“Tutshelaki Antu Tshe Ololo”
1 Lo dikatshi di’okotsha di’Olimu Aso wa Diolelo wa Ngɔndɔ ka Hende la ka Sato 2002, takakambe l’ɛtɛ w’awui ɛnɛ: ‘Tosambisha Ɔtɛkɛta wa Nzambi Efula’ ndo ‘Nyonge Ɛngɔnyi l’Elimu w’Ɔlɔlɔ.’ (Kol. 1:25; 1 Tim. 6:18) Lo asawo asɔ, wakatokeketsha dia mbidja welo wa lânde dia kimanyiya anto wayasha dia vɔ mbɔtɔ lo Eohwelo, kimanyiya wanɛ wahayosambisha dia vɔ nyomokamba nto kamɛ l’etshumanelo, ndo kimanyiya ana ndo ambeki aso wa Bible wakotsha kɛnɛ kalɔmbama dia vɔ tatɛ sambisha. Aha la tâmu, welo wakatadje wakonge l’etombelo w’ɔlɔlɔ. Kakianɛ, “lam’ekisu la etena k’ololo, [totetemale la ntshelaka] antu tshe ololo.”—Ngal. 6:10.
2 Towaete dia Vɔ Ndjɔtɔ Nto: Lo mbilo ka filialɛ kaso anto wele bu apandjudi wa lokumu l’ɔlɔlɔ ndekana 450 000 mbɔtɔka lo Eohwelo ɔnɔnyi tshɛ. Lam’ele woho wayawɔ lo losanganya mɛnyaka dia wekɔ la yema ya nsaki, kakɔna kahombaso sala dia keketsha wanɛ “wakasonwama [dia] lumu la pundju” dia vɔ koma ‘ambetawudi’ na? (Etsha 13:48) Tâkeketsha dia vɔ ndja nto lo nsanganya ya l’etshumanelo aha la tshimbatshimba.
3 Bonde kahatete onto lɛnya nsaki dia ndjɔtɔ lo Wekelo wa Dibuku wa l’Etshumanelo dia nde ndjokondja wahɔ oma l’ɔkɛtshanyelo wa dibuku Onto Loleki Woke lo Tena Tshɛ? Naka nde ekɔ onto ɔmɔtshi leyayɛ kana owotɔ ayɛ, kete wɛ koka mbêta dia nde ndjohokamɛ sawo dimɔtshi diayoyosha lo Kalasa k’Olimu wa Teokrasi. Ewoyande ɛtɛ w’asawo wa lo sɛkɛ wayoshama lo mingu yele la ntondo. (Ekongelo k’oyoyo pombaka panema lo dibaya dia waewoyelo.) Yangaka diaaso tshɛ diakokayɛ nomialomia nsaki k’onto ɔsɔ dia nde tɛmɔla Jehowa. Ndo naka nde atatatɛ mbeka Bible l’opandjudi ɔmɔtshi wa l’etshumanelo, kete sɛngɔlande l’ɔlɔlɔ tshɛ dia wɛ mbeka la nde Bible.
4 Totetemale la Keketsha Wanɛ Wahayosambisha: L’atei w’anto wɔtɔ lo losanganya la Eohwelo, efula wamboshilaka la ndjakimɔ le Jehowa. Koko, l’etena kɛmɔtshi vɔ wakayotshika sambisha lokumu l’ɔlɔlɔ. Ɔnkɔnɛ, Paulo tokeketshaka dia ‘salɛ anto tshɛ ɔlɔlɔ, djekoleko wanɛ wotɔ laso lo mbetawɔ.’ (Ngal. 6:10) Lâsɔ, sho pombaka ndjakiyanya ntondo dikambo dia wanɛ wahayosambisha.
5 Ondo amɔtshi wakashile mbɔsa yɛdikɔ y’ɔlɔlɔ oma lo woho wakâkeketsha dikumanyi ndo apandjudi akina dia vɔ nyomoyasha nto l’olimu w’esambishelo. Naka dikumanyi wambokɔlɔmba dia sambisha l’opandjudi wambotatɛ ndjasha nto l’esambishelo, kete eya dia ngandji kokayɛ Jehowa ndo olimu w’esambishelo ayowokimanyiya dia nde nyomɔhɛtahɛta nto. Ɛnyande woho wayashayɛ lo toho totshikitanyi t’olimu w’esambishelo, dia nde tana ɔngɛnɔngɛnɔ, tetemala l’olimu akɔ ndo kondja ɛtshɔkɔ w’oma le Jehowa.
6 Tosha Apandjudi w’Eyoyo Etatelo ka Dimɛna: Lam’akɛnyi womoto ɔmɔtshi leke esadi wa ndjasha dia nde amboshola ɔlɔngɔswamelo waki Nzambi wa mɛtɛ, nde akalange tatɛ sambisha aha la tshimbatshimba. Lam’akandeye kɛnɛ kakawalongamɛka le nde, nde akate ate: “Dimi nangaka tatɛ ɛlɔ.” Naka dikumanyi wambetawɔ di’onto ɔmɔtshi leka la yɛ Bible tatɛ sambisha, kete ɛnya onto akɔ ohomba wa tshɔ l’olimu ɔsɔ, lo mbosha etatelo ka dimɛna. Kimanyiyande dia nde monga la mbekelo ka ndjalɔngɔsɔlaka lomingu tshɛ otsha l’esambishelo ndo ka sambishaka.
7 Naka ɔnayɛ ambokoma opandjudi w’oyoyo wahatabatizama, kete kamba la nde kâmɛ dia mbokimanyiya dia nde pama lo ndjela ɛnɔnyi ndo akoka ande. Oma lo yema tshitshɛ y’ekimanyielo kawoshayɛ, wɛ mbeyaka ndjokoma dia mamba lo mɛna woho wayondosawola l’onto ɔmɔtshi aha l’okakatanu, woho wayondadia divɛsa dimɔtshi, kana wayondosha onto periodikɛ. Naka nde ambohomana l’onto ɔmɔtshi layasha, kete ɛnyande woho wa sala wendelo w’oyoyo ndo ndjela nsaki kakɛnyisha onto akɔ.
8 Tohamia Olimu Aso: Onde awui wele layɛ koshaka diaaso dia sambisha efula kânga l’ɔkɔngɔ wa nshi ya Eohwelo? Onde wɛ koka mbahɛ wonya ɔtɔi kana ehende lâdiko wa wenya wokoyosambishaka? Onde wɛ mbokaka sso l’alamanaka dia menda nshi y’otsha la ntondo yakokayɛ kamba oko ombatshi mboka wa tshanda? Onde wɛ koka sala etshikitanu ɛmɔtshi lo lɔsɛnɔ layɛ dia wɛ koma okambi wa lo tena tshɛ? Welo tshɛ wadjaso l’olimu w’esambishelo koka kimanyiya onto ɔmɔtshi dia nde mbetawɔ akambo wa mɛtɛ! (Etsha 8:26-39) Lam’endɛso kɛnɛ kayaye lo nshi yele la ntondo, nyɛsɔ “[to]yelaki akambu w’ololo nshi tshe, untu la unyandi untu la unyandi. [t]utshelaki antu tshe ololo.”—1 Tes. 5:15.
[Kiombo ya lo lɛkɛ 3]
Totetemale Kimanyiya:
□✔ Wanɛ wakɔtɔ lo Eohwelo
□✔ Apandjudi wambotatɛ sambisha nto
□✔ Apandjudi w’eyoyo wahatabatizama