Onde wɛ kambaka l’oyango ɔmɔtshi?
1 Jehowa ekɔ Nzambi kele la sangwelo. (Is. 55:10, 11) Sho keketshamaka dia mbôkoya. (Ef. 5:1) Ndo sho pombaka mɛnya dikambo sɔ lo yoho yakambaso olimu aso. Diɔ diakɔ diele sunganaka vɔ kombola ɔnɛ: “Onde wɛ kambaka l’oyango ɔmɔtshi?”
2 Oyadi esambishelo ka lo soko la soko, ka lo tshakitudi kana okahanyelo w’ekanda, tshɛ ekɔ olimu wa Nzambi wakambaso l’oyango ɔmɔtshi. Koko, aha wɛ mbohɛ ɔnɛ olimu aso kema wa sambisha oto koko ndo wa mbetɛ anto ambeki. (Mat. 28:19, 20) L’ɔkɔngɔ wa monɛ ntɔngɔ y’akambo wa mɛtɛ wa Diolelo, sho pombaka kawola dia toyitɛ ashi ndo ndjikokɛka mbala la mbala etena kɛnɛ kendɛso le Jehowa dia nde mbodia ntɔngɔ yakɔ. (1 Kor. 3:6) Sho pombaka ndjasha l’otema ɔtɔi dia kalolaka dia tênda anto ndo tatɛ mbeka lawɔ Bible.
3 Fudia olimu ayɛ: Mbala tshɛ, onto mongaka l’ɔngɛnɔngɛnɔ efula lam’endande olimu wakandakambe ndo nde toyatɛka ɔnɛ: “Lamboshidiya kɛnɛ kakamasangoya dia ntsha.” Oko wofundamidiɔ lo 2 Timote 4:5, Paulo akate ate: ‘Okotshake olimu ayɛ dimɛna.’ Dia wɛ kotsha olimu ayɛ dimɛna, wɛ pombaka ntshaka tshɛ dia mbesa saki kakɛnya anto. Lo ekongelo kayɛ k’olimu ka lomingu la lomingu, sɔna etena shikaa kahombayɛ ntshɔka dia tembola anto. Kamba l’oyango wa pemba tatɛ mbeka Bible l’anto walanga akambo w’ɔlɔlɔ. Oyango ɔsɔ mbahombayɛ monga lawɔ wonya weyɛ l’esambishelo.
4 Mbola apandjudi nganɛ watowoyaokaka lam’abatizama ambeki awɔ wa Bible lo losanganya lɔmɔtshi la woke. Vɔ tɔngɛnangɛnaka efula oko watɔngɛnangɛnaka wanɛ wolongodi batismu. Vɔ wakakotsha oyango ɔmɔtshi wa woke! Opandjudi ɔmɔtshi wetɛ anto ambeki akalembetshiya dikambo sɔ ate: “Mbetɛ anto ambeki kɛdikɛdi ndeka tombola Jehowa. Ɔsɔ ekɔ tshondo ya lɔsɛnɔ le wanɛ wetawɔ akambo wa mɛtɛ. Dimi nangaka ndakanya anto akina akambo wa mɛtɛ—ɔsɔ ekɔ olimu wa dimɛna efula! . . . Efula ka wanɛ wamboyɔsa yɛdikɔ ya mboka Jehowa ngandji wamboyokoma angɛnyi ami wa mamba.”
5 Ohokanyiya dia wɛ ambokimanyiya onto dia nde ndjâkimɔ le Jehowa! Ɔsɔ ekɔ mɛtɛ dikambo di’ɔngɛnɔngɛnɔ efula! Elowa wa ngasɔ ndja oma l’olimu wokambemi l’oyango ɔmɔtshi.—Kol. 4:17.