Ngɔndɔ ka nɛi ekɔ etena ka sho ‘kamba efula ndo ka ndjasha la wolo tshɛ’
1 Le ekambi wa Jehowa, mingu yele la ntondo ndo l’ɔkɔngɔ w’Eohwelo yekɔ etena ka kana yimba dimɛna. Ɔnɛ ekɔ etena ka kana yimba lo kɛnɛ kakatosalɛ nyɔi ka Yeso ndo elongamelo kakatosha Nzambi diɛsɛ oma lo dikila diakatshola Yeso. Lam’akanyiyayɛ datɛ dia Ngɔndɔ ka Nɛi 19, di’ɔnɔnyi w’etshi, kakɔna kokayɛ lo yimba na? Onde wɛ koka mbohɔ dungi di’anto wakayɛnyi la dikɔlɔ diakɔ? ɔngɛnɔngɛnɔ wa lo nyuma waki lushi la Eohwelo? Dako di’oshika di’oma lo Bible diakashama ndo alɔmbɛlɔ w’oma k’ɛse otema wakasalema? Ondo wɛ akɔshi yɛdikɔ ya mɛnya lowando layɛ lo yoho y’efula lo ngandji kakɛnya Jehowa nde la Yeso. Shɛngiya yakɔna yele l’akambo asɔ le yɛ ɛlɔ kɛnɛ?
2 Ekɔ mɛtɛ di’ekambi wa Jehowa mɛnyaka lowando lawɔ lo toho efula, koko aha l’ɛtɛkɛta eto. (Kol. 3:15, 17) Lo Ngɔndɔ ka Nɛi ketshi, takasale lo yoho ya lânde dia mɛnya lowando laso lo tɛdikɔ takɔshi Jehowa dia tosha panda, lo ndjasha l’olimu w’Akristo. Ambatshi mboka wa tshanda wakakome nunu, olekanyi ndo lofulo lakonge laso ntondo l’ɛtshi kaso ka nkɛtɛ pursa 83 y’etondo. Welo wakadje ambatshimboka, sanganya ndo welo wakadje apandjudi akina tshɛ wa Diolelo wakatondja lofulo l’oyoyo la wenya, la periodikɛ yakakahanyema ndo la waendelo w’eyoyo. Ɔngɛnɔngɛnɔ aso wakafule lam’akatɛnyi nunu di’anto watatɛ la mbeka Bible ndo lam’akatakonya lofulo l’oyoyo l’anto wakɔtɔ lo losanganya la Eohwelo!
3 Aha la tamu, lam’ele elongamelo kaso kekɔ shikaa, tɔ totshutshuyaka dia kamba. Ekɔ mɛtɛ oko wakafunde ɔpɔstɔlɔ Paulo ate: “Dia dikambu ne mbatshasu ulimu, ndu mbatetemalasu ne dia shu teko la elungamelu kasu le Nzambi ka lumu, leli Ushimbedi w’antu tshe, djekaleka le wane wetawo.”—1 Tim. 4:10.
4 Lo nshi y’Eohwelo nyɛ, ngande wayoyɛnya mbetawɔ kayɛ lo tɛdikɔ takɔshi Jehowa dia tosha lɔsɛnɔ na? Lo Ngɔndɔ ka Nɛi k’etshi, takakonya lofulo l’oyoyo l’apandjudi wa Diolelo. Onde kokaka sho ndekanya lofulo lɔsɔ lo Ngɔndɔ ka Nɛi kɛnɛ? Eelo, sho kokaka kotsha oyango ɔsɔ. Koko, ayonga ohomba di’opandjudi tshɛ oyadi wambobatizama kana wahatabatizama ndjasha dia sambisha. Efula k’eyoyo kokaka kotsha kɛnɛ kalɔmbama dia vɔ lawɔ mbisha lonya. Ɔnkɔnɛ, lam’ayalɔngɔsɔlayɛ dia nkamba efula ndo dia ndjasha la wolo tshɛ lo Ngɔndɔ ka Nɛi kɛnɛ, sɛdingola toho takokayɛ keketsha anto akina, mbidja ndo eyoyo la wanɛ wahâtahokɔ olimu dimɛna dia vɔ kotshindɛ.
5 Kimanyiya anto amɔtshi wahayosambisha: Naka wɛ mbeyaka anto amɔtshi wele aya ngɔndɔ ɔtɔi kana hiende yahawasambisha, kete ondo wɛ koka mbâkeketsha ndo mbâlɔmba dia vɔ kotshindɛ l’esambishelo. Naka ekɔ anto amɔtshi wa l’etshumanelo wambosala ngɔndɔ shamalo aha la sambisha, kete dikumanyi wayodja welo wa lânde dia mbaembola ko mbâkeketsha dia vɔ tatɛ sambisha nto lo Ngɔndɔ ka Nɛi.
6 Sho tshɛ pombaka tetemala la nɔmbaka nyuma ka Jehowa dia tɔ tokeketsha l’olimu aso. (Luka 11:13) Ahombaso sala dia nongola nyuma kɛsɔ na? Pombaka sho mbadiaka Ɔtɛkɛta waki Nzambi wakafundama lo wolo wa nyuma. (2 Tim. 3:16, 17) Sho pombaka nto ‘mpokamɛ kɛnɛ katɛ nyuma tshumanelo,’ lo mbɔtɔka lo nsanganya yakɔ tshanu ya lo lomingu la lomingu. (Eny. 3:6) Ɔnɛ ekɔ etena k’oshika ka kimanyiya wanɛ wahayosambisha ngɔndɔ mɔtshi kana ngɔndɔ shamalo dia vɔ nɔngɔsɔla mbekelo yawɔ ya wekelo ndo mbɔsa yɛdikɔ ya mbɔtɔka lo nsanganya mbala la mbala. (Osam. 50:23) Tokimanyiya anto akina ndo toyalame shamɛ dia monga la lonyuma la dimɛna. Koko, ekɔ dikambo dikina nto dialɔmbama.
7 Ɔpɔstɔlɔ Petero akalembetshiya dia Nzambi mbishaka nyuma kande k’ekila le “waku watûkitanyiyaka.” (Etsha 5:32) Okitanyiya wa ngasɔ nembetshiyaka nto kitanyiya didjango dia ‘nsambisha anto ndo mbâlembetshiya akambo dimɛna dimɛna.’ (Etsha 1:8, 10:42) Ɔnkɔnɛ, kânga mbele mɛtɛ tekɔ l’ohomba wa nyuma ka Nzambi dia tokeketsha woho wa sho sambisha, ekɔ nto mɛtɛ dia lam’atatɛso mɛnya nsaki kaso ka ngɛnyangɛnya Jehowa, nde tokimanyiyaka ndo lo yoho yoleki. Tatɔnyɔlake pondjo ohomba wa takola wanya w’etatelo asɔ wendana l’okitanyiya wa la lolango!
8 Ekimanyielo le akɛnda: Ambutshi, onde nyambɛna di’ana anyu waya la mposa ka mbewoya anto akina akambo wa mɛtɛ? Onde vɔ nyotshindɛka l’esambishelo? Onde vɔ mbishaka ɛnyɛlɔ ka dimɛna lo lɔkɛwɔ lawɔ? Naka eelo, kete tengengake dia mbewoya ɔmɔtshi wa l’atei wa Kɔmite k’Olimu k’Etshumanelo dia menda kana ɔmɔtshi l’atei w’anayɛ aya l’akoka wa monga opandjudi lo Ngɔndɔ ka Nɛi kɛnɛ. (Enda lo dibuku Notre ministère, lɛkɛ 100-101.) Eya dia ananyu kokaka kimanyiya efula dia tombola Jehowa lo nshi y’Eohwelo.—Mat. 21:15, 16.
9 L’osomba wa Géorgie lo wodja w’États-Unies, ombutshi ɔmɔtshi wa womoto akakeketshaka ɔnande la womoto leke dikɛnda nshi tshɛ dia nde sambishaka anto akina awui wa Jehowa. Ɔnɔnyi wetshi, lam’akatasambishaka ɔn’ɔsɔ nde la nyango, nde akasha pami kɛmɔtshi biukubuku Katɔlɔmba ndo akôlembetshiya lo tshena pe kɛnɛ kele lo ɛtɛ w’awui wofundami. Pami kɛsɔ akawombola ate: “Ɛnɔnyi engana wele layɛ?” Nde akakadimola ate: “Esambele.” Pami kɛsɔ akambe heyama dia mɛna woho wakosambisha ɔn’ɔsɔ dimɛna efula. Pami kakɔ akeyaka akambo wa mɛtɛ oma ko dikɛnda diande koko ndoko lushi lakandɔshi yɛdikɔ ya mbɔtɔnganyiya lɔsɛnɔ lande l’akambo asɔ. Kombeta edja, pami kɛsɔ, la wadɛnde, l’ɔnande la womoto wakatatɛ la mbeka Bible.
10 Akɛnda efula wambokomaka apandjudi, ndo sho ngɛnangɛnaka woho watotshindɛwɔ dia sambisha kâmɛ la so. Akɛnda asɔ koka kimanyiya ndo keketsha akina wa lo lɔlɔnga lawɔ. Koko, Ngɔndɔ ka Nɛi ekɔ nto etena k’ɔlɔlɔ le ase nkumbo dia keketsha diɔtɔnganelo ndo lonyuma lawɔ lo kamba olimu w’ekila kâmɛ. Ewandji wa nkumbo pombaka mbisha ɛnyɛlɔ lo dikambo sɔ.—Tuk. 24:27.
11 Ekimanyielo le eyoyo: Kayotota dikambo di’eyoyo weka layɛ Bible na? Onde hawokoke vɔ lawɔ mbisha lonya lo welo wa lânde wadjaso lo Ngɔndɔ ka Nɛi kɛnɛ? Ondo vɔ wakɛnya nsaki ka mbewoya anto akina kɛnɛ kakawekaka lam’akanyashidiya wekelo wa tshapita 2, odingɔ 22, kana tshapita 11, odingɔ 14, lo dibuku Ewo. Naka nyekɔ suke la shidiya dibuku nɛ, kete yalɔngɔsɔla dia mbɛnya dikambo sɔ hwe lam’ayonyɔsɛdingola tshapita 18, odingɔ 8, wata ɔnɛ: “Ondo wɛ ekɔ la mposa k’efula ka mbewoya ewotɔ ayɛ, angɛnyi ayɛ, ndo anto akina kɛnɛ kekayɛ. Mɛtɛ, ondo wɛ ambotatɛka sala dikambo sɔ, oko wakewoyaka Yeso lokumu l’ɔlɔlɔ le anto akina lo tena diakandakondjaka lo tshakitudi. (Luka 10:38, 39; Joani 4:6-15) Kakianɛ, ondo wɛ nangaka nyomosala awui efula.” Kema ndo wanɛ weka layɛ Bible mbakombola dia sala dikambo sɔ?
12 Onde ombeki ayɛ mbetawɔka Ɔtɛkɛta waki Nzambi? Onde nde kitanyiyaka atɔndɔ wa lo Bible? Onde nde mbɔtɔnganyiyaka lɔsɛnɔ lande l’ɛlɛmbɛ waki Nzambi? Onde nde mbɔtɔka lo nsanganya ya l’etshumanelo? Onde nde nangaka kambɛ Jehowa Nzambi? Lâsɔ, lande na kahayôkeketsha dia nde mɛnana la dikumanyi dia menda kana nde aya l’akoka wa koma opandjudi wahatabatizama na? (Enda lo dibuku Notre ministère, lɛkɛ 98-99.) Lo yoho shɔ mbayondotatɛ ndamɛ mɛna nganɛ wayowosukɛ ɔlɔngɔswamelo wa Jehowa lo welo wadjande dia mbôkambɛ.
13 Ekɔ mɛtɛ dia, ambeki amɔtshi pamaka esadi oleki akina. Ɔnkɔnɛ, lo ndjela dako diele l’Olimu Aso wa Diolelo wa Ngɔndɔ ka Samalo 2000, lɛkɛ 4, odingɔ 5-6, efula wakeke dibuku dia hende vɔ l’anto wakatatɛ mɛnya nsaki ntondo koko wakikɔ l’ohomba wa nyomokondja ekimanyielo kekina dia vɔ nkoma mɛtɛ wanɛ wakoka monga kâmɛ la so. Sho tekɔ lo tetemala la nongamɛ dia anto w’etema ɛlɔlɔ asɔ wayokoma ambeki wa Kristo w’eshika oyadi kânga lo “etena ka tshitshe kana k’utali.” (Etsha 26:29) Ko naka lofulo la ngɔndɔ yamboyeka la woho w’onto la ngasɔ lambɛnama dia lekɔ “etena . . . k’utali,” onde nshi y’Eohwelo nyɛ hakoke monga diaaso dia dimɛna le ombeki ayɛ dia nde tatɛ mɛnya lowando l’efula lele lande l’olambo wa tshungo waki Yeso?
14 Woho wa mbâkimanyiya dia vɔ sambisha: Sho mbekaka akambo efula lo woho wa kimanyiya anto dia vɔ monga l’akoka wa tatɛ sambisha lo sɛdingola woho waketsha Yeso anto akina. Nde komonga, ndjaka tana olui w’anto ko nde mbutɛ ambeki ande ate nyotate mbâsambisha. Ntondotondo, nde akawaɛnya ohomba w’olimu w’esambishelo, ohomba wa nɔmbaka ndo oma lâsɔ ko nde ndjowasha onto l’onto: ɔnɛ layotomba la nde, ɛtshi ka nkɛtɛ kayowosambisha, ndo losango lahombawɔ mɛmbɛ anto. (Mat. 9:35-38; 10:5-7; Mako 6:7; Luka 9:2, 6) Wɛ kokaka sala woho akɔ wamɛ. Oyadi ɔnayɛ mbayoyokimanyiya, ombeki w’oyoyo kana onto ɔmɔtshi lakayotshikaka sambisha l’etena kɛmɔtshi, ayonga ohomba wɛ mbidja welo wa lânde dia kotsha eyango wayela ɛnɛ.
15 Tɛtɛ l’ohomba w’olimu ɔsɔ: Ɛnya onto ohomba w’olimu w’esambishelo. Ɛnya ɛlɔlɔ waya oma lɔkɔ. Tɛnde awui amɔtshi wakete wɛnya kɛnɛ kasala etshumanelo l’esambishelo. Kɛnɛmɔla yimba yaki la Yeso yɛnyawɔ lo Mateu 9:36-38. Keketsha onto layanga dia monga opandjudi kana ɔnɛ lambosala ngɔndɔ shamalo aha la sambisha dia nde nɔmbaka lo kɛnɛ kendana la woho wayondoyasha ndamɛ l’esambishelo ndo di’olimu wakambema l’andja w’otondo kɛndakɛnda dimɛna.
16 Keketsha onto dia nde kanyiya efula ka waaso watanema dia nsambisha: Tɛnde dia nde kokaka sangana l’olui wa wekelo wa dibuku woho wa sala esambishelo ka lo luudu la luudu. Ewoyande ndo dia diaaso diele laso dia sawola l’ewotɔ, l’angɛnyi aso kana l’asekaso wa l’olimu kana wa la kalasa wonya wa diomuyelo. Wonya watatɛngɔla lo mutuka sho l’anto, sho kokaka kondja diaaso dia tatɛ sawo paka lo ndjasha tsho le anto watɛngɔla aso. Lam’ɔsaso yɛdikɔ shɔ, dikambo sɔ ndjotoshaka mbala efula diaaso dia sambisha dimɛna. Lo mɛtɛ ekɔ waaso efula wakokaso mbewoya anto akina elongamelo kaso “lushi la lushi.”—Osam. 96:2, 3.
17 Lâsɔ, ondo ayoleka dimɛna dia wɛ l’opandjudi w’oyoyo kamba kâmɛ l’esambishelo ka lo luudu la luudu kam’akondjayɛ diaaso. Naka wɛ amboyadjɛ oyango wa pamia olimu ayɛ lo Ngɔndɔ ka Nɛi, kete mbola ɔnangɛso lakaha bɛtshi dia nkɛtɛ dia mbeya kana ɛtshi ka nkɛtɛ kakokayɛ kamba kekɔ. Naka kekɔ, kete tɔ kayokosha waaso wa kikindjakindja. Oko ɛnyɛlɔ, lam’ashidiyayɛ olimu kana watshɔyɛ lo nsanganya kana l’ahole akina, wɛ koka mɛna dia onto ɔmɔtshi ekɔ la ngelo lo lokombo lakiyɛ kotana ndoko onto lam’akayete ntondo kana lam’aki ndoko onto lakɛnya nsaki. Naka kokaka, kete embola onto ɔsɔ lo tshena pe l’etena kɛnayɛ wate ndeka sungana. Lo sala ngasɔ, wɛ ayoka dia wɛ ambokotsha ɔkɛndɛ ayɛ ndo wɛ ayonga l’ɔngɛnɔngɛnɔ l’esambishelo.
18 Lɔngɔsɔla losango lɔmɔtshi lakotola yambalo y’anto: Nanga sambisha losango la Diolelo la mbeya woho wa lisambisha ekɔ akambo ahende wotshikitanyi, djekoleko naka onto eke oyoyo kana akayotshikaka etena k’otale aha la sambisha. Kimanyiya oyoyo kana onto lahayosambisha ngɔndɔ tshɛ ekɔ dui dia dimɛna efula. Losanganya l’Olimu ndo nsanganya y’otsha l’esambishelo kokaka tosha tokanyi t’amɛna efula, koko ndoko kɛdimi l’onto tayalɔngɔsɔdi ndamɛ.
19 Ngande wakokayɛ kimanyiya eyoyo dia vɔ ndjalɔngɔsɔla otsha l’esambishelo? Tatɛ la mbaɛnya woho wa mbisha onto periodikɛ lo yoho ya wɔdu ndo lo tshena pe! Lɔmbawɔ dia vɔ kanyiya akambo wakawoke lo tita nsango wakiyanya anto wa l’ɛtshi kanyu ka nkɛtɛ, ndo oma lâsɔ ko vɔ nyanga sawo dimɔtshi diele lo periodikɛ yeke ka ntomba diatɛkɛta dikambo diakɔ. Vusola kâmɛ la wɔ mbɔtwɛlɔ kakɔ ndo nyokambe latɔ l’esambishelo aha la tshimbatshimba.
20 Tohamia akoka aso lo kɛnɛ kendana l’ohamelo wayonga lo nshi yayaye: Ɔnɔnyi wetshi, lofulo l’anto wakɔtɔ lo Eohwelo l’andja w’otondo lakalekana miliyɔ 14,8. Koko, lofulo l’apandjudi wakakimɔ alapɔlɔ laki paka anto ndekana miliyɔ shamalo. Kɛsɔ mɛnyaka dia, oko anto miliyɔ 8,8 waketawɔ dia ndja lo ekongelo ka lânde kɛsɔ lɛnɛ akawayohokamɛ wetshelo ɔmɔtshi w’ohomba w’oma lo Bible. Vɔ wakayeyaka amɔtshi wa l’atei aso, ndo ondo dui sɔ diakonge la shɛngiya y’ɔlɔlɔ le wɔ. Efula l’atei awɔ tɛkɛtaka dimɛna dikambo diaso, mbidjaka lonya l’olimu aso wa l’andja w’otondo ndo ntɔswɛlɛka la ntondo k’anto akina. Olui ɔsɔ wa woke w’anto mɛnyaka woho w’ehamelo kayonga lo nshi yayaye. Akokaso sala dia mbâkimanyiya dia vɔ pama nto otsha la ntondo na?
21 Efula k’eyoyo waya lo Eohwelo ndjaka oma lo leeta lakawasha ɔmɔtshi la l’atei aso. Dikambo sɔ mɛnyaka mɛtɛ dia l’atei w’ampokami vɔ mongaka l’onto ɔmɔtshi leyawɔ. Naka onto ɔmɔtshi amboya lo leeta lakatawosha, kete tekɔ l’ɔkɛndɛ wa mbôlongola dimɛna ndo mbôkimanyiya dia nde ndjela losanganya dimɛna. Lam’ele dihole diayololanɛ l’anto, kimanyiyande dia nde tana dihole dia mbidjasɛ. Shande Bible, ndo lɔmbande dia nyu memba kâmɛ lo dibuku diayɛ di’esambo. Kadimola dimbola tshɛ diakokande kombola. Woho wayoyasha le nde, kokaka nyomoleka nomialomia nsaki kande. Koko, onto tshɛ l’atei aso ekɔ l’ɔkɛndɛ wa naka nde ambɛna elungi k’oyoyo, ko nde mbôlongola la wangasanu tshɛ ndo sawola la nde yema dia ndjaeyanya la nde.
22 Wɔtwɛlɔ wa lo Eohwelo mbeyaka monga la shɛngiya ya wolo lo tokanyi taki onto. Oyelo ande lo losanganya koka mɛnya dia nde atatane kɛnɛ katandayange l’ahole akina ndo ɔnɛ tambowosha ɛngɔ kɛmɔtshi kahombande sɛdingola dimɛna dimɛna. Olembetshiyelo wendana la yɛdikɔ ya diambo efula yakɔshi Nzambi dia tosha tshungo koka monga dikambo di’oyoyo le onto lele bu ndoko la kanyi lo kɛnɛ kendana la ngandji k’efula kele la Jehowa. Nde koka mɛna esadi eto dia sho tshikitana l’anto akina oma lo woho weso kema dungi pende, oma lo lɔngɛnyi, ngandji ndo loshilambo lele laso. Mbalasa kaso hafɔnɛ la kɛnɛ katondɛnaka lo mvudu y’ɛtɛmwɛlɔ lɛnɛ ele mpingu la waa sɛlɛmɔnyi kina. Eyoyo wayɛna mɛtɛ dia ampokami wekɔ anto wa weho tshɛ ndo hawosale ɔkɔngɔ wa falanga. Akambo asɔ mbeyaka monga la shɛngiya ya wolo le wɔ dia vɔ nyomokalola nto lo mbalasa ka Diolelo.
23 L’ɔkɔngɔ wa Eohwelo, onto ɔmɔtshi pombaka monga suke dia kimanyiya eyoyo tshɛ wakaye lo losanganya. Naka wɛ akete oyoyo ɔmɔtshi, kete wɛ ekɔ l’ɔkɛndɛ wa lânde. La ntondo ka vɔ kalola, yashikikɛ dia vɔ wambeya awui wendana la nsanganya kina yasalema lo Mbalasa ka Diolelo. Tɛwɔ ɔtɛ a dui wa dako dia lo sɛkɛ dia mbala kayaye. Ewoyawɔ dihole ndo wonya wasalema Wekelo wa Dibuku wa l’Etshumanelo wosukanyi la lanɛ wodjashiwɔ. Oma lâsɔ, ko wɛ mbasha dibuku Ewo, ko mbaewoya sawo diayekama lomingu la Ngɔndɔ ka Nɛi 30, sawo diakɔ diekɔ l’ɔtɛ ate: “Ngande Wele Wakiso wa Ngandji Wakavu?” Lembetshiyande ɔkɔkɔ wayalɔngɔsɔla etshumanelo k’otondo dia mbɔtɔ lo losanganya la distrikɛ laya suke la salema layonga suke lawɔ.
24 Yalɔngɔsɔla dia towaenda lawakawɔ lushi lɔmɔtshi. Yashikikɛ dia vɔ wekɔ la biukubuku Katɔlɔmba ndo dibuku Ewo, nɛ dia abuku asɔ mbayowakimanyiya dia vɔ mbeya atshina w’akambo wa lo Bible. Naka polo lâsɔ ko vɔ watatatɛ mbeka, kete lɔmbawɔ dia tatɛ mbeka lawɔ Bible. Lɔmbawɔ dia vɔ mbadia biukubuku Les Témoins de Jéhovah, yɛnya hwe woho wakɛndakɛnda ɔlɔngɔswamelo aso. Lɔmbawɔ nto dia vɔ menda waa bandɛ video yaso, oko ɛnyɛlɔ Our Whole Association of Brothers (Tshunda di’Otondo di’Anangɛso). Lɔngɔsɔla dia vɔ mɛnana l’anto akina wa l’etshumanelo. Lo ngɔndɔ yayaye, tetemala la mɛnanaka l’eyoyo, etawɔ dia ndjɔtɔ lo nsanganya lam’aya omendji w’otshimbedi kana lam’enyu la losanganya l’otshimbedi kana la lânde la lushi ɔtɔi. Shawɔ diaaso tshɛ dia vɔ ndjaɛnya dia “wakasonama lu lumu la pundju.”—Etsha 13:48.
25 Kɛnɛ kakoka dikumanyi ntsha: Dia sho tondoya lo welo wayotodja dia sambisha efula lo Ngɔndɔ ka Nɛi kɛnɛ, dikambo sɔ nemanɛka lo yɛdikɔ y’efula la kɛnɛ kayosala dikumanyi. Naka wɛ ekɔ ɔnɔmbɔdi wa wekelo wa dibuku, kete funda akambo wakokayɛ sala dia kimanyiya onto tshɛ la l’olui ayɛ wa wekelo wa dibuku dia nde lawɔ mbidja lonya l’elimu ɛnɛ wa lânde. Onde olui ayɛ wekɔ l’anto amɔtshi weke akɛnda, eyoyo, wahayosambisha ngɔndɔ mɔtshi, kana ngɔndɔ shamalo? Enda kana ambutshi, ambatshi mboka kana apandjudi akina wambɔsaka yɛdikɔ ya mbakimanyiya. Shawɔ ekimanyielo tshɛ kakokayɛ mbâsha l’onto ndo l’onto. Kadiyɛso kɛmɔtshi kakasale ɛnɔnyi ehende w’etondo, aha la kimɔ alapɔlɔ w’olimu ngɔndɔ tshɛ akasambisha ndekana wenya 50 lo Ngɔndɔ ka Nɛi ketshi. Kakɔna kakôkimanyiya dia sala otshikitanu ɔsɔ na? Nde akate ate aki wendelo w’ekeketshelo wakasale dikumanyi.
26 Dikumanyi vɔ l’ekambi w’olimu pombaka kamba kâmɛ woho wa ndjashikikɛ ɔnɛ bɛtshi dia nkɛtɛ diahombama diekɔ, mbidja ndo periodikɛ ndo ekanda wayonga ohomba lo ngɔndɔ kayaye. Onde kokaka nɔngɔsɔla nsanganya kina y’otsha l’esambishelo? Naka eelo, kete nyewoya etshumanelo tɛdikɔ ta lânde tambɔsama. Lâdiko di’akambo asɔ tshɛ, l’alɔmbɛlɔ anyu wa lo sɛkɛ kana wa lânde, nyɔlɔmbɛ Jehowa dia nde tshɔkɔla ngɔndɔ kaso kambotɔsa yɛdikɔ ya nyomoleka kamba olimu wa Diolelo.—Romo 15:30, 31; 2 Tes. 3:1.
27 Lo Ngɔndɔ ka Nɛi ketshi, l’etshumanelo kɛmɔtshi ka lo lɛkɛ la Nɔrdɛ ka Californie lo wodja w’États-Unis, dikumanyi mɛtɛ wakakeketsha anto dia ndjakimɔ efula l’olimu w’esambishelo. Lomingu tshɛ lo nsanganya, vɔ wakalɔmbaka apandjudi dia sɛdingola lo dɔmbɛlɔ dia menda kana vɔ kokaka kamba olimu w’ombatshi mboka wa tshanda. Lo diaaso tshɛ, dikumanyi la ekambi w’olimu tshɛ wakakeketshaka anto la wangasanu tshɛ dia mbetɛ Ngɔndɔ ka Nɛi ngɔndɔ koleki tshɛ dimɛna le so. Etombelo wakonge ko pursa 58 y’apandjudi mbidja ndo dikumanyi l’ekambi w’olimu tshɛ wakakambe olimu w’ombatshi mboka ngɔndɔ kɛsɔ!
28 Ɔngɛnɔngɛnɔ waya oma lo sambisha efula: Ɛtshɔkɔ akɔna waya oma lo ‘kamba efula ndo ndjasha la wolo tshɛ’ l’esambishelo na? (1 Tim. 4:10) Lo kɛnɛ kendana l’ohetoheto waki l’etshumanelo kawɔ lo Ngɔndɔ ka Nɛi ketshi, dikumanyi diotshiso la diko ndo wakafunde vate: “Anangɛso l’akadiyɛso mbutaka mbala efula dia lam’akawatatɛ kamba kâmɛ mbala la mbala l’olimu w’esambishelo, ngandji ndo lɔngɛnyi lawɔ lakatamanya monga wolo lam’asawɔ.”
29 Ɔnangɛsɔ ɔmɔtshi leke dikɛnda lele la pâ dia kɛndakɛnda akakombola efula dia nde lawɔ mbisha lonya l’olimu wa lânde wakasalema Ngɔndɔ ka Nɛi ketshi. Diɛsɛ oma l’ekongelo k’oshika ndo oma l’ekimanyielo ka nyango ndo k’anango l’akadiyɛnde wa lo nyuma, nde akatondoya dia sambisha oko ombatshi mboka wa tshanda lo ngɔndɔ kɛsɔ. Ngande wakandayaoke l’ɔkɔngɔ wa kɛnɛ kakandasale kɛsɔ na? Nde akate ate: “Ekɔ mbala ka ntondo lo lɔsɛnɔ lami ka dimi ndjaoka oko onto ɔmɔtshi lele bu l’ɛkɔmɔ.”
30 Ndoko tamu dia Jehowa mbishaka wanɛ wɔsa la nɛmɔ di’efula diɛsɛ diawɔ dia sambishaka lowandji lande ɛtshɔkɔ efula. (Osam. 145:11, 12) Lam’ohɔso nyɔi kaki Nkumɛso, sho shihodiaka dia wanɛ wayakimɔ le Nzambi wayokodja ɛtshɔkɔ w’efula kânga lo nshi yayaye. Ɔpɔstɔlɔ Paulo akalongamɛka difuto dia lɔsɛnɔ la pondjo l’asolo walomɔlomɔ. Koko, nde akeyaka dia ɔsɔ kema ɛngɔ kakandahombe mbidjasɛ tsho ko kɔma anya dia kilongamɛka. Nde akafunde ate: “Dia dikambu ne, mbatumutshaka ulimu wulu, mbatumuhimbaka ntsha ulimu andi la wulu ami tshe watundumbishaka.” (Kol. 1:29) Oma lo tshimbo yaki Yeso, Jehowa akasha Paulo wolo wa nde kamba olimu wakokɛ nsɛnɔ y’anto ndo Nde kokaka ntsha woho akɔ wamɛ le so ɛlɔ kɛnɛ. Onde wɛ ayona dia shikikɛ dikambo sɔ wɛmɛ lo Ngɔndɔ ka Nɛi kɛnɛ?
[Caption on page 3]
[Box on page 3]
Akɔna Akokayɛ Keketsha
dia Sambisha lo Ngɔndɔ ka Nɛi?
Ɔnayɛ?
Ombeki wa Bible?
Onto ɔmɔtshi laya ngɔndɔ shamalo aha la sambisha?