Nsanganya ya Weke Yekɔ Etena k’Ɔngɛnɔngɛnɔ!

¹ Nsanganya ya weke y’Ɛmɛnyi wa Jehowa yekɔ waaso w’ɔngɛnɔngɛnɔ efula. L’edja kolekanyi ɛnɔnyi lokama, nsanganya shɔ yakakimanyiya l’ohamelo wamonga l’ɔlɔngɔswamelo aso. Tatɛ oma k’etatelo, lam’akiso yema tshitshɛ, takɛnyi woho wakatshɔkɔla Jehowa olimu aso wa l’andja w’otondo lo yoho y’efula. Lo losanganya laso la woke la ntondo la lo nshi yaso nyɛ lakasalema la Chicago l’osomba wa Illinois l’ɔnɔnyi wa 1893, l’atei w’anto 360 waki lɔkɔ anto 70 wakabatizama oko djembetelo ya ndjakimɔ kawɔ le Jehowa. Ɔnɔnyi wetshi ɔnɛ, Nsanganya ya Distrikɛ yaki l’ɔtɛ a dui ɔnɛ: ‘Wanɛ Wakitanyiya Ɔtɛkɛta Waki Nzambi,’ yakasalema l’andja w’otondo ndo lofulo l’anto tshɛtshɛ wakɔtɔ laki anto 9454055, ndo anto 129367 wakabatizama. Ande kiɔkɔ y’ɔngɛnɔngɛnɔ lee!

² Kânga tatɛ oma lo nshi yakafundamaka Bible, otshumanelo w’ekambi waki Nzambi aki diaaso dia lânde diakashamaka wetshelo w’oma le Jehowa. Lo nshi y’Ɛzɛra nde la Nehemiya, wodja wakahokamɛka wadielo w’Ɛlɛmbɛ “umaka pindju edja ndu unya l’atei ote.” (Neh. 8:​2, 3) L’ɔtɛ wa eokelo k’oshika k’Ɛlɛmbɛ kakawakondja lo diaaso sɔ, wodja wakonge “l’ongenongeno a wuki.” (Neh. 8:​8, 12) Sho lawɔ ngɛnangɛnaka woho watosha nsanganya ya weke diaaso di’oshika dia nongola wetshelo wa dimɛna ndo mbo ya ndɛ ya lo nyuma “lu tena diayo” oma le Jehowa lo tshimbo ‘y’ɔhɔmbɔ wa kɔlamelo ndo wa kɛsɔ.’ (Mat. 24:45) Lam’ele Yeso akate dia onto pombaka sɛna la “aui tshe watumba uma l’unyo wa [Jehowa],” nsanganya ya weke yekɔ ohomba efula dikambo di’ɔlɔlɔ aso wa lo nyuma.​—⁠Mat. 4:⁠4.

³ Sunganaka Mbidja Welo Tshɛ dia Mbɔtɔ! Sho tshɛ pombaka ndjadjɛ oyango wa mbɔtɔ lo Losanganya la Distrikɛ l’ɔnɔnyi ɔnɛ l’otondo lele l’ɔtɛ a dui ɔnɛ: “Embetsha w’Ɔtɛkɛta wa Nzambi.” Sho pombaka ndjalɔngɔsɔla dia komaka esadi lushi tshɛ ndo tshikalaka polo lam’ayotama “Amɛ!” lo dɔmbɛlɔ dia ndjihelo. Dia sala dikambo sɔ, ondo sho pombaka tshikitanya ekongelo kaso. Mbɔsa vakashi oma l’olimu aso dia mbɔtɔ lo losanganya mbeyaka monga l’ekakatanu ɛmɔtshi. Sho pombaka mbɔsa yɛdikɔ y’oshika ndo tatɔfɔnyake dia dikambo sɔ kokaka ndjosalema dwamamɛ. Naka tekɔ l’ohomba wa kondja pango kana wa kondja woho wa koma lo dihole dia losanganya, kete sho pombaka tayalɔngɔsɔdi k’ɔlɔmɔ. Wolo tshɛ wahombaso mbidja wayonga dimɛna!

⁴ Ekambi wa Jehowa hawɛdika ɛtshɔkɔ wakondjama oma lo wɔtwɛlɔ wa lo nsanganya ya weke la dɔlara kana francs congolais. Tɔshi ɛnyɛlɔ k’anto amɔtshi wakɔshi yɛdikɔ ya mbɔtɔ lo Losanganya la Wedja Efula l’Ɛmɛnyi wa Jehowa la l’ɔnɔnyi wa 1958 laki l’ɔtɛ a dui ɔnɛ: Lolango Laki Nzambi, lakasalema l’Osomba wa New York. Ɔnangɛso ɔmɔtshi akatshike olimu ande wa wokelo mingu hiende y’etondo dia tosha ekimanyielo ka la lolango ndo mbɔtɔ lo losanganya la woke. Ɔnangɛso ɔmɔtshi la lo disɛnga dielɛwɔ Îles Vierges akasondja bɛtshi dia nkɛtɛ tanu woho wa nkumbo kande kele l’anto asamalo mbɔtɔ lo losanganya lakɔ. Atshukanyi amɔtshi weke akɛnda wakasondja wato awɔ wa mɔtɛrɛ dia vɔ tshɔ l’anawɔ asato wele, ɔna la kose ekɔ la ngɔndɔ hiende ndo l’enondo l’ɛnɔnyi esambele otsha lo losanganya lɔsɔ. Wakatɛ anangɛso amɔtshi asato wele otema ɔtɔi w’oma la Californie ɔnɛ naka vɔ mbetsha l’olimu awɔ, kete wayoyotana dia wambowanya l’olimu etena kayowokawola. Koko, dikambo sɔ kombashimba dia vɔ ntshɔ lo losanganya la woke lɔsɔ lahawohɛki.

⁵ Jehowa Mfutaka Welo Wadjaso l’Otema Ɔtɔi: Jehowa mɛnaka ndo tshɔkɔlaka welo wadja ekambi ande. (Heb. 6:10) Oko ɛnyɛlɔ, lo Losanganya la l’ɔnɔnyi wa 1950 laki l’ɔtɛ a dui ɔnɛ: Ehamelo ka Teokrasi, wanɛ wakɔtɔ lɔkɔ wakoke dako diakatshikitanya eokelo k’akambo diaki l’ɔtɛ a dui ɔnɛ: “Dikongɛ di’Akambo di’Oyoyo.” Ɔnangɛso Frederick Franz akemula ndo akalomialomia saki k’anto tshɛ lo mimbola ate: “Onde wanɛ wele lo losanganya lɔnɛ la wedja efula hawotɔngɛnangɛna dia mbeya ɔnɛ amɔtshi l’atei wa wanɛ wele l’atei aso lanɛ, la dikɔlɔ nɛ, wayoyonga ewandji lo nkɛtɛ k’oyoyo?” Ɛnɔnyi ndekana 50 l’ɔkɔngɔ wa lâsɔ, tekɔ lo tetemala la ngɛnangɛna dingadimu sɔ diakasha eokelo k’ɔlɔlɔ k’Osambu 45:⁠16.

⁶ L’ɔkɔngɔ wa nde mbɔtɔ lo losanganya la distrikɛ l’ɔnɔnyi wetshi, owandji ɔmɔtshi wa nkumbo waki la lowando akafunde kɛnɛ kayela: “Anangɛso, hanyokoke mbeya pondjo woho wakatsha losanganya lɔnɛ nsɛnɔ y’anto. Dimi la nkumbo kami takonɔ otsha l’osomba ɔmɔtshi dia tokamba olimu, koko lonyuma laso lakayokomɛka la ndana. . . . Takanya yimba l’ɛkɛndɛ aso w’Okristo. Takayokoma polo ndo lo ntshika dia mbɔtɔ lo nsanganya ndo tomba l’esambishelo sho tshɛ. . . . Losanganya lɔnɛ lamboyotosha wolo, ndo tamboyadjɛ nto eyango wa lo nyuma ndo tekɔ lo sala woho wa kotsha eyango akɔ.”

⁷ Jehowa ekɔ lo ntosha mbo ya ndɛ ya lo nyuma yeso l’ohomba. Nde talɛka mɛsa woludi tɔɔ la diangɔ lo nsanganya yaso ya weke. Lowando laso lo yɛdikɔ shɔ pombaka totshutshuya dia mbuta nganɛ wakate Kɔnɛliyɔ etena kakaye ɔpɔstɔlɔ Petero dia ndjowenda ate: “Shu tshe teko lindu kakiane lu ashu wa [Nzambi], dia mbuka akambu tshe wakakutela [Jehowa].” (Etsha 10:33) Nyɛsɔ toyadje oyango wa mɛnama “lu ashu wa [Nzambi]” lo tenyi tshɛ dia Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Embetsha w’Ɔtɛkɛta wa Nzambi” ko tayɔngɛnangɛna!