“Mbetawɔ Lo Dui Dia Nzambi”—Losanganya La Distrikɛ 1997
1 Ɔpɔstɔlɔ Paulo akohola Timɔtɛ ɔnɛ “Afundelo tshɛ akasambiyama oma le Nzambi.” (2 Tim. 3:16, NW) Lam’ele Dui dia Nzambi diakafundama l’ɛlɔmbwɛlɔ ka nyuma k’ekila, sho tekɔ l’ɛkɔkɔ w’ɛlɔlɔ wa diêtawɔ. Losanganya la Distrikɛ l’ɔnɔnyi ɔnɛ lekɔ l’ɔtɛ a dui w’ɔnɛ: “Mbetawɔ lo Dui dia Nzambi.” Oyadi aya ɛnɔnyi efula mbeyaso akambo wa mɛtɛ, ko kana têke ka mbɔtɔ l’ɔlɔngɔswamelo waki Jehowa, ekongelo ka losanganya lɔsɔ kayokeketsha mbetawɔ kaso lo Bible. Sho tshɛ, onto l’onto pombaka ndjalɔngɔsɔla di’aha pandja kânga lushi ɔtɔi la losanganya lɔsɔ. Ande ɔlɔ wayonga mɛtɛ naka anto wêke ka mɛnya saki kawɔ, mbut’ate wanɛ weka la so Bible, mbɔtɔ la so lo losanganya lakɔ lee!
2 Losanganya la Woke la Nshi Shato: Losanganya la Distrikɛ la nshi shato lakalɔngɔswama ɔnɔnyi ɔnɛ di’ɔlɔlɔ aso. L’Olimu Aso wa Diolelo wa Yâta Afusa 1997, sho tanaka listɛ l’ahole 53 wayosalema assemblées lo Burundi, lo Congo la lo Zaïre. Wonya ɔnɛ, wɛ mbeyaka lo losanganya lakɔna layotshɔ etshumanelo kanyu ndo ondo wɛ amboshila mbɔsa tɛdikɔ t’eshika dia tanema lawɔ nshi yakɔ shato. Onde wɛ akalɔmbɛ owandji ayɛ w’olimu dikimɔ dia nshi yakɔ tshɛ? Naka wɛ ekɔ l’ana wakɔtɔ lo kalasa, onde wɛ ambewoyaka embetsha awɔ la dilɛmiɛlɔ tshɛ dia vɔ wayetsha lo kalasa Lushi la Tanu la la Samalo l’ɔkɔkɔ wa dikambo di’ohomba efula diendana l’olowanyelo awɔ wa lo nyuma?—Euh. 31:12.
3 Losanganya layomɛka nshi tshɛ lo 9 h 30. Nkuke yayodihɔka lo 8 h 00. Onyake wanɛ wele l’elimu wa kamba mbayokondjaka dikimɔ dia mbɔtɔ k’ɔlɔmɔ, koko aha dia ntshɔ atombanɛ ahole la ntondo ka diholɛ anto tshɛ nkuke.—Fil. 2:4.
4 Ayonga Ɔlɔlɔ Sho Mpokamɛ Dimɛna: L’eleko ka ntondo, ɔpɔstɔlɔ Petero akohola Akristo ɔnɛ ekɔ ɔlɔlɔ vɔ mpokamɛ dui di’amvutshi oko anto wenda tala diangamula lo dihole dia wodjima. (2 Pet. 1:19) Dui sɔ diekɔ mɛtɛ, kânga le so. Lam’ele tekɔ lo sɛna l’andja wokimame l’anya waki Satana, sho tekɔ oko lo dihole dia wodjima. Tekɔ l’ɔngɛnɔngɛnɔ nɛ dia wakatêlɛ oma lo wodjima wa lo nyuma. (Kol. 1:13; 1 Pet. 2:9; 1 Joa. 5:19) Dia ntshikala l’osase, sho pombaka monga la mbetawɔ ka nge lo mpokamɛka Dui dia Jehowa diakafundama l’ɛlɔmbwɛlɔ ka nyuma k’ekila. Losanganya laso la Distrikɛ layaye layototshutshuya dia sho ntsha ngasɔ.
5 Naka sho nangaka ndjela assemblée dimɛna, kete ondo tayohomba mbidja wolo, mɛtɛ, tayɔtshɔkwama naka sho sala ngasɔ. Katomuyake dimɛna woho wa sho ndjolonga alako tshɛ wayoshama dimɛna. Katotshɔke k’ɔlɔmɔ l’assemblée woho wa sho todjasɛka la ntondo ka losanganya tatɛ. Katêmbake osambu w’etatelo ndo ndjela dɔmbɛlɔ. Epalanga w’anto pombaka mbisha ɛnyɛlɔ, ndo ambutshi wayohomba nama anawɔ.—Ef. 6:4.
6 Naka sho tôki sso lo ekongelo k’alako wayoshama lushi lakɔ, kete ondo tayokoka kanyiya awui a weke wayowotɔmbɔla. Lâsɔ kete yambalo yaso yayodɛ efula wonya wayoshamaka alako akɔ. Sho mbeyaka tayangi la yambalo tshɛ awui wayotoyokoka nembetshiya anyaso, ɔkɔkɔ akɔna wadjaso mbetawɔ le Nzambi ndo lo daka diande dia mɛtɛ dia futa wanɛ wôyanga l’otema ɔtɔi. (Heb. 11:1, 6) Vɔ tɔlɔmbaka dia sho fundaka awui amɔtshi w’ohomba efula wayotama l’assemblée lo kalupɛ yaso lo tshena pe. Naka onto funda awui efula efula, kete nde mbeyaka pandja awui woleki ohomba, nɛ dia nde ayonga paka l’olimu wa fundaka tsho.
7 Ɔnɔnyi wetshi, takɛnyi akɛnda kambe tsho l’epalanga wateteta tshanana l’ɛsɛsɛ, wateteta l’andja wonya wa losanganya ndo watasawola l’anto akina, lo dihole dia vɔ nonga kɛnɛ kakatokatɛ “ɔhɔmbɔ wa kɔlamelo ndo wa kɛsɔ” di’ɔlɔlɔ aso. Yeso akatolake dia toshaka mbo ya ndɛ ya lo nyuma l’etena kahombama. (Mat. 24:45-47, NW) Omalɔkɔ, katôngake lawɔ dia sho kondja ɛlɔlɔ w’oma lo mbo ya ndɛ shɔ, koko aha monga akanga a lɔhɛndɛ. (2 Kor. 6:1) Ndo nto, mɛnamaka di’oko ana hawokikɛ ndo nyangaka dia ntshɔ lo komba wonya tshɛ, dia vɔ kondja yɛkɛ nɛndɛ ya ntshɔ dia tɛngɔlaka. Naka nyayohokolaka ana ɔlɔlɔ la ngelo, kete vɔ hawotɔkɛlakɛlaka wonya tshɛ lo komba ndo hawotoningɔningɔka djɔ l’assemblée. Mbala mɔtshi ana w’ɛnɔnyi dikumi l’ɛmɔ mbidjasɛka l’olui yema tshalola, ko sawolaka, wangunanguna, ndo wetshanya ɛtɛkɛta ɛmɔtshi. Nshi nyɛ, ɛlɔngɔlɔngɔ tshutshuyamaka efula, ɔnkɔnɛ vɔ pombaka mbidja yambalo yawɔ tshɛ l’alako wawashawɔ, aha sala ndoko dui dikina wonya weta losanganya. Vɔ pombaka mbikadja nsaki y’ɛlɔngɔlɔngɔ l’esekaseka yahɔtɔnɛ l’ɛlɛmbɛ wa lo Bible. (Enda lo 2 Timote 2:22.) Yambalo yayodjaka anto tshɛ, oyadi ɛlɔngɔlɔngɔ kana epalanga, yayɔngɛnyangɛnya Jehowa ndo yayowotombola.
8 Naka os’olimu w’olongwelo ambotosha dako lo dikambo sɔ, kete tayohomba mbɔsa dako diakɔ oko djembetelo ya ngandji katoka Jehowa. (Ngal. 6:1) Onto tshɛ pombaka mbohɔ ɔnɛ: naka nde ekɔ lo mbidja wolo dia mbɔtɔ l’assemblée, kete ele dia ‘tolonga ndo têka.’ (Euh. 31:12) Lâdiko dia lâsɔ, “kanga lomba mpokamɛka ndo kondjaka wahɔ oma lo wekelo.” (Tok. 1:5, NW) Tatɛ oma ko kakianɛ polo ndo l’assemblée, katosawolake l’atei a nkumbo dikambo di’ohomba wa sho todjasɛka dihole ɔtɔi, di’aha tononɛka wonya wa losanganya ndo mbidja yambalo y’efula dia kondja wahɔ wa mɛtɛ oma lo losanganya lakɔ.
9 Ɔlɔtɔ Wangɛnyangɛnya Jehowa: Andja w’otondo wekɔ lo menda anto wa Jehowa. (1 Kor. 4:9) Mɛtɛ, sho mbeyamaka efula oma l’ɔlɔtɔ aso wa kɔmba ndo yoho yanyaso kana yalɔngɔsɔlaso divo. Efula ka wanɛ wakamba l’alako wa l’Afundelo watanaso lo 1 Timote 2:9, 10 la lo 1 Petero 3:3, 4 wakɛnyi dia ɛnamelo kawɔ ka lo demba kambotshikitana l’akambo tshɛ tatɛ oma kam’akawamɛ mbɔtɔ l’etshumanelo k’Akristo. Dui sɔ tshikitana efula la yoho yataleke naana ɛlɔtɔ w’ase andja ɔnɛ ɛlɔ kɛnɛ ndo wonyelo awɔ la wɛlɛ̂lɔ w’avo. Sho pombaka ndjâlama di’aha ndjɔfɔna l’ase andja ɔnɛ lo ndɔtaka ahɔndɔ wa sɔnyi kana wele oko kanga djele, lo ndjelaka eya koye (mode) lo wonyelo kana wɛlɛ̂lɔ wa divo kana lo ndɔta ahɔndɔ wahasungana. Naka sho ndɔta ndo nɔngɔsɔla divo diaso dimɛna, kete tayosha anto w’eyoyo wayotshɔ l’assemblée ɛnyɛlɔ k’ɔlɔlɔ ka vɔ shihodia ɔnɛ nganɛ mbahomba Akristo ndɔtaka.
10 Ɔnɔnyi wetshi, anto wakatshikala enyɔ hwe lo menda dionga diaki l’anto suke la tshɛ l’assemblée; koko, anangɛso l’akadiyɛso amɔtshi wâkalɔtɛ ndo wâkanya avo oko ase andja ɔnɛ, djekoleko wonya wɔsawɔ yema ya hiɛlɛlɛ. Lam’asangoyaso dia ntshɔ otsha l’assemblée, sho pombaka sɛdingola ɔlɔtɔ aso ndo nganɛ ayotɔlɔngɔsɔla avo aso. Ambutshi, kanyeye sɔna ahɔndɔ wayohomba ndɔta ananyu wa totshitshɛ w’ɛlɔngɔlɔngɔ. Toyashikikɛ di’aha sho tshikɛ tooho t’ɛlɔtɔ ta l’andja ɔnɛ la t’ɔlɔngɔswɛlɔ wa divo kana hiɛlɛlɛ yawɔ dihole dia tɔ monga la shɛngiya ya kɔlɔ lo ɛnamelo kaso ka lo demba k’Akristo.
11 Toyâle la Dionga di’Ɔlɔlɔ: Dionga di’ɔlɔlɔ ekɔ djembetelo yeyama Akristo wa mɛtɛ. (1 Pet. 2:12) Oyadi lende ayotonga, l’assemblée, lo rɛstora, l’ɔtɛlɛ ndo lo nkɛndɔ yaso, sho kokaka sambisha dimɛna oma lo lɔkɛwɔ laso ndo kimanyiya anto akina dia vɔ mɛna kɛnɛ kakoka tondja mbetawɔ kaso le Nzambi ndo lo Dui diande. Dui sɔ mbeyaka ndjokonya anto amɔtshi lo vɔ nyanga dia mbeya Jehowa. (Enda lo 1 Petero 3:1, 2.) Tekɔ la diɛsɛ dia tombola Jehowa oma lo lɔkɛwɔ laso.
12 Vɔ toholaka mbala ko mbala dia sho mendaka lɔkɛwɔ l’an’aso ɔlɔlɔ, dia sho mbâlamaka, di’aha vɔ ndawɔlawɔka l’ahole tshɛ wa l’ɔtɛlɛ (kana lɛnɛ ohangiso), nɛ dia dui sɔ mbeyaka fukutanya kidiya kina. La Société nongolaka alapɔlɔ ɛnɔnyi tshɛ ɔnɛ ambutshi amɔtshi hawolame anawɔ dimɛna. Kânga mbatosha assemblée diaaso dia sho mɛnana l’anangɛso ndo sangana la wɔ, ambutshi hawohombe mbohɛ ɔkɛndɛ awɔ wa kokɛka anawɔ wonya tshɛ. Ɔsɔ ekɔ ɔkɛndɛ wakasha Jehowa ombutshi a pami la wa omoto tshɛ. (Tuk. 1:8; Ef. 6:4) Awui wa kɔlɔ wasala ana wahawalame mbeyaka nanya lokumu l’ɔlɔlɔ lele l’Ɛmɛnyi wa Jehowa ekina oma lo weolo wakawadje.—Tuk. 29:15.
13 Tokaloya Falanga Yakatombe dia Nɔngɔsɔla Losanganya: Sho tshɛ totondjaka falanga dia mbɔtɔ l’assemblée. Koko, ekɔ otondjelo okina wa falanga wahombaso kana lomba. Ahole wasalaso nsanganya ya weke sho mbafutɛka oshinga wolo. Sho pombaka nto tondja falanga l’akambo akina. Sho ngɛnangɛnaka weshasha wa la lolango wakimɔnyu l’assemblée.—Etsha 20:35; 2 Kor. 9:7, 11, 13.
14 Ahole wa Mbidjasɛ: Alako wokowotoshaka ɛnɔnyi l’ɛnɔnyi wekɔ ohomba efula: AHA MOMBƐ ANTO AKINA AHOLE, ONYAKE EWOTƆ AYƐ WA KA SUKE LA WANƐ WOYE LAYƐ. Ekɔ ɔlɔ efula dia mɛna ɔnɛ ɛnɔnyi wetshi ɛnɛ, ampokami efula wekɔ lo ndjela dui sɔ, ko keketshaka ngandji katotokanaka l’assembée. Lo ahole efula wasalema assemblée, ahole amɔtshi kema okakatanu dia todjasɛ lɛkɔ. Nyokane anto akina wele la pâ lo mbâtshikɛ ahole wosunganyi la wɔ dia vɔ mbidjasɛ.
15 Appareils wa Fɔtɔ, caméscopes la magnétophones: Kokaka onto kamba la appareils wa fɔtɔ la dihomɔ dikina diasangola awui. Koko, sho la dia kanɛ ampokami akina di’aha mbafukutanya. Hatohombe monɛ wonya washama dako dia tonda fɔtɔ, nɛ dia ayonga wɔɔnganu wa fukutanya anto akina wasala tshɛ dia nonga. Ndoko ehomɔ ɔtɔi kasangola awui, oyadi ka woho akɔna, kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka assemblée, kânga kitshama lo tɔsɛsɛ sɛsɛ kana lɛnɛ enda ampokami akina.
16 Esakelo ka Wanyandja: Departɛma nɛ mendanaka paka l’esakelo ka wanyandja. Tɔ kema l’akoka wa sakɛ anto wele la hemɔ yahakɔnɔ. Diɔ diakɔ diahomba onto l’onto tâkanyi yimba lo dikambo di’esakelo kande kana di’ase kumbo kande. Kotshu la aspirinɛ ayɛ, ekanga ayɛ wa l’otema, diangɔ diayɛ dia sola kana mbifɛ mpota, mpɛngɛlɛ y’ana w’ashashi ndo diangɔ dikina dia ngasɔ diahatanema l’assemblée. Wanɛ tshɛ watata hemɔ ya diowe kana kardiyakɛ, wanɛ wokoki tondama shashimoya la hemɔ ka diabɛtɛ, la weho ekina wa hemɔ, pombaka tɔshi tɛdikɔ tawɔ lo weho akɔna tshɛ. Vɔ pombaka monga l’ekanga wahombama, ndo ose nkumbo kawɔ, kana ose etshumanelo kawɔ ɔmɔtshi leya pâ kele lawɔ pombaka mbâlamaka wonya tshɛ dia mbâkimanyiyaka wonya wewɔ l’ohomba. Lo assemblées ɛmɔtshi, anto waki la hemɔ yahakɔnɔ ko kondjala la wanɛ wâlama wakayondamaka la hemɔ wolo, ko akambo wakayoyala wolo. Departɛma dialɔngɔsɔla losanganya akayohombaka mbelɛ ase esakelo ka wanyandja dia mbatɔla lo mpitadi. Naka onto ekɔ l’ohomba w’esakelo kɛmɔtshi ka lânde ko ndoko ose nkumbo kande kânga ɔtɔi lakoka mbokimanyiya, kete pombaka mbewoya dikumanyi dia l’etshumanelo kande dia vɔ mbɔsa tɛdikɔ tahombama dia mbokimanyiya. Hawotomba mvudu mɔtshi ya lânde ya mbidjaka paka anto wele la weho ɛmɔtshi wa hemɔ.
17 Olelo: Woho wambowonya olimu wa diangɔ dia ndɛ ambotokimanyiya dia sho mbidja yimba efula lo mbo ya ndɛ ya lo nyuma wonya wa losanganya. Takamɛ nongola mikanda efula wa eokelo ka losaka lo yɛdikɔ shɔ yakɔsama. Onto tshɛ pombaka tâkani dia mɛmba yangɔ ya ndɛ yasha demba wolo yayondoyɔlɛ wonya wa diomuyelo dia la midi. Tatɔ̂tɔke l’assemblée l’elangi wakoka mbolɛ la wanu wa kandji kana alkɔlɛ. Pombaka ntshɔ paka l’ehonde wa totshitshɛ w’ashi wakoka mbɔtɔ la tshina di’okala wodjashiyɛ. Wakɛnyi ampokami amɔ walɛ diangɔ wonya wa losanganya. Dui sɔ hɛnya ɔnɛ sho mbɔsaka assemblée la nɛmɔ. Lo assemblées ɛmɔtshi, anto wakasondjaka diangɔ l’etei kana l’andja wa dihole dia losanganya, ko wakɛnyi anangɛso amɔtshi wantshɔ lɛkɔ dia tosomba diangɔ wonya wa losanganya. Dui sɔ hadiosungana kânga yema.
18 Sho ngɛnangɛnaka efula difɛstɔ diaso dia lo nyuma ndo ɔlɔ watôngaka lam’atotosawolaka l’asa onto l’ɔnango lo wɔladi wonya wa diomuyelo dia midi. Dia ndjaɔtɔnganyiya la yɛdikɔ shɔ, kotshu la mbo ya ndɛ yayɛ wɛmɛ lo dihole dia tônɛka oma lam’odjashiyɛ dia tosomba. Ɔsɔku mbayoyonga la wenya efula wa sawola kâmɛ l’ananyɔ ndo l’akadiɛyɛ.
19 Ande ɔlɔ wokaso lam’akanyiyaso nganɛ wayonga losanganya la distrikɛ laya ka suke, “Mbetawɔ lo Dui dia Nzambi” lee! Sho tshɛ pombaka ndjâshikikɛ kana tamboshila la mbɔsa tɛdikɔ dia mbɔtɔ lo tenyi tshɛ dia losanganya lakɔ, dia ndɛ dambo dia dimɛna efula dia lo nyuma diambotokatɛ Jehowa oma lo tshimbo y’ɔlɔngɔswamelo ande. Dui sɔ diayotokimanyiya dia sho ‘kondja akoka tshɛ wahombama wa ntsha elimu w’ɔlɔlɔ’ lo nshi yayaye.—2 Tim. 3:17.
Batismu: Wanɛ wayobatizama wayodjasɛ l’ekala wakawâlamɛ la ntondo ka assemblée tatɛ lushi la Samalo la pindju. Onto l’onto kâye l’ɛsiyamɛ ande ndo l’ahɔndɔ wasungana dia ndjɔ̂tɔ lawɔ l’ashi. Nshi ya ntondo, takɛnyi di’amɔtshi wakalɔtaka ɛlɔtɔ wa kɔlɔ ko mbetshaka batismu ɔlɛlɔ oto. Dikumanyi diayɔsɛdingola wembola wele lo biukubuku Atshina a Wekelo kâmɛ la wanɛ wayobatizama kawoyashikikɛ dia kana onto tshɛ l’atei awɔ ambohotɔ akambo asɔ ɔlɔlɔ. L’ɔkɔngɔ w’ɔtɛkɛtshi mbisha dako dia batismu ndo nɔmba, ɔnɔmbɔdi w’etenyi kakɔ ka losanganya ayotoma osambu. L’ɔkɔngɔ w’etenyi ka komelo k’osambu tatɛ, ase olimu w’olongwelo wayɔlɔmbɔla wanɛ wayobatizama otsha lɛnɛ ayowotodindjama l’ashi. Batismu ka djembetelo yɛnya ɔnɛ onto amboyakimɔ le Nzambi ekɔ dikambo dia l’asa onto ndamɛ la Jehowa. Omalɔkɔ, ndoko yɛdikɔ mɔtshi yɔsami dia “batismu ya l’olui” ya kandinda hiende kana ndekana kimanɛ l’anya wonya wa dindjamawɔ l’ashi.
Kitadi: Kanyɔlɔtake kitadi ka 1997 oyadi l’assemblée kana lo mboka lam’etetanyu. Dikambo sɔ kimanyiyaka tena efula dia sambisha dimɛna. Nyayokondja ntadi la totapatapa tatɔ lo tshimbo y’etshumanelo kanyu, nɛ dia hadiotonga l’assemblée. Tokongake tshikima nshi y’assemblée yambosukana dia ndjɔlɔmba ntadi diayɛ wɛ la nkumbo kayɛ. Tanyohɛke dia mongaka la kartɛ kanyu ka “Instructions médicales — Pas de sang”. kmOT-6/96
Ahole wa Mpanga: Tambonyɔlɔmba nyu tshɛ dia kamba kâmɛ lo ndjela PAKA listɛ l’ahole wakalɔngɔsɔla Bilɔ w’assemblée dia mpangia anto. Naka anangɛso wa l’osomba wayosalema losanganya wambotohangia lawakawɔ, kete tatolanyake ɔlɔlɔ awɔ wotolongudiwɔ lo mbidjasɛ edja efula l’ɔkɔngɔ w’assemblée. Kânga lo nshi ya losanganya, tatɔfɔnyake ɔnɛ akanga a ngelo wotohangiyisha wayotoshaka mbo ya ndɛ. Amɔtshi bu l’akoka wa ntsha ngasɔ. Omalɔkɔ, totate ndjalɔngɔsɔla oma ko kakianɛ dia ntshɔ la mbo ya ndɛ yayototɔlɛ nshi y’assemblée. Sekeletɛlɛ k’etshumanelo ayosala tshɛ di’Adɛmandɛ wa wanɛ wayanga luudu la lânde la tohanga tomama esadi lɛnɛ ayosalema assemblée akɔ. Naka l’ɔkɔkɔ ɔmɔtshi wa lânde wɛ ambɛna ɔnɛ wɛ hatohanga nto lo dihole diakayasɔnɛ, kete kewoya esadi eto ɔnɛ layokohangia kana ase ɔtɛlɛ, kana departɛma dia l’assemblée diahangia anto, woho wa vɔ mbidja onto okina lo luudu lotoyohanga.
Kɔsa y’Etshimbi la ya Lɛɛmbɛ: L’ahole efula, vɔ shimbaka anto mbɔtɔ la kɔsa y’etshimbi lo nsanganya ya weke y’anto efula. Ɛlɛmbɛ w’anami wa mpokoso hetawɔ dia ndjikitsha l’ɛsɛsɛ, kana l’asa ekala l’ekala. Lam’ele elui w’anto mbeyaka ndjotshumana ko woho wa mbeta nto hayeyama, kɔsa y’etshimbi mbeyaka monga wâle le ana w’ashashi ndo le wanɛ wakoka takana lɔkɔ. Omalɔkɔ, tambonyɔlɔmba di’aha ntshɔ la yɔ l’assemblée. Koko, yatowodjashaka ana mbetawɔmaka nɛ dia ambutshi kokaka mbadjasha lɔkɔ l’omamu awɔ. Aha ntshɔ la kɔsa ya lɛɛmbɛ. Yɔ kokaka monga wâle ndo hawetawɔ dia mbidjasɛka lɔkɔ lo nsanganya ya weke y’anto efula. Ekɔ ohomba efula ndo sunganaka nyu mbisha lonya dia kitanyiya awui ahende asɔ.
Olimu a Wanɛ Wayakimɔ la Lolango: Onde wɛ hakoke ndjâombɛ yema y’etena lo assemblée dia mbisha lonya l’olimu ɔmɔtshi? Sho kokaka ndjaetɛ ohomba efula ndo ndjakondjiyɛ ɔngɛnɔngɛnɔ wa woke naka sho kambɛ anangɛso, kânga wenya engana ɛsɔ eto. Naka wɛ kokaka mbisha ekimanyielo kayɛ, kete toyaɛnya l’olimu a wanɛ wayakimɔ la lolango lo assemblée. Ana wele l’ɛse k’ɛnɔnyi 16 kokaka mbisha lonya ndo vɔ lawɔ lo yoho y’ɔlɔlɔ l’ɛlɔmbwɛlɔ k’ambutshi awɔ kana k’opalanga okina wele l’ɔkɛndɛ akɔ.
Ɔhɛmwɛlɔ: Tangeme dia mbeya akambo wokoki ndjotomba woho wa mbewɔ ekakatanu w’anyanya. Tena efula, ase wevi l’anto akina w’ekonda sɔmaka angɛndangɛnda. Kodihake nkuke ya mutuka ayɛ nshi tshɛ la sapi ndo totshikake ndoko ema kakotola asho. Assemblées kotolaka ase wevi la akanga a tɔ̂mɔdi. Tohembake tshika ɛngɔ k’oshinga wolo la kɔsa kayɛ. Wɛ hakoke ndjashikikɛ ɔnɛ wanɛ tshɛ wokodingi wekɔ Akristo. Bonde kadjayɛ ɔnanyɔ l’ohemba? Takalongola alapɔlɔ w’ɔnɛ anto weso hateye wakahembe kotola ana w’akɛnda otsha l’andja. TƐNAKE ANAYƐ WATAPƆ. kmOT-6/96
Pombaka nto mbewɔ wâle ɛmɔtshi wakoka tokomɛ. Mbala yetshi, anangɛso wakalolanɛ lo mituka kana lo waato aha la mbidja yimba lo lofulo l’anto lakoka mbɔtɔ lɔkɔ. Lonyangu ko akisida wa weke wakasalema. Lam’ele lɔsɛnɔ lekɔ ekila, sho nangaka menda ɔlɔlɔ lo mbewɔ di’aha ndjɛmba onongo wa dikila. Dia tenyanya otadimbo weteta mituka, sho pombaka ndjashikikɛ ɔnɛ mutuka wokoki tokamɛ kana mbikamɛ anaso kema.
Lo Lotena Eduwa 11, 1997 mbayotatɛ losanganya la distrikɛ la ntondo: “Mbetawɔ lo Dui dia Nzambi.” Tekɔ lo nɔmba Jehowa l’otema ɔtɔi dia nde tshɔkɔla weolo aso woho wa sho mbɔtɔ lo nsanganya ya distrikɛ shɔ ko tɔlɛ mbo y’amɛna lo mɛsa Ande.
[Caption on page 6]
[Box on page 6]
Losanganya la Distrikɛ—Awui wa Mbohɔka