Losanganya la distrikɛ la Ɛmɛnyi wa Jehowa la l’ɔnɔnyi 2006 lele l’ɔtɛ a dui ɔnɛ: “Etshungwelo kaya suke!”
1. Ngande wakɛnya ekambi wa Nzambi lowando lawɔ lo ɔtɛmwɛlɔ wa mɛtɛ lo nshi y’edjedja ndo diaaso diakɔna dia lânde dia woho akɔ wâmɛ diele laso ɛlɔ kɛnɛ?
1 Nkumekanga Hɛzɛkiya ka la Juda y’edjedja akatome akɛndji la mikanda dia mbelɛ anto dia vɔ ntshɔ lo losanganya la Jerusalɛma. (2 Ek. 30:6, 13) Kɛnɛ kakasale anto akɛnya dionga diawɔ lo kɛnɛ kendana la ɔtɛmwɛlɔ wa mɛtɛ. (2 Ek. 30:10-12) Lo ngɔndɔ yayaye, ekambi wa Jehowa wa nshi nyɛ wayonga la diaaso dia woho akɔ wâmɛ dia mɛnya lowando lawɔ l’oma k’ɛse otema lo diɛsɛ dia lânde dia nsangana kâmɛ dia tɛmɔla Jehowa. Mukanda ɔmɔtshi wakawatomɛ etshumanelo kanyu kelɛka dia mbɔtɔ lo losanganya la distrikɛ lele l’ɔtɛ a dui ɔnɛ: “Etshungwelo kaya suke.” Ngande wayoyokadimola lo leeta lɔsɔ?
2. Kakɔna kakokaso sala kakianɛ dia ndjoleka kondja wahɔ oma lo losanganya la woke?
2 Yalɔngɔsɔlaka oma ko kakianɛ: Dia ndeka kondja wahɔ oma l’ekongelo ka lo nyuma kele lo nɔngɔswama la ngandji tshɛ, sho pombaka monga lo losanganya l’otondo. La lomba tshɛ, tatɛ sala kakianɛ ɛlɔngɔswɛlɔ wahombama dia wɛ ndo nkumbo kayɛ mbɔtɔ lo nshi yakɔ shato tshɛ. (Tuk. 21:5) Ɛlɔngɔswɛlɔ wa ngasɔ mbeyaka mbidja ndo nɔmba owandji ayɛ w’olimu dikimɔ, kɛtshanya la olonganyi ayɛ wele bu Ɔmɛnyi wa Jehowa ndo kimanyiya ambeki ayɛ wa Bible dia vɔ mbɔtɔ lo nshi yakɔ tshɛ. Aha ndjosala awui anɛ w’ohomba lo minitɛ k’ekomelo. Koko, dja awui akɔ lo dɔmbɛlɔ diayɛ le Jehowa, lo ndjaɛkɛ ɔnɛ “ndi ayukutshela dikambu diako.”—Osam. 37:5.
3. Lande na kahombaso ndeka kamba kâmɛ la tɛdikɔ tambɔsama dikambo dia ohangelo aso?
3 Okongamelo wa Jehowa kambaka la wolo tshɛ dia ndjashikikɛ dia ahole wa panga wekɔ efula lo osomba tshɛ wasalema losanganya la woke. Lowando laso lo welo waha la ndjahombia wadja anangɛso wakamba la etete dia kimanyiya dia kotsha tɛdikɔ tɔsɔ, nɛmɔ diashaso anangɛso la akadiyɛso wayoya lo losanganya ndo woho walɛmiyaso ekongelo ka teokrasi pombaka totshutshuya dia ndeka kamba la atɔndɔ wotoshawɔ lo sawo nɛ.—1 Kor. 13:5; 1 Tes. 5:12, 13; Heb. 13:17.
4-6. a) Awui akɔna w’ohomba wahombaso nama lo yimba etena kayangaso pango, ndo lande na? b) Tɛdikɔ takɔna tahombama mbɔsama naka anangɛso ndo akadiyɛso wambohanga lo Mbalasa ka Diolelo? c) Awui akɔna amɔtshi wahomba sɛdingɔma dia mbɔtɔ lo losanganya la distrikɛ? (Enda kiombo yele lo lɛkɛ 4.)
4 Ohangelo: Mbala efula ɛlɔngɔswɛlɔ w’ohangelo wa lo osomba wayosalema losanganya mongaka lo mvudu y’anto (mvudu ya anangɛso la akadiyɛso), lo Mbalasa ya Diolelo kana le ase nkumbo. Listɛ l’ahole tshɛ wayosalema nsanganya layohanema lo dibaya diahanɛwɔ waewoyelo l’etshumanelo l’ɔkɔngɔ wa dikatshi di’okotsha nɛ sɛdingɔma lo Losanganya l’olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande tɔɔtɔ losanganya la l’ɔnɔnyi 2006.
5 Naka wɛ ayolanga tohanga laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litomɛ Departɛma diendana l’ohangelo lo osomba wayosalema losanganya. Lo listɛ lɔsɔ, nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde la onto akɔ naka laka owotɔ ande mbayondotohanga. Kɛsɔ ayokimanyiya anangɛso wakamba lo Departɛma diendana l’ohangelo dia kondja etena k’efula ka nyangɛ anto tshɛ pango. Kɔmite k’olimu ka l’etshumanelo pombaka sɛdingola akoka w’opandjudi tshɛ la ntondo ka tomɛ Departɛma diendana l’ohangelo listɛ. Naka wambotosha dihole dia sho panga, kete hatonga dimɛna dia sho shoamɛ ndjayangɛ dihole dikina dia todjasɛ laka ɔnangɛso okina kana laka ɔngɛnyi aso. Kɛsɔ ayetɛ ɔkɛndɛ w’anangɛso wakamba lo Departɛma diendana l’ohangelo wotsho. Koko, naka onto ayotodjasɛ nshi ya losanganya laka ose nkumbo kande lele bu ɔnangɛso la lo nyuma, kete atokimɔke lokombo lo listɛ l’anto walɔmba pango.
6 Ohangelo wa lo Mbalasa ka Diolelo: Tambolanga nyosha alako amɔtshi wendana la ohangelo wa lo Mbalasa ka Diolelo. Kɔmite ka losanganya la distrikɛ ayɔsɔna ekumanyi kɛmɔtshi dia menda dikambo sɔ. Nde ayonga la okimanyedi, ndo ayoleka dimɛna dia okimanyedi ɔsɔ monga ekumanyi kekina kana okambi w’olimu wele la lonyuma la dimɛna ndo wakoka. Mbalasa la dia kahanyema lo tenyi pende: Etenyi kɛmɔtshi dikambo di’akadiyɛso l’anawɔ kâmɛ ndo ana wa wamato ndo etenyi kekina dikambo di’anangɛso la ana w’apami. Mbalasa ka Diolelo ayonga paka dikambo dia ndalaka tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla dia olimu wa djamu salemaka diaha wovi ndjova diangɔ di’anto. Anangɛso wele la lonyuma la dimɛna mbahomba sala olimu ɔsɔ. Okatelo wa diangɔ dia ndɛ l’etei ka Mbalasa ka Diolelo hatetawɔma. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo woho wa katɛka paka lo nshi yayosalema losanganya. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo asɛkɛ atɔ mongaka wonya tshɛ pudipudi ndo kɔmba. Pombaka menda ɔlɔlɔ diaha ndanya ndoko ɛngɔ ɔtɔi ka lɔkɔ. Wanɛ wohangi lo mbalasa wayosala la wolo tshɛ dia monga la lɔkɛwɔ l’ɔlɔlɔ lakoka le Akristo wa mɛtɛ lam’asawɔ ndo otsha le asukanyi.—1 Kor. 10:31.
7. Ngande wakoka ehomba w’anto wele l’ehomba wa lânde kotshama?
7 Ehomba wa lânde: Tukedi 3:27 mbutaka ɔnɛ: “Tuyalaki la unyishi a [diangɔ] di’ololo le wane wukuki dilungula lam’eye la wulu wa mbashadio.” Ngande wakokayɛ salɛ anto akina ɔlɔlɔ lo kɛnɛ kendana la losanganya? Apandjudi waya esombe, anto wele la dikɔmɔ, wanɛ wakamba olimu wa lo tena tshɛ ndo akina mbeyaka monga l’ohomba w’ekimanyielo lo kɛnɛ kendana la wɛmbɛlɔ kana ohangelo. Wanɛ wotɔ lawɔ mbele l’ɔkɛndɛ wa ntondo wa kimanyiya anto asɔ. (1 Tim. 5:4) Naka vɔ hawokoke mbâkimanyiya, kete asekawɔ ambetawudi mbeyaka mbasha ekimanyielo. (Ngal. 6:10) Emendji wa wekelo wa dibuku pombaka sɛdingola dia mbeya akɔna l’atei w’anto wa l’elui awɔ ele l’ohomba w’ekimanyielo ka lânde dia vɔ ndjashikikɛ di’anto wamboshila ndjalɔngɔsɔla la ntondo.
8. Lande na kahombaso mbɔtɔ lo losanganya layɔtɔ etshumanelo kaso?
8 Wɔtwɛlɔ wa lo losanganya lokina: Dia ndjashikikɛ ɔnɛ ahole wa mbidjasɛ, ekanda, pango ya tohanga ndo awui akina wayonga lo yɛdikɔ yakoka, wɛ keketshamaka dia tɔɔtɔ lo losanganya layɔtɔ etshumanelo kayɛ. Koko, naka akambo wele layɛ hakosha diaaso dia wɛ mbɔtɔ losanganya layɔtɔ etshumanelo kayɛ, kete lam’alangayɛ tengengake dia tɔɔtɔ losanganya lokina.
9. Naa yoho mɔtshi yakokaso kimanyiya di’akina ndjokondja ɔngɛnɔngɛnɔ lo losanganya layaye?
9 Anto wayakimɔ la lolango: Aha la tâmu, anto tshɛ wayɔtɔ lo losanganya wayokondja ɔngɛnɔngɛnɔ w’efula ndo wayokondja wahɔ oma lo mbo ya ndɛ ya lo nyuma ndo waaso wa monga la lɔngɛnyi lakeketsha. Ɔngɛnɔngɛnɔ aso wayoleka monga efula naka sho ndjakimɔ la lolango tshɛ dia sala olimu wahomba salema dia losanganya mbeta dimɛna. (Etsha 20:35) Kɔmite ka losanganya la distrikɛ wayelɛ anto akina dia ndjokamba la wɔ olimu ɔsɔ. Onde wɛ kokaka monga suke?—Osam. 110:3.
10. Kakɔna kangɛnangɛnayɛ lo nsanganya yaso ya distrikɛ ya lo ɔnɔnyi la ɔnɔnyi, ndo ahombayɛ ndjashikikɛ dia sala?
10 Etena kakinde lo losanganya lɔmɔtshi la distrikɛ, yana mɔtshi ya hiami y’ɛnɔnyi etanu akate ate: “Losanganya la distrikɛ ekɔ etenyi kalekami nanga ka ɔtɛmwɛlɔ wa Jehowa.” Kɔmatɛrɛ k’oma k’ɛse otema kɛsɔ tokimanyiyaka sho tshɛ dia shihodia woho wangɛnangɛnaso mbɔtɔ lo nsanganya yaso ya distrikɛ ya lo ɔnɔnyi la ɔnɔnyi. Kɛnɛ kakembe omembi w’esambo ɔnɛ: “Ndjala l’etemwelo kaye lushi otoi, ambuleka ndjala nshi kinunu am’akina ololo” kekɔ mɛtɛ. (Osam. 84:10) Davidi akɛnya oma lo ekimanyielo k’osambo ɔsɔ nsaki kande ka ‘mbidjasɛ lo luudu la Jehowa nshi tshɛ ya lɔsɛnɔ lande dia menda olangala wa tɛmpɛlɔ ka Jehowa.’ (Osam. 27:4) Davidi akangɛnangɛnaka efula monga kâmɛ l’atɛmɔdi wa Jehowa. Nyɛsɔ tokoya lowando lande dikambo di’ɔtɛmwɛlɔ wa mɛtɛ lo mbɔtɔ nshi yakɔ shato ya losanganya la distrikɛ lele l’ɔtɛ a dui ɔnɛ: “Etshungwelo kaya suke.”
[Box on page 3]
Ekongelo ka wenya
Lushi la tanu ndo la samalo
9:30 la pindju - 5:05 l’ɔkɔngɔ a midi
Lushi la lomingu
9:30 la pindju- 4:10 l’ɔkɔngɔ a midi
[Box on page 4]
Awui amɔtshi wa sɛdingola dia mbɔtɔ lo losanganya la distrikɛ
1. Naka wɛ pombaka munda lɔkɛndɔ l’otale dia tɔɔtɔ lo losanganya, kete tatɛ momba falanga ya lɔkɛndɔ lanyu wɛ la nkumbo kayɛ, ndo y’olelo anyu lɛkɔ.
2. Kanyokanyiya nto dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu di’oshinga wolo.’—Euh. 16:16; Tuk. 3:9.
3. Lo wonya wa losanganya, sho tombolaka lokombo la Jehowa oma lo lɔkɛwɔ l’ɔlɔlɔ ndo oma l’ɔlɔtɔ aso wa pudipudi ndo wa kɔmba.—1 Kor. 10:31.
4. Ntsha tshɛ dia ndjela kɛnɛ kata anangɛso walongola anto ndo wele la ɔkɛndɛ wa mbisha anto ahole. Tâmbɛke ahole tshanana onyake paka dikambo di’ase nkumbo kayɛ kana dia wanɛ woye la yɛ.
5. Lo wonya wa diomuyelo, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Nɛ dia mbo ya ndɛ ya wotsho mbeyaka ndjokosha djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto kasha lonya dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.