Tokambe l’ekanda oko akanga a tomba
1 Ekongelo ka woho wa kamba l’ekanda kakatatɛ lam’akawakahanya kɔpi 6000 ya Tshoto y’Etangelo ya Ngɔndɔ k’Esambele 1, 1879 l’Angɛlɛ. Tatɛ oma lâsɔ, weho efula w’ekanda wakayofundama ndo kahanyema lo yɛdikɔ y’efula.
2 Olimu wakɛndakɛnda paka oma lo weshasha: Atete mingu efula, sho mala mboka ɔnɛ apandjudi kana anto wele la nsaki wayokondjaka ekanda aha paka la vɔ kimɔ lofulo lɔmɔtshi l’akuta. Koko, lam’ashaso onto ekanda, sho koka mbetawɔ weshasha wa la lolango dia sukɛ olimu w’esambishelo ka lokumu l’ɔlɔlɔ wasalema l’andja w’otondo. Tekɔ la mbetawɔ dia Jehowa ayɔtshɔkɔla ekongelo kɛsɔ k’oyoyo.—Enda lo Mateu 6:33.
3 Woho wayototshaka l’esambishelo: Tokambe la mbɔtwɛlɔ y’eshika dia memula nsaki k’onto. Naka onto hɛnya ndoko nsaki, kete ndoko ohomba wa mbosha okanda. Hatokoke nanya ekanda le anto wahɛnya ndoko nsaki. Koko, naka ɔtɛkɛtshi aso ambɛnya nsaki ndo ambetawɔ dia mbadia okanda, sho kokaka mboshawɔ. Lo yoho shɔ mbayotɔsɛnaka ɔlɔlɔ dia kambaka l’ekanda aso oko anto wele la lomba.
4 Lɔkɔngɔ wa wɛ mɛnya ɔtɛkɛtshi ayɛ okanda, wɛ kokaka mbuta wate: “Naka wɛ nangaka mbadia okanda ɔnɛ, kete layɔngɛnangɛna kotshikɛwɔ.” Endaka nde ambombola ate: “Oshinga awɔ?,” wɛ kokaka kadimola wate: “Sho hatonde okanda. Aha sondja mbasondjaso okanda ɔnɛ. Olimu aso wekɔ lo kambema lo wedja ndekana 230 oma le anto wayakimɔ vamɛ dia mbetsha anto akina woho wa kondja lɔsɛnɔ la pondjo. Naka wɛ nangaka kimɔ woshasha dia sukɛ olimu ɔsɔ kete layɔngɛnangɛna dia mbôlongola.”
5 Etena kashayɛ onto periodikɛ, wɛ mbeyaka monyiya wombola wendana la sawo dimɔtshi diele lɔkɔ ko mbotɛ ɔnɛ: “Dimi nangaka wɛ ndjoshola awui akina wendana la wombola ɔsɔ lo sawo nɛ. Naka wɛ kombolaka mbadia periodikɛ hiende nyɛ, kete layɔngɛnangɛna kotshikɛyɔ.” Naka nde ambetawɔ wɛ kokaka mbuta nto wate: “Dimi la mbetawɔ nte sawo nɛ diayokɔngɛnyangɛnya efula. Ndo dimi nangaka ndjokenda lomingu layaye dia ndjeya tokanyi tayɛ. Tshoto y’Etangelo tombaka l’ɛtɛkɛta 132 ndo lo lofulo lolekanyi 22000000 l’andja w’otondo. Olimu ɔsɔ kambemaka paka oma lo weshasha wa la lolango. Naka wɛ nangaka kimɔ yema ya woshasha dia sukɛ olimu ɔsɔ wa wetshelo kete tayetawɔ l’ɔngɛnɔngɛnɔ.”
6 Tengengake dia tɛkɛta dikambo dia weshasha nɛ dia vɔ mbakɛndjakɛndja olimu aso. Ɛnyɛlɔ, onto ɔmɔ lɛnya mposa mbeyaka kômbola ɔnɛ: “Onde nyekɔ lo takahɛ anto okanda ɔnɛ?” Wɛ koka mbôkadimola ɔnɛ: “Naka wɛ nangaka mbôwadja, ɔsawɔ. Koko lekɔ lo nanga kolembetshiya dimɛna dikambo di’olimu aso wakambema l’andja w’otondo ndo woho wakondjama falanga.” Sho kokaka mbôkiya ɔnɛ olimu aso wekɔ lo kambema l’andja w’otondo oma le Ɛmɛnyi wa Jehowa aha la vɔ nyanga kânga wahɔ. Sho koka kotola yambalo yande lo tshɛkɛta ya lo kiombokombo yele lo dikatshi diahende dia Tshoto y’Etangelo yata ɔnɛ, otombelo wa periodikɛ kɛnɛ, “ekɔ etenyi kɛmɔtshi k’olimu wa l’andja w’otondo wa ndakanya anto Bible, olimu wosukame oma lo weshasha wa la lolango.” Oma lâsɔ, sho koka mbotɛ ɔnɛ, naka nde nangaka kimanyiya Ɛmɛnyi wa Jehowa dia kamba olimu ɔsɔ lo wodja aso lo kimɔ yema ya woshasha, kete tayɔngɛnangɛna woshasha akɔ.
7 Onto koka mbetawɔ okanda mbala kakɔ ɔtɔi ko nde kôka losaka tsho ko minya ekolo. L’etena kɛsɔ, wɛ kokaka mbuta ɔnɛ: “Lekɔ l’eshikikelo nte wɛ ayɔngɛnangɛna okanda ongo. Anto efula ndjambolaka woho watomba akuta wakɛndjakɛndja olimu aso, lam’ele vɔ wekɔ lo kambema l’andja w’otondo. Efula ka l’atei a wanɛ wetawɔ ekanda aso mɛnyaka dia vɔ ngɛnangɛnaka kɛnɛ kekawɔ l’ekanda akɔ ko vɔ kimɔka yema ya woshasha dia sho tetemala mbakahanya. Naka anto wambetawɔ mbidja lonya, sho tolongolaka weshasha awɔ l’ɔngɛnɔngɛnɔ.”
8 Ngande wakokaso mbishola onto lele la nsaki ka mɛtɛ?:
Lo mɛtɛ, oyango aso kema wa takahaka ekanda okahakaha. Sho nangaka di’ekanda aso kotsha oyango awɔ, mbut’ate kimanyiya anto wele la nsaki dia mbeya asangwelo w’amɛna efula waki Jehowa. Ayoyala kɔlɔ naka tayotshika ekanda le wanɛ wahɔshi akambo wa lo nyuma la nɛmɔ. (Heb. 12:16) Dia nkahanya ekanda aso dimɛna, paka sho monga l’akoka wa mbishola ɔnɛ lele la nsaki ka mɛtɛ. Ko ngande watɛnamaka nsaki kakɔ na? Naka onto nangaka sawola la so, kete ɔsɔ ekɔ djembetelo ya dimɛna. Naka nde kohokamɛka la yambalo, kadimolaka wembola ayɛ ndo mbutaka lokanyi lande, kete nde ngɛnangɛnaka sawo diakɔ mɛtɛ. Naka nde kɔtɛkɛtshaka la loshilambo ndo oko ɔngɛnyi, kete nde mɛtɛ nangaka kohokamɛ. Naka nde takoyelaka lo wadielo ayɛ wa Bible, kete nde nɛmiyaka Ɔtɛkɛta wa Nzambi. Mbala efula ekɔ ohomba mimbola onto kana nde ayotadia ekanda wamboyowosha. Wɛ koka nto mbotɛ dia wɛ nangaka kalola dia ndjowenda dia ndjotetemala la sawo. Naka nde ambetawɔ, kete ɔsɔ ekɔ djembetelo kina yɛnya dia sawo diakɔ mbɔngɛnyangɛnyaka. Naka wɛ ambɛna tolembetelo tɔnɛ tɛnya di’onto ekɔ la nsaki ka mɛtɛ, wɛ koka nongamɛ di’ɔnɛ onto ɔsɔ ayokamba dimɛna l’oseka okanda tshɛ wayôwotshikɛ.
9 Otshikitanelo ɔnɛ wa lo yoho yaso ya kamba olimu ambonyomoleka mɛnya dia ‘sho bu oko efula k’anto wanɛ wanda okanda la ɔtɛkɛta wa Nzambi.’ (2 Kor. 2:17) Otshikitanelo ɔnɛ mɛnyaka nto dia sho kakitɔna l’andja ɔnɛ.—Joa. 17:14.
10 Lam’ele elanyelo ka Babilɔna ka Woke kaya suke, wambɔtɛmɔnya mpina weho tshɛ w’ɛtɛmwɛlɔ. Oyango aso woleki ele di’olimu ɔnɛ washa lɔsɛnɔ w’esambishelo ka Diolelo tetemala la kambema l’andja w’otondo aha la wekamu ndo dia anto efula nɔmbɔma otsha lo panda.—Mat. 24:14; Romo 10:13, 14.