Ekongelo ka Losanganya l’Otshimbedi Layaye

Elembetshiyelo kɛmɔtshi ka tshɛkɛta wɔma ko “dilɛmiyɛlɔ di’efula ndo wɔma wɔsɔhanyi la dilɛmiyɛlɔ wele l’onto djekoleko otsha le Nzambi.” Ɔsɔ ekɔ wɔma wa dimɛna walembetshiyama l’Afundelo oko “etatelu ka yimba.” (Osam. 111:10) Wɔma ɔsɔ tshikitana la woho okina wa wɔma watanema l’andja ɔnɛ waki Satana wasɛnaso. Ngande wakokaso mbewɔ dia monga la woho wa wɔma wa kɔlɔ ɔsɔ lam’ayangaso dia mboka Jehowa wɔma wɔsɔhanyi la dilɛmiɛlɔ na? Losanganya l’otshimbedi la l’ɔnɔnyi w’olimu wa 2002 layokadimola lo wombola ɔsɔ. Lɔ lekɔ l’ɔtɛ a dui wata ɔnɛ: ‘Nyoke Nzambi Wɔma ndo Nyôtombole.’ (Eny. 14:⁠7) Tayoshihodia weho efula wakoka ɔm’ɔmɔ wa l’atei aso kana ɔlɔngɔswamelo w’otondo kondja wahɔ oma lo wɔma wa Jehowa.

Kânga mbele wɔma koka mbela okiyanu kana ɔkɔmwɛlɔ w’otema ndo oshishelo wa wolo wa tondoya ekakatanu, Bible mbutaka ɔnɛ: ‘Onto tshɛ loka Jehowa wɔma ekɔ l’ɔngɛnɔngɛnɔ.’ (Osam. 128:⁠1) Ekongelo ka losanganya lɔnɛ kayotɛnya woho wakokaso tondoya ekakatanu wendana l’ɔtɛmwɛlɔ wa mɛtɛ. Tayɛna woho wakokaso kimanyiya eyoyo dia vɔ mboka Nzambi wɔma wasungana wayowatshutshuya dia mbokambɛ l’etema awɔ tshɛ, l’anima awɔ tshɛ, la timba tawɔ tshɛ ndo la welo awɔ tshɛ. (Mako 12:30) Lushi la ntondo la losanganya lɔnɛ layokomɛ la sawo diaki omendji wa distrikɛ diele l’ɔtɛ a dui ɔnɛ: “Mamatana Efula la Wanɛ Wokayɛ Ngandji.” Nde ayotolembetshiya woho wakokaso mbishola welo wadja Diabolo dia tokakitola la Jehowa, la nkumbo kaso, ndo l’anangɛso w’Akristo.

Sawo dia tenyi nɛi diayoshama lushi la hende la losanganya diekɔ l’ɔtɛ a dui ɔnɛ: ‘Toke Jehowa Wɔma, Koko Aha Anto.’ Diɔ diayotolembetshiya lande na ndo ngande wahombaso nɛndja woho wa wɔma tshɛ watoshimba dia kotshaka olimu aso dimɛna kana namaka kɔlamelo yaso ndo nkum’otema kaso k’ɔlɔlɔ la kalasa kana lo dihole di’olimu. Dako dia lo sɛkɛ diayonga l’ɔtɛ a dui ɔnɛ: “Nyoke Nzambi Wɔma ndo Nyolamake Wadjango Ande.” Diɔ mbɔsama oma l’akambo wɔkɔndwami l’Enyelo tshapita ya 14. Losanganya lɔnɛ l’otshimbedi layokomɛ la dako diasha ekeketshelo diata ɔnɛ: “Totetemale la Kɛndakɛnda lo Wɔma wa Jehowa.”

Kalasa k’Olimu wa Teokrasi, Losanganya l’Olimu l’ɛnya woho wahombama losanganya lakɔ nɔmbɔmaka, dako dia batismu ndo Wekelo wa Tshoto y’Etangelo lo hiembola ekɔ akambo akina w’ohomba wahanyatolanga pandja l’ekongelo ka losanganya kɛnɛ. Kanyete ambeki anyu wa Bible dia vɔ mbɔtɔ kâmɛ la nyu lo losanganya lɔnɛ. Onto tshɛ lakombola batizama pombaka mbewoya omendji walɔmbɔla kɔlɔmɔ. Sho tshɛ tayohomba mɛnya wɔma aso wa dimɛna wokaso Jehowa ndo lotombo lawoshaso lo ndjalɔngɔsɔla di’aha pandja kânga etenyi ɔtɔi k’ekongelo ka dimɛna kɛnɛ!

[Caption on page 3]

Onde Dimi Koka Nyanga Ekimanyielo oma lo Wodja Okina?

Mbala efula, apandjudi amɔtshi fundɛka filialɛ y’Ɛmɛnyi wa Jehowa ya lo wedja ekina dia mbalɔmba weho w’ekimanyielo tshɛ. Ɛnyɛlɔ, amɔtshi nɔmbaka anto wa fundanɛka la wɔ, wadi kana omi, bandɛ vidɛo, ndo kânga asɔmbɔ w’akuta. Tambolanga di’onto tshɛ mbeya dia filialɛ hayendana l’akambo asɔ.

Société ekɔ ɔlɔngɔswɛlɔ wayakimɔ l’elimu w’ɔlɔlɔ, koko aha wahomba anto nyanga dia kondja wahɔ oma lɔkɔ. Vɔ sukamɛka oma lo weshasha wa la lolango wakimɔ anto wa l’andja w’otondo l’oyango wa losango la Diolelo diaki Nzambi sambishama lo nkɛtɛ k’otondo. (Mat. 24:14) Oko wediɔ ɔsɔku, weshasha tshɛ kambemaka olimu paka lo kɛnɛ kendana l’olimu w’esambishelo ndo hawokoke sɔndja anto amɔtshi akuta w’oma lo weshasha ɛsɔ.

Mbala efula, anto fundɛka angɛnyi awɔ kana wanɛ wambonɔ ngelo lɛkɔ dia mbalɔmba ekimanyielo ka l’emunyi. Anto amɔtshi wele bu ndo l’ekondjelo ka l’emunyi tshɔka otsha lo wedja ekina kana otsha l’esomba wa weke, dia tendɛka l’anya w’anangɛso wele lo wodja kana l’osomba walangawɔ todjasɛ. Onde sho kokaka mbuta dia paka sho ato mbadiɛnɛ la ‘tena dia wolo mbikikɛ’ nɛ, koko aha anto akina, mbidja ndo anangɛso wa lo nyuma wa lo tenyi dikina di’andja ?​—⁠1 Tim. 3:⁠1.

Etshumanelo k’Akristo kambɔsaka yɛdikɔ ya kimanyiyaka wanɛ wele lo dihombo ndo wanɛ wanandema la mpokoso y’oma lo diangɔ diakatongama wele l’atei aso. Yɛdikɔ shɔ nembetshiyama lo lɛkɛ 122-123 la dibuku Organisés pour bien remplir notre ministère. Lâsɔ kema dimɛna fundɛ tshumanelo kana filialɛ ya lo wedja ekina dia nɔmba ekimanyielo.

Ndo nto, adrɛsɛ wa tshumanelo ndo wa wanɛ walɔmba ekanda wombama lo fardɛ ya lo filialɛ namemaka lo sheke ndo hawokoke mbisha wanɛ walanga fundanɛ l’anto wa l’ahole akina lo yoho ya lânde kana dia mbisha wanɛ walanga nyanga wadi kana omi oma lo dihole dikina. Naka wɛ ekɔ lo tatshu otsha lo wodja okina, wɛ mbeyaka fundɛ biro ka filialɛ ka lo wodja ɔsɔ ndo mimbola adrɛsɛ wa Mbalasa kɛmɔtshi ka Diolelo koleki suke ndo wenya wasalema nsanganya.

Naka sho ndjela alako anɛ kete hatotoshisha wenya aso kana olimu aso efula.​—⁠1 Kor. 14:⁠20.