Dikambɔ diambɛla dia muna
1. Naa olimu w’ohomba wakambema ɛlɔ kɛnɛ?
1 L’ɔkɔngɔ wa nde nsambisha womoto ɔmɔtshi l’ose Samariya, Yeso akatɛ ambeki ande ate: “Nyedia ashu anyu, nyendi dikambo diambela dia muna.” (Joa. 4:35, 36) Dinela dia lo nyuma diekɔ lo salema ndo Yeso akakoke tɛnyi la ntondo woho wayohama olimu ɔsɔ l’andja w’otondo. Oma ko edjaselo kande l’olongo, Yeso tetemalaka ndjasha l’olimu wa dinela ɔsɔ. (Mat. 28:19, 20) Naa awui amɔtshi wɛnya di’olimu ɔsɔ wekɔ lo tatetemala mpama otsha lo kondoko yawɔ?
2. Akambo akɔna wɛnya dia olimu wa dinela wa l’andja w’otondo wekɔ lo tahame?
2 Dinela dia l’andja w’otondo: L’ɔnɔnyi w’olimu wa 2009, lofulo l’apandjudi wa l’andja w’otondo lakadɛ lo pursa 3,2. Lo wedja wele olimu w’esambishelo wakasekɛma, lofulo l’apandjudi lakadɛ polo lo pursa 14. Lofulo l’anto wakeke la so Bible ngɔndɔ la ngɔndɔ lakalekana anto 7 619 000. Lofulo l’ambeki wa Bible lɔsɔ ndeka lofulo l’oyoyo l’apandjudi ndo lo mbɛdika la ɔnɔnyi wetshi, suke l’ambeki wa Bible nkama tshanu wamboyokotshama lâdiko. Oko watahame olimu ɔsɔ esadi esadi lo bɛtshi efula dia nkɛtɛ, ohomba w’efula wa waa misiɔnɛrɛ yetshama lo Kalasa ka Ngiliyadɛ wamboleka mɛnama. Woho wasambishama angɛndangɛna ekɔ la etombelo w’amɛna efula lo wodja la wodja. Mɛnamaka dia Jehowa ekɔ lo nkɛndjakɛndja olimu la shamanya lo etena k’ekomelo kɛnɛ ka dinela. (Is. 60:22) Onde wɛ mɛnaka “dikambo” diayɛ la sso di’ɔlɔlɔ?
3. Kakɔna kakoka anto amɔtshi mbuta lo kɛnɛ kendana l’ɛtshi kawɔ ka nkɛtɛ?
3 Dinela dia lo ɛtshi kayɛ ka nkɛtɛ: Anto amɔtshi mbeyaka mbuta ɔnɛ: “Ɛtshi kami ka nkɛtɛ bu l’etombelo w’ɛlɔlɔ efula.” Ekɔ mɛtɛ dia bɛtshi dimɔtshi dia nkɛtɛ bu l’etombelo w’ɛlɔlɔ oko dikina kana diaya bu l’etombelo w’ɛlɔlɔ oko wakidiɔ ntondo. Ɔnkɔnɛ, Ɛmɛnyi ɛmɔtshi mbeyaka mbuta dia dinela diambokoma lo kondoko yadiɔ lo bɛtshi dia nkɛtɛ sɔ ndo ɔnɛ ambotshikala paka tɔtɔi t’anto toto mbahomba sambishama. Onde ngasɔ mbediɔ?
4. Dionga diakɔna di’ɔlɔlɔ diendana l’olimu aso diahombaso monga la diɔ ndo lande na?
4 Oma ko etatelo polo l’ekomelo, dinela okongaka etena kele l’olimu efula. Tolembete woho wɛnya ɛtɛkɛta waki Yeso ɛnɛ ohomba wa nsala akambo la shamanya. Nde akate ate: “Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.” (Mat. 9:37, 38) Jehowa lele Owandji wa dinela mbele l’ɔkɛndɛ wa mbuta etena ndo lɛnɛ ahomba olimu ɔsɔ monga la etombelo w’ɛlɔlɔ. (Joa. 6:44; 1 Kor. 3:6-8) Naa ɔkɛndɛ wele la so? Bible kadimolaka ɔnɛ: “Uneki wuhu aye la pindju. Tushaki lunya laye mumuya la dikolo.” (Und. 11:4-6) Eelo, lam’ele olimu wa dinela wekɔ lo tatshu lo kondoko yawɔ, ɔnɛ kema etena ka sho ndewalewa.
5. Lande na kahombaso ntetemala nsambisha l’ohetoheto kânga l’ɛtshi ka nkɛtɛ kɛnama dia anto wa lɔkɔ hawetawɔ losango laso?
5 Totetemale muna: Oyadi ɛtshi kaso ka nkɛtɛ kambokindjakindjama efula ndo mɛnamaka di’anto wa lɔkɔ hawetawɔ losango laso, tekɔ l’ɔkɔkɔ w’oshika wa nsambisha l’ohetoheto ndo la shamanya. (2 Tim. 4:2) Akambo wa kɔlɔ wasalema l’andja ɔnɛ koka ndjotshutshuya anto amɔtshi dia vɔ ntshikitanya dionga diawɔ ndo nkana yimba dimɛna lo kɛnɛ kendana la nshi yayaye. Etena kayole ɛlɔngɔlɔngɔ l’esekaseka, vɔ koka ndjɛna ohomba wa ntana wɔladi ndo ki ka lo yimba. Etete kaso kâkakoke ntetemala mambiya anto akina. Eelo, anto waki kombetawɔ losango laso ntondo mbeyaka ndjolietawɔ. Sho pombaka mpɛmɔla kânga wanɛ watshininala dia ntona losango laso.—Ezek. 2:4, 5; 3:19.
6. Kakɔna kayotokimanyiya dia nama ohetoheto aso naka tekɔ l’okakatanu l’ɛtshi kaso ka nkɛtɛ?
6 Kakɔna kayotokimanyiya dia nama ohetoheto aso naka tekɔ l’okakatanu l’ɛtshi kaso ka nkɛtɛ? Lâdiko dia esambishelo ka lo luudu la luudu, sho koka ndjasha lo toho tokina t’esambishelo, ɛnyɛlɔ esambishelo ka l’ahole wandawɔ ekanda kana ka lo telefɔnɛ. Kana sho koka ntshikitanya mbɔtwɛlɔ yaso lo nkamba la mbɔtwɛlɔ y’eyoyo. Sho koka nto ntshikitanya ekongelo kaso lo sambishaka la dikɔlɔ kana tena dikina dialeka anto tanema lawakawɔ. Ondo sho koka ndjadjɛ oyango wa mbeka ɔtɛkɛta w’oyoyo dia nyomoleka nsambisha anto efula lokumu l’ɔlɔlɔ. Sho mbeyaka monga l’akoka wa mfudia olimu aso lo nkamba oko ombatshi mboka wa pondjo. Kana sho koka monɔ lɛnɛ ele ekambi wa dinela wekɔ yema tshitshɛ efula. Naka sho mɛna olimu wa dinela la sso di’ɔlɔlɔ, kete tayosala la wolo dia ndjasha tshɛ l’olimu w’ohomba ɔsɔ.
7. Polo ndo l’etena kakɔna kahombaso ntetemala nkamba olimu w’otshumanyelo?
7 Akambi wa dikambɔ wekɔ paka la etena ka tshitshɛ keto dia ntshumanya diangɔ, ɔnkɔnɛ vɔ hawomuya kana tɛwɔla anya naka olimu ɔsɔ watashile. Dinela dia lo nyuma nɔmbaka dia nsala akambo la shamanya lo yoho ya ngasɔ. Polo l’etena kakɔna kahombaso ntetemala nkamba olimu w’otshumanyelo? L’edja tshɛ keke ‘dikongɛ nɛ di’akambo’ ndo polo lo “ekumelu.” (Mat. 24:14; 28:20) L’ɛnyɛlɔ ka Jehowa lele Okambi woleki tshɛ, sho nangaka nshidiya nkamba olimu wakandatosha. (Joa. 4:34; 17:4) Nyɛsɔ totetemale nkamba olimu aso l’ohetoheto, l’ɔngɛnɔngɛnɔ ndo totetemale mɛna olimu aso la sso di’ɔlɔlɔ polo ndo l’ekomelo. (Mat. 24:13) Olimu wa dinela watashile.
[Efundelo wa l’etei w’odingɔ wa lo lɛkɛ 2]
Oma ko etatelo polo l’ekomelo, dinela okongaka etena kele l’olimu efula