‘Yakimɔ tshɛ’ l’olimu ayɛ
1 Etena kadiaso dia ɔpɔstɔlɔ Paulo akatshaka totombotombo lam’akinde la Kɔrɛtɔ, sho koka mbuta ɔnɛ olimu ɔsɔ akawodjɛka wekamu dia nde tana diaaso dia sambisha. Koko, Etsha 18:5 mbutaka dia: ‘Paulo akatatɛ la ndjakimɔ tshɛ l’ɔtɛkɛta, asambisha ase Juda dia nembetshiya ɔnɛ Yeso mbele Kristo.’ Lande na kakayasha Paulo efula ngasɔ l’olimu w’esambishelo na? Kânga mbele anto efula wa la Kɔrɛtɔ wakashile la koma ambetawudi, Nkumadiɔndjɔ akashikikɛ dia anto efula wa mbetɛ ambeki wakikɔ l’osomba ɔsɔ. (Etsha 18:8-11) Onde tekɔ l’ɔkɔkɔ wa ngasɔ wa ndjakimɔ tshɛ l’olimu aso? Eelo. Takakoke tana anto efula wa mbaetsha akambo wa mɛtɛ.
2 Tosambisha Efula lo Ngɔndɔ ka Nɛi: Lo mɛtɛ, oyango ayɛ wekɔ wa sambishaka lokumu l’ɔlɔlɔ ngɔndɔ tshɛ. Koko, ngɔndɔ mɔtshi toshaka waaso efula wa ‘ndjakimɔ tshɛ’ l’olimu ɔnɛ. L’atei wa ngɔndɔ shɔ mbele ndo Ngɔndɔ ka Nɛi l’etena kasalema Eohwelo. Onde wɛ ekɔ la waaso wa kamba olimu w’ombatshi mboka wa tshanda kana wa nyomoleka mbidja wolo l’esambishelo l’etena kɛsɔ? Apandjudi efula wasala dikambo sɔ kondjaka ɛtshɔkɔ efula. (2 Kor. 9:6) Naka wɛ ekɔ lo sala kɛnɛ tshɛ kakokayɛ sala, kete eya dia Jehowa ekɔ lo ngɛnangɛna olimu wokambɛyɛ l’anima ayɛ tshɛ. (Luka 21:2-4) Oyadi lɔsɛnɔ la ngande lele layɛ, yadjɛ oyango wa ‘ndjasha tshɛ’ l’olimu ayɛ w’esambishelo Ngɔndɔ ka Nɛi kɛnɛ. Ndo tohɛke dia nkimɔ alapɔlɔ ayɛ w’olimu l’ekomelo ka ngɔndɔ dia welo ayɛ mbadiema kamɛ la wɛnɛ wakadje ekambi waki Jehowa ekina.
3 Tembolake Eyoyo Wakɔtɔ lo Eohwelo: L’ɛtshi ka nkɛtɛ kendama oma le filialɛ kaso, anto 604160 wakɔtɔ lo losanganya la Eohwelo ɔnɔnyi w’etshi. Tateye lofulo l’anto tshɛ wakɔtɔ lo losanganya lɔsɔ ɔnɔnyi ɔnɛ. Koko, alapɔlɔ mɛnyaka dia “dinela” dia woke diekɔ lo tokongɛ. (Mat. 9:37, 38) Diakɔ diele, aha la tshimbatshimba, yalɔngɔsɔla dia tembola wanɛ wakɛnya saki ndo wakɔtɔ lo losanganya la Eohwelo woho wa mbâkimanyiya lo nyuma. Naka wɛ tshimbatshimba dia sala wembolelo wa ngasɔ, kete wɛ kokaka mbisha ‘kanga kɔlɔ diaaso dia nde monula ɔtɛkɛta wa diolelo wakonɛma l’etema awɔ.’ (Mat. 13:19) Naka wɛ sala wembwelo aha la tshimbatshimba, kete dikambo sɔ diayɛnya dia wɛ mɛtɛ ekɔ lo ‘ndjasha tshɛ’ l’olimu ayɛ.
4 Totetemale la Kimanyiya Wanɛ Wetsha Ngɔndɔ Shamalo Aha la Sambisha: Lo Ngɔndɔ ka Hende, takatatɛ mbidja welo wa lânde dia kimanyiya wanɛ wetshaka ngɔndɔ shamalo aha la sambisha. Naka ekɔ amɔtshi wahatendama oma le dikumanyi, kete dikumanyi pombaka ndjalɔngɔsɔla dia towaenda la ntondo k’ekomelo ka Ngɔndɔ ka Nɛi. Dikumanyi wayosala la wolo dia mbeya ɔkɔkɔ wahayosambisha onto ndo woho w’oshika wa mbôkimanyiya dia nde nyomokambɛ Jehowa la wasaso nto. Ekimanyielo ka la ngandji kɛsɔ mɛnyaka dia dikumanyi mbɔsaka ɔkɛndɛ awɔ w’elami w’“ekoko wa [Nzambi]” la nɛmɔ di’efula. (1 Pet. 5:2; Etsha 20:28) Tshoto y’Etangelo ya Ngɔndɔ ka Divwa 15, 1993, lɛkɛ 22-23, yekɔ l’alako w’amɛna efula wakoka kamba la dikumanyi etena kasɛdingolawɔ ɔm’ɔmɔ l’atei w’akambo atanu wakoka konya anto dia vɔ tshika sambisha. Mbokɛmaka dia anto amɔtshi kokaka nyomoyɔhɛtahɛta l’olimu w’esambishelo lo Ngɔndɔ ka Nɛi kɛnɛ.
5 Tokimanyiya Anto Efula dia Vɔ Koma Apandjudi Wahatabatizama: Onde anayɛ waya l’akoka wa koma apandjudi wa lokumu l’ɔlɔlɔ wahatabatizama? Kayotota dikambo di’anto akina weka la yɛ Bible na? Naka vɔ wambetawɔma oma le dikumanyi oko apandjudi wahatabatizama, onde Ngɔndɔ ka Nɛi hakoke monga etena k’ɔlɔlɔ le wɔ ka vɔ tatɛ sambisha? Naka onto ekɔ lo tahame ndo amboshidiya mbeka biukubuku Katɔlɔmba ndo dibuku Ewo, kete wekelo wa Bible mbeyaka tetemala lo dibuku dia hende, l’atei wa dibuku dimɔtshi lo wanɛ wayela anɛ: dibuku Parole de Dieu, dibuku La paix et la sécurité véritables, dibuku Tambosangana Kâmɛ l’Ɔtɛmwɛlɔ. Oyango ayɛ ele wa kimanyiya ombeki dia nde monga l’ewo k’efula k’akambo wa mɛtɛ, koma opandjudi wahatabatizama, ndo koma Ɔmɛnyi wa Jehowa wamboyakimɔ ndo wambobatizama.—Ef. 3:17-19; 1 Tim. 1:12; 1 Pet. 3:21.
6 Etete kayɛ ndo woho wayashayɛ l’otema ɔtɔi le ambeki ayɛ wa Bible koka mbâkimanyiya dia vɔ mbidja akambo wa mɛtɛ l’etema awɔ. Ɔmɛnyi wa Jehowa ɔmɔtshi akahomana l’atshukanyi amɔtshi waya esombe waketawɔ wekelo wa Bible l’otema ɔtɔi. Koko atshukanyi asɔ wakatɛ ɔmɛnyi ɔsɔ dia nde ndjoya l’ɔkɔngɔ wa mingu shato. L’ɔkɔngɔ wa mingu yakɔ shato, wekelo wakayotatɛka. Kombeta edja oma lâsɔ, atshukanyi asɔ wakayosalaka suke la lomingu l’otondo aha la mbeka l’ɔmɛnyi ɔsɔ. Koko l’ekomelo, womoto akayohamaka polo ndo lo batismu. Ɔnangɛso mbohɔka ate: “l’ɔkɔngɔ wa nde batizama, washo ande wakalole l’asɔi w’ɔngɛnɔngɛnɔ ndo dikambo sɔ diakayotokonyaka dia ndo dimi la wadɛmi kɛdia asɔi w’ɔngɛnɔngɛnɔ.” Mɛtɛ, ‘ndjakimɔ tshɛ’ lo lokumu l’ɔlɔlɔ mbelaka ɔngɛnɔngɛnɔ efula!
7 Prɔfɛsiya ya lo Bible ndo akambo weta l’andja mɛnyaka dia tambɔnyɔngɔmɛ etale l’etena k’ekomelo. Ɔnɛ ekɔ etena kahomba ekambi waki Nzambi tshɛ ‘ndjakimɔ tshɛ’ dia mbewoya anto akina lokumu l’ɔlɔlɔ. Ɔpɔstɔlɔ Paulo akasha eshikikelo ɔnɛ woho w’olimu wa ngasɔ ‘hongaki anyanya pondjo le Nkumadiɔndjɔ.’—1 Kor. 15:58.
[Caption on page 4]
Nzambi Nɛmiyamaka oma lo Pudipudi
1 Ɛlɛmbɛ wa Mɔsɛ wakahikaka dia pudipudi ndjâla. Vɔ waketɛka Isariyɛlɛ wodja wa lânde, wodja wakahombaka tshikala pudipudi lo demba ndo lo nyuma. (Lew. 11:35, 36; 15:1-11; Is. 52:11) Nzambi akalɛmiyamaka oma lo pudipudi ndo, oma lo pudipudi kakɔ, anto wâki l’alemba w’amɛna.
2 Ndo ɛlɔ kɛnɛ, pudipudi ekɔ eongelo ka lânde k’ekambi waki Jehowa. Ko, kânga mbɛnama dikambo sɔ l’olui awɔ tshɛ, onde ɔsɔku mbediɔ le ɔmɔmɔ wa l’atei aso oka? Woho wayakiyanyaso efula kana yema tshitshɛ dia ndjâla la kiongamu ndo pudipudi mɛnyaka efula ka saki kele laso ka ndjela adjango wa Jehowa.
3 Kayotota dia luudu laso na? Onde lɔ mbetshaka losango la Diolelo lêso lo tasambisha ɛngɛnɔ oka? Onde na, anto amɔtshi kokaka tɔ̂sa oko anto wa kashi lam’ataso ɔnɛ kɛtɛ kayokadimɔ paradiso koko luudu laso lekɔ epakapaka, ndo sho hatohembola pasipalɔmɛ ndo sɛkɛ diaso diambodɔnɛ l’adiyo oka? Ko naka luudu laso lekɔ ɛsɔhanasɔhana oko ema kambokalema ndo kana nsolo ka kɔlɔ kekɔ lo mbupola oma lɔkɔ nɛ dia lɔ kema pudipudi, kokaka sho mbuta ɔnɛ tekɔ lo mbisha ‘ɛnyɛlɔ k’ɔlɔlɔ ka pudipudi kasungana l’andja w’oyoyo wayɔlɔmbwama oma le Diolelo dia Nzambi oka?’—om lɛkɛ 129-131.
4 Ko mutuka (le wanɛ wele lawɔ) wakamb’aso olimu l’esambishelo, ngande wewɔ na? Onde na, vɔ wekɔ pudipudi l’etei ndo l’andja, yoho yahakoke olimu wasalaso mɔnywama oka? Ko kayotota di’ahɔndɔ aso, atapa aso la yoho yokombami kana yele divo diaso na? Diɔ diekɔ pudipudi ndo la kiongamu, yoho yahakoke onto toshilɛ amɛku oka? Mɛtɛ, dia sho ndjâla pudipudi, sho pombaka mbɔkaka ndo solaka ahɔndɔ aso esangɔ l’esangɔ.—w89 1/6 lɛkɛ 16-19.
5 Ko kakɔna kayotosala naka ɔnangɛso ɔmɔtshi hadje yimba lo pudipudi ka demba diande la ka luudu lande polo ndo lo yoho ya mbisha etshumanelo sɔnyi na? Kokaka mbokimanyiya la ngandji lo menda ɛnɔnyi wele lande kana pâ kele lande. Naka tayosala ɔsɔku kete tayowɛnya ɔlɔlɔ aso. Onto ɔmɔtshi mbeyaka ndjâla mindo koko nde hadieye; ɔnkɔnɛ alako woshami l’ɔsɛngɔsɛngɔ wayowotshutshuya dia nde nɔngɔsɔla dikambo sɔ. Wanɛ wahasha ɛnyɛlɔ k’ɔlɔlɔ lo dikambo sɔ kema l’akoka walɔmbama dia nongola waɛsɛ w’ohomba wa l’atei w’etshumanelo. Dikumanyi pombaka lo mɛtɛ ndjâlama dia mbidja ɛlɛmbɛ awɔ kana funda awui awɔ w’ɛnawɔ ɔlɔlɔ efula.
6 Anto weke kâ ndjasha l’akambo wa mɛtɛ, wekɔ lo mbetama dia ndjɔlɛ dambo dia lo nyuma diele lo Mbalasa ka Diolelo. Esangɔ tshɛ, sho mbaetaka l’ɔngɛnɔngɛnɔ nɛ dia mbalasa ka Diolelo kekɔ pudipudi ndo kɔmba. Koko, sho pombaka mbidja weolo dia tɔ tshikalaka ɔsɔku. Toshishime lo ndjɛkɛ yotodingi. Onde na, kɔsa, odihe la pele diekɔ pudipudi oka? Nkomba yekɔ lo mɔmbama mbala la mbala oka? Naka onto ambêkɛ dia mɛnaka odihe w’afuku afuku kana wolodi la ditshu la pele di’omômbɔ mukubu, kete nde ɛ̂naka dikambo sɔ kawɔ. Koko anto waya mbala ka ntondo lo Mbalasa ka Diolelo kokaka ndjɛna kɔlɔ. Sho pombaka sala la wolo aso tshɛ dia mbalasa ka Diolelo kôngake pudipudi ndo kɔmba, lo kiɔmbaka kana kilɔngɔsalaka naka ambokoma lo londa laso.
7 Aha kânga la mbuta ɔtɛkɛta ɔtɔi, sho kokaka tombola Nzambi oma lo ɛnamelo kaso ndo oma lo pudipudi ka luudu laso, ka mutuka aso ndo ka Mbalasa kaso ka Diolelo. Ɛnyɛlɔ kaso hatotakanya ndoko onto, koko tɔ kayɛnya pudipudi la osemboki w’ɔtɛmwɛlɔ aso.—1 Kor. 10:31, 32; Jak. 1:27.