“Wahimbami Ntundu”​—⁠Woho Akɔna Na?

¹ Ehamelo katatetemala monga l’atei w’ɔlɔngɔswamelo waki Jehowa, talekaka mɛnya ohomba w’anangɛso wele l’akoka wa kamba oko ekambi w’olimu. Anangɛso efula wahâtasɔnama dia kamba olimu ɔsɔ, mbidja ndo wanɛ weke akɛnda, wekɔ la saki ka kamba l’atei w’etshumanelo. Etena kawashawɔ olimu ɔmɔtshi wa lâdiko, vɔ toyaokaka dia wekɔ ohomba ndo tolangaka kotsha olimu akɔ dimɛna. Ehamelo kawɔ nemanɛka la woho ‘wakawatahembami ntondo.’ (1 Tim. 3:10) Woho akɔna wasalema dikambo sɔ na?

² Ɔkɛndɛ wa Dikumanyi: Lam’ayowenda dia kana ɔnangɛso kotshaka kɛnɛ kalɔmba Afundelo lo 1 Timote 3:​8-13 di’onto monga okambi w’olimu, dikumanyi wayohemba akoka wele l’ɔnangɛso dia mɛmba ɔkɛndɛ. Vɔ mbeyaka mbɔlɔmba dia mbisha lonya l’elimu wele oko, kahanya abuku ndo periodikɛ, mendaka awui wa mikro, nɔngɔsɔla Mbalasa ka Diolelo kana elimu ekina. Dikumanyi wayenda woho wakotshande ndo wayashande l’ɛkɛndɛ ande. Vɔ wayenda waonga ande kana nde ekɔ onto lele bu akadikadi, lalɛnya wonya, lele l’etete, lahayange lokumu, lele la yimba ya ndjâkimɔ, ndo lakamba dimɛna l’anto akina. (Fil. 2:20) Onde nde mbishaka ɛnyɛlɔ k’ɔlɔlɔ oma lo yoho yande ya ndɔta ndo ya nɔngɔsɔla demba? Onde nde hadje sawosawo l’ɛkɛndɛ ande? Wayenda “etsha andi w’ololo la memakana ka yimba yandi.” (Jak. 3:13) Onde nde mɛtɛ ekɔ lo nyanga dia monga okambi w’olimu l’atei w’etshumanelo? Onde nde ekɔ lo kotsha didjango diaki Yeso dia ‘mbetɛ anto tshɛ ambeki’ lo nsambisha l’ohetoheto?​—⁠Mat. 28:19; enda lo Tshoto y’Etangelo ya Ngɔndɔ ka Divwa 1, 1990, lɛkɛ 18-28.

³ Kânga mbele hawoshikike lofulo l’ɛnɔnyi lahomba monga l’onto dia sɔnama oko okambi w’olimu, Bible tɛkɛta di’anangɛso asɔ oko ‘apami watotshaka olimu.’ Hatohombe nongamɛ di’ekambi w’olimu monga akɛnda efula kana ɛnɔnyi dikumi kana dikumi l’ɛmɔtshi eto lam’ele vɔ tɛkɛtaka dikambo diawɔ oko anto wakoka monga la wadi ndo l’ana. (1 Tim. 3:​12, 13) Apami asɔ hawohombe monga anto watshutshuyama lo “saki ya kolo y’elongo w’apami” koko pombaka vɔ monga anto wakɛndakɛnda lo yoho y’oshika ndo wele la lɔkɛwɔ l’ɔlɔlɔ ndo la nkum’otema ka pudipudi la ntondo k’anto ndo ka Nzambi.​—⁠2 Tim. 2:⁠22.

⁴ Kânga mbele akoka wa lôtɔ wekɔ ohomba efula, dionga diele l’onto ndo woho wɔsande ɔkɛndɛ ndeka ohomba. Onde ɔnangɛso ɔmɔtshi nangaka tombola Nzambi ndo kambɛ anangɛso la ndjakitshakitsha tshɛ? Naka ɔsɔku kete Jehowa ayɔtshɔkɔla weolo wadjande dia pama l’atei w’etshumanelo.