Ayoyotɛ ose Mizilima na?
1 Onde wɛ ambosambishaka ose Mizilima ɔmɔtshi? Naka ɔsɔku, kete ondo wɛ akɛnyi dia vɔ wekɔ la mbetawɔ ka wolo le Nzambi. Koko, vɔ haweye akambo efula lo kɛnɛ kendana la Paradiso kayonga lanɛ la nkɛtɛ oko wakadite amvutshi waki Jehowa. Sho nangaka mbaewoya elongamelo kɛsɔ kele laso. (1 Tim. 2:3, 4) Akambo wayela anɛ wayokokimanyiya dia wɛ mbeya mbâsambisha dimɛna.
2 Ase Mizilima wekɔ la mbetawɔ le Allah, mbut’ate Nzambi, ndo vɔ mbetawɔka ɔnɛ Mahɔmɛ (kana Muhamɛdi) ekɔ omvutshi waki Nzambi. Kɔrana mbele dibuku diawɔ di’ekila ndo ɔtɛmwɛlɔ awɔ mbelamɛka ɔnɛ Izilamɛ, tshɛkɛta yele la kitshimudi ɔnɛ “okitanyiya.” Kɔrana mbutaka ɔnɛ kashi la ɔtɛmwɛlɔ wa dikishi ekɔ kɔlɔ. Tɔ mbutaka ɔnɛ ekɔ paka Nzambi ɔtɔi ndo nde kema etenyi kɛmɔtshi ka lo Losato Losanto. Ndo nto, tɔ mbetshaka ɔnɛ anima havu, lowenga la dja lekɔ ndo paradiso kayonga l’olongo. Ase Mizilima mbetawɔka dia Bible ekɔ Ɔtɛkɛta waki Nzambi koko vɔ fɔnyaka ɔnɛ wakayokotshaka kana minya awui amɔtshi oma lɔkɔ. Koko, vɔ mbutaka ɔnɛ Kɔrana ekɔ paka woho wakawakikadimola oma l’ɔtɛkɛta wa ntondo, tɔ kekɔ pudipudi, hawonyisha kana kotsha awui amɔtshi.
3 Onga la yewo, la shɛnɔdi ndo oko ɔngɛnyi: Lam’asawolɛ l’ose Mizilima, onga oko ɔngɛnyi ande ndo onga la yewo. (Tuk. 25:15) Tohɛke dia ose Mizilima tshininalaka wolo lo wetshelo awɔ ndo vɔ mbekaka efula ka wetshelo akɔ wate kana oko ekongoso, aha la nyanga dia mbashihodia. Omalɔkɔ, kana la wɔ lomba lo wetshelo wa l’ɔtɛmwɛlɔ ndo mbaɛnya kɛnɛ kalembetshiya lolango la Nzambi hɔsama le wɔ oko dikambo dimɔtshi di’ohomba dia lo nyuma. (Romo 12:2) Dia kimanyiya ose Mizilima, pombaka monga la solo dia lotutsha ndo ndjadja lo dihole diande.—1 Kor. 9:19-23.
4 Paka wɛ mbewɔ tɔtɛkɛta takoka onto lele ose Mizilima ndjokɔfɔnya l’ose Lokristokristo. Lembetshiyande hwe dia wɛ kema oseka Mupɛ kana ose Asɔnyi, ndo ɔnɛ wɛ tshikitana la wɔ. Elɛka Bible ɔnɛ Dibuku diaki Nzambi wonya wenyu lo sawola. Lam’ele waa Mizilima hawɔngɛnangɛna tshɛkɛta y’ɔnɛ “Ɔnaki Nzambi,” hatonga dimɛna wɛ ndjitɛkɛta kana sawola la nde dikambo sɔ naka nde atahame lo nyuma. Koko, wɛ kokaka tɛkɛta dikambo dia Yeso, lo mbêlɛka ɔnɛ ɔprɔfɛta kana ɔkɛndji. Ewɔ awui wa tamanu. Naka wɛ ambɛna dia nde ambomɛ momala, ko wɛ mimɔ la loshilambo tshɛ aha la tshimbatshimba.
5 Ndeka ɔlɔlɔ wɛ sawola l’onto ɔtɔi koko aha djui y’anto. Mbala efula, ekɔ ɔlɔlɔ dia womoto sambisha osekande womoto, ndo pami sambisha onyande pami. Kânga mbele aha nshi tshɛ mbahomba ntshaka ngasɔ, ekɔ ɔlɔlɔ monga la shɛnɔdi. Ndo nto, ase Mizilima efula hawɔngɛnangɛna wamato wayalɔtsha kana wayalɛnga lo yoho ya tshambandeko kana ya wamɛnyi wamɛnyi. Akadiyɛso pombaka mbeya dikambo sɔ ɔlɔlɔ.—1 Kor. 10:31-33.
6 Akambo wakokaso sawola la wɔ: Tɛkɛta la nde kɛnɛ kendana la woke woke waki Nzambi ndo dia ngandji kande. Tengengake dia mbotɛ ɔnɛ wɛ ekɔ ombetawodi wa mɛtɛ, wetawɔ ɔnɛ Nzambi ka mɛtɛ ekɔ ɔtɔi (koko aha Losato Losanto), ndo ɔnɛ ɔtɛmwɛlɔ wa dikishi wekɔ kɔlɔ. Tɛkɛta la nde lo kɛnɛ kendana l’akambo wa kɔlɔ wambolola l’andja ɔnɛ, ɛnyɛlɔ oko: ata, ta di’ase ngelo, la lohetsho la lam’asa wanɛ wele bu lokoho ɔtɔi la demba ndo dungi pende diele le ase ɛtɛmwɛlɔ efula.
7 Biukubuku yele l’ɔtɛ a dui ɔnɛ Ɛlɔmbwɛlɔ ka Nzambi: Mboka Kaso k’Otsha lo Paradiso (l’Angɛlɛ) yayokolembetshiya akambo akina lo kɛnɛ kendana l’asawo wakoka kamba la yɛ dia tatɛ sawola l’ose Mizilima. Yɔ yakatondjama dia kotola yambalo y’ase Mizilima wanɛ wasɛna l’ahole wahawakoke mboka wɔma mbeka Bible.
8 Wɛ mbeyaka pemba la mbɔtwɛlɔ kɛnɛ:
◼ “Lekɔ lo ntsha tshɛ dia tɛkɛta l’ase Mizilima. Lakadia akambo amɔtshi wendana l’ɔtɛmwɛlɔ anyu ndo akambo wetawɔnyu, ko lakɛnyi dia ase Mizilima mbetawɔka Nzambi ɔtɔi ka mɛtɛ ndo amvutshi tshɛ. [Tshikande akadimole.] Dimi nangaka sawola la yɛ dikambo dia prɔfɛsiya kɛmɔtshi k’edjedja kata ɔnɛ nkɛtɛ kayokadimɔ paradiso. Onde dimi kokaka kadiɛ kɛnɛ kakafunde omvutshi? [Adia Isaya 11:6-9.] Divɛsa nɛ mboholakami divɛsa dimɔtshi diofundami lo Kɔrana diele lo biukubuku nyɛ.” Fola biukubuku Ɛlɔmbwɛlɔ ka Nzambi lo lɛkɛ 9, ndo adia awui wofundami l’alɛta wedima wata ɔnɛ anto w’ɔlɔlɔ wayokita nkɛtɛ. Naka nde ambɛnya saki, tetemala sawola la nde ndo nyɔkɛtshanya odingɔ 7 polo 9 lo wedi okina wa dikatshi. Tshikɛnde biukubuku yakɔ, ndo ɔsa yɛdikɔ ya ndjowembola nto.—Enda mbɔtwɛlɔ kekina l’Olimu Aso wa Diolelo wa Ngɔndɔ ka Sato, 1998 lɛkɛ 6, odingɔ 26.
9 Naka wɛ ambɔlɔmba onto ɔmɔtshi dia nyu sɛdingola biukubuku Ɛlɔmbwɛlɔ ka Nzambi, ayoleka dimɛna mbotɛ ɔnɛ dimi nangaka sho ndjosawolaka lo biukubuku nyɛ, koko aha ɔnɛ dimi nangaka sho mbeka Bible. Naka nyamboshidiya biukubuku shɔ, kete nde mbeyaka monga suke dia nyu mbeka biukubuku Kakɔna kana dibuku Ewo. Ekanda ekina wakatondjama paka dikambo di’ase Mizilima, oko ɛnyɛlɔ traktɛ kata ɔnɛ, Le chemin du paradis : comment le trouver ? ndo biukubuku Le temps de la vraie soumission à Dieu.
10 Lo mbeya akambo asɔ wetawɔ waa Mizilima ndo woho watowotshaka la ntondo k’akambo akɔ, sho kokaka mbeya sɔna ekanda wakokaso mbasha wonya weso lo mbasambisha. Tambolongamɛ dia Jehowa ayotetemala tshɔkɔla weolo wadjanyu dia kimanyiya weho w’anto tshɛ dia vɔ tɛndɛɛ lokombo la nde ndo shimbamɛ.—Etsha 2: 21.