Tosambisha dimɛna l’ekimanyielo ka telefɔnɛ

¹ Oko weso Ɛmɛnyi wa Jehowa, oyango aso bu wa ndjasha tsho l’esambishelo ka lokumu l’ɔlɔlɔ koko tekɔ nto l’oyango wa losango l’ɔlɔlɔ munanda anto tshɛ weso l’akoka wa mɛnana la wɔ. (Etsha 10:42; 20:24) Kânga mbele esambishelo ka lo luudu la luudu kekɔ lo tetemala la monga yoho yoleki dimɛna ya tana anto wa sambisha, sho mɛnaka dia, aha paka la yoho y’esambishelo shɔ tsho mbayotokoka sambisha anto tshɛ. Ɔnkɔnɛ, dia ‘kotsha olimu aso dimɛna,’ sho kambaka la toho tokina, mbidja ndo esambishelo ka lo telefɔnɛ dia tana anto wele oko ɛkɔkɔ.​—⁠2 Tim. 4:⁠5.

² L’ahole efula, anto mbidjasɛka lo mvudu y’etajɛ yalamema wolo oma le asɔlayi, lo parsɛlɛ yele la nkumbo efula, kana parsɛlɛ yadihama wonya tshɛ yele ekɔ wolo sho sambisha lo soko la soko oko wokotosambishaka dia munanda anto. Kânga lo bɛtshi dia nkɛtɛ diakokaso sambisha lo luudu la luudu, sho hatototanaka anto efula lawakawɔ. Koko, efula k’anto wekɔ lo kondja etombelo w’amɛna efula lo sambisha anto wadjasɛ l’ahole wa ngasɔ lo telefɔnɛ. Oko ɛnyɛlɔ, la pindju kɛmɔtshi l’esambishelo ka lo luudu la luudu, atshukanyi amɔtshi kotana anto divwa w’etondo lawakawɔ. Lam’akawakawola lo Mbalasa ka Diolelo, vɔ wakayenda numɛlɔ ya telefɔnɛ y’anto asɔ lo listɛ lakawafunde ahole wadjasɛ anto la numɛlɔ yawɔ ya telefɔnɛ. Vɔ wakayetaka anto asɔ lo telefɔnɛ ko wakayosawolaka l’anto enanɛi lawakawɔ!

³ Onde wɛ mɛnaka wolo sambisha lo telefɔnɛ? Ɔnangɛso ɔmɔtshi akasuya ate: “Lam’ele dimi halange di’onto mbetami lo telefɔnɛ dia mbutɛmi ɔnɛ nde nangaka sondjami woho w’ɛngɔ tshɛ, diakɔ diahamalange dimi lawɔ sala woho w’esambishelo kɛsɔ.” Koko, l’ɔkɔngɔ wa nde sawola l’anto lo telefɔnɛ paka mbala hiende tsho nde akate ate: “Dimi lolanga esambishelo kɛsɔ! Dimi kokoka fɔnya kânga yema dia dimi koka sala dikambo nɛ, koko lodilanga! Anto sawolaka dimɛna lo telefɔnɛ ndo wɛ mongaka la kɛnɛ tshɛ kele ohomba suke layɛ. Esambishelo kɛsɔ kekɔ mɛtɛ l’etombelo w’amɛna efula!” Kadiyɛso kɛmɔtshi akate woho akɔ wamɛ ate: “Dimi mɛtɛ kondjashaka dia sambisha lo telefɔnɛ. Lo nyotɛ mɛtɛ, dimi konangaka sala dikambo sɔ. Koko dimi lakadihembe ndo lakɛnyi dia diɔ diekɔ l’etombelo w’amɛna efula. Dimi lakakondja waendelo w’eyoyo 37 ndo diɛsɛ oma l’esambishelo ka lo telefɔnɛ lakayongaka l’anto efula wele dimi kokoka mbeka la wɔ tshɛ Bible!” Naka wɛ nangaka pemba sambisha lo telefɔnɛ, kete wɛ lawɔ koka kondja etombelo w’ɔlɔlɔ.

⁴ Woho wa kongɛ esambishelo ka lo telefɔnɛ: L’atei w’etshumanelo, olimu w’esambishelo nɔmbɔmaka oma le omendji w’olimu. Naka ohomba wekɔ, olui wa dikumanyi kokaka sɔna ekumanyi kekina kana okambi w’olimu wakoka dia nde kamba kâmɛ la nde dia nɔngɔsɔla woho w’anto sambisha lo telefɔnɛ. Ɔnangɛso lakahanya bɛtshi dia nkɛtɛ pombaka nde lawɔ mbisha lonya lo dikambo sɔ nɛ dia nde mbayokahanyaka bɛtshi dia nkɛtɛ ndo mbayokimɔka alapɔlɔ wa kɛnɛ tshɛ keta. Ndo omendji w’otshimbedi ayoyashaka dia mbeya nganɛ watakɛndakɛnda ekongelo kɛsɔ.

⁵ Naka ekɔ ahole amɔtshi wa lo lɛtshi lanyu la nkɛtɛ wele, ekɔ wolo dia sambisha lo soko la soko, kete pombaka nɔngɔsɔla dia bɛtshi dia nkɛtɛ sɔ sambishamaka lo telefɔnɛ. Ɔnangɛso layowosha ɔkɛndɛ ɔsɔ kasɛdingole la yambalo tshɛ dia sala listɛ la waa parsɛlɛ yahomba kakatanyema la bɛtshi dia nkɛtɛ sɔ diayosambishama l’ekimanyielo ka telefɔnɛ. Pombaka kahanya ahole asɔ lo tɛtshi ta totshitshɛ woho wa kimanyiya anto wayowosha ahole akɔ dia vɔ kambaka mbala la mbala. Kartɛ ya bɛtshi dia nkɛtɛ tshɛ yatanema ahole wa ngasɔ pombaka mbidjama djembetelo dia nembetshiya ɔnɛ lo dihole kapanda esambishelo ka lo telefɔnɛ mbayosalemaka.

⁶ Oma lende akokanyu kondja numɛlɔ ya telefɔnɛ y’ahole asɔ na? Nyu koka tana dibuku diofundjiwɔ ahole wodjashi anto ndo numɛlɔ yawɔ ya telefɔnɛ lo mvudu yele l’ekanda wadia anto tshɛ (bibliothèque public). Naka dihole dimɔtshi diahɔtɔ anto wɔtɔtɔ diekɔ la listɛ lawɔ la telefɔnɛ, kete ondo nyu kokaka mbɔsa numɛlɔ oma lo listɛ lakɔ. Naka aha ɔsɔku, kete kokaka sangola nkombo y’anto wodjashi l’ahole akɔ oma lo dibuku diele la nkombo y’anto wodjashi lo dihole la dihole ko tenda numɛlɔ yawɔ ya telefɔnɛ lo dibuku diele la listɛ ya numɛlɔ ya waa telefɔnɛ.

⁷ Dikumanyi kokaka ndjasha l’olimu ɔsɔ lo nɔngɔsɔla woho w’anto anɛ waya tomanyi l’esambishelo ka lo telefɔnɛ kimanyiya akina, ondo oma l’ekimanyielo k’ekongelo ka Ambatshi Mboka Kimanyiyaka Anto Akina. Mbala la mbala, l’etenyi kɛmɔtshi ka lo Losangaya l’Olimu kendana l’ehomba w’etshumanelo nyu kokaka keketsha anto dia ndjasha lo woho w’esambishelo kɛsɔ.

⁸ Etena katshɔ dikumanyi dia tembola ɔnangɛso kana kadiyɛso kele bu la demba dia wolo kana kele l’ɛkɔmɔ kahawosha diaaso dia mbeteta, vɔ kokaka mbôkimanyiya dia nde salaka esambishelo ka lo telefɔnɛ. Ondo ekumanyi kɛmɔtshi kokaka pemba sambisha lo telefɔnɛ lo washo w’opandjudi ɔsɔ. Oma lâsɔ opandjudi mbeyaka mbelɛ onto ɔmɔtshi lo telefɔnɛ dia mbosambisha. Anto efula wakatatɛ sala ngasɔ mbetshaka minitɛ mɔtshi lushi tshɛ l’olimu ɔsɔ, ndo vɔ mɛtɛ nangaka olimu akɔ.

⁹ Alako wakoka tokimanyiya dia tondoya: Lam’akatome Yeso ambeki ande dia tosambisha, nde “akâtumi ahendi ahendi.” (Luka 10:⁠1) Lande na? Nɛ dia nde akeyaka dia lam’ayowotakambaka kâmɛ, vɔ wayotetshanaka akambo efula ndo wayotakeketshanaka. Ngasɔ mbediɔ ndo lo kɛnɛ kendana l’esambishelo ka lo telefɔnɛ. Lam’enyu anto ahende, nyu koka mbetshana awui amɔtshi lam’asanyu, kɛtshanya etombelo wokondjishanyu, ndo mbishana tokanyi lo sawo diayonyoyosawola l’anto wakanyasambishisha mbala kayela. Nyu koka kimanyiyana dia tana ekadimwelo w’eshika kânga wonya wasawolanyu l’onto lo telefɔnɛ.

¹⁰ Dia wɛ tondja tokanyi t’eshika ndo di’aha yimba yayɛ mbekɔ l’awui akina etena kasambishayɛ lo telefɔnɛ, djasɛ lo dihole diakokayɛ kitsha dihomɔ diayɛ di’esambishelo dimɛna la ntondo kayɛ, oko Bible, dibuku Comment raisonner, biukubuku Katɔlɔmba, periodikɛ la diangɔ dikina. Funda mbɔtwɛlɔ y’asawo mɔtshi ndo kitshayɔ lo dihole diakokayɛ ndjiadia. Yalɔngɔsɔla dia funda awui tshɛ dimɛna, mbidja ndo lushi la wonya wosawodinyu dia wɛ ndjeya mbesa nsaki kakɛnyisha onto.

¹¹ Mbala efula, anto mongaka la yewo lam’okawɔ dui dimɔtshi di’onto lahaweye lo telefɔnɛ. Diakɔ diahombayɛ tɛkɛta la waasaso, tɛkɛta oko onto lasawola l’ɔngɛnyi ndo la yewo. Oma lo dui diayɛ, onto latɛkɛta layɛ ayeya dionga diayɛ ndo dia kana wɛ ekɔ akadikadi kana bu. Tɛkɛta la wɔlamu ndo l’otema ɔtɔi. Tɛkɛta ɔkɔkɛ, hwe ndo la dui diokɛma dimɛna. Sha onto lasawola layɛ diaaso dia nde lawɔ tɛkɛta. Tɛnde lokombo layɛ ndo dihole diodjashiyɛ. Sho hatolange di’anto tɔfɔnya la wanɛ wasakiya diangɔ diawɔ dia sondja lo tshimbo ya telefɔnɛ. Lo dihole dia mbuta ɔnɛ wɛ nangaka sawola l’anto tshɛ wa lo lokombo lakɔ, tɛnde dia wɛ ekɔ lo nanga sawola paka la nde.

¹² Woho wa tatɛ sawo lo telefɔnɛ: Mbɔtwɛlɔ efula yele lo lɛkɛ 2-7 lo biukubuku Woho wa Tatɛ ndo . . . kokaka mbɔtɔnɛ l’esambishelo ka lo telefɔnɛ. Wɛ kokaka mbuta wate: “Lamboketa lo telefɔnɛ nɛ dia dimi bu l’akoka wa ndja dia ndjɛnana la yɛ. Lamboketa dia kombola kanyi yayɛ lo dikambo di’ohomba efula nɛ.” Oma lâsɔ, ko wɛ mbotɛ otondo wa dikambo.

¹³ Mbɔtwɛlɔ ka ntondo kele l’ɛse k’ɔtɛ wa dui watɛkɛta dikambo dia “Kɔlɔ/Okokelo” kokaka kambema lo yoho nyɛ: “Alo! Lokombo lami. Dimi mbidjasɛ lo . . . . Lambolanga kewoya ntondo dia dimi hasondja ndoko ɛngɔ ɔtɔi kana nyanga dia mbeya dikambo dimɔtshi. Lamboketa nɛ dia lekɔ l’okiyanu efula lo kɛnɛ kendana l’okokelo. Akambo wa kɔlɔ efula wekɔ lo salema l’ahole wodjashiso, ndo wekɔ la shɛngiya lo nsɛnɔ yaso. Onde wɛ fɔnyaka dia lushi lɔmɔtshi anto tshɛ wayokoka mbeteta lo toshinga oyadi kânga l’otsho aha la mboka wɔma w’onto mbatshɛ kɔlɔ? [Tshikande akadimole.] Lambolanga kadiɛ kɛnɛ kalaka Nzambi dia sala.”

¹⁴ Sala woho wa tatɛ mbeka l’anto Bible mbala kakɔ ɔtɔi lo telefɔnɛ mongaka l’etombelo w’amɛna. Kokaka mɛnya onto woho wasalawɔ wekelo lo minitɛ ngana tsho. Lɔmbande dia wɛ ndjowenda lakande woho wa nyu tetemala la wekelo, kana naka onto halange dia wɛ ntshɔ lakande, ko wɛ mbɔlɔmba dia nyu ndjotetemala la wekelo lo telefɔnɛ lushi lokina.

¹⁵ La ntondo ka nyu komiya sawo, kanyiya dikambo dimɔtshi diahomba ndjokokimanyiya dia wɛ ntenda onto akɔ lakande kana dia wɛ ndjôtomɛ dibuku dimɔtshi. Naka onto ekɔ lo mengenga dia kotɛ dihole diodjashinde, ko wɛ mbɔlɔmba dia nyu ndjotetemala la sawo dianyu paka lo telefɔnɛ. Ondo ayohombama sawola la nde mbala efula lo telefɔnɛ la ntondo ka nde ndjetawɔ dia wɛ towenda lakande.

¹⁶ Tɔshi Yɛdikɔ: Kadiyɛso kɛmɔtshi k’ɛnɔnyi 15 akatatɛka esambishelo kande ka la pindju lo mbeta anto lo telefɔnɛ. Nde akatɛkɛta la womoto ɔmɔtshi laketawɔ dibuku Ewo. Lam’akatshu kadiyɛso lakande dia towosha dibuku, womoto ɔsɔ akalange dia mbeya woho akɔna wakakoke kadiyɛso mbeya numɛlɔ kande ka telefɔnɛ lam’ele tɔ bu lo listɛ lele waa numɛlɔ. Kadiyɛso kɛsɔ akafɔnya numɛlɔ kɛsɔ lɔfɔnya! Womoto ɔsɔ aketawɔ mbeka Bible ndo kakianɛ nde aya opandjudi wahatabatizama.

¹⁷ Wakasha kadiyɛso kɛmɔtshi ɛtshi ka nkɛtɛ ka nde sambishaka lo telefɔnɛ koko nde konanga sambisha l’ɛtshi kɛsɔ ka nkɛtɛ mingu shato y’etondo nɛ dia nde aki la wɔma. Kakɔna kakayowoshaka dihonga dia nde tatɛ la sambisha lɛkɔ na? Nde akohɔ ɔtɛ wa sawo diakatombe lo Réveillez-vous ! wa Ngɔndɔ ka Ntondo 22, 1997, diaki l’ɔtɛ ate: “Etena Kemi Wɔdu, Mbemi la Wolo.” Sawo sɔ diakatɛkɛta dikambo di’Ɔmɛnyi wa Jehowa ɔmɔtshi wasambisha l’ekimanyielo ka telefɔnɛ l’ɔtɛ wakinde komonga l’akoka wa tomba l’esambishelo. Kadiyɛso akate ate: “Dimi lakalɔmbɛ Jehowa dia nde mbishami wolo. Lakɔlɔmbɛ dia nde mbishami ɛtɛkɛta w’eshika wa dimi sala mbɔtwɛlɔ kami.” Etombelo akɔna wakandakondja lushi lande la ntondo la sambisha lo telefɔnɛ na? Nde ate: “Jehowa akoke dɔmbɛlɔ diami. Anto wakapokamɛ dimɛna, ndo lakalɔngɔsɔla wendelo w’oyoyo.” L’ɔkɔngɔ diko, esambishelo kande ka lo telefɔnɛ kakayokonyaka dia mbeka l’onto ɔsɔ Bible. Nde mbutaka l’ekomelo ate: “Jehowa akambetsha nto dia ndjaɛkɛka le nde koko aha le mi dimɛ.”​—⁠Tuk. 3:⁠5.

¹⁸ Sambisha akambo wa mɛtɛ lo telefɔnɛ aya yoho mɔtshi ya dimɛna efula ya sambisha lokumu l’ɔlɔlɔ. Yalɔngɔsɔla dimɛna ndo salatɔ l’otema ɔtɔi. Tɔkɔmɔke otema oyadi kânga wɛ hakondjisha ekadimwelo wa dimɛna mbala ka ntondo kahembayɛ. Lɔmba ɛlɔmbwɛlɔ kaki Jehowa ndo sɛdingola kɛnɛ kasala wanɛ wokosambishaka lo yoho ya dimɛna shɔ. Lo monga la mposa kaha pandja kânga onto ɔtɔi lo lɛtshi laso la nkɛtɛ, nyɛsɔ toyasha tshɛ dia sala olimu aso la shamanya.​—⁠Romo 10:​13, 14.