‘Tosambisha Ɔtɛkɛta wa Nzambi Efula’
1 Naka wɛ ekɔ mɛtɛ la lowando l’ɛngɔ kɛmɔtshi ka dimɛna kokoshawɔ, onde wɛ hatɛnya lowando lakɔ oma lo dionga ndo oma l’etsha ayɛ? Wɛ mɛtɛ ayoliɛnya! Lo kɛnɛ kendana l’ɔlɔlɔ w’otema ndo la ngandji k’efula kele la Jehowa otsha le anto, Paulo akate ate: “Lusaka le [Nzambi], ne dia ushasha andi waheyana mvuta.” “Ushasha” akɔna ɔsɔ na? Woshasha ɔsɔ kɛdikɛdi “ngandji ka mamba k’utamanya ka [Nzambi]” kakandatoke lo yoho yoleki tshɛ lo tosha Ɔnande hita oko tshungo dikambo dia pɛkato yaso.—2 Kor. 9:14, 15; Joa. 3:16.
2 Onde Paulo akɛnya lowando lande paka l’ɛtɛkɛta oto? Ndooko! Nde akɛnya lowando lande l’efula lo toho totshikitanyi. Nde akayakiyanya efula dikambo dia lonyuma l’asekande Akristo ndo akalangaka sala kɛnɛ tshɛ kakinde l’akoka wa sala dia mbakimanyiya woho wa vɔ kondja wahɔ efula oma lo ngandji k’efula kaki Nzambi. Lo kɛnɛ kendana l’anto asɔ, Paulo akafunde ate: “Shu takaleki nyulanga, taki la ongenongeno, aha dia nyu[sambi]sha lukumu l’ololo la [Nzambi] lutu, keli takalangi ndu nyusha nyumu yasu, ne dia nyakayala elangimi asu a wulu.” (1 Tes. 2:8) Lâdiko wa kimanyiya wanɛ wamboshilaka monga l’atei w’etshumanelo dia vɔ kokɛ panda kawɔ, Paulo akasambisha lokumu l’ɔlɔlɔ aha la pekɔ, nde akande lɔkɛndɔ la nunu dia kilɔmɛtɛlɛ l’ashi ndo l’okongo dia tana ‘wanɛ wakayalɔngɔsɔla dimɛna dia kondja lɔsɛnɔ la pondjo.’ (Etsha 13:48) Lowando l’efula laki la Paulo lo kɛnɛ tshɛ kakosalɛ Nzambi akotshutshuya dia ‘sambisha ɔtɛkɛta wa Nzambi efula.’—Kol. 1:25.
3 Onde lowando laso lo kɛnɛ tshɛ kakatosalɛ Jehowa hatotshutshuya dia sho kimanyiya wanɛ wele l’ohomba w’ekimanyielo ka lo nyuma l’etshumanelo kaso? (Ngal. 6:10) Kema sho tshutshuyamaka dia ndjasha tshɛ l’esambishelo ka Diolelo l’ɛtshi kaso ka nkɛtɛ k’otondo?—Mat. 24:14.
4 Diaaso dia Mɛnya Lowando Laso: Ɔnɔnyi tshɛ, Eohwelo ka nyɔi ka Kristo toshaka diaaso dia lânde dia sho mɛnya lowando laso lo kɛnɛ kakatosalɛ Jehowa la Yeso. Ɔsɔ bu tsho losanganya lokina kana tsho eohwelo ka dikambo dimɔtshi dia ngako. Yeso akate ate: “Kanyutshaki okone, dia mbuhomi.” (Luka 22:19, sho mbɛnganyisha alɛta ango.) Eohwelo ka nyɔi ka Kristo ekɔ diaaso dia sho kana yimba lo woho w’onto wele Yeso. Tɔ kekɔ etena ka sho mbeya ɔnɛ nde ekɔ ɛlɔ kɛnɛ la lɔsɛnɔ ndo lo kamba olimu, la lotombo ndo la lowandji lakawawosha l’ɔtɛ wa kɔlamelo ndo yimba yande ya ndjahombia. Eohwelo kɛsɔ kekɔ nto diaaso dia sho mɛnya woho wayakitshakitshaso lo ɛlɔmbwɛlɔ kaki Kristo oko walɔmbɔlande akambo ndo elimu wa l’etshumanelo k’Akristo. (Kol. 1:17-20) Ekambi waki Nzambi tshɛ pombaka mbɔtɔ la dilɛmiɛlɔ tshɛ lo losanganya la Eohwelo ka nyɔi ka Kristo. Ɔnɔnyi ɔnɛ Eohwelo kayosalema, Lushi la Nɛi, Ngɔndɔ ka Sato 28, 2002 l’ɔkɔngɔ wa ɛɔtwɛlɔ ka wonya.
5 Oma lo weolo wa mɛtɛ wakadjama la ntondo ka Eohwelo ɔnɔnyi wetshi, lo Congo-Kinshasa takakonya lofulo loleki l’anto 592292 ndo lo Congo-Brazzaville aki anto 20258 wakɔtɔ lo losanganya lɔsɔ. Anto angana wayɔtɔ ɔnɔnyi ɔnɛ na? Kɛsɔ ayoleka mendana la ‘woho wayotokamba la wolo ndo wayototetemala’ kimanyiya anto efula dia vɔ mbɔtɔ lo Eohwelo.—1 Tim. 4:10.
6 Lâdiko dia mbɔtɔ lo Dambo dia Dikɔlɔ dia Nkumadiɔndjɔ, sho kokaka nyomoleka fudia olimu aso w’esambishelo. Aha la tâmu, nunu di’anangɛso l’akadiyɛso wayonga ambatshi mboka wa tshanda ngɔndɔ ɔtɔi kana ndekana. L’ɛnɔnyi etanu wetshi ɛnɛ, ɔnɔnyi tshɛ takakomaka la lofulo la l’atei atei l’ambatshi mboka wa tshanda 14458 lo nshi ya Eohwelo, mbut’ate oma lo Ngɔndɔ ka Sato polo ka Tanu. Onde wɛ koka la ndjalɔngɔsɔla dia wɛ ngɛnangɛna la diɛsɛ sɔ dia monga ombatshi mboka wa tshanda ɔnɔnyi ɔnɛ? Ɔsɔ ayonga yoho ya dimɛna ya mɛnya lowando layɛ la mɛtɛ lo woshasha wa la ngandji wakatosha Nzambi mbut’ate olambo wa Kristo. Wɛ koka monga l’eshikikelo dia Jehowa ayokɔtshɔkɔla oko wadiɛnya akambo wayela anɛ.
7 Kadiyɛso kɛmɔtshi kakamba olimu wa l’emunyi wa lo tena tshɛ akafunde lo kɛnɛ kendana l’olimu ande w’ombatshi mboka wa tshanda lo Ngɔndɔ ka Sato ɔnɔnyi wetshi ate:“Olimu Aso wa Diolelo wa Ngɔndɔ ka Hende 2001 akakeketsha onto tshɛ lele la diaaso dia kamba olimu w’ombatshi mboka wa tshanda lo nshi ya Eohwelo. Lam’ele Ngɔndɔ ka Sato aki la nshi ya Samalo tshanu, kɛsɔ akɔtɔnɛ dimɛna l’ekongelo kami. Ɔnkɔnɛ, lakɔshi yɛdikɔ ya ndodja dɛmandɛ diami.” L’etatelo ka Ngɔndɔ, lam’akandatatɛ olimu ande, nde akayadjɛ oyango wa kondja onto ɔmɔtshi lahomba tatɛ mbeka la nde Bible. Onde nde akakondja? Eelo, lam’akandasambishaka wonya ande wa 52 wa Ngɔndɔ kɛsɔ nde akatane onto laketawɔ mbeka la nde Bible! Akandate l’ekomelo na? Nde akate ate: “Sho kondjaka ɛtshɔkɔ wa mamba etena kadjaso welo wa lânde.”
8 Wahɔ akɔna wakakondja nkumbo kɛmɔtshi kakakambe olimu ɔsɔ vɔ tshɛ na? Nkumbo kɛmɔtshi k’anto anɛi kele vɔ tshɛ wakakambe olimu w’ombatshi mboka wa tshanda Ngɔndɔ ka Nɛi, wakɛnyi dia vɔ hawohɛki ngɔndɔ kɛsɔ pondjo. Mama ka nkumbo akate ate: “Takongaka lushi tshɛ l’ɔngɛnɔngɛnɔ nɛ dia taki kamɛ l’olimu! Asawo wakatasawolaka wendana la kɛnɛ kakatatshaka l’esambishelo lushi la lushi aketɛka wonya w’olelo wa dikɔlɔ etena k’ɔngɛnɔngɛnɔ wa mamba.” Ɔna ɔmɔtshi akate ate: “Lakangɛnangɛna dia sambisha la Papa l’atei wa lomingu, etena katondongaka l’olimu wa l’emunyi.” Ombutshi wa Pami akakotsha ate: “Oko wemi ɔtɛ wa nkumbo, laki l’ɔngɛnɔngɛnɔ lo mbeya dia tekɔ lo kamba sho tshɛ olimu woleki dimɛna l’etena kaso kɛnɛ.” Onde nkumbo kanyu koka kamba olimu w’ombatshi mboka kamɛ? Lande na kahanyakɛtshanya lo nkumbo ndo menda kana nyu tshɛ koka kamba olimu w’ombatshi mboka wa tshanda lo nshi ya Eohwelo na?
9 Onde Sho Koka Mbetɛ Ngɔndɔ ka Sato 2002, Ngɔndɔ Koleki Tshɛ Dimɛna le So? L’etatelo ka 2000, Olimu Aso wa Diolelo wakonyiya wombola ɔnɛ: “Onde Sho Koka Mbetɛ Ngɔndɔ ka Nɛi 2000, Ngɔndɔ Koleki Tshɛ Dimɛna le So?” Okadimwelo akɔna wakashama lo wombola ɔsɔ na? Takakotsha mfulo y’eyoyo efula. Lo ngɔndɔ ɔtɔi, takakonya lofulo loleki tshɛ l’ambatshi mboka wa tshanda 7964. Ndo nto, takakonya lofulo l’oyoyo la wenya, la periodikɛ yakatakahɛ anto, ndo la waendelo w’eyoyo. Onde wɛ akohɔ wangasanu wakonge l’etshumanelo kanyu k’otondo lo woho wakahɛtahɛta olimu wa lo nyuma lo ngɔndɔ ka lânde kɛsɔ? Onde sho koka sala woho akɔ wamɛ ɔnɔnyi ɔnɛ kana ndekanya? Naka sho tshɛ mbidja welo efula, kete Ngɔndɔ ka Sato 2002 ayokoka monga “Ngɔndɔ Koleki Tshɛ Dimɛna le So.” Lande na Ngɔndɔ ka Sato?
10 Ekɔ ɛkɔkɔ ehende wetɛ Ngɔndɔ ka Sato ngɔndɔ ka lânde k’olimu. Ntondotondo, Eohwelo kayosalema l’ekomelo ka Ngɔndɔ ka Sato, kɛsɔ toshaka diaaso oma l’etatelo ka ngɔndɔ dia sho mbeta anto efula dia vɔ ndjosangana laso. Ɔkɔkɔ wa hende, ɔnɔnyi ɔnɛ, Ngɔndɔ ka Sato kekɔ la wikɛndɛ etanu, kɛsɔ mbishaka wanɛ wakamba olimu wa l’emunyi ndo ambeki diaaso dia kamba olimu w’ombatshi mboka wa tshanda. Lande na kahayadjasɛ wony’ɔnɛ dia sala ekongelo ka dimɛna k’olimu, lo kamba l’alamanaka wele lo dikatshi di’okotsha nɛ? Wɛ ayɛna di’olimu w’ombatshi mboka wekɔ wɔdu efula woho wakiyɛ kɔfɔnya ndo fɔnya. Ɛnyɛlɔ, lo sambishaka wenya 8 lo wikɛndɛ tshɛ, wɛ ayonga tsho l’ohomba wa wenya 10 eto lo nshi yambotshikala lo ngɔndɔ dia wɛ kotsha wenya 50 walɔmbama.
11 Kakɔna kakoka dikumanyi sala dia kimanyiya anto tshɛ l’etshumanelo dia ‘sambisha ɔtɛkɛta wa Nzambi efula’? Nyokeketsha apandjudi l’ekimanyielo k’asawo washanyu lo nsanganya kana lo asawo wasawolanyu la wɔ. Emendji wa Wekelo wa Dibuku wa l’Etshumanelo ndo akimanyedi awɔ koka mbɔsa yɛdikɔ ya sawola l’onto tshɛ la l’olui awɔ ndo mbokimanyiya. Tɔtɛkɛta tɔmɔtshi t’ekeketshelo kana alako amɔtshi w’eshika koka mbatshutshuya dia kamba olimu ɔsɔ. (Tuk. 25:11) Amɔtshi koka mɛna dia naka vɔ tshikitanya ekongelo kawɔ yema tshitshɛ tsho, kete wayonga la diɛsɛ dia kamba oko ambatshi mboka wa tshanda. Lo tshumanelo efula, suke la dikumanyi ndo ekambi w’olimu tshɛ la wadɛwɔ wakasha ɛnyɛlɔ k’ɔlɔlɔ lo kamba oko ambatshi mboka wa tshanda lo nshi ya Eohwelo. Kɛsɔ akatshutshuya apandjudi efula dia ndjela lokolo lawɔ. L’ɔtɛ wa hemɔ kana w’awui akina, apandjudi amɔtshi hawotokoka kamba oko ambatshi mboka, koko vɔ koka keketshama dia mɛnya lowando lawɔ lo ndeka nyomosambisha kamɛ l’ase etshumanelo akina lo ndjela akoka awɔ.
12 Di’etshumanelo kondja etombelo w’amɛna, dikumanyi la dia kongɛ akambo dimɛna dimɛna. Nsanganya y’otsha l’esambishelo la dia nɔngɔswama lo wenya wasungana l’atei wa lomingu. Naka kokaka, omendji w’olimu ayotasɔnyi la ntondo anangɛso wakoka dia nɔmbɔlaka nsanganya tshɛ y’otsha l’esambishelo. Pombaka ndjalɔngɔsɔla dimɛna di’aha nsanganya shɔ ndekanya minitɛ 10 kana 15, mbidja ndo okahanyelo w’anto, wa bɛtshi dia nkɛtɛ ndo dɔmbɛlɔ. (Enda lo Wembola w’oma le Ambadi l’Olimu Aso wa Diolelo wa Ngɔndɔ ka Divwa 2001.) Pombaka nembetshiya etshumanelo dimɛna dikambo di’ekongelo k’olimu lo ngɔndɔ kɛsɔ ndo kihanɛ lo dihole dia waewoyelo.
13 Pombaka nɔngɔsɔla bɛtshi dia nkɛtɛ diahomba sambishama. Omendji w’olimu la dia sawola l’ɔnangɛso lakahanya bɛtshi dia nkɛtɛ dia vɔ nɔngɔsɔla bɛtshi dia nkɛtɛ diahaleke kindjakindjama. Tɛtɛ dia pombaka sala la wolo dia sambisha anto wahatanema lawakawɔ, lo toshinga, lo wa makashinyi, ndo dia esambishelo ka l’akɔlɔ. L’ahole wakoka, apandjudi amɔtshi koka kimanyiyama dia sambisha lo telefɔnɛ.
14 Nyâkimanyiya dia Vɔ Nyomokamba nto: Onde ekɔ apandjudi amɔtshi l’etshumanelo kanyu waya bu la waasaso l’esambishelo ka lokumu l’ɔlɔlɔ? Anto asɔ wekekɔ as’etshumanelo ndo wekɔ l’ohomba w’ekimanyelo. (Osam. 119:176) Lam’ele ekomelo k’andja ɔnɛ wa kɔlɔ kaya suke ndo andja w’oyoyo waya k’onyɔ, tekɔ l’ɔkɔkɔ w’oshika wa sala la wolo aso tshɛ dia kimanyiya anto wambetsha ngɔndɔ shamalo aha la sambisha. (Romo 13:11, 12) L’ɛnɔnyi etanu w’etshi, ɔnɔnyi tshɛ anto efula waketawɔ ekimanyielo ka ngasɔ ko wakakome nto apandjudi wele l’ohetoheto. Akokaso sala dia kimanyiya anto efula dia vɔ pɛtshahɛtsha ngandji ndo wɛkamu waki lawɔ l’etatelo k’olimu awɔ?—Heb. 3:12-14.
15 Olui wa dikumanyi la dia kɛtshanya woho wakokawɔ sala dia kimanyiya wanɛ waketsha ngɔndɔ efula aha la sambisha l’ɛnɔnyi engana weke kambeta ɛnɛ. (Mat. 18:12-14) Sekeletɛlɛ k’etshumanelo pombaka sɛdingola Fishi y’Apandjudi dia menda wanɛ tshɛ wambetsha ngɔndɔ shamalo aha la sambisha. Pombaka mbidja welo wa lânde dia membola ɛkɔkɔ dia mbakimanyiya. Ekumanyi kɛmɔtshi koka membola opandjudi ɔmɔtshi wakekesanɛka kana wakokanaka la nde ntondo, kana nɔmba apandjudi akina dia vɔ lawɔ mbisha lonya. Koka monga ko vɔ wakeke l’onto lele kakianɛ hayosambisha ndo layɔngɛnangɛna ekimanyielo kɛsɔ ka lânde l’etena kɛnɛ k’ohomba. Tekɔ l’elongamelo dia efula ka wanɛ wahayosambisha wayokeketshama dia tatɛ sambisha nto ɔtɛkɛta wa Nzambi. Naka wambokoka sambisha nto, kete ayonga dimɛna efula vɔ tatɛ sambisha lo nshi ya Eohwelo!—Enda awui akina lo Wembola w’oma le Ambadi l’Olimu Aso wa Diolelo wa Ngɔndɔ ka Divwa 2000.
16 Onde Vɔ Wambokoka Sambisha? Jehowa ekɔ lo tetemala tshɔkɔla ekambi ande lo mbela “diango di’ushinga a wulu dia wedja tshe.” (Hang. 2:7) Ɔnɔnyi tshɛ, nunu di’anto komaka apandjudi wahatabatizama. Waa na asɔ na? Ana w’Ɛmɛnyi wa Jehowa kamɛ ndo ambeki wa Bible watahame. Ngande weyaso ɔnɛ wambokoka monga apandjudi wa lokumu l’ɔlɔlɔ na?
17 Ana w’Ɛmɛnyi wa Jehowa: Aya ɛnɔnyi efula wele ana efula wekɔ lo tshindɛ ambutshi awɔ l’esambishelo ka lo luudu la luudu, kânga l’etena kewɔ watakome apandjudi wahatabatizama. Ngɔndɔ ka Sato ayonga etena ka dimɛna le wɔ dia tatɛ. Ngande weyɛ dia kana ɔnayɛ ambokoka monga opandjudi? Dibuku Organisés pour bien remplir notre ministère lo lɛkɛ 100 mbutaka dia paka “naka ɔna ekɔ la lɔkɛwɔ la dimɛna ndo ekɔ l’akoka wa ndamɛ ndjatɛkɛtɛ dia mbetawɔ kande lo sambisha anto akina lokumu l’ɔlɔlɔ, ndo tshutshuyama oma k’ɛse kande k’otema dia sala dikambo sɔ.” Naka wɛ mɛnaka di’ɔnayɛ ambokoka koma opandjudi, kete tɛkɛta l’ekumanyi kɛmɔtshi ka lo Kɔmite k’Olimu ka l’Etshumanelo.
18 Ambeki wa Bible Wele l’Akoka: Naka ombeki wa Bible aya l’ewo ndo aya tshanda yende lo mbɔtɔ lo nsanganya, kete nde koka kombola koma opandjudi wa Diolelo. Naka wɛ ekɔ lo mbeka l’onto la ngasɔ, kete sɛdingola wembola ɛnɛ: Onde nde ekɔ lo tahame lo nyuma lo ndjela ɛnɔnyi ndo akoka ande? Onde nde ambotatɛka ntɛkɛta l’anto akina lo tshakitudi dikambo dia mbetawɔ kande? Onde nde ‘ambɔlɔta lonto l’oyoyo’? (Kol. 3:10) Onde nde kotshaka kɛnɛ kalɔmbama dia monga opandjudi wahatabatizama, oko wɛnyamadiɔ lo dibuku Notre ministère lo lɛkɛ 97-99? Naka eelo, kete wɛ la dia sawola la Kɔmite k’Olimu k’Etshumanelo dia vɔ ndjalɔngɔsɔla woho wa dikumanyi dihende sawola la yɛ ndo l’ombeki akɔ wa Bible. Naka nde aya l’akoka, kete dikumanyi dihende sɔ wayowewoya dia nde koka tatɛ sambisha lo sɛkɛ.
19 Ko Kayotota Dikambo dia Ngɔndɔ ka Nɛi la ka Tanu? Ndo Ngɔndɔ shɔ nto mbayonga ngɔndɔ ya lânde dia sho fudia olimu aso w’esambishelo. Efula ka wanɛ wayokamba oko ambatshi mboka wa tshanda Ngɔndɔ ka Sato koka monga l’akoka wa kamba nto olimu ɔsɔ lo Ngɔndɔ ka Nɛi ndo kana ka Tanu. Lo Ngɔndɔ ka Nɛi la ka Tanu, tayoleka mbidja welo dia mbisha anto Tshoto y’Etangelo la Réveillez-vous ! l’esambishelo. Periodikɛ shɔ mongaka mɛtɛ la tɔsɛngiya t’ɔlɔlɔ lo nsɛnɔ ya wanɛ watiada! Periodikɛ shɔ kimanyiyaka efula l’ohamelo wa mamba wasalema l’andja w’otondo. Tayodja welo wa lânde lo Ngɔndɔ ka Nɛi la ka Tanu dia kahɛ anto efula periodikɛ. Tatɛ ndjalɔngɔsɔla oma ko kakiye dia wɛ ndjasha tshɛ l’olimu ɔsɔ.
20 Lam’ele tambɔsa ekongelo ka pamia olimu w’esambishelo, onde honga ohomba wɛ fudia lofulo la periodikɛ lalongolayɛ l’etshumanelo? L’ɔnɔnyi w’olimu w’otondo, sho kahɛka anto Tshoto y’Etangelo la Réveillez-vous ! Lushi la Samalo tshɛ, lushi lɔsaso oko Lushi la Periodikɛ. Koko, lam’ele apandjudi efula wayokamba oko ambatshi mboka wa tshanda ndo sho tshɛ tayokahanya periodikɛ lo ngɔndɔ shɔ, ondo ayonga ohomba wɛ mbidiya kɔmandɛ kayɛ ka periodikɛ l’etshumanelo. Naka ngasɔ mbediɔ, kete aha la tshimbatshimba, ewoya ɔnangɛso lendana l’awui wa periodikɛ l’etshumanelo kanyu. L’etena kakɔ kamɛ, ɔnangɛso lendana l’awui w’ekanda pombaka ndjashikikɛ dia kana ekanda k’ɔlɔlɔ ka traktɛ Aimeriez — vous en savoir plus sur la Bible? kekɔ dia apandjudi kamba layɔ.
21 Efula wakɛnya lowando lawɔ lo kɛnɛ kendana l’ɔtɛ a dui watomba l’Olimu Aso wa Diolelo wata ɔnɛ “Woho wa Mbisha Anto Periodikɛ.” Onde wɛ kondjaka wahɔ oma l’ekongelo kɛsɔ lo mbekaka mbɔtwɛlɔ ya wɔdu yendana la woho wa mbisha anto periodikɛ? Lande na kahanyɔshi etenyi kɛmɔtshi ka wekelo anyu wa Bible wa nkumbo lomingu tshɛ dia nyu vusola woho wa kamba la mbɔtwɛlɔ shɔ?
22 Toleke ndjasha lo Nshi Nyɛ ya Eohwelo: L’ɛnyɛlɔ k’ɔpɔstɔlɔ Paulo, nyɛsɔ tɛnya Jehowa woho wandolaso “ushasha andi waheyana mvuta” lo ndeka ndjasha l’elimu wa lo nyuma wɔlɔngɔswami lo nshi nyɛ ya Eohwelo. Kɛsɔ nangaka mbuta ɔnɛ (1) mbɔtɔ lo losanganya lɔsɔ loleki ohomba la l’ɔnɔnyi, mbut’ate lo Dambo dia Dikɔlɔ dia Nkumadiɔndjɔ, diayonga Lushi la Nɛi Ngɔndɔ ka Sato 28, 2002; (2) kimanyiya wanɛ wahayosambisha dia vɔ pɛtshahɛtsha ‘ngandji kaki lawɔ l’etatelo’ (Eny. 2:4; Romo 12:11); (3) kimanyiya anaso kana ombeki tshɛ wa Bible wakoka dia koma opandjudi wahatabatizama; ndo (4) ndjasha tshɛ l’esambishelo lo yɛdikɔ yɛdimi l’akoka aso kana kamba oko ombatshi mboka wa tshanda lo Ngɔndɔ ka Sato kana lo ngɔndɔ yayela.—2 Tim. 4:5.
23 Sho nɔmbaka l’otema ɔtɔi dia sho tshɛ ndeka ndjasha l’esambishelo ka lokumu l’ɔlɔlɔ la Diolelo lo nshi ya Eohwelo, lo mɛnya lowando laso l’efula lo kɛnɛ tshɛ kakatosalɛ Jehowa.
[Kiombo ya lo lɛkɛ 6]
Ekongelo k’Onto Ndamɛ k’Olimu w’Esambishelo lo Ngɔndɔ ka Sato 2002
Lushi la Lomingu Lushi l’Ɔtɔi Lushi la Hende Lushi la Sato Lushi la Nɛi Lushi Lushi la Tanu Lushi la Samalo
1 2
Lushi la Periodikɛ
3 4 5 6 7 8 9
Lushi la Periodikɛ
10 11 12 13 14 15 16
Lushi la Periodikɛ
17 18 19 20 21 22 23
Lushi la Periodikɛ
24 25 26 27 28 29 30
EOHWELO Lushi la Periodikɛ
L’ƆKƆNGƆ WA
31 ƐƆTWƐLƆ KA WONYA
Onde wɛ koka kimɔ wenya 50 Ngɔndɔ ka Sato lo kamba oko ombatshi mboka wa tshanda?