Esambishelo ka lo telefɔnɛ kokaka monga l’etombelo w’ɛlɔlɔ

1. Lande na kakokaso mbɔsa esambishelo ka lo telefɔnɛ oko etenyi kɛmɔtshi k’ohomba k’olimu aso?

¹ Lande na kahombaso ndjadjɛ oyango wa kambaka la telefɔnɛ l’esambishelo kaso? Ekɔ nɛ dia ɔsɔ ekɔ yoho kina ya nkimanyiya anto dia vɔ nkondja ewo k’oshika katɔla otsha lo panda. (2 Pet. 3:9) Kânga mbele yoho ya ntondo yakamba la so dia nsambisha lokumu l’ɔlɔlɔ la Diolelo diaki Nzambi ele esambishelo ka lo luudu la luudu, sho kambaka la toho tokina dia nsambisha anto wahatanema lawakawɔ.—Mat. 24:14; Luka 10:1-7; Eny. 14:6.

2. Ngande wokongɛmi esambishelo ka lo telefɔnɛ?

² Woho wokongɛmi esambishelo kɛsɔ: Woho washawɔ apandjudi wasambisha lo luudu la luudu bɛtshi dia nkɛtɛ, mbashawɔ ndo apandjudi wasambisha lo telefɔnɛ. Opandjudi kokaka nsala dui sɔ ndamɛ kana l’apandjudi ahende kana asato. Dihole diasambisha apandjudi lo telefɔnɛ pombaka monga dihole diele bu la londjo kana l’efukutanu. Apandjudi efula mɛnaka ɔlɔlɔ mbidjasɛ la mɛsa ko nkitsha ekanda watokambaka la wɔ l’esambishelo ka lo luudu la luudu suke la wɔ.

3. Akambo akɔna wahombaso mbohɔka etena kasambishaso lo telefɔnɛ?

³ Woho wa nsambisha lo telefɔnɛ: Etena kasambishaso lo telefɔnɛ, mbɔtwɛlɔ kaso pombaka monga oko onto lasawola l’onto. Apandjudi amɔtshi w’eyoyo kokaka mbadiɛ ampokami awɔ mbɔtwɛlɔ kɛmɔtshi ladia, koko onge oko onto lasawola la onto. Mbɔtwɛlɔ yele lo dibuku Comment raisonner, Olimu aso wa Diolelo ndo yele lo traktɛ kele l’ɔtɛ a dui ɔnɛ: Onde wɛ nangaka mbeya akambo wa mɛtɛ? kokaka tokimanyiya lo dikambo sɔ. Etena kalɔngɔsɔlaso mbɔtwɛlɔ yaso, teye dui dialangaso nsambisha, tɔlɔngɔsɔlɛ dimbola ndo tonge suke dia mbadia avɛsa angana washa okadimwelo. Mbala efula, sho kokaka mbisha anto ekanda akɔ wâmɛ watotoshaka anto l’esambishelo ka lo luudu la luudu. Katodjake yimba lo waohwelo wayela anɛ: Tomuyake yema ndo tɔtɛkɛtake ɔkɔkɛ ɔkɔkɛ. Tonge la loshilambo, la solo dia lotutsha ndo oko onto lasawola l’ɔngɛnyi, nɛ dia dikambo sɔ kokaka mbokɛma kânga lo telefɔnɛ. Etena kasha ompokami aso kanyi yande, tohokame ndo oma lâsɔ towandole lo kanyi yoshande. Tatɔlɔmbake woshasha wa la lolango nɛ dia anto kokaka mbɔsa dia towalɔmba falanga lo telefɔnɛ.

4. Kakɔna kakoka esambishelo ka lo telefɔnɛ tokimanyiya dia sho ntsha lo ɛtshi kaso ka nkɛtɛ?

⁴ Anto wasawola la so lo telefɔnɛ mbeyaka monga la dikɔmɔ kana la hemɔ kana anto wele ekongelo kawɔ hatosha diaaso dia mbatana lawakawɔ etena keso l’esambishelo ka lo luudu la luudu. Mbeyaka monga nto ko anto akina mbidjasɛ lo nkombo yadihama wonya tshɛ ndo yalamema. Ɔnkɔnɛ, dia sho nkamba olimu aso dimɛna dimɛna, sho pombaka ndjadjɛ oyango wa nsambishaka lo telefɔnɛ nɛ dia ɔsɔ ekɔ yoho y’esambishelo yonga l’etombelo w’ɛlɔlɔ.