Ambutshi: nyosha ananyu ɛnyɛlɔ k’ɔlɔlɔ
1 Ɔtɛkɛta waki Nzambi totɛka dia “Shi [la nyangu] untu ololo ayutamanya ngenangena.” (Tuk. 23:24, 25) Ande ɔtshɔkɔ le ambutshi wakasha anawɔ ɔnyɛlɔ k’ɔlɔlɔ lee! Ɔnangɛso ɔmɔtshi la lo kɔmite ka filialɛ ka lo wodja ɔmɔtshi akate dia ambutshi ande ate: “Akambo wa mɛtɛ waki tshondo ya lɔsenɔ lakiwɔ, ndo dimi lawɔ nangaka mbaetsha tshondo ya lɔsɛnɔ lami.” Kakɔna kahomba ana mɛnaka le ambutshi awɔ na?
2 Loshilambo la dilɛmiyɛlɔ di’efula: Ambutshi wekɔ l’ɔkɛndɛ wa tɔtɔmiya mbekelo y’ɛlɔlɔ le anawɔ. Loshilambo hetshama paka l’onyɔ oto, koko vɔ kokaka lieka ndo lo menda anto akina la mbaokoya. Ko lâsɔ, mbekelo yakɔna yele la yɛ na? Onde ananyu nyokaka nyata ɔnɛ: “okimwe,” “lam’alangayɛ” kana “losaka”? Onde nyu nɛmiyanaka l’atei a nkumbo? Onde nyu tohokamɛka akina wonya watɛkɛtawɔ? Onde nyu tohokamɛka ananyu etena kanyotɛwɔ dikambo dimɔtshi? Onde nyu mongaka la mbekelo y’ɛlɔlɔ ya ngasɔ oyadi lo Mbalasa ka Diolelo kana la ngelo kanyu, lɛn’enyu nyamɛ?
3 Lonyuma la nge ndo olimu wa l’ohetoheto: Ɔnangɛso ɔmɔtshi lakakambe olimu wa lo tena tshɛ ɛnɔnyi ndekana 50 mbohɔka ate: “Mama la Papa waki ɛnyɛlɔ ka dimɛna efula lo woho wakawɔsaka nsanganya la nɛmɔ ndo wakiwɔ l’ohetoheto l’olimu w’esambishelo.” Woho akɔna wɛnyayɛ anayɛ ɔnɛ wɛ ndjakiyanyaka dikambo dia lonyuma la wa lo luudu layɛ na? Onde nyu sɛdingolaka divɛsa dia lushi la lushi kâmɛ? Onde nyu salaka wekelo wa lo nkumbo esangɔ l’esangɔ? Onde anayɛ kɛnaka adia Bible l’ekanda waki la Société? Kakɔna katowokaka etena katoyɔlɔmbaka Nzambi dikambo di’ase nkumbo? Onde wɛ tosawolaka l’anayɛ asawo wa mbaodja lo nyuma ndo awui w’ɛlɔlɔ wendana l’akambo wa mɛtɛ ndo wa l’etshumanelo? Onde nyekɔ la mposa ka wolo ka mbɔtɔka lo nsanganya tshɛ ndo nsambishaka kâmɛ lo nkumbo?
4 Ambutshi, nyokanyiya ɛnyɛlɔ kashanyu ananyu. Nyokietɛ ɛnyɛlɔ ka dimɛna efula ko vɔ wayokilama dimɛna lɔsɛnɔ lawɔ l’otondo. Wadi aki omendji w’eteta ɔmɔtshi laya l’ɛnɔnyi 70 l’ɛmɔtshi akate ate: “Ɛnyɛlɔ k’ɔlɔlɔ k’ambutshi ami w’Akristo kekɔ lo kimanyiyami polo nd’ɛlɔ kɛnɛ. Ndo lekɔ lo nɔmba Nzambi oma k’ɛse otema dia nde kimanyiyami dia dimi mɛnya lowando l’efula lele lami lo sango sɔ diakawatshikɛ lo kambaka ladiɔ dimɛna dimɛna lo nshi yayaye tshɛ.”