Tonge l’Ohetoheto l’Akambo w’Ɔlɔlɔ!

¹ Lam’ele tambɔtɔ lo nshi ya Eohwelo ka l’ɔnɔnyi 2003, tekɔ l’ɛkɔkɔ efula wa monga ‘l’ohetoheto l’akambo w’ɔlɔlɔ.’ (1 Pet. 3:13) L’atei w’ɛkɔkɔ ɛsɔ, ɔkɔkɔ woleki tshɛ ele olambo wa tshungo waki Yeso Kristo. (Mat. 20:28; Joa. 3:16) Lo kɛnɛ kendana la dikambo sɔ, ɔpɔstɔlɔ Paulo akafunde ate: “Nyu kuntshungwama la diango diayulana, la fesa kana paunyi, uma lu ditshelu dianyu di’anyanya, . . . Keli nyu nyakatshungwama la dikila di’ushinga a wulu, uku dia ona okoko laha la munga kuyanga vadi, dia Kristu ndame.” (1 Pet. 1:​18, 19) Lowando lele laso lo yoho ya diambo efula yakawatɛnya ngandji totshutshuyaka dia sala akambo w’ɔlɔlɔ, teya dia Yeso “akayakimo dikambu diasu, dia ndi ntutshungula uma lu kolo tshe, la dia mbedia antu wayali wandi hita, ndu [wele l’ohetoheto l]’elimu w’ololo.”​—⁠Tito 2:14; 2 Kor. 5:​14, 15.

² Etena kasalaso kɛnɛ kele ɔlɔlɔ lo washo wa Nzambi, sho mongaka la diokanelo di’ɔlɔlɔ lam’asaso la nde ndo nde tokokɛka la ngandji tshɛ. Petero akate nto ate: “Untu latulangaka lumu, la atulangaka mena nshi y’ololo, . . . ndi akadimo uma lu kolo, atshaki ololo; ayangi ki, akiyeli. Ne dia ashu wa khumadiondjo weko le antu w’ololo, atui andi weko hwe lu dombelo diawo.” (1 Pet. 3:​10-12) Lo tena dia kɔlɔ nɛ, ekɔ tshondo y’ɔtshɔkɔ dia mbeya dia Jehowa ekɔ lo tolama ndo ɔnɛ nde ekɔ wonya tshɛ suke dia mbekɛ lonya lande dikambo diaso, dia ‘tokokɛ oko ɔna sso diande.’​—⁠Euh. 32:10; 2 Ek. 16:⁠9.

³ Kânga mbakawadiɛnɛka l’ekakatanu, Akristo wele Petero akâfundɛ mukanda ɔnɛ wakahɛtahɛtaka l’ohetoheto, ndo wakasambisha lokumu l’ɔlɔlɔ polo lɛnɛ akawakoke lisambisha. (1 Pet. 1:6; 4:12) Woho akɔ wâmɛ mbasala ndo ekambi waki Nzambi ɛlɔ kɛnɛ. Kânga mbasɛnaso lo “tena dia wulu,” lowando lele laso l’ɛlɔlɔ waki Jehowa totshutshuyaka dia sala lolango laki Nzambi l’ohetoheto tshɛ. (2 Tim. 3:1; Osam. 145:⁠7) Nyɛsɔ tɔsɛdingole elimu ɛmɔtshi w’ɔlɔlɔ wayotoyakimɔ lɔkɔ lo nshi ya Eohwelo nyɛ.

⁴ Teete Anto Akina oya lo Eohwelo: Yoho mɔtshi yakokaso mɛnya lowando laso lo woshasha wa mamba wa tshungo ele monga lo eohwelo ka nyɔi ka Yeso kasalema ɔnɔnyi l’ɔnɔnyi. Ɔnɔnyi ɔnɛ, tɔ kayosalema Lushi la Sato, Ngɔndɔ ka Nɛi 16, l’ɔkɔngɔ wa ɛɔtwɛlɔ ka wonya. (Luka 22:​19, 20) Ɔnɔnyi wetshi tshumanelo dia l’andja w’otondo diaki 94600 ndo anto tshɛtshɛ wakɔtɔ lo eohwelo kɛsɔ aki anto 15597746! Mɛnamaka di’anto ndekana 220000 wakakotshama lo mbɛdika la lofulo la wanɛ w’ɔnɔnyi wa la ntondo.

⁵ Ko anto angana wayɔtɔ ɔnɔnyi ɔnɛ na? Dui sɔ nemanɛka lo yɛdikɔ y’efula la welo wa lânde wayotodja dia keketsha anto akina dia sangana la so. Tatɛ funda nkombo y’anto tshɛ walangayɛ mbelɛ. Tatɛ la funda nkombo y’ase nkumbo kayɛ. Naka wɛ ekɔ l’olonganyi wele kema ombetawudi, kete ɛnyande l’otema ɔtɔi dia wɛ nangaka nde monga kâmɛ layɛ lo eohwelo kɛsɔ. Pami kɛmɔtshi kele kema ombetawudi akate ate nde akɔtɔ l’Eohwelo k’ɔnɔnyi wetshi nɛ dia wadɛnde akangɛnangɛna efula dia nde monga lawɔ. Oma lâsɔ ko wɛ funda nkombo y’ewotɔ ayɛ, y’asukanyi ayɛ, y’asekayɛ wa l’olimu, kana y’asekayɛ wa lo kalasa. Tohɛke dia mbeta ambeki ayɛ wa Bible.

⁶ L’ɔkɔngɔ wa wɛ sala listɛ l’anto wayoyelɛ, kɔsɔnɛ ndo etena kayoyototshikɛ onto l’onto dikatshi diande dia leeta. Kamba l’akatshi wa leeta wa Eohwelo. Dia kimanyiya anto dia vɔ mbohɔ wonya ndo dihole diayosalema Eohwelo, sho pombaka mbafundɛ l’ɛse ka dikatshi dia leeta sɔ dihole ndo wonya wayosalema Eohwelo. Lam’ele Ngɔndɔ ka Nɛi 16 kaya suke, tshɔka dia tembola anto wele lo listɛ layɛ kana wɛ mbatelefɔnɛ dia mbaohola. Nyɛsɔ tokimanyiya anto efula dia vɔ monga lo diaaso dioleki ekila sɔ.

⁷ Tokimanyiya Wanɛ Wayɔtɔ lo Eohwelo: Otsho wa lushi l’Eohwelo mongaka nshi tshɛ diaaso di’ɔngɛnɔngɛnɔ efula. Sho mongaka la diɛsɛ dia nongola anto wele watɔtɔka lo nsanganya yaso. Yalɔngɔsɔla dia koma esadi ndo naka kokaka, totombake kam’ashila Eohwelo. Yanga dia mbeyana l’anto w’eyoyo wele l’atei w’ampokami. Onga la wangasanu ndo longolaka anto dimɛna.​—⁠Romo. 12:13.

⁸ Onde anto amɔtshi woye lo Eohwelo mbeyaka kimanyiyama dia pama lo nyuma oma lo wekelo wa Bible wa la ngelo? Tosale la wolo dia funda nkombo ndo adrɛsɛ w’anto tshɛ wele mbala kɛnɛ vamɛ wakaye aha l’onto mbaelɛ woho wa sho mbeya nganɛ wa tetemala mbakimanyiya. Naka sho mbakimanyiya la ngandji tshɛ, kete amɔtshi l’atei awɔ mbeyaka pama polo ndjokoma apandjudi wahatabatizama la ntondo ka Eohwelo k’ɔnɔnyi wayaye. Lam’ayototshɔ dia tembola anto wakɔtɔ lo Eohwelo, towawete dia vɔ ndjohokamɛ dako dia lânde diayoshama Ngɔndɔ ka Nɛi 27.

⁹ Onde Wɛ Koka Kamba oko Ombatshi Mboka wa Tshanda lo Ngɔndɔ ka Sato ndo ka Nɛi? Ɔnɔnyi tshɛ, ohetoheto aso otsha le Jehowa totshutshuyaka dia sho ndjakimɔ tshɛ l’olimu w’esambishelo lo ngɔndɔ shɔ yakambema olimu wa lânde. Sho koka kondja etombelo w’ɔlɔlɔ naka as’etshumanelo sanganya welo awɔ dia sambisha lokumu l’ɔlɔlɔ l’ohetoheto tshɛ lo nshi ya Eohwelo.

¹⁰ Etshumanelo kɛmɔtshi kaki l’apandjudi 107 ndo ambatshi mboka wa pondjo 9 wakate dia Ngɔndɔ ka Nɛi ketshi, aki mɛtɛ “ngɔndɔ ka diambo efula,” nɛ dia ngɔndɔ kɛsɔ apandjudi 53 wakakambe oko ambatshi mboka wa tshanda, mbidja ndo dikumanyi la ekambi w’olimu tshɛ. Ngande wakalomialomia dikumanyi nsaki k’anto dia vɔ kamba oko ambatshi mboka wa tshanda lo ngɔndɔ kɛsɔ na? Vɔ wakatatɛ kɔlɔmɔ la keketsha anto dia kamba oko ambatshi mboka wa tshanda. Nsanganya y’otsha l’olimu w’esambishelo yakasalemaka lo wenya wotshikitanyi lo lushi dia kimanyiya anto tshɛ wa l’etshumanelo. Wakaleke keketsha anto dia sambisha lo telefɔnɛ, djekoleko akanga wa dikɔmɔ.

¹¹ Kadiyɛso kɛmɔtshi kaki l’ɛnɔnyi 86, kaki kokokaka kɛndakɛnda l’ɔtɛ wa pâ kaki lande lo demba, akalodia dɛmandɛ di’ombatshi mboka wa tshanda. La pindju, nde akasambishaka wenya ɛmɔtshi lo telefɔnɛ etena kakandadjasɛka lo mɛsa wa lo kuku, oma lâsɔ ko nde mumuya wenya ɛmɔtshi engana, l’ɔkɔngɔ diko ko nde sambisha nto wenya efula lo telefɔnɛ. Onto ɔmɔtshi lakasawola la nde akawotɛ dia l’ɛnɔnyi ehende wetshi, nde akavusha omɛnde ndo anande ahende w’apami ndo nde komboka bonde kaketawɔ Nzambi di’akambo wa kɔlɔ wa ngasɔ mbokomɛ. Kadiyɛso akosambisha dimɛna, ndo wekelo wa Bible wakatatɛ. Esambishelo ka lo telefɔnɛ la dikɔlɔ ndo wenya ekina ekɔ yoho ya dimɛna ya sambisha anto wadjasɛ lo mvudu y’etajɛ kana l’ahole wahɔtɔ anto wɔtɔtɔ. Tɔ kimanyiyaka nto apandjudi dia sambisha anto wahongi lawakawɔ lushi l’otondo.

¹² Dikumanyi wakakumiya alapɔlɔ awɔ lo mbuta ɔnɛ: “Takakondja waaso w’ɔlɔlɔ ndo taki la lowando lo waɛsɛ ndo ɛtshɔkɔ wakasha Jehowa ɔmɔmɔ la l’atei aso.” Naka nyu monga l’ekongelo ka dimɛna, kete ndo etshumanelo kanyu koka kondja ɛtshɔkɔ wa ngasɔ.

¹³ Tosale la Wolo dia Ndjakimɔ Tshɛ lo Tshɛ l’Olimu w’Esambishelo: Ngandji kokaso Nzambi ndo onyaso onto totshutshuyaka dia ndjatshungolɛ etena ngɔndɔ tshɛ dia sambishaka anto akina lokumu l’ɔlɔlɔ. (Mat. 22:​37-39) Emendji wa Wekelo wa Dibuku wa l’Etshumanelo ndo akimanyedi awɔ ndjatshutshuyaka dia kimanyiya anto wa l’olui awɔ dia sambishaka ngɔndɔ tshɛ. Yoho ya dimɛna ya sala dikambo sɔ ele ndjalɔngɔsɔla la ntondo dia sambisha l’anto amɔtshi shikaa wa l’olui anyu. Lo dihole dia ndjosala dikambo sɔ paka l’ekomelo ka ngɔndɔ, tatɛ sala ngasɔ l’etatelo ka ngɔndɔ. Dui sɔ diayokosha waaso efula wa kimanyiya anto akina la ngandji tshɛ.

¹⁴ Onde nyekɔ l’apandjudi wele la dikɔmɔ l’olui anyu wa wekelo wa dibuku wele l’okakatanu dia tomba l’olimu w’esambishelo? Naka amɔtshi wekɔ lo lopitadi kana dihama lo mvudu yawɔ la hemɔ, kete mbokɛmaka dia vɔ hawotonga la waaso w’efula wa sambisha. Koko lo kamba dimɛna la yema ya waaso tshitshɛ wele lawɔ dia ngamula osase awɔ, vɔ mbeyaka tshutshuya wanɛ wɛna elimu awɔ w’ɔlɔlɔ dia ndjasha l’otema ɔtɔi l’akambo wa mɛtɛ. (Mat. 5:16) Omendji wa wekelo wa dibuku pombaka ndjashikikɛ ɔnɛ anto asɔ mbeyaka dia vɔ kokaka kimɔ alapɔlɔ awɔ w’olimu oyadi kânga ekɔ minitɛ 15 tsho mbakawasambisha. Apandjudi asɔ wa kɔlamelo keketshamaka ndo mongaka l’ɔngɛnɔngɛnɔ w’efula etena kongawɔ l’akoka wa kimɔ alapɔlɔ awɔ w’olimu w’esambishelo. Dikambo sɔ kimanyiyaka nto dia shikikɛ ɔnɛ alapɔlɔ wa l’andja w’otondo w’elimu wakakambe ekambi wa Nzambi wekɔ wa mɛtɛ.

¹⁵ Ɛlɔngɔlɔngɔ l’Esekaseka Wayakimɔ Tshɛ dia Sala Akambo w’Ɔlɔlɔ! Ekɔ ekeketshelo k’efula dia mɛna woho wakamba ɛlɔngɔlɔngɔ l’esekaseka w’Akristo la wolo awɔ l’olimu waki Jehowa! (Tuk. 20:29) Naka wɛ ekɔ ɔlɔngɔlɔngɔ kana osekaseka, ngande wakokayɛ mɛnya ohetoheto ayɛ le Jehowa l’olimu wayotokamba lo ngɔndɔ hiende ya lânde nyɛ na?

¹⁶ Naka wɛ atakome opandjudi wambobatizama l’etshumanelo, onde wɛ kokaka sala tshɛ dia kondja diɛsɛ sɔ? Yambola wembola wayela ɛnɛ: ‘Onde dimi lekɔ la ewo ka shikaa k’akambo wa mɛtɛ wa lo Bible? Onde dimi nangaka ndjasha l’olimu wa Diolelo? Onde dimi mbishaka ɛnyɛlɔ ka dimɛna oma lo lɔkɛwɔ lami? Onde dimi kokaka mɛnya mbetawɔ kami lo sambisha anto akina lokumu l’ɔlɔlɔ? Onde otema ami tshutshuyakami dia ntsha dikambo sɔ?’ Naka ekadimwelo kayɛ kekɔ eelo lo wembola ɛnɛ, kete sawola l’ambutshi ayɛ lo kɛnɛ kendana la nsaki kayɛ ka koma opandjudi. Ambutshi ayɛ kokaka sawola l’ekumanyi kɛmɔtshi l’atei wa dikumanyi diakamba lo kɔmite k’olimu.

¹⁷ Ko naka wɛ amboshilaka monga opandjudi wa lokumu l’ɔlɔlɔ, onde wɛ kokaka kamba dimɛna la nshi ya vakashi dia sambisha efula? Ɛlɔngɔlɔngɔ l’esekaseka efula wambobatizama wakonge l’akoka wa kamba olimu w’ombatshi mboka wa tshanda lo woho wakiwɔ l’ekongelo k’ɔlɔlɔ ndo oma l’ekimanyielo k’oma le ambutshi ndo k’oma le anto akina. Naka wɛ bu l’akoka wa kamba oko ombatshi mboka wa tshanda, kete yashikikɛ dia pamia olimu ayɛ w’esambishelo. Yadjɛ oyango wɛmɛmɛ. Lâdiko di’oyango wendana la lofulo la wenya, yadjɛ oyango okina wendana l’olowanyelo w’olimu ayɛ. Ondo wɛ mbeyaka ndjâtshutshuya dia mbadiɛka anto divɛsa dimɔtshi lo soko tshɛ diayoyosambisha, dia ndowanya wendelo w’eyoyo wasalayɛ, dia tatɛ wekelo wa Bible l’onto ɔmɔtshi, kana pamia olimu ayɛ lo sambishaka ndo lo telefɔnɛ kana ndjalowanya l’akambo akina wendana l’olimu w’esambishelo. Ko kayotota lo kɛnɛ kendana l’oyango wa mbelɛ osukanyi, ɔngɛnyi ayɛ wa lo kalasa kana owotɔ ayɛ ɔmɔtshi oya lo Eohwelo ka l’ɔnɔnyi ɔnɛ na? Naka tayoyasha efula l’elimu ɛsɔ wa teokrasi, kete tayokondja ɛtshɔkɔ efula ndo dikambo sɔ diayokeketsha anto akina wa l’etshumanelo.​—⁠1 Tes. 5:⁠11.

¹⁸ Tokimanyiya Eyoyo dia Vɔ Pama: L’ɔnɔnyi w’olimu wetshi, takekaka Bible ngɔndɔ tshɛ la yɛdikɔ ya l’atei atei y’anto 224318 lo Congo-Kinshasa, ndo anto 14192 lo Congo-Brazzaville. L’edjedja ka wonya, efula l’atei w’ambeki wa Bible asɔ wayohama polo ndo lo vɔ ndjakimɔ le Nzambi ndo batizama. Koko, la ntondo ka vɔ kotsha oyango ɔsɔ, sho pombaka mbakimanyiya dia vɔ koma apandjudi wa lokumu l’ɔlɔlɔ. Ɔsɔ ekɔ nna di’ohomba lo kɛnɛ kendana la mbetsha eyoyo woho wa vɔ koma ambeki wa Yeso Kristo. (Mat. 9:9; Luka 6:40) Onde wɛ ekɔ l’ombeki wa Bible waya suke la takola nna sɔ?

¹⁹ Naka wɛ kema l’eshikikelo l’ohamelo w’ombeki ayɛ wa Bible, kete yanga ekimanyielo kaki omendji wa wekelo wa dibuku kana omendji w’olimu. Ondo wɛ koka mbelɛ dia nde monga wonya wekayɛ l’ombeki akɔ. Anangɛso asɔ wekɔ l’akoka wa menda dimɛna polo lo yɛdikɔ yakɔna yambohama ombeki wa Bible ɔsɔ lo nyuma. Vɔ mbeyaka monga l’alako wayokimanyiya ombeki dia nde tetemala pama lo nyuma.

²⁰ Naka ombeki ayɛ ambɛnya dia nde nangaka koma opandjudi wahatabatizama, ko wɛ mɛnaka dia nde ambokoka, kete sawola l’omendji-walɔmbɔla. Nde ayoyalɔngɔsɔla dia dikumanyi dihende mɛnana la yɛ wɛ l’ombeki ayɛ dia menda kana nde ambokotsha awui walɔmbama. Vɔ wayokamba l’awui wa lo dibuku Notre ministère lɛkɛ 98-99. (Enda Tshoto y’Etangelo ya Ngɔndɔ ka Dikumi l’Ɔtɔi 15, 1988, lɛkɛ 17 lo Falase.) Naka wambetawɔ di’ombeki ayɛ koma opandjudi, kete wɛ pombaka tatɛ mbɛnya woho wasambishaso aha la tshimbatshimba. Kam’ayondotatɛ kimɔ alapɔlɔ w’olimu, wayewoya etshumanelo dia nde aya opandjudi wahatabatizama. Sho kombolaka dia nunu di’apandjudi w’eyoyo, oyadi akɛnda kana dikumanyi, kotsha oyango w’ohomba efula ɔsɔ lo ngɔndɔ hiende ya lânde nyɛ.

²¹ Tayokamba Olimu Woleki Ɔlɔlɔ Naka Sho Takonge Akambo la Ntondo: Tayonga l’akoka wa ndjasha efula l’elimu wa teokrasi lo nshi ya Eohwelo nyɛ, naka sho takonge akambo la ntondo. (Tuk. 21:⁠5) Ekɔ awui efula wahomba kotola yambalo yaki dikumanyi.

²² Dia kimanyiya etshumanelo dia sambisha lo yoho yoleki tshɛ dimɛna, dikumanyi pombaka mbɔsa tɛdikɔ t’ɔlɔlɔ dia nsanganya y’otsha l’olimu w’esambishelo salemaka lushi tshɛ ndo lo wikɛndɛ. Omendji w’olimu mbele l’ɔkɛndɛ wa ntondo wa kongɛ nsanganya shɔ. Onde nsanganya nkina y’otsha l’esambishelo koka salemaka la pindju k’efula kana la dikɔlɔ dia yɔɔ? Pombaka mbewoya etshumanelo tɛdikɔ tambɔsama. Mbeyaka monga dimɛna panɛ ekongelo kɛsɔ lo dibaya dia waewoyelo.

²³ Dikumanyi pombaka ndjashikikɛ di’ɛlɔngɔswɛlɔ wendana la Eohwelo wambotasademi la ntondo ka Ngɔndɔ ka Nɛi 16. Ɛlɔngɔswɛlɔ ɛsɔ mendanaka ndo la woho wayonyokambaka la Mbalasa ka Diolelo naka ndo tshumanelo dikina mbasangana lɔkɔ, vɔ mendanaka nto l’osolelo wa Mbalasa ka Diolelo, wanɛ wayolongolaka anto ndo wayetshetsha mapa la vinyɔ ndo woho wa kondja mapa akɔ la vinyɔ. Pombaka tewoyisha etshumanelo wonya ndo dihole diayosalema Eohwelo la ntondo ndo etshikitanu tshɛ wambosalema lo kɛnɛ kendana l’ekongelo ka losanganya ka lomingu lɔsɔ. Naka tayodja yimba l’akambo ango, kete eohwelo ‘kayeta dimɛna ndo aha l’ofukutanu.’​—⁠1 Kor. 14:40.

²⁴ Lo wekelo awɔ wa lo nkumbo, ɛtɛ wa nkumbo mbeyaka mɛna ɔlɔlɔ vɔ kɛtshanya woho wakokawɔ sambisha efula lo nshi ya Eohwelo. Onde nkumbo kayɛ k’otondo kokaka kamba oko ambatshi mboka wa tshanda? Kana onde ase nkumbo kokaka sukɛ ɔnɛ kana wanɛ wambetawɔ dia kamba olimu ɔsɔ? Naka ndooko lakoka sala dikambo sɔ, kete ase nkumbo wayadje eyango wa shikaa dia mbetsha wenya efula l’esambishelo. Onde nyekɔ la yana mɔtshi ya dikɛnda lo nkumbo, yele naka nyu mbokeketsha yema ndo mbokimanyiya, kete nde kokaka koma opandjudi wahatabatizama? Anto angana wakoka nkumbo kanyu mbelɛ oya lo Eohwelo ɔnɔnyi ɔnɛ? Nkumbo kanyu kayokondja ɛtshɔkɔ ndo ɔngɛnɔngɛnɔ w’efula naka nyu takonge akambo la ntondo.

²⁵ Tokondja Wahɔ lo Nshi Yambotshikala: Lam’akandafundɛka Akristo wa lo Ntambe ka ntondo, ɔpɔstɔlɔ Petero akawaohola dia mambalɛ dikambo dikongɛ di’akambo di’ase Juda diaki suke la ndanyema. (1 Pet. 4:⁠7) Ɛlɔ kɛnɛ tolembetelo tshɛ mɛnyaka di’ekomelo k’andja ɔnɛ w’otondo kaya suke. Lushi la lushi, yoho yaso ya lɔsɛnɔ pombaka mɛnya dia sho mbetawɔka dikambo sɔ. Oko weso apandjudi waki Jehowa wele l’ohetoheto, sho pombaka ndjasha tshɛ l’olimu wa mbewoya lokumu l’ɔlɔlɔ.​—⁠Tito 2:​13, 14.

²⁶ Ɔnɛ ekɔ etena ka sho monga l’ohetoheto ndo ka kamba olimu! Kana yimba lo kɛnɛ kambokosalɛ Jehowa, kamondosalɛ nkumbo kayɛ, ndo etshumanelo. Kânga mbahatakoke pondjo mbofuta lo toho t’efula tamondotɔtshɔkɔla, sho kokaka tɛmɔla Jehowa l’anima aso tshɛ. (Osam. 116:​12-14) Tayolongola ɛtshɔkɔ oma le Jehowa oma lo welo wayotodja. (Tuk. 10:22) Nyɛsɔ sho tshɛ tonge ‘l’ohetoheto l’akambo w’ɔlɔlɔ’ l’etena kɛnɛ ka lânde kayotokamba olimu w’efula, “dia [Nzambi] atumbwami lu akambu tshe uma le Jesu Kristu.”​—⁠1 Pet. 3:13; 4:⁠11.

[Kiombo ya lo lɛkɛ 3]

Lofulo l’Anto Wakɔtɔ lo Eohwelo l’Andja w’Otondo

1999 14088751

2000 14 872086

2001 15374986

2002 15597746

[Kiombo ya lo lɛkɛ 4]

Waa Na Wayoyelɛ lo Eohwelo?

□ Ase nkumbo wa kasuke ndo ewotɔ

□ Asukanyi ndo asekayɛ

□ Asekayɛ wa l’olimu ndo wa la kalasa

□ Anto watshɔyɛ dia tembolaka ndo ambeki wa Bible

[Kiombo ya lo lɛkɛ 5]

Kimanyiya Wanɛ Woye lo Eohwelo

□ Longolawɔ la wangasanu tshɛ

□ Tshɔka dia towaembole

□ Lɔmbawɔ dia mbeka la wɔ Bible

□ Elɛwɔ lo sawo dia lânde

[Kiombo ya lo lɛkɛ 6]

Naa Eyango Wele Layɛ lo Nshi ya Eohwelo?

□ Sala di’onto ɔmɔtshi lakayelɛ ndja lo Eohwelo

□ Koma opandjudi wa lokumu l’ɔlɔlɔ

□ Etsha lofulo lɔmɔtshi la wenya l’esambishelo

□ Yalowanya l’akambo amɔtshi wendana l’esambishelo

□ Kamba oko ombatshi mboka wa tshanda