“Akɛndji Wa Wɔladi A Nzambi”—Losanganya La Distrikɛ 1996
1 Aha la tamu, losanganya la distrikɛ l’ɔnɔnyi ɔnɛ layotokimanyiya dia nama wɔladi a Nzambi ndo layɛnya ɔkɛndɛ aso lo kɛnɛ k’endana la kimanyiya akina dia vɔ kondja wɔladi wa ngasɔ. Oko akadiewoya Olimu Aso wa Diolelo wa Yâta Afusa 1996, losanganya lakɔ layonga l’ɔtɛ a dui w’ɔnɛ “Akɛndji wa Wɔladi a Nzambi.” Onde wɛ amboyalɔngɔsɔla di’aha pandja ndoko ema?
2 Losanganya la Nshi Shato: Tamboyashikikɛ dia nyayɔngɛnangɛna assemblée w’ɔnɔnyi ɔnɛ efula ndo nyayokalola la wakanyu l’ohetoheto wa mamba. (2 Ek. 7:10) Ɔnɔnyi ɔnɛ, assemblée ayoviya nto nshi shato. Onde wɛ akashile la nɔmba dikimɔ woho wa ndjâla lawɔ nshi yakɔ shato? Naka wɛ ekɔ l’ana wakɔtɔ kalasa, onde wɛ akewoya embetsha awɔ la dilɛmiɛlɔ tshɛ ɔnɛ vɔ hawotonga lushi la Tanu l’ɔkɔkɔ wa dikambo dimɔtshi di’ohomba efula di’endana la wetshelo awɔ w’awui w’ɔtɛmwɛlɔ?
3 Olimu Aso wa Diolelo wa Yâta Afusa 1996 mbishaka nshi ndo ahole wayosalema assemblées tshɛ lo etenyi kaso ka nkɛtɛ. Sekeletɛrɛ ka l’etshumanelo kanyu amboshilaka nyewoya lɛnɛ ayonyotsho.
4 Assemblée ayomɛka lushi tshɛ l’eshidi 9 la taahe 30, ndo layoshila tsha l’eshidi 4 wa dikɔlɔ lushi la Lomingu. Nkuke yayodihɔmaka l’eshidi 8. Paka wanɛ wele l’olimu ɔmɔtshi w’oshika wa kamba mbayonga la dikimɔ dia mbɔtɔ k’ɔmɔ, koko hawotolama ahole la ntondo ka vɔ diholɛ anto tshɛ nkuke. Onde tayonga l’otema w’ɔlɔlɔ otsha le anangɛso waya esombe la wanɛ wele la dikɔmɔ lo tshika esongo hwe l’ahole wasungana ndo w’amɛna efula? Tôhɛke dia “Ngandji . . . hayange wahɔ ande ndamɛ.”—1 Kɔr. 13:4, 5, NW; Fil. 2:4.
5 Onde Tayosamuyama? L’ɔkɔngɔ wa shila Tukedi 27:17, “Luwulu latudjaka luwulu diesa,” Tshoto y’Etangelo ya Loseketanya 15, 1993 (lo Falase), lɛkɛ 8, ɔtɛ a dui wahɔnyi “Woho ‘wasamuyana’ Akristo l’asawɔ,” odingɔ 1 akate ɔnɛ: “Sho tekɔ oko dihomɔ diahomba samuyama tena tshɛ. Lam’ele ngandji kokaso Jehowa ndo tɛdikɔ tɔsaso lo ndjela mbetawɔ kaso nɔmbaka dia sho tshikitana la wa l’andja ɔnɛ, sho pombaka ndjatshikitanyaka nshi tshɛ l’anto efula.” Ngande ayotoyela dako sɔ na?
6 Sho tshikitana la wa l’andja ndo sho pombaka tshikala ngasɔ. Sho pombaka tetemala la mbidja weolo naka sho nangaka monga l’ohetoheto l’etsha w’ɛlɔlɔ. (Tito 2:14) Diɔ diakɔ diakate sawo dia lo Tshoto y’Etangelo yakatatshi ɔnɛ: “Etena keso kâmɛ l’anto walanga Jehowa, sho samuyanaka l’asaso, sho tshutshuyanaka lo ngandji ndo l’etsha w’ɛlɔlɔ.” Losanganya la distrikɛ ekɔ yɛdikɔ mɔtshi y’ɔsa Jehowa dia tokimanyiya dia samuya lonyuma laso. Aha sho pandja etenyi kɛmɔtshi ka assemblée.
7 Tonge Totshundju Lam’alongaso: Nonga ekɔ dionga diahombaso pamia. Vɔ mbutaka ɔnɛ onto lele bu la yimba efula kimɛka paka oko etenyi ka l’ahende ka kɛnɛ kakandôki, oyadi nde kolongaka la yambalo ya woho akɔna tshɛ. Ɛlɔ, tambɔtɛtɛ lo dikambo dia mbekola yimba; mbeyaka ndjâla ko hatokoke mbidja yimba edja efula. Onde hatokoke nɔngɔsɔla dikoka diaso dia mbidjaka yimba dimɛna, djekoleko etena kodjashiso l’atei w’anto efula dia nonga onto ɔmɔtshi latɛkɛta? Naka, etena kakalolayɛ la ngelo, wambokombola dia wɛ kɔndɔla lo tshena pe awui wakatama lushi la lushi lo assemblée, onde wɛ ayokoka mbuta? Ngande wokokiso sho tshɛ nɔngɔsɔla dikoka diaso dia nonga, woho wa mbidja yambalo l’etenyi tshɛ ka lo assemblée?
8 Ekɔ ohomba efula dia mbidja yambalo tshɛ, nɛ dia naka aha ɔsɔku kete hatotokoka kamba la oshasha w’oma le Nzambi wetawɔ yimba. Ɛnyɛlɔ, naka sho mbidjaka yimba efula lo dako dimɔtshi, kete tayoleka mbohɔ atshina w’awui wa lo dako diakɔ kana w’etenyi kakɔ k’ekongelo. Koko, dikambo sɔ ndeka nemanɛ la yambalo ya lânde yadjaso l’awui weso la diɛsɛ dia mboka lo nsanganya ya distrikɛ. Saki ka lânde ndo yambalo yadjaso l’etenyi tshɛ ka assemblée nemanɛka la woho wele lonyuma laso ndo elongamelo aso wa lo nshi yayaye. Lo assemblées, vɔ tetshaka mboka ya Jehowa, ndo sho kondjaka wetshelo lo woho wa kamba olimu washa onto lɔsɛnɔ. (1 Tim. 4:16) Ohokanyiya di’oko wɛ ekɔ masuwa lâdiko dia ndjale kambɔmbɔ la ngembe. Alaka wa Jehowa wekɔ oko lôngo la wolo l’elongamelo. Naka onto hahokɛ lotui dimɛna lo nsanganya y’Akristo ndo tshikaka yimba yande mbekêkɔ, ondo nde ayohandja alako kana wetshelo ɔmɔtshi wele la tokanyi t’eshika totokoka mboshimbela lo wombwelo wa lo nyuma.—Heb. 2:1; 6:19.
9 L’ahole efula l’andja ɔnɛ, anangɛso salaka weolo tshɛ wa l’emunyi dia mbɔtɔ lo assemblées. Asolo kɛtaka djekoleko lo mɛna woho wayelawɔ assemblées la yambalo tshɛ. Koko, l’ahole akina, anto amɔtshi fukutanyaka ampokami la wêteto wonya washawɔ alako. Akina komaka l’ɔkɔngɔ. Lo assemblées ɛmɔtshi, aki wolo mboka kɛnɛ katama lo taahe ta ntondo ta assemblée nɛ dia anto efula waketetaka l’ɛsɛsɛ ndo l’otshimba wa lɔyɛnga. Aha paka anangɛso wakamba la lolango ato, la wa mama yakokɛ anawɔ w’akɛnda mbaketetaka. Mbala efula, ofukutanu tombaka oma le anto wadja paka londjo loto. Ɔnɔnyi ɔnɛ, olimu w’olongwelo ayodja yimba efula lo dikambo sɔ, ndo tambolongamɛ dia onto tshɛ ayodjasɛ etena kayɔlɔmba ɔnɔmbɔdi ampokami dia vɔ mbidjasɛ. Tayɔngɛnangɛna ekimanyielo kanyu heyama lo dikambo sɔ.
10 Naa alako w’eshika wayotokimanyiya dia sho ndeka mpokɛ lotui lo assemblée ndo kimɛ tokanyi efula tayɔmbwama? Kɛnɛ kakatate l’ɛnɔnyi wetshi keke ohomba: (a) Yasha l’ɔkɔkɔ wa ntondo wakayaye l’osomba wasalema assemblée. Aha dia ndjosembola ekolo, koko dia ndjolonga ndo ndjêka. (Euh. 31:12) Yatshutshuya dia mumuyaka efula otsho tshɛ. Naka wɛ ambɔlɛmba efula ya lo assemblée, kete wɛ hatokoka mbidja yimba dimɛna. (b) Koye kɔ̂mɔ dia kondja etena ka tokitsha mutuka ayɛ kana dikalo lo dihole diadiɔ ko ndjodjasɛ la ntondo ka assemblée tatɛ. Naka assemblée waya ka tatɛ ko wɛ ndjolawɔ lolawɔ dia todjasɛ, kete wɛ mbeyaka pandja ɛtɛkɛta w’etatelo. (c) Funda atshina w’akambo lo tshena pe. Naka wɛ funda awui efula, kete wɛ hatokoka mpokɛ lotui dimɛna. Lam’afundayɛ, yashikikɛ dia wɛ hahandja tokanyi tokina nɛ dia wɛ ekɔ lo ndjasha tshɛ lo funda. (d) Naka wambota ɔtɛ a dui w’etenyi kɛmɔtshi ka assemblée ko wɛ mangemɛ dia kilonga la saki tshɛ. Yambola wate: ‘Okokimi mbeka oma lo etenyi kɛnɛ dia fudia lowando lami ndo ngandji kami le Jehowa? Ngande wokoki kimanyiyami alako asɔ dia nyomoleka mɛnya lonto l’oyoyo? Ngande wayokimanyiya dikambo sɔ dia dimi ndjalowanya l’olimu?’
11 Lɔkɛwɔ Lalowanya Olimu Aso: Paulo akakeketsha Tito dia nde monga “[ɛnyɛlɔ ka, NW] etsha w’ololo.” Lo mɛnyaka kɔlamelo lo wetshelo ande, Tito otokimanyiya akina dia vɔ ‘ndowanya wetshelo w’Oshimbedi aso, Nzambi, lo akambo tshɛ.’ (Tito 2:7, 10) Ɔnɔnyi tshɛ, sho nongolaka alako wa ngandji watoholawɔ bonde kele ekɔ ohomba efula monga la lɔkɛwɔ lɔtɔnɛ la lolango la Nzambi lam’eso lo mboka k’otsha lo assemblée, lo dihole diohangiso, ndo lo dihole dia assemblée.
12 Kapita ka l’ɔtɛlɛ ɔmɔtshi akate ate: “Tongaka ɔlɔ nshi tshɛ kondja Ɛmɛnyi nɛ dia vɔ kongaka, hawotosha olimu efula ndo namaka anawɔ wonya tshɛ.” Onongodi wa l’ɔtɛlɛ ɔmɔtshi akate ɔnɛ olimu ande mongaka “wɔdu efula etena kafundja Ɛmɛnyi nkombo yawɔ lam’ayawɔ kana lam’atombawɔ oma l’ɔtɛlɛ nɛ dia, kânga wɛ mbatɛ dia vɔ mbɔtɔ l’ɔnɔngɔ, vɔ mongaka la loshilambo nshi tshɛ, kongaka ndo mbokaka akambo esadi.” La Nouvelle-Angleterre, lo Etats-Unis, omoto ɔmɔtshi akâmbe efula dia lɔkɛwɔ l’Ɛmɛnyi w’ɛlɔngɔlɔngɔ wakadjasɛka la nde l’ɔtɛlɛ ɔtɔi; ko nde akalɔmbɛ dia kondja ekanda watɛkɛta dia ɔlɔngɔswamelo wakiso.
13 Koko, sho kokaka ndjalowanya lo akambo amɔtshi. Sho nangaka nyewoya tɔkɔmɔkɔmɔ tɔmɔtshi takawafundɛ la Société. Omendji ɔmɔtshi w’eteta akatotɛ ɔnɛ ana w’Ɛmɛnyi wa Jehowa pombaka namema efula. Vɔ ndawɔlawɔka lo tɔsɛsɛ sɛsɛ, mbidjaka londjo efula. Sho pombaka mbokiya anaso ɔnɛ lɔkɛwɔ laso l’Akristo kema la lo wenya ɛmɔtshi eto. Lɔ halohembetɛ lo dihole dia assemblée. Tekɔ Akristo wonya tshɛ. Lɔkɛwɔ laso la ngelo ndo lo shinga pombaka monga ɔlɔlɔ oko etena kodjashiso l’anangɛso wonya washama alako lo assemblée, talongola wetshelo wa Jehowa.—Is. 54:13; 1 Pet. 2:12.
14 Kânga mbaya bu olimu wa mbo ya ndɛ lo assemblées, falanga yekɔ lo ntshɔ efula lo futɛ ahole wa sala assemblées, nɔngɔsɔla ahole wa memadia mituka ndo nyanga diangɔ kambe. Eshasha aso wa la lolango kimanyiyaka dia kaloya falanga shɔ. Kadiyɛso kɛmɔtshi kele l’ana waya topalanga akaye l’akuta yema tshitshɛ lo assemblée. Koko, nde ndamɛ ndo anande wakasukɛ assemblée kângo la yema ya oshasha tshitshɛ. Yɛdikɔ y’ɔsa onto l’onto dia sala lo dikambo sɔ mendanaka l’onto ndamɛ, koko sho mbeyaka shate nyekɔ lo mboka waohwelo asɔ.—Etsha 20:35; 2 Kor. 9:7.
15 Sho Mbeyamaka lo Woho Walɔtaso: Woho walɔtaso mɛnyaka eso ndo tokanyi tele la so le anto akina. Ɛlɔngɔlɔngɔ ndo epalanga efula mongaka kâmɛ l’efula k’anto wɔlɔtshi ahɔndɔ wa l’andja ɔnɛ ndo w’ɔlɔtalɔta la kalasa kana l’olimu. Ɔnɔnyi l’ɔnɔnyi, yoho y’ɔlɔtɔ yekɔ lo taleke ndâna, kana sɔnyi. Naka hatolami lo dikambo sɔ, kete sho kokaka sɛngiyama esadi eto oma le anto wa l’andja ɔnɛ wotodingi, ko sho ndjɔlɔta oko vɔ. Weoho efula w’ɛlɔtɔ hasungana lo nsanganya y’ɔtɛmwɛlɔ. L’ɔkɔngɔ wa assemblée ɔmɔtshi l’ɔnɔnyi wetshi, takalongola mukanda wa lowando, koko wakakotsha ɔnɛ: “Dimi ndjambolaka mɛtɛ bonde kakonge ana wa amato efula l’ekutu wa tomondo ngango, ahɔndɔ w’ahɛka la ɔkɔngɔ l’andja ndo wâtemi efula l’ɔkɔngɔ.” Aha la tamu, sho tshɛ nangaka ndɔta woho wosungani l’ekambi w’Akristo, oyadi lo assemblée kana lam’atatasembola ekolo malɛkɔ. Ekɔ dimɛna sho kanaka yimba tena tshɛ lo dako dia ɔpɔstɔlɔ Paulo dia ndɔta ‘ahɔndɔ wakoka, wahaleke kotola asho w’anto ndo wosunganyi.’—1 Tim. 2:9.
16 Ahomba shikikɛ woho wahomba monga dihɔndɔ ‘diakoka’ ndo diahaleke kotola asho w’anto? Monga aha la lokumu kɛdikɛdi “ndjâla la kanyi yahatambe olelo, hatombe swa, yokoki la nde.” Dikisiɔnɛrɛ nembetshiyaka nto onto laha la lokumu oko kanga “memakana.” Oyadi la Société kana dikumanyi ndoko lahomba mbidja ɛlɛmbɛ lo dikambo dia ɔlɔtɔ kana ekombɔ k’ɔtɛ. Ko onde, kema Akristo wele la yoho y’ɔlɔtɔ yɛnama ɔnɛ hakoke ndo hasungana pombaka tshikitanya dionga diawɔ? (Enda lo Filipi 1:10.) Ahɔndɔ aso ndo ekombɔ kaso k’ɔtɛ katolekake kotola yambalo y’anto. Ɛnamelo kaso pombaka monga ɔlɔ menda, koko aha fɔna l’andja ɔnɛ kana monga sɔnyi. Oko weso ekambi wa lokumu l’ɔlɔlɔ, tayotombola Jehowa ndo tayosha efanelo k’ɔlɔlɔ k’ɔlɔngɔswamelo ande naka tayonga la dihɔndɔ ndo l’ekombɔ k’ɔtɛ kasungana edja tshɛ keso l’osomba wasalema losanganya la distrikɛ. Ɔnkɔnɛ, ambutshi wayɛnya ɛnyɛlɔ ndo wayoyashikikɛ dia anawɔ wakalɔtshi woho wasungana la dikambo diakɔ. Dikumanyi diayosha ɛnyɛlɔ k’ɔlɔlɔ ndo wayonga suke dia mbisha alako wa la ngandji tshɛ naka ekɔ ohomba.
17 Caméras, Caméscopes la Magnétophones: Kokaka kamba la wa caméras ndo dihomɔ dikina diɔsa awui, koko pombaka kanɛ ampokami akina. Naka sho ntshɔ dia tɔsaka fɔtɔ wonya washama dako, hatotofutanya paka anto akina ato wasala tshɛ dia nonga, koko tayohandja ndo sho lawɔ etenyi kɛmɔtshi ka assemblée. Nshi tshɛ, sho tokondjaka wahɔ oma lo kɛnɛ kotami paka naka tekɔ lo mpokɛ lotui ɔlɔlɔ le ambahemi a loseke ndo naka tekɔ lo funda wa nɔtɛ lo tshena pe. Ondo tayodja assemblée w’otondo lo bandɛ lo dikambo dia ɔnangɛso ɔmɔtshi kana kadiyɛso kakawakawa la hemɔ lakande; koko naka lo dikambo diaso shamɛ, kete aha la tamu tayoyokashimɔ lam’ayotokalola lakaso l’ɔkɔngɔ wa mbetsha wenya efula la sangola assemblée, hatotonga l’etena kânga yema ka nonga kana nyomonganɛ kɛnɛ kosangodiso. Ndoko ehomɔ ɔtɔi kasangola awui, oyadi ka ngande, kayohomba kɔhama lo kiɔkɔ y’atɔtɔ kana l’ekongelo ka sɔnɔrizasiɔ ka assemblée, kânga kitshama lo tɔsɛsɛ sɛsɛ kana lɛnɛ enda ampokami akina.
18 Ahole wa Mbidjasɛ: Tekɔ lo tetemala la mɛna etshikitanelo lo kɛnɛ k’endana la mambɛ ahole. Ɔnɔnyi wetshi, ampokami efula wakayele dako nɛ: PAKA ASE NKUMBO KAYƐ WA KA SUKE LA WANƐ WAYA LA YƐ LO MUTUKA ƆTƆI MBAHOMBAYƐ MOMBƐ AHOLE. Lam’ele anto efula wakasale ɔsɔku, ondo nyakayaoke yema hɛɛ. Kɛnɛ koleki ohomba nto, ele woho wakanyayele dakɔ sɔ akangɛnyangɛnya Jehowa kamɛ l’“ɔhɔmbɔ wa kɔlamelo,” washa mbo ya ndɛ ya lo nyuma.—Mat. 24:45, NW.
19 Anangɛso efula wekɔ la tonge tayanga esakelo wa lânde. Amɔtshi ndjaka lo assemblée lo kɔsa k’etshimbi ko wekɔ l’ohomba w’ase nkumbo kawɔ mbakimanyiya. Akina wekɔ lo mbɔsa ekanga wa hemɔ yahakɔnɔ, ɛnyɛlɔ oko hemɔ ka kardiyakɛ. Ekɔ ɔngɛnɔngɛnɔ efula mɛtɛ lam’ɛnaso anangɛso l’akadiyɛso walangaso asɔ lo assemblée, wele la tɛdikɔ t’aha pandja ndoko yangɔ ya ndɛ ya lo nyuma. Koko, anto amɔtshi wakakite la hemɔ lo assemblée, ko ndoko ose nkumbo kana ose etshumanelo kawɔ laki lawɔ dia mbâkimanyiya. Lo tena dimɔtshi, ɔnɔngɔsɔdi wa assemblée akelɛ wanɛ wasakanɛ esadi esadi dia vɔ mɛmba ɔnangɛso kana kadiyɛso la lopitadi. Ɔkɛndɛ wa kokɛ anto wele la hemɔ yahakɔnɔ wekɔ ntondo l’anya w’ase nkumbo yawɔ ndo le ewotɔ awɔ wa suke. Olimu w’esakelo ka wanyandja wa lo assemblée kema l’akoka wa kokɛ anto wele la hemɔ yahakɔnɔ. Naka ose nkumbo kayɛ ekɔ l’ohomba w’esakelo ka lânde, sala tshɛ di’aha nde tshikala ndamɛ naka dikambo dia wanyandja diamboyotomba. Lo wedi okina, hawotomba mvudu yotshikitanyi lo dikambo dia wanɛ wahakoke mbidjasɛ l’ahole wokodjasɛka anto tshɛ. Dikumanyi diayolonga wanɛ tshɛ wele l’etshumanelo kawɔ wayanga osakelo wa lânde ndo wayodja yimba dia tɛdikɔ t’eshika tɔ̂sami ntondo dia mbâkimanyiya.
20 Olelo: Oko akatadioke lo Olimu Aso wa Diolelo wa Mɔmbi, mbo ya ndɛ hatonga lo losanganya la distrikɛ lɔnɛ, kânga lo nsanganya y’etshimbedi la ya lushi ɔtɔi yayoyela. Yɛdikɔ y’oyoyo shɔ yakasokoya anto efula lo vɔ mbuta tokanyi efula t’amɛna lo ɛlɔlɔ wayonga naka onto l’onto mɛmba mbo yande ya ndɛ. Ɔnangɛso ɔmɔtshi akafunde ate: “Lekɔ lo mɛna ɔlɔlɔ wa woke efula wa lo nyuma lo yɛdikɔ shɔ. Wenya wakatetshaka ndo wolo ɔnɛ tshɛ wayɔtɔ kakianɛ l’akambo wa lo nyuma. Dimi komboka ndoko kanyi tshɔi yotshikitanyi.” Kadiyɛso kɛmɔtshi akate ate: “Anangɛso wa ngandji, oma lo ɛnyɛlɔ, nyekɔ lo keketsha Okristo tshɛ dia nde ndjasɛdingola ndo menda woho wa minya wesanu ɛmɔtshi lo lɔsɛnɔ lande ndo fudia olimu ande wa Teokrasi.” Omendji ɔmɔtshi w’eteta akafunde lo dikambo di’olimu w’edjedja wa mbo ya ndɛ ate: “Lam’aki yɛdikɔ y’edjedja, anangɛso efula wakahandjaka assemblée w’otondo.” Ekumanyi kekina akafunde lo dikambo dia mbo ya ndɛ yakasombe anangɛso ate: “Vɔ wakakondja ko kɛnɛ kakawalange aha konge l’ɔnɔngɔ.” Dia ndihiya, kadiyɛso kekina akafunde ate: “L’ɔkɔngɔ wa assemblée, tshɛ aki yɔɔ ndo ki, ndo onto tshɛ aki l’ɔmɔnɔmɔnɔ.” Mɛtɛ, onto tshɛ akakoke mɛmba mbo ya ndɛ efula dia kondja wolo l’ɔkɔngɔ a midi. Efula wakɛnya dia waya l’etena efula ka menda angɛnyi.
21 Lo nsanganya ya distrikɛ y’ɔnɔnyi ɔnɛ, olimu wa mbo ya ndɛ honga. Wɛ kokaka mbɔsa taahe tɔmɔtshi dia nyomenda dikatshi di’okotsha dia Olimu Aso wa Diolelo wa Mɔmbi 1996, odingɔ 8 ndo lo koma ya sawo diakɔ, lɛnɛ oshawɔ tokanyi lo dikambo dia mbo ya ndɛ y’ɛlɔlɔ yasungana mɛmba lo assemblée. Tohɛke di’aha tɔla tosakasaka t’ehonde w’ashi a tshitshi kânga wanu wa kandji. Naka wɛ ekɔ l’ohomba w’ohonde w’ashi a tshitshi wa shekaseka, kete vɔ pombaka koka la tshina dia kɔsa kayɛ. Tohɛke dia wɛ ekɔ l’etena efula lo diomuyelo dia la midi dia ndɛ ndo nnɔ kɛnɛ kakayela. Oko lo nsanganya ya lo Mbalasa ka Diolelo, hatole pondjo lo wonya washama alako lo assemblée. Ɔsɔku mbayotɛnya dilɛmiɛlɔ diaso lo tɛdikɔ takɔsama lo dikambo dia ɔtɛmwɛlɔ ndo dia mbo ya ndɛ ya lo nyuma yakondjaso.
22 Nsanganya ya ntondo ya distrikɛ “Akɛndji wa Wɔladi a Nzambi” yambotatɛ lo wedja ɛmɔtshi. Onde wɛ ambɔsa tɛdikɔ tshɛ tahombama dia mbɔtɔ lo lakinyu, ndo ambangemɛ dia nongola ɛlɔlɔ oma lo nshi shato shɔ yayotonga kâmɛ dia kondja mbo y’ɛlɔlɔ ya lo nyuma? Tekɔ lo nɔmba Jehowa l’otema ɔtɔi dia nde tshɔkɔla weolo anyu woho wa nyu mbɔtɔ lo assemblée w’ɔnɔnyi ɔnɛ.
Batismu: Wanɛ wayobatizama wayodjasɛ l’ahole wakawâlamɛ la ntondo ka assemblée tatɛ lushi la Samalo la pindju. Takɛnyi dia amɔtshi wekɔ l’ahɔndɔ wahasha onto nɛmɔ ko mbetshaka batismu oko ɛngɔ k’anyanya. Kandida tshɛ kâye la dihɔndɔ diande di’ashi diasungana ndo esiyamɛ. Dikumanyi diayɔsɛdingola wembola wele lo biukubuku Atshina a Wetshelo kâmɛ la wanɛ wayobatizama kawoyashikikɛ dia kana onto tshɛ l’atei awɔ ambâhotɔ. L’ɔkɔngɔ w’ombahemi a loseke mbisha dako dia batismu ndo dɔmbɛlɔ, ɔnɔmbɔdi w’etenyi ka assemblée akɔ ayosha wanɛ wayobatizama alako lo tshena pe, ko nde ndjotoma osambu. L’ɔkɔngɔ w’etenyi ka komelo, ase olimu w’olongwelo wayɔlɔmbɔla wanɛ wayobatizama tsha lo dihole diayowodindjama l’ashi. Lam’ele batismu ka djembetelo ya ndjakimɔ ekɔ dikambo di’onto ndamɛ l’asande la Jehowa, hatotosala wa “batismu ya l’olui” ya kandida hiende kana ndekana kimanɛ l’anya wonya wa dindjama l’ashi.
Kitadi: Kɔlɔtake kitadi ka 1996 oyadi lo assemblée kana lo mboka lo ntshɔ la kalola. Dikambo sɔ kimanyiyaka tena efula dia sambisha dimɛna. Nyayokondja ntadi lo tshimbo y’etshumanelo kanyu, nɛ dia hadiotonga lo assemblée. Tokongake nshi ya assemblée ambosukana dia ndjɔlɔmba ntadi diayɛ la dia nkumbo kayɛ. Tanyohɛke dia mongaka la kartɛ k’“Instructions médicales — Pas de sang.”
Olimu a Wanɛ Wayakimɔ la Lolango: Lam’aya bu olimu wa mbo ya ndɛ anɛ, anto efula wakayakimɔka la lolango l’olimu ɔsɔ wayolanga ondo ndjaetɛ ohomba l’ahole akina. Onde wɛ hakoke ndjâombɛ yema y’etena lo assemblée dia mbisha ekimanyielo kayɛ l’olimu ɔmɔtshi? Sho kokaka ndjaetɛ ohomba efula ndo ndjakondjiyɛ ɔngɛnɔngɛnɔ wa woke naka sho kambɛ anangɛso, kânga wenya engana ɛsɔ eto. Naka wɛ kokaka mbisha ekimanyielo kayɛ, kete toyaɛnya l’olimu a wanɛ wayakimɔ la lolango lo assemblée. Ana wele l’ɛse k’ɛnɔnyi 16 kokaka mbisha lonya ndo vɔ lo yoho y’ɔlɔlɔ l’ɛlɔmbwɛlɔ ka shɛwɔ, ka nyangɛwɔ kana k’opalanga okina wele l’ɔkɛndɛ akɔ.
Ɔhɛmwɛlɔ: Tangeme dia mbeya akambo wokoki ndjotomba woho wa mbewɔ ekakatanu w’anyanya. Tena efula, ase wevi l’anto akina w’ekonda sɔmaka angɛndangɛnda. Kodihake nkuke ya mutuka ayɛ nshi tshɛ la sapi ndo totshikake ndoko ema kakotola asho. Assemblées kotolaka ase wevi la akanga a tɔ̂mɔdi. Tohembake tshika ɛngɔ k’oshinga wolo la kɔsa kayɛ. Wɛ hakoke ndjashikikɛ ɔnɛ wanɛ tshɛ wokodingi wekɔ Akristo. Bonde kadjayɛ onto l’ohemba? Takalongola alapɔlɔ w’ɔnɛ anto weso hateye wakahembe kotola ana w’akɛnda otsha l’andja. TOSHISHAKE ANAYƐ LO ASHO PONDJO.
[Caption on page 6]
[Box on page 6]
Losanganya la distrikɛ—Yôhodi