Onde Wɛ Nɛmiyaka Awui w’Ekila?

¹ Naka onto kombola ɔnɛ onde wɛ nangaka awui w’ekila, wɛ ayokadimola esadi eto wate eelo! Ko naa tɛdikɔ tɔmɔtshi t’ekila taki Nzambi tangɛnangɛnaso na?

² Sho mɛtɛ ngɛnangɛnaka diɔtɔnganelo diele lam’asaso la Shɛso lele l’olongo! Nde toshikikɛka ɔnɛ naka sho ‘ndjasukanya le nde, kete nde ayoyasukanya oya le so.’ (Jak. 4:⁠8) Otondonga aha olambo wa tshungo wakakimɔ Yeso Kristo, tshike ndoko onto lotokoka nongola lɔsɛnɔ la pondjo. (Joa. 3:16) Oma lo lowando l’oshika lele laso, sho mɛnyaka lushi la lushi lo dɔmbɛlɔ, yoho y’efula yangɛnangɛnaso woshasha ɔsɔ w’oshinga wolo w’oma le Nzambi.

³ Ɔtɛkɛta waki Nzambi wakasambiyama, mbut’ate, Bible k’Ekila ekɔ nto ekila le so, oko wele ɔlɔngɔswamelo waki Jehowa wa lanɛ la nkɛtɛ. Sho mɛnyaka nɛmɔ diahombama lo tɛdikɔ tɔsɔ t’oma le Jehowa lam’akitanyiyaso awui wa lo Bible, lam’akeketshaso dimama diaaso dia ngandji k’onto l’ɔnango, lam’akotshaso la yambalo tshɛ awui wa teokrasi, ndo lam’akambaso dihɛka lo dihɛka la wanɛ walɔmbɔla.​—⁠1 Pet. 1:⁠22.

⁴ Oma lo tshimbo y’ɔhɔmbɔ wa kɔlamelo ndo wa kɛsɔ, sho nongolaka mbo ya ndɛ ya lo nyuma tshavutshavu. Tayoyilongola ɔnɔnyi ɔnɛ lo Losanganya la Distrikɛ lele l’ɔtɛ a dui ɔnɛ: ‘Wanɛ Wakitanyiya Ɔtɛkɛta wa Nzambi.’ Lo losanganya lɔsɔ, tayolongola wetshelo w’ohomba ndo tayonga kâmɛ la anangɛso wa ngandji oko wakombolaso. Ngande wakokaso mɛnya lowando l’oma k’ɛse otema lo yɛdikɔ shɔ y’ekila na?

⁵ Aha Minya Luudu la Jehowa Yimba: Nehemiya akalake wanɛ wakakambaka la wolo tshɛ dia nyomohika dihele dia Jerusalɛma ‘di’aha minya luudu la Nzambi kawɔ yimba.’ (Neh. 10:39) Ɛlɔ kɛnɛ, ‘luudu’ laki Jehowa ekɔ ɔlɔngɔswɛlɔ wakinde wendana l’ɔtɛmwɛlɔ. Nsanganya yaso ya distrikɛ yekɔ etenyi kɛmɔtshi k’ɔlɔngɔswɛlɔ ɔsɔ. Di’aha sho minya ɔlɔngɔswɛlɔ ɔsɔ yimba, sho la dia tanema lo losanganya lɔsɔ ndo liyela la yambalo y’efula lo mɛnya Jehowa nganɛ wɔsaso tɛdikɔ tande la nɛmɔ di’efula. (Heb. 10:​24, 25) Ngande wahombaso ndjalɔngɔsɔla oma ko kakianɛ dia mɛnya ɔnɛ sho ngɛnangɛnaka dikambo di’ekila sɔ efula na?

⁶ Totaneme Nshi Yakɔ Shato: Onto tshɛ l’atei aso pombaka ndjalɔngɔsɔla dia nde monga nshi yakɔ shato ya losanganya laso la woke. Onde wɛ ekɔ lo ndjalɔngɔsɔla dia komaka lushi tshɛ kɔlɔ̂mɔ ndo mbidjasɛ polo ndo lo dɔmbɛlɔ dia ndjihelo dia Lushi la Lomingu? Naka eelo, kete wɛ ayokondja ɛtshɔkɔ efula. Mbɔtɔ lo losanganya lɔmɔtshi la woke hatongaka nshi tshɛ dikambo dia wɔdu. Memadja olimu ayɛ wa l’emunyi koka kɔlɔmba dia wɛ mbɔsa yɛdikɔ ya wolo. Mbala mɔtshi ko sho bu l’akoka wa koma lo dihole dia losanganya. Koko, tetawɔke akambo asɔ koshimba dia mbɔtɔ lo losanganya la woke.

⁷ Tênde Ɛnyɛlɔ ka Dimɛna Efula Kɛnɛ: Ɔnɔnyi wetshi, lam’akawatatshɔka otsha lo losanganya la distrikɛ, olui ɔmɔtshi w’anangɛso wa lo wodja ɔmɔtshi wa l’Afrikɛ lɛnɛ alɔma ta wakahomana l’olui ɔmɔ w’asɔlayi. Vɔ wakambola anangɛso vate: “Enyu, ndo otsha lende atanyatshu?” Vɔ wakakadimola vate: “Sho tekɔ Ɛmɛnyi wa Jehowa, ndo tekɔ lo tatshu dia tɔtɔ lo losanganya la distrikɛ.” Ɔmɔtshi l’atei w’asɔlayi asɔ akate ate: “Nyu Ɛmɛnyi wa Jehowa hanyoke ndoko dikambo wɔma mɛtɛ. Nyutshu, nyayotɔtɔ losanganya lanyu aha l’okakatanu. Koko, nyeye dia nyayohomana l’asɔlayi efula. Nyotakɛndakɛndaka paka l’atei w’otadimbo! Oyadi nyu kɛnaka anto efula wotshumani nyotetemale kɛndakɛnda paka l’atei w’otadimbo!” Vɔ wakatshe ngasɔ ndo wakakome totondo toto lo losanganya. Anangɛso asɔ wakakondja ɛtshɔkɔ nɛ dia wakɛnya woho wangɛnangɛnawɔ awui w’ekila.

⁸ L’ɛnyɛlɔ k’anangɛso wa lo bɛkɛ dikina dia l’Afrikɛ, sho lawɔ pomanaka l’ehemba. Koko, aha la tamu, sho kokaka mbokoya mbetawɔ kawɔ ndo ndjashikikɛ dia mbɔtɔ lo tenyi tshɛ dia losanganya laso la distrikɛ. Naka ekɔ ohomba ntsha etshikitanu ɛmɔtshi, kete tɔlɔmbɛ Jehowa ɛlɔmbwɛlɔ, teya shate nde ayɔtshɔkɔla weolo wadjaso dia mbɔtɔ nshi yakɔ tshɛ.

⁹ Tayokondja Ɛtshɔkɔ: Tekɔ la mposa k’Ɔtɛkɛta wa Nzambi, teya shate lo tshimbo yawɔ mbayotohama dia kondja panda. (1 Pet. 2:⁠2) Naka sho mbɔtɔ lo losanganya laso la distrikɛ ndo ndjela kɛnɛ kayotama lɔkɔ, kete mbetawɔ kele l’onto tshɛ l’Ɔtɛkɛta waki Nzambi kayonga nge ndo kayowosha akoka wa shika ekolo la ntondo k’akuwa waki Satana. Lo ntsha ngasɔ, tayɛnya Jehowa ndo anto tshɛ watenda ɔnɛ sho ngɛnangɛnaka awui w’ekila efula ndo ɔnɛ sho “kema l’atei a wane watsho ekongokongo . . . , keli teko l’atei a wane weli la mbetawo ka nshimbela [anima].”​—⁠Heb. 10:39; 12:16; Tuk. 27:⁠11.

¹⁰ Sho kokaka nongamɛ dia Jehowa Nzambi ayodihola nkuke ya l’olongo ndo ayototshulwɛ ɛtshɔkɔ wa lo nyuma. (Mal. 3:10) Yadjɛ oyango wa monga lo Losanganya la Distrikɛ lele l’ɔtɛ a dui ɔnɛ ‘Wanɛ Wakitanyiya Ɔtɛkɛta wa Nzambi’ tatɛ oma l’etatelo ka losanganya la pindju ka Lushi la Tanu polo ndo lo dɔmbɛlɔ dia ndjihelo ndo “Amɛ!” ka la dikɔlɔ dia Lushi la Lomingu. Wɛ ayɔngɛnangɛna naka wɛ ntsha ngasɔ!