohomba. Lam’ele dikongɛ di’akambo nɛ diekɔ lo tasukana otsha l’ekomelo kadiɔ, etena ambotshikala yema tshitshɛ dia shidiya olimu ɔsɔ.
4 Alapɔlɔ mɛnyaka ɔnɛ Jehowa ekɔ lo kɛndjakɛndja olimu w’otshumanyelo w’anto wele oko ɛkɔkɔ. (Is. 60:22) Lo bɛtshi dia nkɛtɛ efula, anto wekɔ lo pungumɔ oya lo mɛtɛ, wata vate: “Shu tayutsho kame la nyu, ne dia shu takuki lukumu ati: [Nzambi, NW] eko kame la nyu.” (Zek. 8:23) Ɛtɛkɛta ɛnɛ wa Yeso wamboleka kotshama nshi nyɛ: “Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.” (Mat. 9:37, 38) Kema dikambo sɔ tokeketshaka dia sho ndjâla l’ohetoheto, oko ambeki wa Yeso “waki lushi la lushi lo tɛmpɛlɔ, watombola Nzambi”?—Luka 24:53, NW.
5 Tewoyake Anto Mɛtɛ Lushi la Lushi: Sho pombaka kanaka yimba lushi la lushi lo yoho yakokaso mbewoya anto akina mɛtɛ. Waaso hawohandɔ. Onde hatokoke mbɔsa taahe tɔmɔtshi dia sawola l’ɔngɛnyi kana l’onto ɔmɔtshi leyaso lo telefɔnɛ, ɔnɛ lɛnaso ɔnɛ nde kokaka mbetawɔ? Kana, lande na ahatafundɛ onto lahatahomwe lokolo la mbotana la ngelo kande? Onde tambokanyiyaka lushi lɔmɔtshi dia tshikɛ kɔmɛlɛsa kɛmɔtshi kiatshikatshi lɛnɛ asombaso diangɔ? Aha la tamu, sho kokaka kana yimba lo waaso w’efula wakondjaso lushi la lushi dia mbewoya anto akina elongamelo kaso. Naka sho mbidja weolo ndo ndjâla la yema y’ohetoheto, kete Jehowa ayotokimanyiya.—1 Tes. 2:2.
6 Ɔnkɔnɛ, la ntondo ka sho tatɛ elimu aso wa lushi la lushi, toyambole ɔnɛ: ‘Onde layɔsa yɛdikɔ ya mbewoya elongamelo kami naka diaaso kondjama ɛlɔ?’ Tokoya dionga dia Yeso, ɔnɛ lakalembetshiya bonde kakandatomama la nkɛtɛ, ate: “Dieli la mi dia nsambisha lukumu l’ololo la diulelu dia [Nzambi, NW].” (Luka 4:43, sho mbɛnganyisha alɛta ango.) Naka sho nangaka monga oko Ombetsha aso, kete tayosala woho akɔ wamɛ.—Luka 6:40.