Ekadimwelo Lo Wembolo Anyu

◼ Etena kasambishaso lo telefɔnɛ, onde sho kokaka mbutɛ onto yɛdikɔ yendana l’okimwelo wa weshasha?

Wonya wasambishaso onto, naka kokaka sho mbeyaka mbolembetshiya ɔnɛ weshasha wa la lolango mbasukɛ olimu wa wetshelo wa Bible wakamba Ɛmɛnyi wa Jehowa l’andja w’otondo, ndo di’ɔnɛ sho mbetawɔka weshasha akɔ l’ɔngɛnɔngɛnɔ. Koko, hatokoke tɛkɛta dikambo dia weshasha wonya wa sambishaso lo telefɔnɛ, nɛ dia anto mbeyaka ndjɔfɔnya ɔnɛ tekɔ lo mbaeta lo telefɔnɛ dia mbalɔmba weshasha. Olimu w’esambishelo wakamba Ɛmɛnyi wa Jehowa lo tshɛ kawɔ kema oko wanɛ wanda okanda.​—⁠2 Kor. 2:⁠17.

◼ Etena kasambishaso lo telefɔnɛ, kakɔna kahombaso sala naka onto ambotona di’Ɛmɛnyi wa Jehowa mbowelɛ nto lo telefɔnɛ?

Sho pombaka nɛnya lolango lande. Sho pombaka funda datɛ diotonyinde la numɛlɔ kande ka telefɔnɛ ndo lokombo lande ko mbidja dikatshi sɔ lo divɔlɔpɛ dia bɛtshi dia nkɛtɛ di’etshumanelo di’aha apandjudi akina ndjoweta nto lo telefɔnɛ. Mbala ɔtɔi l’ɔnɔnyi, etshumanelo pombaka sɛdingola listɛ la wanɛ wakatone mbaeta lo telefɔnɛ. Omendji w’olimu mbeyaka sɔna apandjudi amɔtshi wa tomanamana, wasambisha la yewo, dia vɔ tembola anto asɔ dia mbeya kana vɔ wakatetemala tona sawola l’Ɛmɛnyi wa Jehowa.​—⁠Enda l’Ekadimwelo lo Wembola Anyu wele l’Olimu Aso wa Diolelo wa Ngɔndɔ k’Esambele 1994.