Woho watokimanyiya Wekelo wa dibuku wa l’etshumanelo
1. Ngande watokimanyiya nsanganya yaso tshanu ya lomingu la lomingu?
1 Nsanganya yaso tshanu ya lomingu la lomingu tshikitana lo yoho yalɔmbɔmayɔ ndo lo oyango ayɔ. Koko, yɔ tshɛ yekɔ ohomba efula ndo tokimanyiyaka dia sho ‘kananɛ onto la onyande dia tshutshuyana lo ngandji la lo elimu w’ɔlɔlɔ.’ (Heb. 10:24, 25) Naa wahɔ ndo awui amɔtshi wa lânde wele la Wekelo wa dibuku wa l’etshumanelo?
2. Naa wahɔ wele la sangana anto yema tshitshɛ lo wekelo wa dibuku?
2 Wekelo wa dibuku tokimanyiyaka dia sho pama lo nyuma: Lofulo l’anto wɔtɔ lo wekelo wa dibuku mongaka yema tshitshɛ efula lo mbɛdika la lofulo l’anto wɔtɔ lo nsanganya nkina ya l’etshumanelo. Dui sɔ kimanyiyaka dia sho mbekesanɛ esadi l’anto akina wakoka tokimanyiya lo nyuma. (Tuk. 18:24) Onde wɛ ambosala la wolo dia mbeya anto tshɛ wa lo olui anyu wa wekelo wa dibuku, ondo lo mbalɔmba dia nyu sambisha kâmɛ? Wekelo wa dibuku kimanyiyaka nto omendji wa wekelo wa dibuku dia nde mbeya ekakatanu wahomana l’onto tshɛ la l’olui ndo woho wa mbokeketsha.—Tuk. 27:23.
3. Ngande wakimanyiya wekelo wa dibuku anto dia mbisha kɔmatɛrɛ ndo dia ambeki wa Bible mbɔtɔ lɔkɔ?
3 Onde wɛ ambɔlɔmbaka ambeki ayɛ wa Bible dia vɔ ndjɔtɔ lo wekelo wa dibuku kâmɛ la yɛ? Anto wayasha l’akambo wa mɛtɛ woka wɔma mbɔtɔ lo nsanganya ya weke mbeyaka ngɛnangɛna mbɔtɔ lo nsanganya yele anto bu efula, djekoleko lo elui wasalema lo waa mvudu y’anto. Woho weta losanganya lɔsɔ kimanyiyaka akɛnda ndo eyoyo dia vɔ mbisha kɔmatɛrɛ. Ndo lam’ele anto mongaka yema tshitshɛ, sho ndekaka monga la waaso wa mbisha kɔmatɛrɛ ndo tombola Jehowa lo yoho shɔ.—Osam. 111:1.
4. Wekelo wa dibuku kokaka monga dimɛna lo toho takɔna?
4 Wekelo wa dibuku salemaka mbala efula lo ahole wakoka apandjudi ntshɔ aha la okakatanu. Kânga mbele hokoka di’onto tshɛ ntshɔka lo olui woleki sukana la nde, mbeyaka monga ko wɔtwɛlɔ wa lo wekelo wa dibuku lo ahole wakawatotome hatɔsɛ wenya efula lo mboka oko wenya watɔsɛ otshwelo w’otsha lo nsanganya nkina ya l’etshumanelo. Dihole diasalaso wekelo wa dibuku mbeyaka monga nto dimɛna dia sala losanganya l’otsha l’olimu w’esambishelo.
5. Ngande wakoka omendji wa wekelo wa dibuku tokimanyiya lo kɛnɛ kendana la esambishelo?
5 Wekelo wa dibuku tokimanyiyaka di’esambishelo: Omendji wa wekelo wa dibuku kimanyiyaka onto tshɛ dia nde sambishaka mbala la mbala, monga l’etombelo w’ɔlɔlɔ ndo monga l’ɔngɛnɔngɛnɔ l’olimu ɔsɔ. Ɔnkɔnɛ, nde salaka la wolo dia sambisha kâmɛ l’oseka onto tshɛ la l’olui, lo mbokimanyiya lo awui wotshikitanyi wendana l’esambishelo. Lam’alangayɛ ewoya omendji anyu wa wekelo wa dibuku naka wɛ ambɛna dia wɛ ekɔ la dui dimɔtshi diendana l’esambishelo diakokakatanya, ɛnyɛlɔ oko dia sala waendelo w’eyoyo. Ondo, nde kokaka nɔngɔsɔla dia wɛ sambisha kâmɛ la opandjudi ɔmɔtshi wa lo olui anyu wambohokɔ akambo. Akoka ayɛ wa nɔmbɔla wekelo wa Bible mbeyaka ndowanyema naka wɛ mbidjaka yimba lo toho ta wetshelo takamba la omendji wa wekelo wa dibuku etena kalɔmbɔlande wekelo wa dibuku.—1 Kor. 4:17.
6. Lande na kahombaso sala la wolo dia kondja wahɔ oma lo wekelo wa dibuku?
6 Ekɔ mɛtɛ tshondo y’ɔtshɔkɔ dia monga la Wekelo wa dibuku wa l’etshumanelo! Yɛdikɔ ya la ngandji shɔ tokimanyiyaka dia sho monga nge lo nyuma lo tena nɛ dia pâ efula diasɛnaso.—Osam. 26:12.