Onde Tayowokamba Nto?
Leeta Lokina Le Ambatshi Mboka Wa Tshanda—Etenyi Ka 1
1 Onde tayowokamba nto? Kamba na? Onde tayokamba olimu w’ombatshi mboka wa tshanda lo nshi y’Eohwelo? Dikatshi di’okotsha di’Olimu Aso wa Diolelo wa Ngɔndɔ ka Sato 1997 akakotola yambalo yaso l’ɔtɛ a dui adiɔ wa lɔ̂ka w’ɔnɛ: “Toyange Ambatshi Mboka wa Tshanda 100 000.” Taki l’eshikikelo ɔnɛ nyayɔsa leeta lɔsɔ la nɛmɔ. Lam’akasanganyema alapɔlɔ w’olimu wa Ngɔndɔ ka Sato 1997, takangɛnangɛna dia mɛna ɔnɛ apandjudi 3 965 (mbut’ate 122 lo Burundi, 444 lo Congo-Brazzaville ndo 3 399 lo Congo-Kinshasa) wakakambe olimu w’ombatshi mboka wa tshanda kânga mbakalɔmaka ta. Naka sho sanganya lofulo lɔsɔ la lɔnɛ l’ambatshi mboka wa pondjo 5 339 la wa lânde 86 wakakimɔ alapɔlɔ wa ngɔndɔ kɛsɔ, sho mɛnaka dia suke la % 16 (Burundi: % 12; Congo-Brazzaville: % 21) y’apandjudi tshɛ waki l’olimu w’ombatshi mboka. Onde tayowokamba nto lo nshi y’Eohwelo nyɛ?
2 Tekɔ lo mandola wanɛ tshɛ wakadje wolo dia sambisha efula ɔnɔnyi wetshi lo Ngɔndɔ ka Nɛi. Mɛtɛ, tshɛ kanyu nyakasokoyama la ngandji kahanyanga wahɔ kokanyu Jehowa Nzambi l’asekanyu anto. (Luka 10:27; 2 Pet. 1:5-8) Apandjudi wele l’akambo wotshikitanyi wakayalɔngɔsɔla dia monga ambatshi mboka wa tshanda. L’etshumanelo kɛmɔtshi, apandjudi 51 wakonge ambatshi mboka ngɔndɔ kakɔ kâmɛ, l’atei awɔ aki ndo dikumanyi efula, mama kɛmɔ kaki la yana ya yimato ya ngɔndɔ 15, kadiyɛso kɛmɔtshi kakamɔ oma l’olimu ande ko ndjokondja okina wa kambaka tshenyi ya lushi, olimu wawosha diaaso dia monga ombatshi mboka, kâmɛ ndo kadiyɛso kɛmɔtshi kaya osombe kahatongaka ombatshi mboka ndoko lushi. Omendji w’otshimbedi akafunde ate: “Wolo wa mamba wambodjama l’esambishelo. . . . Dui sɔ kema la shɛngiya paka lo mbilo keto koko ndo tshumanelo diambolola l’ohetoheto. Anangɛso wekɔ l’ɔngɛnɔngɛnɔ dia mbeyana dimɛna ndo dia mɛna etombelo w’ɛlɔlɔ l’olimu.”
3 Akɛnda kotshikala l’ɔnɔngɔ akɔ ɔnɔnyi wetshi lo Ngɔndɔ ka Nɛi. Opandjudi ɔmɔ wa omoto w’ɛnɔnyi 13 wahatabatizama akakongɛka l’asolo lokoloko etena kayondɛnya djembetelo ya ndjakimɔ kande le Jehowa. L’ɔkɔngɔ wa nde batizama lo Ngɔndɔ ka Hende, nde akafunde dia saki kande ka monga ombatshi mboka wa tshanda lo Ngɔndɔ ka Nɛi ate: “Lam’ele ndoko ɛngɔ kakashimbe nto l’etena kɛsɔ, lakakimɔ dɛmandɛ diami mbala kakɔ ɔtɔi. . . . Tototetsha tena dia diambo efula ngasɔ otondonga aha leeta lanyu loludi la ngandji la monga ambatshi mboka. Lekɔ la lowando efula le Jehowa dia mbishami diɛsɛ dia monga l’atei w’apandjudi 100 000 waketawɔ leeta lɔsɔ.” Nde akayadjɛ oyango wa kamba nto.
4 Ondo wɛ aki l’ɔnɔngɔ w’apandjudi 3 965 wakakambe olimu w’ombatshi mboka wa tshanda ɔnɔnyi wetshi lo Ngɔndɔ ka Nɛi, kana 6 721 lo Ngɔndɔ ka Tanu, kana nto 8 685 lo Ngɔndɔ ka Samalo. Onde wɛ ayowokamba nto ɔnɔnyi ɔnɛ? Naka wɛ kokoka monga ombatshi mboka ɔnɔnyi wetshi lo Ngɔndɔ ka Nɛi, onde wɛ koka monga ɔnɔnyi ɔnɛ? Onde tayolekanya lofulo l’ambatshi mboka wa tshanda 8 260 wakonge lo Ngɔndɔ ka Samalo lo 1997 (kana 141 lo Ngɔndɔ k’Enanɛi 1997 la Burundi; 444 lo Ngɔndɔ ka Nɛi 1997 lo Congo-Brazzaville)? Lofulo lɔsɔ l’ambatshi mboka wa tshanda mbamboleka tshɛ lo mbilo kaso k’otondo.
5 Kanyiya Ɔlɔlɔ lo Ngɔndɔ ka Nɛi la ka Tanu: Ɔnɔnyi ɔnɛ, Eohwelo kayosalema Lushi la Samalo, Ngɔndɔ ka Nɛi 11, diɔ diakɔ diele Ngɔndɔ ka Nɛi ngɔndɔ ka dimɛna efula ka ndjasha efula l’olimu w’esambishelo. (2 Kor. 5:14, 15) Lo nshi 11 y’etatelo ka ngɔndɔ, tayoyasha lo mbelɛ anto tshɛ walanga dia vɔ ndja lo losanganya l’Eohwelo. Naka wɛ ekɔ lo sangoya dia monga ombatshi mboka wa tshanda lo Ngɔndɔ ka Tanu, kete takimwe dɛmandɛ diayɛ k’ɔlɔmɔ la ntondo ka datɛ dialangayɛ tatɛ.—1 Kor. 14:40.
6 Lam’ele Ngɔndɔ ka Tanu kekɔ la nshi ya Samalo tshanu ndo ya Mingu tshanu, honga wolo le apandjudi wɔtɔ kalasa kana wanɛ wakamba olimu wonya w’otondo dia vɔ monga ambatshi mboka wa tshanda ngɔndɔ kɛsɔ. Naka wɛ ntsha ekongelo ka sambishaka wenya dikumi lo wikɛndɛ akɔ etanu, kete ayotshikala paka wɛ nyanga wenya 10 eto kete wenya 60 walɔmbama ambokoka.
7 Oyadi lo Ngɔndɔ ka Tanu kana ka Samalo, tayosha anto Tshoto y’Etangelo la Réveillez-vous ! Dui sɔ la dia keketsha efula l’atei aso dia monga ambatshi mboka. Lande na kataso ngasɔ? Nɛ dia periodikɛ bu wolo lo mbisha onto (oshinga amboholɔ ndo polɔ) ndo ekɔ dimɛna ndjisha anto. Yɔ sunganaka lo weho tshɛ w’esambishelo: lo luudu la luudu, lo makashinyi la makashinyi, l’ɛsɛsɛ, l’ahole wakitshawɔ mituka ndo l’ahole akina wasambishaso lo tshakitudi. Kɛnɛ koleki tshɛ ele, Tshoto y’Etangelo la Réveillez-vous ! sukɛka akambo wa mɛtɛ wendana la Diolelo. Yɔ kotolaka yambalo y’anto l’okotshamelo wa pɔlɔfɛsi ya lo Bible, lo mɛnya ɔnɛ Diolelo dia Nzambi diekɔ lo mbolɛ. Yɔ sɛngiyaka ndo nsɛnɔ y’ambadi ayɔ, nɛ dia yɔ tɛkɛtaka di’ehomba wele l’anto mɛtɛ. Naka sho kanyiya woho wakasɛngiya tojurunalɛ tɔsɔ t’ohomba efula nsɛnɔ yaso, kete tayosokoyama dia tikahɛ anto efula kokokiso kahanya lo Ngɔndɔ ka Tanu la ka Samalo.
8 Tekɔ lo mɛna l’alapɔlɔ dia tshumanelo efula diambɔmɔtsha lokema la periodikɛ. Tɛnya dia sho ngɛnangɛnaka wenya ndo falanga yakimɔma dia ndjifunda ndo tatoyitshikake dia yɔ monga lônge hota. Tohɔ nto dia nunu di’anto w’etema ɛlɔlɔ wekɔ l’ohomba wa periodikɛ shɔ dia mbeya akambo wa mɛtɛ. (Joa. 8:31, 32) Ɔnkɔnɛ, tambokeketsha tshumanelo tshɛ diɔmɔtshisha periodikɛ, djekoleko emendji w’olimu, ekambi w’olimu wele l’ɔkɛndɛ wa periodikɛ ndo anɔmbɔdi wa wekelo wa dibuku, dia vɔ mɛnya ɛnyɛlɔ dia shidiya periodikɛ shɔ. Toyatshutshuya dia ntsha ngasɔ lo kamba oko ambatshi mboka wa tshanda.
9 Dia wɛ ndjalɔngɔsɔla di’okahanyelo ɔsɔ wa woke wa periodikɛ, ayonga ɔlɔlɔ wɛ nyomenda asawo anɛ: “Tshoto y’Etangelo la Réveillez-vous ! Akambo wa Mɛtɛ lo Wonya Wasungana” (Tshoto y’Etangelo ya Ngɔndɔ ka Ntondo 1, 1994) la “Tɔlɔngɔsɔlɛ Sawo Diaso Shamɛ dia Mɛnyanya Periodikɛ” (Olimu Aso wa Diolelo wa Ngɔndɔ ka Dikumi l’Ɔtɔi 1996).
10 Dikumanyi Mɛnyaka Ɛnyɛlɔ: La saki ka kimanyiya lokema l’apandjudi wakonge ambatshi mboka ɔnɔnyi wetshi lo Ngɔndɔ ka Nɛi, dikumanyi dia l’etshumanelo kɛmɔtshi wakalɔngɔsɔla dia Samalo kɛmɔ ka lo ngɔndɔ monga lushi l’olimu wa lânde le etshumanelo k’otondo. Wakɔshi tɛdikɔ dia ntsha randevu w’esambishelo mbala efula lo wenya wotshikitanyi lushi lakɔ, dia mbisha etshumanelo k’otondo diaaso dia sambisha lo weho wotshikitanyi. Vɔ wakasambisha l’ahole wandawɔ ekanda, l’ɔsɛsɛ, lo luudu la luudu, wakembola anto, wakafundɛ anto mikanda ndo wakasambisha lo telefɔnɛ. Apandjudi wakasukɛ yɛdikɔ shɔ dimɛna efula: 117 wakasambisha lushi lakɔ. Wakasambisha tshɛtshɛ wenya 521 ndo wakasha anto periodikɛ, tobukubuku ndo abuku tshɛtshɛ 617! Ohetoheto waki Lushi la Samalo lɔsɔ akakome polo ndo Lushi la Lomingu, ko lofulo l’anto wakaye lo Losanganya la Dako dia lo Sɛkɛ la la Wekelo wa Tshoto y’Etangelo lakadɛ hakoke.
11 Lo Ngɔndɔ ka Nɛi la ka Tanu, lo Losanganya tshɛ l’Olimu, pombaka mboholaka etshumanelo wonya ndo dihole diayohomana anto lomingu layaye dia ntshɔ la tosambisha, djekoleko naka tɛdikɔ tokina tambɔsama lâdiko dia tɔnɛ takakongɛma. Ambatshi mboka wa pondjo kâmɛ ndo apandjudi wahonga ambatshi mboka wa tshanda wambokeketshama dia sukɛ esambishelo ka l’olui naka wekɔ la diaaso. (Etenyi kayela lo Ngɔndɔ ka Tanu.)
“Oyadi wesanu akɔna wele layɛ, naka wɛ ambobatizamaka, mbeyamaka oko onto lele la lɔkɛwɔ l’ɔlɔlɔ ndo koka kotsha wenya 60 lo ngɔndɔ l’esambishelo, ko wɛ nangaka kamba oko ombatshi mboka wa tshanda ngɔndɔ ɔtɔi kana efula, kete dikumanyi dia l’etshumanelo kanyu wayetawɔ dɛmandɛ diayɛ dia monga la diɛsɛ sɔ di’olimu.” — Organisés pour bien remplir notre ministère, lɛkɛ 114.
[Caption on page 5]
[Box on page 5]
Onde Wɛ Koka Monga Ombatshi Mboka wa Tshanda?
[Caption on page 6]
[Box on page 6]
Ekongelo Ka Wenya Dia Monga Ombatshi Mboka Wa Tshanda
Diɛnyɛlɔ Dia Sambisha Wenya 15 Lo Lomingu
Pindju—Oma lo Lushi l’Ɔtɔi Polo la Samalo
Lushi la Lomingu mbeyaka mbɔtɔ lo dihole dia lushi tshɛ
Lushi Etena Lofulo la Wenya
L’Ɔtɔi Pindju 2 h 30
La Hende Pindju 2 h 30
La Sato Pindju 2 h 30
La Nɛi Pindju 2 h 30
La Tanu Pindju 2 h 30
La Samalo Pindju 2 h 30
Wenya Tshɛtshɛ: 15
Nshi Hiende y’Etondo
Nshi hiende yalangayɛ l’atei a lomingu
Lushi Etena Lofulo la Wenya
La Sato Lushi l’Otondo 7 h 30
La Samalo Lushi l’Otondo 7 h 30
Wenya Tshɛtshɛ: 15
Akɔlɔ Ahende la Wikɛndɛ
Akɔlɔ ahende walangayɛ l’atei a lomingu
Lushi Etena Lofulo la Wenya
L’Ɔtɔi Dikɔlɔ 1 h 30
La Sato Dikɔlɔ 1 h 30
La Samalo Lushi l’Otondo 8
La Lomingu Tshenyi ya Lushi 4
Wenya Tshɛtshɛ: 15
L’Ɔkɔngɔ a Midi l’Atei a Lomingu la Lushi la Samalo
Lushi la Lomingu kokaka mbɔtɔ lo dihole dia lushi tshɛ
Lushi Etena Lofulo la Wenya
L’Ɔtɔi L’Ɔkɔngɔ a Midi 2
La Hende L’Ɔkɔngɔ a Midi 2
La Sato L’Ɔkɔngɔ a Midi 2
La Nɛi L’Ɔkɔngɔ a Midi 2
La Tanu L’Ɔkɔngɔ a Midi 2
La Samalo Lushi l’Otondo 5
Wenya Tshɛtshɛ: 15
Ekongelo Kami Dimɛ k’Esambishelo
Nshikikɛ lofulo la wenya wayoyosalaka l’etena l’etena
Lushi Etena Lofulo la Wenya
L’Ɔtɔi
La Hende
La Sato
La Nɛi
La Tanu
La Samalo
La Lomingu
Wenya Tshɛtshɛ: 15
[Caption on page 5]
Onde Tayowokamba Nto?
Leeta Lokina le Ambatshi Mboka wa Tshanda—Etenyi 2
Diewoyelo: Takasɛdingola etenyi ka ntondo l’Olimu Aso wa Diolelo wa Ngɔndɔ ka Nɛi, 1998. Etenyi kayela tɔ kɛnɛ:
12 Omendji w’olimu ayohomba mɛnana l’ɔnangɛso lashana mbilo dia mbɔsa tɛdikɔ dia kamba lo nyɛ yahaleke kindjakindjama. Kanyoleke ndjasha lo nyanga wanɛ wahatanema la ngelo ndo lo sambisha l’ɛsɛsɛ la lo waa makashinyi. Kokaka tɛtɛ di’esambishelo ka la dikɔlɔ, djekoleko lo wedja wayotshikitana wenya samalo ka ntondo ka lo Ngɔndɔ ka Nɛi. Pombaka nɔmba periodikɛ kambe dia kamba la yɔ efula lo Ngɔndɔ ka Nɛi la ka Tanu.
13 Apandjudi Efula Kokaka Mbôkamba: Etelo ka ntondo ka lo dɛmandɛ dia monga ombatshi mboka wa tshanda mbutaka ɔnɛ: “Ngandji kokami Nzambi la saki kami ka kimanyiya anto akina dia vɔ mbeka dia mbeya Jehowa l’asangwelo ande woludi la ngandji tshutshuyakami dia fudia olimu ami w’esambishelo, lo ndjafundja oko ombatshi mboka wa tshanda.” Ngandji kokaso Jehowa la saki ka kimanyiya anto akina lo nyuma mbatotshutshuya dia sho ndjakimɔ. (1 Tim. 4:8, 10) Di’onto monga ombatshi mboka wa tshanda, nde pombaka batizama, monga la lɔkɛwɔ l’ɔlɔlɔ ndo monga l’akoka wa sambisha wenya 60 lo ngɔndɔ. Naka onto tshɛ l’atei aso menda wesanu wele lande, shi amɔtshi wahatongaka ambatshi mboka wayokoka monga ɔnɔnyi ɔnɛ lo Ngɔndɔ ka Nɛi la ka Tanu?
14 Anto efula lo tshumanelo wayɛna dia vɔ lawɔ koka monga ambatshi mboka etena kɛnawɔ anto akina wele la wesanu oko vɔ wambonga. Ana wa kalasa, esombe w’anto, Akristo wakamba olimu wa wonya w’otondo, kâmɛ ndo dikumanyi l’ekambi w’olimu, l’anto akina wakakambe olimu w’ombatshi mboka wa tshanda dimɛna. Omoto ɔmɔtshi lotshukami laki l’ana ahende ko akakambaka ndo olimu wa wonya w’otondo akasambisha wenya 60, akasha anto periodikɛ 108, ndo akatatɛ mbeka l’anto 3 Bible lo ngɔndɔ ɔtɔi kakandonge ombatshi mboka wa tshanda. Ngande akandatshe na? Nde akasambishaka lo mbilo kaki suke la lɛnɛ akambande lo wonya watondɔlɛka la midi l’olimu, nde akasambishaka lo mikanda, ndo l’ahole watowokitshaka mituka la l’ɛsɛsɛ. Lomingu tshɛ nde akasambishaka kâmɛ l’etshumanelo lushi lakinde kokambaka. Nde ɔnɛ lakafɔnyaka ntondo ɔnɛ olimu w’ombatshi mboka wa tshanda ekɔ oyango wahandakokaki kotsha, oma l’ekeketshelo k’anto akina l’ekongelo k’oshika, nde akalɛmbia wekamu tshɛ.
15 Yeso akashikikɛ ambeki ande ate: ‘Lɔkɔhɔ lami lekɔ tefutefu ndo oshikɔ ami wekɔ osadi.’ (Mat. 11:30) Ɔsɔ aki ɔtɛ a dui wa sawo dimɔtshi diakeketsha efula diakatombe lo Tshoto y’Etangelo ya Ngɔndɔ ka Divwa 1, 1995. Yɔ mbutaka dikambo dia kadiyɛso kɛmɔ kakatshimbaka yimba wonya tshɛ l’olimu wa wonya w’otondo. Onde nde akakanyiyaka ɔnɛ nde hakambaki olimu w’ombatshi mboka wa tshanda ndoko lushi? Kema. Mɛtɛ, nde akongaka ombatshi mboka wa tshanda ngɔndɔ tshɛ. Lande na? Nɛ dia nde akɛnyi ɔnɛ olimu ɔsɔ akôkimanyiyaka dia nde memala lo wɛdimo. Kimanyiya anto lo vɔ mbeka akambo wa mɛtɛ wele lo Bible ndo mbaɛna watshikitanya nsɛnɔ yawɔ dia mbetawɔma le Nzambi aki kiɔkɔ y’ɔngɛnɔngɛnɔ wa mamba lo lɔsɛnɔ lande l’ohanuhanu.—Tuk. 10:22.
16 Oyadi kakɔna tshɛ kahomba onto ndjahombia ndo etshikitanu tshɛ wahombande ntsha dia monga ombatshi mboka, kɛsɔ tshɛ futamaka oma l’ɛlɔlɔ wakondjande l’olimu akɔ. Kadiyɛsɔ kɛmɔtshi akafunde l’ɔkɔngɔ a kamba olimu w’ombatshi mboka wa tshanda ate: “Vɔ wakakimanyiya dia dimi ndeka nyanga dia kimanyiya akina ndo di’aha dimi ndjakanɛka. . . . Lambɔlɔmba wanɛ wakoka dia vɔ mbôkamba.”
17 Ekɔ Ohomba Monga l’Ekongelo ka Wenya ka Dimɛna : Lo lɛkɛ 7 l’Olimu Aso wa Diolelo wa Ngɔndɔ ka Nɛi 1998, takasangola toho t’ekongelo ka Wenya taki l’Olimu Aso wa Diolelo wa Ngɔndɔ ka Sato 1997. Ondo kɛmɔtshi sunganaka le yɛ lo ndjela wesanu ayɛ. Lam’adiendayɛ nto, sɛdinga elimu ayɛ watotshaka ngɔndɔ tshɛ. Naa elimu wahombayɛ ntsha la ngelo wakoka ntshama ntondo ka wɛ monga ombatshi mboka kana wakokayɛ tokotshika ko ndjotsha l’ɔkɔngɔ w’olimu ayɛ na? Onde wɛ koka mbɔsa wenya ɛmɔtshi watoyetshaka lo tɔkɛnyɔ la l’awui akina? Lo dihole dia mendaka paka wenya 60 wahombayɛ sambisha, ntsha ekongelo kayɛ ka wenya lo lushi kana lo lomingu. Wenya 2 eto lo lushi kana 15 lo lomingu mbalɔmbama le ombatshi mboka wa tshanda. Enda dikongelo dia wenya dioshawɔ dingo, ko wɛ mbɔsa bikɛ dia menda kɛnɛ kayoleka sungana le yɛ ndo le nkumbo kayɛ.
18 Etombelo w’ɔlɔlɔ ndo woho wakasukɛ etshumanelo olimu w’ɔnɔnyi wetshi lo Ngɔndɔ ka Nɛi akadiya ohetoheto w’ombatshi mboka ɔmɔtshi wa pondjo, ko nde akafunde ate: “Losaka heyama l’ekeketshelo kanyu koludi la ngandji dia mbidja weolo dia sukɛ olimu w’ombatshi mboka wa tshanda. . . . Dikongelo dia wenya diakanyɛnya diakakimanyiya apandjudi efula wahatongaka ambatshi mboka dia vɔ mɛna ɔnɛ vɔ koka kamba olimu akɔ. . . . Lekɔ l’ɔngɛnɔngɛnɔ heyama dia monga l’ɔlɔngɔswamelo waki Jehowa ndo ndjela ɛlɔmbwɛlɔ koludi la ngandji k’ɔhɔmbɔ wa kɔlamelo ndo wa kɛsɔ.”
19 Tukedi 21:5 toshikikɛka ɔnɛ: ‘Asangwelo wa kanga tshete, watôkundjiyaka diangɔ efula.’ Tukedi 16:3 tokeketshaka ɔnɛ: ‘Ɛkamake Jehowa l’elimu ayɛ tshɛ. Ko asangwelo ayɛ wayoshikikala shikaa.’ Mɛtɛ, naka tayɔsa yɛdikɔ yaso l’ɔkɔngɔ wa mbutɛ Jehowa lo dɔmbɛlɔ ndo naka tayoyaɛkɛ tshɛ le nde dia nde tokimanyiya dia ndjikotsha, kete tayokoka kamba olimu w’ombatshi mboka aha la kandakanda. Ondo l’ɔkɔngɔ wa sho mɛna ɔnɛ ekongelo kaso ka wenya ka monga ombatshi mboka wa tshanda kekɔ dimɛna efula ngɔndɔ ɔtɔi kana hiende, tayofatola lo kiombo yele lo dɛmandɛ di’olimu ɔsɔ yata ɔnɛ: “Fatola lanɛ kana wɛ nangaka tetemala kamba oko ombatshi mboka wa tshanda edja tshɛ keyɛ la diaaso.” Oyadi kakɔna tshɛ, sho kokaka nɔngɔsɔla dia monga ombatshi mboka wa tshanda nto lo Ngɔndɔ k’Enanɛi, nɛ dia ngɔndɔ kɛsɔ kayonga la Samalo tshanu ndo Nshi ya Mingu tshanu. Ɔnkɔnɛ, onto tshɛ ayoshidiya ɔnɔnyi wa teokrasi la ndjatshutshuya dia sambisha efula lo ndjela akoka ande.
20 Yeso akatatshi ate: “One lambetawo, ndu ndi ayutsha elimu watumutshaka. Ndu elimu wuleki ene mbayundutsha.” (Joa. 14:12) Tekɔ la diɛsɛ di’ɔngɛnɔngɛnɔ dia monga ekambi kâmɛ la Nzambi l’etena kɛnɛ katakotshama pɔlɔfɛsi kɛsɔ lo yɛdikɔ ya woke. Etena kɛnɛ kasungana dia sambisha lokumu l’ɔlɔlɔ l’ohetoheto w’efula, lo ndjatshungolɛka etena k’ɔlɔlɔ dia kamba olimu ɔsɔ. (1 Kor. 3:9; Kol. 4:5) Mongaka ombatshi mboka wa tshanda mbala tshɛ keso la diaaso ekɔ yoho mɔtshi ya dimɛna efula ya sho kamba lotumu laso l’apandjudi a Diolelo. Tekɔ lo kongɛ l’asolo lokoloko dia mɛna lo yɛdikɔ yakɔna yayemba ambashi mboka wa tshanda osambu wa lotombo ɔnɔnyi ɔnɛ. (Osam. 27:6) Lam’akanyiyaso etombelo w’ɔnɔnyi wetshi lo Ngɔndɔ ka Nɛi, sho ndjambolaka shate: ‘Onde tayowokamba nto?’ Tekɔ l’eshikikelo ɔnɛ ayonga ɔsɔku!
“Oyadi wesanu akɔna wele layɛ, naka wɛ ambobatizamaka, mbeyamaka oko onto lele la lɔkɛwɔ l’ɔlɔlɔ ndo koka kotsha wenya 60 lo ngɔndɔ l’esambishelo, ko wɛ nangaka kamba oko ombatshi mboka wa tshanda ngɔndɔ ɔtɔi kana efula, kete dikumanyi dia l’etshumanelo kanyu wayetawɔ dɛmandɛ diayɛ dia monga la diɛsɛ sɔ di’olimu.” — Organisés pour bien remplir notre ministère, lɛkɛ 114.
[Caption on page 5]
[Box on page 5]
Onde Wɛ Koka Monga Ombatshi Mboka wa Tshanda?