“Woma wa Nzambi”—Losanganya la distrike 1994
1 Tatɛ oma lo nshi ya Abele la Noa, anto efula waki la mbetawo wakenya woho one wakiwo la “woma wa Nzambi.” (Heb. 11:4, 7) Woma wa Nzambi “kedikedi kitanyia ndo nemiya Otungi l’otema otoi ndo di’aha ntsha ndoko kiambokambo motshi yawonyangiya.” (ad lɛk. 343.) Tatɛ oma lo ngondo ka Loseketanya polo ndo lo Kɔlɛkɔlɛ, tayenya dilemielo diako dia l’otema otoi so lo mboto lo losanganya la distrike “Woma wa Nzambi.” Onde tayoto lo losanganya l’otondo, tatɛ oma l’osambu w’etatelo polo ndo lo dombelo dia ndjihelo oka?
2 L’asolo l’olongo, sho tokongeka losanganya la distrike ononyi tshe. Ondo esango emotshi wotwelo aso lo losanganya lako nemaneka la tondja falanga ndo mbidja weolo aso, koko sho kondjaka engenongeno efula. Sho kalolaka la wakaso l’ongenongeno ndo tokeketshami lo nyuma. (Enda 1 Nkumi ya Dikanga 8:66.) Osanganelo wa l’anto akina salanganyaka ndo losanganya minyaka olengolengo. Koko tatohɛke dia sho sanganaka dia temola Jehowa. Nde mbatotome dui dia sho sangana ndo mbatetsha dia sho kondja engenongeno. — Ehw. 31:12, 13; Osam. 122:1.
3 Dilemiyelo di’efula otsha le Jehowa ayotosokoya dia sho monga lawo: Paulo akasha akristo dako dia vo “kambe Nzambi olimu w’osanto, la woma wa Nzambi ndo la dilemiyelo.” (Heb. 12:28, NW) Mete, losanganya la distrike lambolongoswama dia tokimanyia dia sho ntsha ngaso. Ondo tayonga l’ekakatanu wayokoka mbidja weolo aso wa monga lawo l’ehemba. Ekakatanu ako wayokoka fona l’akona, koko oma l’ekimanyielo kaki Jehowa, tayokoka mbaleka wolo. (Mat. 17:20) Naka we kema l’akoka wambosa vakashi dia ndjela losanganya l’otondo, tatɛ lushi la tanu la pindju polo lushi la lumingu la dikolo, onde wa akalombe dikimo le owandji aye w’olimu ndo alomba Jehowa etena kako kame? (Jak. 1:6-8) Ana wayoto lo losanganya lomotshi layosalema l’okongo wa kalasa ndjiho wayohomba mbewoya embetsha awo l’okitanyia tshe one hawotonga lo kalasa lushi la tanu la lasamalo dia vo mboto lo losanganya l’ohomba l’endana l’otemwelo.
4 Tokondja engenongeno oma lo ekola kele laso: Ekola kakona keso na? Wenya la weolo wahombaso mbidja dia mboto lo losanganya. Honga dikambo dia tshundju le so dia sho ndjalongoswama la kongamu tshe woho wa mboto lo losanganya la distrike ko monga l’oyango wa kalola lakaso lushi la lumingu la dikolo l’okongo wa shisha etenyi ka woke ka wetshelo kana ka pologalame. Onde sho kokaka mboto lo dambo dimotshi ko toyasha l’elimu ekina oka? Lo sanganya motshi y’ononyi wetshi, anto amotshi wakakalolaka la wakawo l’ekomelo ka sanganya ya la pindju. Koko, naka teko anto wambotshunda lo nyuma ndo wele la woma wa Nzambi, kete hatohombe pandja ndoko engo kakatolongoswe Jehowa. —Enda 1 Koreto 2:9, 10.
5 Ondo le efula ka l’atei aso, tokanyi ta tako losanganya la ntondo k’ekomelo ka pologalame hotoye lo weɔngɔ. Koko kânga mbedio ngaso, tayokoka pandja etenyi kemotshi ka woke. Woho akona? Lo tshika di’aha ndjalongosola woho wa kondja engenongeno w’eshika wa pologalame kako. Tayolanga memo esadi dia tale yangango y’ololo la pindju ndo ntsha tolimu limu t’ohomba, dikambo diayotokimanyia dia sho mbidjase l’ahole aso la ntondo ka losanganya tatɛ. Eko nto ohomba wa monga la diomuyelo dia dimena l’otsho woho w’aha ningɔningɔ djo la yanyi koko dia nama yambalo yaso lushi l’otondo.
6 Dia kondja engenongeno w’elolo wa dikonge diako, woho omotshi wakenama ololo ele dia fundaka lo kiatshikatshi, akambo watama lo tshena pe. Dui so mendanaka l’akenda ndo l’epalanga.
7 Tayohomba sala la wolo dia mbidjase l’ahole aso la ntondo ka losanganya mimɛ. Oyadi kânga teko lo mbetsha etena k’ongenongeno kame l’angenyi aso w’edjedja ko etena kako onombodi ambota ate pologaleme kaya suke la tatɛ, ayonga dui di’ololo le so dia sho menya one sho nemiyaka ampokami la anangeso naka tayokumiya sawo ndo kalola l’ahole aso.
8 Onde we ayokoka mandoma oma lo lokewo laye? Eko dimena dia sho mongaka nshi tshe la lokewo l’ololo, koko etena katototshumanaka l’olui a woke, tena efula anto wa l’andja tôngaka la mbekelo ka toyela lo nna ndo lo nna. Esango emotshi wayotedikola lo ndjela lokewo laso kana leko ololo kana kolo, lo dihole dia vo tedikola lo ndjela olimu aso wa sambisha. Sho kombolaka di’eteketa aso la etshelo aso watolonganyi la lotombo laki Jehowa. —Tok. 27:2; 1 Petero 2:12.
9 Alapolo wakashama one lo losanganya lokina, weteto waki efula etena kaki sanganya lo tshama. Akadiama oleki anto 1000 (wele lofulo l’ana lakaleke) waketetaka l’ɛsɛsɛ lushi la samalo l’okongo wa midi, dui di’enya one ambutshi pombaka mbishaka an’awo alako ndo mbalama la yambalo tshe. Etena k’eteta anto tena efula l’ɛsɛsɛ, londjo salemaka efula, dui so shishaka yambalo ya wane wahemba ndjela. Anto amotshi weko l’elimu w’ohomba wa sala etena keta losanganya, ko onde akina hawokoke mbidjase ki l’ahole awo ndo mpokame l’ololo tshe oka?
10 Ambutshi efula weko la sso dia wolo otsha le an’awo etena kotowo lo sanganya ya l’etshumanelo lumingu tshe. Onde hawokoke monga la woho ako wame wa sso dia wolo naka pombamaka ndjashikike one kana ana wodjashiko l’ololo tshe suke lawo ndo hawengola wengol’engola l’ɛsɛsɛ etena keta losanganya oka? Eelo, dihole dia losanganya komaka Mbalasa ka woke ka Diolelo, koko lo andja waki Satana mbongaso nshi tshe; anto wele la tokanyi ta kolo kokaka mboto l’eyango wa kolo l’ahole weso aha l’okakatanu. NYU POMBAKA MBEYA WENYA TSHE DIHOLE DIAKONA DIELE AN’ANYU NDO KENE KASALAWO.
11Ɔlɔtɔ la Ekombɔ k’ote: Teko lo sena lo nshi yele ndota olota lota ndo monga epakapaka eko akambo wetawoma. Anto efula hawodje lomba lo ɔlɔtɔ awo lam’atshowo lo mvudu ya Nzambi, etena katshowo lo matumba kana atenda ngomo kana nto lam’atshowo atole eyowoyowo kânga lo wa eresitora. Ɔlɔtɔ w’epakapaka la divo diele halongoswami dimena menyaka woho akona w’onto weso. Tatoheke dia dihole dia losanganya kema nto oko seke dia tokenyo, koko komaka Mbalasa ka Diolelo.
12 Wane walanga nongola batismu pombaka mboho dia, lo etena kako keso, kema dimena ndota weho emotshi wa mayo watolotamaka la mboka. Vo pombaka monga la ɛlɔtɔ wakoka ndo wa loshilambo. Endana la dui so na? Dinondo weko l’okende wa nama di’aha onto omotshi la l’etshumanalo kawo lalongola batismu monga oko otakanya. (2 Kor. 6:3, 4) Mayo wa djɛwɛlɛwɛ wenya demba oko wedio, kana epela wele la wa sologa ya l’andja one kame la pibilisite kana ohandjwelo a kumu wa sala sala sangema loko hakoke ndotama. Eko dimena dia dinondo sawola la wane walanga nongola batismu dia kene k’endana l’awui aso etena kasedingolawo lawo wembola wokama watanema lo dibuku Notre ministère.
13 Loseketanya 12, 1994 mbayotate losanganya la ntondo la distrike “Woma wa Nzambi.” Onde nyamboshila la ndjalongosola, ndo kakiane nyeko suke dia kondja waho watomba oma lo osanganelo w’ongenongeno wa nshi shato kame lo diwoto ndo dia kondja mbo kina efula ya lo nyuma oko waho oka? Teko lo nomba Jehowa l’otema otoi dia nde tshokola weolo wadjanyu dia mboto lo losanganya la distrike l’ononyi one: “Woma wa Nzambi” ndo dia nyu ndeshama la mbo y’ololo y’oma lo mesa waki Jehowa.