Ekadimwelo lo wembola anyu
◼ Onto akɔna ahomba sala dɔmbɛlɔ lo nsanganya ya l’etshumanelo?
Dɔmbɛlɔ dia l’etshumanelo ekɔ etenyi kɛmɔtshi k’ohomba efula k’ɔtɛmwɛlɔ aso. Nɔmba lo lokombo l’anto akina la ntondo ka Jehowa ekɔ diɛsɛ dia woke ndo ɔkɛndɛ wa wotsho. Lo menda ohomba adiɔ, dikumanyi la dia monga la shɛnɔdi lam’asɔnawɔ anangɛso wahomba sala dɔmbɛlɔ lo nsanganya. Anangɛso wambobatizama, wasala dɔmbɛlɔ la ntondo k’etshumanelo la dia monga ekambi w’Akristo wambotshunda, weyama oko anto washa ɛnyɛlɔ k’ɔlɔlɔ ndo walɛmiyama l’etshumanelo. Alɔmbɛlɔ awɔ woludi la dilɛmiyɛlɔ la dia mɛnya diokanelo diele lam’asawɔ la Jehowa Nzambi. Sawo dia lo Tshoto y’Etangelo ya Ngɔndɔ ka Tanu 15, 1986, diele l’ɔtɛ a dui ɔnɛ: “Alɔmbɛlɔ wa lo Sɛkɛ Woye oma l’Otema wa Ndjâkitshakitsha” mɛnyaka awui w’ohomba wakoka kimanyiya wanɛ wasala alɔmbɛlɔ wa lo sɛkɛ dikambo di’etshumanelo.
Dikumanyi hawohombe sɔna ɔnangɛso lahawamane fundo kana lele akadikadi dia sala dɔmbɛlɔ. Ɔnangɛso lele kanga lomendja kana lele la mbekelo ka ntokɛka anto tokedi wonya wasalande dɔmbɛlɔ hakoke sɔnama. (1 Tim. 2:8) Kânga mbakoka ɔnangɛso lêke l’ɛnɔnyi dikumi l’engana eto batizama, dikumanyi pombaka menda kana nde ekɔ l’akoka wa lo nyuma dia sala dɔmbɛlɔ dikambo di’etshumanelo.—Etsha 16:1, 2.
Mbala mɔtshi lo nsanganya y’otsha l’olimu w’esambishelo, naka ndoko ɔnangɛso lele l’akoka wa sala dɔmbɛlɔ la ntondo k’olui, kadiyɛso kambobatizama kele l’akoka koka la sala dɔmbɛlɔ. Nde ayohomba komba ɔtɛ dimɛna. Naka mɛnamaka dia ndoko ɔnangɛso lakoka layonga lo nsanganya mɔtshi y’otsha l’olimu w’esambishelo, dikumanyi mbeyaka sɔna kadiyɛso kele l’akoka dia nɔmbɔla.
Mbala efula ɔnɔmbɔdi wa Losanganya kana wa Sawo dia lo Sɛkɛ mbatosalaka dɔmbɛlɔ dia mbɔtwɛlɔ. Koko lo nsanganya kina ya l’etshumanelo, naka anangɛso efula wele l’akoka wekɔ, onto ɔmɔtshi kokaka dihola la dɔmbɛlɔ, ndo okina sala dɔmbɛlɔ dia ndjihelo koko aha paka ɔnangɛso ladihola kana ladihiya losanganya mbahomba salaka dɔmbɛlɔ. Lo diaaso tshɛ, ɔnangɛso lambɔsɔnama dia sala dɔmbɛlɔ lo losanganya lɔmɔtshi la l’etshumanelo pombaka teyi la ntondo dia nde kanyiya kɛnɛ kayondotota. Etena kɛsɔ, nde kokaka sala dɔmbɛlɔ diele awui tshɛ wakalɔngami l’ɔnɔngɔ ndo dioye oma k’ɛse otema diayosungana la losanganya lɔsɔ.
Alɔmbɛlɔ wa ngasɔ hawohombe monga ɛtshɔlɔtshɔlɔ. Mbala efula, naka ɔnangɛso ekɔ lo sala dɔmbɛlɔ dia lo sɛkɛ, anto wayowoyela dimɛna naka nde ayemala lemala, tɛkɛta la dui diakoka ndo tondja ɛtɛkɛta wokɛma hwe. Dikambo sɔ ayokimanyiya wanɛ tshɛ wotshumanyi dia mboka dɔmbɛlɔ ndo mbuta ‘Amɛ!’ l’otema ɔtɔi l’ekomelo.—1 Ek. 16:36; 1 Kor. 14:16.