Shi kakianɛ lokuke lambokodihwɛ otsha l’olimu w’ombatshi mboka?
Tekɔ l’oyango wa kotsha ambatshi mboka wa pondjo 10 000!
1 Divɛsa diaso dia l’ɔnɔnyi wa 1999 tôholaka dia têke lo ‘lushi la panda’ laki Jehowa. (2 Kor. 6:2) Koko lushi lande la panda lɔsɔ layanga komɛ kem’edja nto. Lâsɔ mbayomɛ ‘lushi lande l’elombwelo.’ (2 Pet. 2:9) Ande ɔlɔ mɛna nganɛ wetawɔ nunu di’anto waaso watatetemala Jehowa mbasha dia vɔ kondja panda lee!
2 Kam’ekende etena, ekambi wa Jehowa wekɔ lo ntsha tshɛ dia nyanga anto anɛ wetawɔ losango lawɔ. Apandjudi efula wa Diolelo wakɔtɔ l’olimu w’ombatshi mboka dia vɔ mbeya nyanga anto asɔ. Shi kakianɛ lokuke lambokodihwɛ otsha l’olimu w’ombatshi mboka? Bonde kambolaso wombola ɔsɔ na?
3 Anto wambɛnya lowando lawɔ: Oko wakawatewoya l’Olimu Aso wa Diolelo wa Ngɔndɔ ka Ntondo 1999, wambokitshakitsha lofulo la wenya walɔmbawɔ ambatshi mboka wa pondjo la wa tshanda. Dia kotsha lofulo la wenya lalɔmbama kakianɛ, ambatshi mboka wa pondjo pombaka kimɔka ngɔndɔ tshɛ wenya 70, mbut’ate wenya 840 l’ɔnɔnyi. Ambatshi mboka wa tshanda wayokimɔka wenya 50 ngɔndɔ tshɛ. Lo kɛnɛ kendana l’etshikitanu ɛsɔ, anto efula wakɛnya lowando lawɔ; ɛtɛkɛta w’atɔi amɔtshi v’ɛnɛ lanɛ:
“Ɔnɛ mɛtɛ ekɔ woshashsa w’oma le Shɛso lele l’olongo!”
“Handeye ndo mbuta ɔngɛnɔngɛnɔ, ngandji, ndo lowando lele lami lo dikambo di’ɛlɔngɔswɛlɔ kɛnɛ!”
“Kɛdikɛdi aya bu kanga fushi ya wolo dia mbɔsa ekongelo woho wa kotsha oyango aso!”
“Kɛnɛ kalɔmbaso ele di’anto efula mbɔsa olimu w’ombatshi mboka wa pondjo ndo kondja ɛtshɔkɔ waya oma lo kambɛ Jehowa lo yɛdikɔ y’efula.”
4 Oko wayangaso koma lo kondoko ya lushi la panda laki Nzambi, mɛnamaka hwe dia Jehowa kombolaka di’ekambi ande tawotombodi la wolo tshɛ mbala k’ekomelo. Woke woke la wolo wa losango lɔsɔ lekɔ lo tadɛ tsho (1) lo woho watatetemala pama lofulo l’apandjudi wa Diolelo ndo (2) lo woho wayanga onto tshɛ pamia kɛnɛ kende l’akoka wa ntsha l’esambishelo ka Diolelo. Jehowa, ɔnɛ ‘lela ehamelo kɛsɔ,’ ambâhomuya lokolo l’ɔlɔ lo weho akɔ ehende: Nde ekɔ lo tshɔkɔla yimba y’ɔlɔlɔ yele l’anto tshɛ waketawɔ kondja panda.—1 Kor. 3:6, 7; Osam. 110:3.
5 Tatohandjake oyango awɔ: Lo dikambo dia lushi la Jehowa lɔsɔ la panda mbakalake Paulo anyande Akristo ɔnɛ: ‘Lam’akambaso kâmɛ la nde [Jehowa], tekɔ lo nyɔsɛngasɛnga nto di’aha mbetawɔ ɔlɔlɔ w’ɔtɛkɔya waki Nzambi ko pandja oyango awɔ.’ Hatotohandja ‘oyango awɔ’ naka sho mɛna ɔnɛ ekɔ ‘etena k’ɔlɔlɔ efula’ ka kamba lo oseka diaaso tshɛ di’anto akina kondja panda. (2 Kor. 6:1, 2) Ɛlɔ kɛnɛ mamboleka mɛnama ohomba w’ɛtɛkɛta ɛsɔ waki Paulo. Akristo wɛnya ngandji kokawɔ Jehowa oma k’ɛse otema mɛnaka ɔnɛ kamba efula l’olimu w’esambishelo ekɔ tshondo ya diɛsɛ. Onde wɛ aya l’akoka wa sambisha efula oko ombatshi mboka wa pondjo?
6 Ɔsɔ ekɔ oyango wa dimɛna: Lo République démocratique du Congo wamboyadjɛ oyango wa kondja ambatshi mboka 10 000 lo Ngɔndɔ ka Divwa 1. Kânga mbalɔma ta lo Congo-Brazzaville sho nongamɛka mɛna anto 400 l’olimu ɔsɔ w’ombatshi mboka wa pondjo lo datɛ diakɔ diamɛ. Sho mbetawɔka dia ɔsɔ ekɔ oyango wa dimɛna efula ndo wakoka onto kotsha. Bonde kayashikikɛso ngasɔ na? L’ɔnɔnyi w’olimu wetshi, taki la yɛdikɔ ya l’atei atei y’ambatshi mboka 8 722 l’ambatshi mboka wa tshanda 4 089 lo Congo-Kinshasa ndo Ambatshi wa pondjo 322 la wa tshanda 164 lo Congo-Brazzaville. Yɛdikɔ ya l’atei atei ya wenya wakakimɔ ambatshi mboka wa tshanda aki 63,8—tshikalaka paka wenya 6,2 dia vɔ kotsha lofulo l’oyoyo lowɔlɔmba ambatshi mboka wa pondjo! Oyadi kânga anto 1 300 ato l’atei a wanɛ wakakambe oko ambatshi mboka wa tshanda lo Congo-Kinshasa la 400 lo Congo-Brazzaville wayɔsa olimu w’ombatshi mboka wa pondjo ɔnɔnyi ɔnɛ, kete tayomɛ Ngɔndɔ ka Divwa la lofulo l’ambatshi mboka wa pondjo ndekana 10 000 lo Congo-Kinshasa ndo ndekana 400 lo Congo-Brazzaville!
7 Ekɔ ohomba monga l’ekongelo: Onde wɛ mɛnaka di’ekɔ wolo kotsha wenya 70 lo ngɔndɔ? Ondo naka wɛ kanyiya dia sambishaka wenya 17 lo lomingu kete wɛ ayokotsha. Lo kamba la bɛnyɛlɔ dia dikongelo diele lo lɛkɛ layela, hemba dia monga l’ekongelo k’ombatshi mboka wa pondjo, ekongelo kɔtɔnganɛ l’akambo wele la yɛ. Wonya walangayɛ kongɛ ekongelo kayɛ, sawola l’ambatshi mboka amɔtshi wa tomanamana dia vɔ kosha tokanyi lo woho wahawɛngɛnga l’olimu awɔ w’ombatshi mboka l’ɛkɛndɛ awɔ wa lo nkumbo. Mbola omendji anyu w’otshimbedi dia nde kotɛ ekongelo k’olimu kele l’ambatshi mboka amɔtshi lomingu tshɛ. Oma lâsɔ, ko wɛ mendɛ le Jehowa dia nde tshɔkɔla ekongelo kayɛ k’ombatshi mboka.—Tuk. 16:3.
8 Nyɔshi oyango ɔsɔ l’atei a nkumbo: Onde nyambɔkɛtshanyaka di’olimu w’ombatshi mboka l’atei a nkumbo? Nyu koka mbidjasɛ kâmɛ lo nkumbo ko sawola nganɛ wakokanyu mbɔsa ekongelo ka dimɛna ndo mbishana lonya dia onto ɔtɔi kana ahende l’atei wa nkumbo kamba oko ombatshi mboka. Aha la tamu, amɔtshi, l’ɔkɔngɔ wa vɔ menda akambo wele la wɔ l’otema ɔtɔi, wayɛna dia vɔ bu la diaaso dia kamba oko ambatshi mboka wa pondjo etena kɛnɛ. Naka ɔsuku, kete yadjɛ oyango wa ndjokamba olimu ɔsɔ lo nshi yayaye. Koko tatɛ ndjâlɔngɔsɔla woho wa ndjokamba oko ombatshi mboka lo datɛ diakayashikikɛ. Ondo wɛ koka kambaka oko ombatshi mboka wa tshanda mbala efula l’ɔnɔnyi, edja ndo wɛ ndjokotsha oyango wa kamba oko ombatshi mboka wa pondjo.
9 Anto ndekana 8 700 wakamba oko ambatshi mboka wa pondjo lo Congo-Kinshasa la 320 lo Congo-Brazzaville wekɔ la weho wa nsɛnɔ yotshikitanyi. Aha vɔ tshɛ mbele l’alemba w’amɛna, ndo efula wekɔ lo diɛnɛ dia kondja kânga dikuta ndo wekɔ lo diɛnɛ l’awui w’ata. Koko kânga mbediɔ ɔsɔku, vɔ wekɔ lo tetemala mbikikɛ asui asɔ ndo wekɔ lo ndjaɛkɛ le Jehowa. Wadi l’omi ɔmɔtshi wakamba oko ambatshi mboka lo vilɛ kɛmɔtshi ka lo Congo-Brazzaville kalɔ̂ma ta wakate ɛtɛkɛta ɛnɛ: “Onde sho nyangaka lo woho wakatayakimɔ dia kambɛ Jehowa? Atonga na! Koko, lam’ohɔso la lonyangu kɛnɛ tshɛ kakatashisha, sho mɛnaka dia diangɔ sɔ tshɛ hadiɛdimi kânga yema l’ɛtshɔkɔ wambotokondja ɛlɔ kɛnɛ ndo watokongɛ la ntondo. Dimi la wadiɛmi tambɔsɔna dia tshikala l’olimu w’ombatshi mboka wa pondjo.” —Luka 9:62; Fil. 3:8.
10 Onde wɛ pombaka sɔtɔla akambo wele ohomba? Sɛna lɔsɛnɔ l’ɔsɛlɛngɛ kokaka kokimanyiya dia wɛ kamba oko ombatshi mboka. Onde lɔsɛnɔ layɛ lekɔ oko luudu l’enanɔnanɔ lele la toshambrɛ taheyama ndo oyango atɔ ndo diangɔ efula diele bu ndo ohomba diakɔsɛ wenya ndo falanga efula ndo diahombayɛ ntshaka tshɛ dia dikokɛ? Naka ngasɔ, kete nya disanya dia lo lɔsɛnɔ lakiyɛ woho wa ndjaetɛ ɔsɛlɛngɛ ko kondja diaaso dia kamba oko ombatshi mboka. Onde wɛ kokaka kitshakitsha lofulo la wenya wetshayɛ l’elimu wa l’emunyi? Onde wɛ kokaka mbɔsa wenya wetshayɛ l’elimu wele bu ohomba efula ko mbadja l’olimu w’ombatshi mboka kana menda di’aha mbetsha wenya wamboleka lo tɔkɛnyɔ?
11 Lo 1 Timote 6:8, Bible tolakaka ɔnɛ: “Keli lam’ayutuyala la diango dia nde ndu la diango dia ndota, shu tayuyala l’ongenongeno lu diango diako.” Ngɛnangɛna la yema tshitshɛ yele la so ekɔ dui di’ohomba efula naka sho nangaka kamba efula l’olimu wa Jehowa ndo mbetsha wahɔ wa lo nyuma lo dihole dia ntondo. (Mat. 6:22, 33) Lo lɛkɛ 104 la Annuaire 1998, lo alapɔlɔ wa la Japon, wekɔ lo mbisha alako efula dia mɛnya bonde kele anto efula lo wodja ɔsɔ wekɔ la yimba y’ɔlɔlɔ ya kamba oko ambatshi mboka. Tende paka dikambo ɔtɔi: “Lo mbuta mɛtɛ, mvudu ya la Japon bu mvudu y’ɔnɛ he yaka yende, ndo hayɔlɔmbɛ wenya efula dia ndjilɔngɔsɔlaka kana ndjikokɛka, ndo l’ahole efula vɔ wekɔ la lɔsɛnɔ laha l’anto wele la lomombo efula.” Kema kɛsɔ mbatɔlɔmbawɔ lo 1 Timote 6:8?
12 L’andja w’otondo, ekambi wa Nzambi wekɔ lo sambisha lokumu l’ɔlɔlɔ l’ohetoheto w’efula la ntondo ka lushi la Jehowa la panda komɛ. Tekɔ lo mandola suke l’apandjudi 700 000 wakakambe oko ambatshi mboka wa pondjo kana wa tshanda ngɔndɔ tshɛ. Onde wɛ kokaka tshikitanya lɔsɛnɔ layɛ dia wɛ mbɔtɔ l’ɔnɔngɔ awɔ? Tambokɔlɔmba dia wɛ sɛdingola la yambalo tshɛ ndo lo dɔmbɛlɔ akambo wele layɛ lam’alangayɛ kadimola lo dimbola nɛ: Shi kakianɛ lokuke lambokodihwɛ otsha l’olimu w’ombatshi mboka?
[Caption on page 4]
Dikongelo dia wenya dia kamba oko ombatshi mboka wa pondjo— Wenya Wahombama: Wenya 17 lo lomingu
[Caption on page 4]
Lushi lɔmɔtshi la lo lomingu la wikɛndɛ
Lushi Wenya
Lushi la Tanu 8
Lushi la Samalo 6
Lushi la Lomingu 3
Wenya Tshɛtshɛ: 17
[Caption on page 4]
Wikɛndɛ ehende la lushi la samalo
Lushi Wenya
Lushi la Hende 7
Lushi la Nɛi 7
Lushi la Samalo 3
Wenya Tshɛtshɛ: 17
[Caption on page 4]
Wikɛndɛ esato la lushi la lomingu
Lushi Wenya
Lushi l’Ɔtɔi 5
Lushi la Sato 5
Lushi la Tanu 5
Lushi la Lomingu 2
Wenya Tshɛtshɛ: 17
[Caption on page 4]
Akɔlɔ ahende la wikɛndɛ
Lushi Wenya
Lushil’Ɔtɔi 3
Lushi la Sato 3
Lushi la Samalo 8
Lushi la Lomingu 3
Wenya Tshɛtshɛ: 17
[Caption on page 4]
Salaka ekongelo kayɛ hita k’ombatshi mboka wa pondjo
Lushi Wenya
Lushi l’Ɔtɔi
Lushi la Hende
Lushi la Sato
Lushi la Nɛi
Lushi la Tanu
Lushi la Samalo
Lushi la Lomingu
Wenya Tshɛtshɛ: 17