Jehowa mbishaka nkudu
1 Ngande wɔsayɛ ɔpɔstɔlɔ Paulo na? Lam’adiaso dibuku di’Etsha, sho ngɛnangɛnaka efula lo mɛna ohetoheto waki lande l’olimu wa Jehowa. Ngande wakakoke Paulo sala akambo asɔ tshɛ na? Nde akate ate: “Dimi mbeyaka ntsha akambu tshe la wulu wa one latunkikitshaka.” (Fil. 4:13) Sho lawɔ kokaka kondja wahɔ oma lo nkudu kasha Jehowa. Lo woho akɔna na? Lo kondjaka wahɔ oma l’ɛlɔngɔswɛlɔ esamalo wakandakongɛ dia toshaka wolo ndo dia tokeketshaka lo nyuma.
2 Ɔtɛkɛta waki Nzambi: Oko weso l’ohomba wa mbo ya ndɛ dia monga la wolo wa demba, mbeso ndo l’ohomba wa ndjalesha l’Ɔtɛkɛta wa Nzambi dia sho tshikala nge lo nyuma. (Mat. 4:4) Bible toshaka nkudu dia tosukɛ. Di’aha shisha ohetoheto ndo wangasanu aso l’akambo wa mɛtɛ, sho la dia salaka wekelo w’oshika ndo kanaka yimba l’awui akɔ lushi la lushi naka kokaka.—Osam. 1:2, 3.
3 Dɔmbɛlɔ: Ekɔ ohomba ndjasukanya le Jehowa, djekoleko lo tena dieso l’ohomba ɔmɔtshi wa lânde. L’ekimanyielo ka nyuma kande, nde mbishaka wolo le wanɛ wɔlɔmbawɔ lo dɔmbɛlɔ. (Luka 11:13; Ef. 3:16) Afundelo tokeketshaka dia sho ‘tetemala lo dɔmbɛlɔ.’ (Romo 12:12) Onde wɛ ekɔ lo sala dikambo sɔ?
4 Etshumanelo: Sho lawɔ kondjaka wolo ndo ekeketshelo oma lo nsanganya ya l’etshumanelo ndo oma lo diɔtɔnganelo di’oshika diele lam’asaso l’anangɛso ndo l’akadiyɛso wasangana la so lɛkɔ. (Heb. 10:24, 25) Etena keso l’ekakatanu, vɔ tokeketshaka ndo tokimanyiyaka la ngandji tshɛ.—Tuk. 17:17; Und. 4:10.
5 Olimu w’Esambishelo: Esambishelo k’esangɔ l’esangɔ tokimanyiyaka dia sho tetemala mbidja yimba l’awui wa Diolelo ndo l’ɛtshɔkɔ adiɔ. Sho keketshamaka etena kakimanyiyaso anto akina dia vɔ mbeya Jehowa. (Etsha 20:35) Aha anto tshɛ wa l’atei aso mbakoka monɔ dia tokamba lɛnɛ ele ohomba efula kana kamba olimu wa lo tena tshɛ, koko lo toho tokina sho kokaka sala tshɛ dia sambishaka efula.—Heb. 6:10-12.
6 Dikumanyi di’Akristo: Sho keketshamaka ndo kimanyiyamaka oma le dikumanyi. Jehowa akawasha ɔkɛndɛ wa kokɛ ɛkɔkɔ ande wele l’atei awɔ. (1 Pet. 5:2) Emendji weteta keketshaka tshumanelo diembolawɔ oko wakatshaka Paulo lo nshi yande.—Romo 1:11, 12.
7 Bɛnyɛlɔ dia wanɛ wele la kɔlamelo: Ekɔ ekeketshelo efula dia sɛdingola bɛnyɛlɔ diakeketsha di’oma le ekambi w’asekaso wele la kɔlamelo, oyadi wa lo nshi ya ntondo kana wa nshi nyɛ. (Heb. 12:1) Naka wɛ ekɔ l’ohomba w’ekeketshelo, bonde kahayadia ɛkɔndɔ ɛmɔtshi wakeketsha wa nsɛnɔ y’ekambi wa Jehowa watanema lo waa periodikɛ yaso, mbadia alapɔlɔ washa ekeketshelo wele lo Annuaires, kana mbadia ɛkɔndɔ ɛmɔtshi wakeketsha w’Ɛmɛnyi wa Jehowa wa nshi nyɛ wele lo dibuku Prédicateurs na?
8 Ɔnangɛso ɔmɔtshi laya kakianɛ l’ɛnɔnyi 90 l’ɛmɔtshi, aketawɔ akambo wa mɛtɛ lâsɔ ko nde êke dikɛnda dia pami. Lam’akinde êke dikɛnda, mbetawɔ kande kakahembama. Dui dia ntondo diakadje mbetawɔ kande l’ehemba ele woho wakandɛnyi nganɛ wakayotomba anto amɔtshi wakakambaka la waasaso kâmɛ l’etshumanelo oma l’ɔlɔngɔswamelo waki Jehowa. Dui dikina ele nde akɛnaka di’olimu w’esambishelo ka lo luudu la luudu wekɔ wolo le nde. Koko, nde akayaɛkɛka nshi tshɛ le Jehowa. Kombeta edja, nde akayɔngɛnangɛnaka esambishelo. Ko ngande wayande ɛlɔ kɛnɛ? Kânga mbayande bu la wolo wa demba, nde ekɔ lo tetemala kamba lo Bɛtɛlɛ ka la Brooklyn oko ɔmɔtshi wa l’atei w’Olui-Walɔmbɔla. Nde hanyange kânga yema lo woho wakandamamema ɔlɔngɔswamelo wa Jehowa.
9 Kadiyɛso kɛmɔtshi kakamba lo Bɛtɛlɛ ka l’Angleterre akabatizama lam’akinde l’ɛnɔnyi 13. Ɔnɔnyi wakayele, nde akatatɛ kamba olimu w’ombatshi mboka nde l’enondo ande la pami, ndo ɔnɔnyi ɔtɔi oma lâsɔ, wakadje she lo lokanu l’ɔtɛ wa lomangemange lande lo nshi yakalɔmaka Ta dia Hende dia l’Andja w’Otondo. Kadiyɛso kɛsɔ akatetemala la ndjaɛkɛ le Jehowa dia kondja wolo ndo nde kotshika kambɛ Nzambi ka mɛtɛ. L’ɔkɔngɔ diko, nde akayotshukanaka l’ɔnangɛso ɔmɔtshi la kɔlamelo ndo vɔ ahende wakatetemala sala lolango laki Jehowa. Ɛnɔnyi 35 l’ɔkɔngɔ wa vɔ tshukana, omɛnde akayovɔ nyɔi ka shashimoya. Etena kɛsɔ nto nde akakondja ekeketshelo oma le Jehowa ndo akatetemala mbôkambɛ polo ndo nshi nyɛ, ele l’elongamelo ka ndjôkambɛka pondjo pondjo oko ɔmɔtshi wa l’atei wa nkumbo k’anto waki Jehowa ka laa nkɛtɛ.
10 Jehowa kimanyiyaka ndo keketshaka ekambi ande wa kɔlamelo. “Ndi atushaka one lambokomo wulu. Ndi atufudiayaka one lamboko la yimba ntshimba wulu.” Sho koka kondja wolo w’oma lo kiɔkɔ yele la wolo waha l’ekomelo shɔ, naka tayokondjaka wahɔ oma l’akambo asamalo wele la diko ango. Tatohɛke ɔnɛ: ‘Wanɛ watolongamɛka le Jehowa wayolodiama la wolo w’oyoyo. . . . Vɔ wayolawɔ koko hawohekɔ, wayɔkɛndakɛnda koko hawɔkɔmɔ.’ (Is. 40:29-31) Dia kondja wolo, Paulo akayaɛkɛka tshɛ le Jehowa, lâsɔ sho lawɔ pombaka sala ngasɔ.