‘Dui diakatama l’etena kadiɔ’
1 Onde sambisha anto akina losango lasha lɔsɛnɔ ekɔ dikambo dia wolo le yɛ? Onde wɛ ndjaokaka dia wɛ koka mbuta dikambo dimɔtshi dia yimba diokoki monga la shɛngiya le ampokami ayɛ? Lam’akatome Yeso ambeki ande, nde akawatɛ ate: “Lam’ayunyutatshokaka, kanyutasambishaka nyati: Diulelu dia l’ulungu diaya suki.” (Mat. 10:7) Losango lɔsɔ komonga wolo, lɔ laki wɔdu sambisha. Woho akɔ mbediɔ ndo ɛlɔ kɛnɛ.
2 Esangɔ efula ɛtɛkɛta engana eto mbele ohomba dia tatɛ sawo l’onto. Lam’akahomana Filipɛ l’ɔlɛnga w’ose Etiyɔpiya nde akawombola ate: “We nimbitelaka kene kalaye?” (Etsha 8:30) Sawo sɔ diaki la ‘dui diakatama l’etena kadiɔ,’ diakayongaka mɛtɛ l’etombelo w’ɔlɔlɔ!—Tuk. 25:11.
3 Wɛ koka kamba la woho wa mbɔtwɛlɔ ka ngasɔ lam’atayasambisha. Woho akɔna na? Lo mbeya sɛdingola akambo ndo lo sɔna ɛtɛkɛta w’eshika wɔtɔnɛ la dikambo diotanyiyɛ onto asala. Mbola wombola ndo hokamɛ okadimwelo washa onto.
4 Wembola ɛmɔtshi w’ohomba: Dia tatɛ sawo, wɛ koka kamba lo wombola ɔmɔtshi l’atei wa wɛnɛ wayela:
◼ “Onde nyu nsambɛka Disambɛ dia Nkumadiɔndjɔ (kana dia Shɛso) l’ɔtɛmwɛlɔ anyu?” (Mat. 6:9, 10) Ta etenyi kɛmɔtshi ka disambɛ diakɔ ndo mbola wate: “Anto amɔtshi mimbolaka vate: ‘Naa lokombo laki Nzambi lakate Yeso dia pombaka lilɛmiya (kana litombola) na?’ Akina mimbolaka nto ɔnɛ: ‘Naa Diolelo diakate Yeso ɔnɛ sho pombaka dilɔmbaka?’ Onde wɛ ambotana ekadimwelo w’eshika lo wembola ɛnɛ?”
◼ “Onde wɛ atayambolaka ndoko lushi ɔnɛ: ‘Naa oyango wa lɔsɛnɔ?” Ɛnya dia lɔsɛnɔ kakatana kâmɛ l’ewo kaki Nzambi.—Und. 12:13; Joa. 17:3.
◼ “Onde wɛ fɔnyaka dia nyɔi ayokomɛ lushi lɔmɔtshi?” Kamba la Isaya 25:8 ndo Enyelo 21:4 dia mbisha okadimwelo w’oshika.
◼ “Onde ekɔ woho ɔmɔtshi wa kandola efukutanu wa l’andja ɔnɛ?” Ɛnya dia Nzambi ntetshaka ate: “Ulangi unyaye.”—Mat. 22:39.
◼ “Onde nkɛtɛ kaso kɛnɛ kayolanyema lushi lɔmɔtshi la diangɔ di’eteta lo loowa (astéroïdes, comètes)?” Ewoyawɔ daka dia lo Bible diɛnya dia nkɛtɛ kayotshikala pondjo pondjo.—Osam. 104:5.
5 Nyewoya anto lokumu l’ɔlɔlɔ l’ɛtɛkɛta wa wɔdu, lo tshena pe ndo l’elungi k’ɔmɔnɔmɔnɔ. Jehowa ayɔtshɔkɔla welo wadjanyu dia sambisha anto akina kânga ‘dui ɔtɔi’ di’akambo wa mɛtɛ.