Esambishelo Kashama oma lo Bandɛ Vidɛo
1 “Ɔnaso akatatɛ menda bandɛ vidɛo la ntondo ka nde kɛndakɛnda. Nde kiendaka mbala la mbala. Ekɔ mɛtɛ dimɛna efula monga la dihomɔ diakɔkɔmiya ngandji ka Jehowa l’etema w’anaso!” Bandɛ vidɛo kakɔna kɛsɔ katɛkɛta ombutshi w’Okristo ɔsɔ na? Bandɛ vidɛo kele l’ɔtɛ a dui ɔnɛ: Noé: il marchait avec Dieu. Mama kɛmɔtshi kele bu Ɔmɛnyi kele ɔnande akende bandɛ ka Nɔa laka onto ɔmɔtshi, akatomɛ Bɛtɛlɛ dɔlara 90 oko woshasha ndo akambola dia kana Bɛtɛlɛ ekɔ la bandɛ vidɛo kina dikambo di’ana. Bandɛ vidɛo yatondja ɔlɔngɔswamelo wa Jehowa yekɔ la shɛngiya ya wolo efula oyadi le akɛnda kana le epalanga.
2 Lo Nkumbo: L’ɔkɔngɔ wa nkumbo kɛmɔtshi k’Ɛmɛnyi wa Jehowa menda bandɛ vidɛo La fermeté des Témoins de Jéhovah face à la persécution nazie, ombutshi wa womoto akate ate: “Lekɔ lo ndjambola lushi tshɛ woho wakakimanyiya Jehowa anto k’anto dia vɔ shika tanga la ntondo k’akambo woleki tshɛ wolo! Lam’akanami yimba l’akambo asɔ dimi mɛnaka di’ekakatanu ami wekɔ anyanya lo mbaɛdika l’ekakatanu ɛsɔ. Wendelo wa bandɛ vidɛo kɛnɛ l’anaso amboleka tɛnya hwe ohomba wa ndjaɛkɛ le Jehowa. Lo kɛtshanya la wɔ kamɛ, takakimanyiya anaso wa wamato dia vɔ monga l’akoka wa shika tanga la ntondo ka tɔsɛngiya kana k’ɛhɛnyɔhɛnyɔ tshɛ wakoka mbakomɛ.”
3 La Kalasa: Lo wonya wekawɔ awui w’ɛkɔndɔ, Ɔmɛnyi ɔmɔtshi w’ɛnɔnyi dikumi l’engana aki l’akoka wa mɛnya etenyi kɛmɔtshi ka bandɛ vidɛo La fermeté lo kalasa kawɔ. Ntondotondo, ombetsha awɔ akataka dia nde halange Ɛmɛnyi wa Jehowa. L’ɔkɔngɔ wa nde menda bandɛ vidɛo kɛsɔ, nde akate ate: “Bandɛ vidɛo kɛnɛ kambotshikitanya kanyi tshɛ yaki lami lo dikambo di’Ɛmɛnyi wa Jehowa. Mbala kekina kayowoya ndjosambisha lakami, dimi layowahokamɛ ndo layotatɛ mbeka la wɔ Bible!” Kakɔna kakokimanyiya dia nde tshikitanya kanyi yaki lande lo dikambo diaso na? Nde akate ate: “ngandji ndo kɔlamelo ya mɛtɛ yele laso.”
4 L’Esambishelo: Kadiyɛso kɛmɔtshi akahomana la womoto ɔmɔtshi lakengengaka dia nongola ekanda aso kânga mbakinde la wembola lo kɛnɛ kendana la so ndo la dietawɔ diaso. Kadiyɛso akayoya nto dia ndjowenda, nde akaye la bandɛ vidɛo Les Témoins de Jéhovah — Un nom, une organisation ndo akakiɛnya womoto ɔsɔ nde l’omɛnde. Vɔ akɔ ahende wakambe heyama ndo waketawɔ mbeka Bible. L’ɔtɛ wakawasambishama dimɛna, vɔ wakatatɛ mbɔtɔnganyiya nsɛnɔ yawɔ la lolango la Nzambi.
5 Onde wɛ kambaka la bandɛ vidɛo yaso lo yoho yakokayɔ monga l’etombelo w’amɛna efula?