Onde na Wɛ Kokaka Tokamba Lɛnɛ Ele Ohomba w’Efula?
1 Onde wɛ ambokanaka yimba lushi lɔmɔtshi dia tshɔ lɛnɛ ele ohomba w’apandjudi wa Diolelo efula? Naka vɔ kɔlɔmba dia wɛ ‘tshɔ lɛkɔ . . . dia tosha ekimanyelo,’ onde wɛ ayotsha oko wakatshe ɔpɔstɔlɔ Paulo? (Etsha 16:9, 10) Lo tshumanelo efula wekɔ l’ohomba wa nkumbo yambotshunda lo nyuma, ambatshi mboka dia mbakimanyiya dia vɔ shidiya kindjakindja mbilo yawɔ, kana wa dikumanyi dia tomanamana ndo ekambi w’olimu dia mbakimanyiya la nɔmbɔla tshumanelo diawɔ. Mbilo mbeyaka monga la tongelongelo tanganyi l’osomba a woke tele lo tosamba. Mbalasa ka Diolelo koleki suke la tosamba tɔsɔ mbeyaka monga etale efula. Ondo elimu wa l’emunyi wa tokamba bu efula lɛkɔ. Mbala mɔtshi ko lɛkɔ tshitshi kana dungu diekɔ efula. Onde wɛ kokaka tokamba l’atei w’ekakatanu wa ngasɔ? Woho akɔna wokokiyɛ totondoya ekakatanu ɛsɔ?
2 Ekɔ Ohomba Monga la Mbetawɔ ndo la Wɛkamu: Oma lo didjango diaki Nzambi, Abarahama akatshike wodja ande wa lôtɔ, Ura ndo akande lɔkɛndɔ la kilɔmɛtɛlɛ 1000 otsha la Harana nde la wadɛnde, la wohiɔ ande, ndo l’osombe wa she, Tɛra. (Etat. 11:31, 32; Neh. 9:7) Oma l’ɔkɔngɔ wa nyɔi ka Tɛra, Jehowa akatɛ Abarahama, lâsɔ ko nde aya l’ɛnɔnyi 75, dia nde tshika Harana l’ase nkumbo kande ko ntshɔ otsha lo wodja wakahombe mbɛnya Nzambi. Abarahama, Sara, ndo Lɔta ‘wakatetemala la lɔkɛndɔ lawɔ.’ (Etat. 12:1, 4, 5) Eelo mɛtɛ, Abarahama kotshɔ dia tokamba lɛnɛ aki ohomba w’efula w’ekambi. Koko otshwelo ande akɔlɔmbaka dia nde ndjala la dui dimɔtshi. Dui diakɔna na?
3 Abarahama akahombe monga la mbetawɔ ndo la wɛkamu dia nde mbɔsa yɛdikɔ ya ngasɔ. Tokanyi tande la yoho yande ya sɛna yakahombe tshikitana. Nde akahombe tshika ewotɔ ande ndo lanɛ wakandasɛnaka lo ki. Koko nde akatshike wotsho tshɛ l’anya wa Jehowa dia nde mbokokɛ nde la wa lo luudu lande. Nshi nyɛ anto efula wambɛnya mbetawɔ kawɔ otsha le Jehowa lo yoho yakɔ yamɛ shɔ.
4 Olimu wa lo Tshanda Mɔtshi Tsho: Onde wɛ ambokondjaka ɛtshɔkɔ waya lo kamba lo mbilo kele anto watatomama lɛkɔ? Ɔnɔnyi wetshi, lo wedja 48 wosukanyi, apandjudi 5 699 wakakindjakindja mbilo 163 l’atei wa mbilo 174 yele anto watasambishaka lɔkɔ. Apandjudi akina 5676 wakakimanyiya tshumanelo 380 dia diɔ shidiya kindjakindja mbilo yakambawɔ paka lo pai lɔkɔ. Dikambo sɔ akalɔmbɛ anto amɔtshi dia minda nkɛndɔ y’etale efula. Onde akasunganaka vɔ mbidja welo ɛsɔ?
5 Ɔnangɛso ɔmɔtshi l’ose Californie lakatshu l’osomba wa Utah akafunde ate: “Lam’akawanɔmbɛ mbala ka ntondo dia dimi ntshɔ l’olui w’anto otsha lo mbilo kɛmɔtshi kahaleke sambishama, dimi lakengenga. Koko l’ɔkɔngɔ diko dimi lakɔshi yɛdikɔ ya mbetawɔ ɔkɛndɛ ɔsɔ. Dimi konyanga pondjo lo woho wakametawɔ ɔkɛndɛ ɔsɔ, ndo ɔkɛndɛ akɔ wakatshikitanya lɔsɛnɔ lami. Dimi mbishaka Jehowa losaka lushi tshɛ oma lo diɛsɛ diakamakondja dia monga ɔmɔtshi wa l’atei w’anto wakande lɔkɛndɔ lɔsɔ.” Ɔnangɛso ɔmɔtshi l’ose Florida lo wodja wa Tennessee akate ate ɔsɔ aki dikambo dioleki dimɛna l’ɛnɔnyi 20 wayande l’atei w’etshumanelo! Ɔlɔngɔlɔngɔ ɔmɔtshi w’ose Connecticut wakatshu lo lɛkɛ la Owɛstɛ wa Virginie akate ate: “Ɔsɔ aki dikambo dioleki ɔngɛnɔngɛnɔ lo lɔsɛnɔ lami!” Apandjudi efula wambosuya dia kamba kânga lo tshanda mɔtshi tsho lɛnɛ ele ohomba efula akakeketsha lowando lawɔ efula l’olimu w’esambishelo. Sawola l’anto wakatshe dikambo sɔ. Wɛ ayɛna dia vɔ wakahame lo nyuma ndo wayokombola sala dikambo sɔ nto naka vɔ kondja diaaso.
6 Mbetawɔ tokamba olimu lo tshanda mɔtshi tsho lɛnɛ ele dihombo efula koka monga l’oyango okina. Anto wasala ngasɔ kokaka ndjeya akambo efula w’ohomba wayowakimanyiya dia ‘mbɛdika oshinga’ lo kɛnɛ kendana la monɔ otsha l’etenyi kekina ka wodja.—Luka 14:28.
7 Jehowa ambɔsa yɛdikɔ dia lokumu l’ɔlɔlɔ sambishama “lu kete tshe” la ntondo k’ekomelo ndja. (Mat. 24:14) Oko weyayɛ dikambo sɔ, naka wɛ ekɔ l’akoka, onde wɛ ayetawɔ dia monɔ otsha lɛnɛ ele dihombo efula? Ohomba wekɔ l’ahole efula.
8 Monɔ Otsha Lɛnɛ Ele Ohomba w’Efula: Onde wɛ ambolongolaka pasiɔ? Onde wɛ ekɔ lo kondja dikuta mbala la mbala? Naka kema, onde wɛ hakoke ndjatongɛ djimulimu mɔtshi? Onde wɛ koka ndjasɛnya oma l’ekimanyielo ka telefɔnɛ kana k’ɔrdinatɛrɛ? Ko naka wɛ kema l’akoka wa ntshɔ, onde wɛ hakoke kimanyiya ose nkumbo ɔmɔtshi dia nde tokamba olimu dihole tshɛ diakokande tokamba?
9 Naka oma l’ɔkɔngɔ wa wɛ sɛdingola dikambo sɔ lo dɔmbɛlɔ wɛ ambɛna dia wɛ kokaka ntshɔ lɛnɛ ele ohomba efula, kete wɛ kokaka tɛkɛta dikambo sɔ wɛ la nkumbo kayɛ ndo la dikumanyi dia l’etshumanelo kayɛ. Oma lâsɔ, ko wɛ funda mukanda ndo mbisha dikumanyi mukanda akɔ dia vɔ funda awui amɔtshi wɛnawɔ ndo ɛsɔnwɛlɔ awɔ la ntondo ka vɔ tomɛ filialɛ mukanda akɔ.
10 Awui akɔna wahombayɛ funda lo mukanda ayɛ na? Ɛnɔnyi ayɛ, lushi lakayabatizama, ɛkɛndɛ wele layɛ l’atei w’etshumanelo, funda dia kana ambotshukana kana êke onyemba, ndo kana wɛ ekɔ l’ana watotshitshɛ. Ta dihole dimɔtshi dialangayɛ tokamba, lo ndjela ehomba ayɛ. Ɛnyɛlɔ, onde wɛ kokaka mbidjasɛ lɛnɛ ele yanyi ndo tshitshi? Onde wɛ mbeyaka mbikikɛ eleko ka tshitshi? Onde wɛ kokaka mbidjasɛ l’akona w’elongolongo? Onde wɛ tɛkɛtaka ɛtɛkɛta ɛmɔtshi w’angɛndangɛnda?
11 Onde wɛ ekɔ l’ohetoheto ndo mbeyaka mbɔsa tɛdikɔ? Onde akambo wele layɛ koshaka diaaso dia wɛ tokamba lɛnɛ ele dihombo efula? Naka ngasɔ, kete wɛ ayɛna woho watetemala Jehowa tshulola ɛtshɔkɔ efula le anto wayaɛkɛ le nde ndo wele la yimba ya ndjahombia!—Osam. 34:8; Mal. 3:10.