Oyango wa dimɛna efula wa ndjadjɛ lo ɔnɔnyi w’olimu w’oyoyo
1. Oyango akɔna wakokaso ndjadjɛ lo ɔnɔnyi w’olimu w’oyoyo?
1 Sho pombaka ndjadjɛ eyango naka sho nangaka pama lo nyuma. Naa eyango wambotoyadjɛ lo ɔnɔnyi w’olimu w’oyoyo? Oyango wa dimɛna efula wa ndjadjɛ ele wa kamba olimu w’ombatshi mboka wa tshanda ngɔndɔ ɔtɔi kana efula. Lam’ele olimu w’ɔngɛnɔngɛnɔ ɔsɔ nɔmbaka mbala efula di’onto kongɛ awui la ntondo, ɔnɛ ekɔ etena k’ɔlɔlɔ ka tatɛ ndjalɔngɔsɔla. Lande na kahombaso ndjadjɛ oyango wa kamba olimu w’ombatshi mboka wa tshanda?
2. Lande na kahombaso ndjadjɛ oyango wa kamba olimu w’ombatshi mboka wa tshanda?
2 Ɛkɔkɔ wa kamba olimu w’ombatshi mboka wa tshanda: Olimu w’ombatshi mboka wa tshanda tokimanyiyaka dia sho ‘ndeka’ ngɛnyangɛnya Shɛso lele l’olongo lo mbetshaka wenya efula l’esambishelo. (1 Tes. 4:1) Etena kakanyiyaso kɛnɛ tshɛ kambotosalɛ Jehowa, etema aso totshutshuyaka dia so mbutɛ anto akina awui wendana la nde. (Osam. 34:1, 2) Jehowa mɛnaka dui sɔ ndo ngɛnangɛnaka woho wayahombiaso dia ndeka sambisha. (Heb. 6:10) Mbeya dia sho ngɛnyangɛnyaka Jehowa oma l’olimu wa wolo wakambaso toshaka ɔngɛnɔngɛnɔ w’efula.—1 Ek. 29:9.
3, 4. Wahɔ akɔna wayotokondja lo kamba olimu w’ombatshi mboka wa tshanda?
3 Mbala efula, etena kaleka onto sala dui dimɔtshi mbaleka dui diakɔ mbosha ɔngɛnɔngɛnɔ ndo monga wɔdu efula le nde. Ndeka sambishaka ayokokimanyiya dia wɛ ndeka ndjaoka dimɛna etena kasambishayɛ lo soko la soko. Wɛ ayonga la diewo efula dia tatɛ sawola l’anto ndo dia kamba la Bible. Mbetawɔ kayɛ kayoleka monga wolo etena katayaleke sawola la anto akina lo dikambo diatɔ. Anto efula waki kɔnɔmbɔlaka wekelo wa Bible wakayongaka la akoka wa tatɛ mbeka l’onto Bible l’ɔkɔngɔ wa vɔ kamba olimu w’ombatshi mboka wa tshanda.
4 Olimu w’ombatshi mboka wa tshanda mbeyaka nto tokimanyiya dia sho monga la ekongelo k’ɔlɔlɔ k’awui wa lo nyuma. Ɔnangɛso ɔmɔtshi laki ntondo ombatshi mboka wa pondjo lakɛnyi dia nde akalekaka mbetsha wenya ande efula lo olimu wa l’emunyi, akɔshi yɛdikɔ ya kamba olimu w’ombatshi mboka wa tshanda ngɔndɔ ɔtɔi. Nde akate ate: “Ngɔndɔ ɔtɔi kɛsɔ akakeketsha woho w’anyanya lo nyuma! Dimi lakayɔsaka yɛdikɔ ya tetemala kamba olimu w’ombatshi mboka wa tshanda ndo dui sɔ diakayokonyaka nto ombatshi mboka wa pondjo.”
5. Ngande wakokaso minya tokanyi t’ɔnɛ hatokoke kamba olimu ɔsɔ?
5 Totondoya wekamu: Anto amɔtshi mbeyaka mengenga kamba olimu ɔsɔ nɛ dia vɔ ndjaokaka dia vɔ bu la diewo dia sambisha. Naka dui sɔ mbakoshimba dia wɛ kamba olimu akɔ, kete Jehowa koka kokimanyiya woho wakandakimanyiya Jeremiya. (Jer. 1:6-10) Kânga mbaki Mɔsɛ “kanga oteketa w’okoke la lulimi wutshu,” Jehowa akakambe la nde dia nde kotsha lolango Lande. (Etum. 4:10-12) Naka wɛ ndjaokaka dia wɛ hokoka, kete tetemala nɔmba Jehowa dia nde kosha dihonga.
6. Ngande wakoka onto kamba olimu w’ombatshi mboka wa tshanda kânga mbende la hemɔ kana la olimu efula wa sala?
6 Onde wɛ mengengaka kamba olimu ɔsɔ l’ɔtɛ wa hemɔ kana weyɛ l’awui efula wa sala? Naka wɛ ekɔ l’ɛkɔmɔ, kete sala kɛnɛ keyɛ l’akoka wa sala mbeyaka kokimanyiya dia wɛ kamba olimu akɔ. Naka wɛ ekɔ l’awui efula wa sala, kete wɛ mbeyaka kongɛ dia ndjosala awui wele kema ohomba efula lo ngɔndɔ kekina. Anto amɔtshi wakakambaka elimu wawaɔsɛ wenya efula waki l’akoka wa ndjatshungwɛ etena ka kamba olimu w’ombatshi mboka wa tshanda lo mbɔsa lushi ɔtɔi kana nshi hiende ya vakashi.—Kol. 4:5.
7. Lande na kele ekɔ ohomba efula nɔmbaka dikambo di’olimu w’ombatshi mboka wa tshanda?
7 Woho wa sala dui sɔ: Lɔmbaka Jehowa dia nsaki kele layɛ ka kamba olimu ɔsɔ. Lɔmbaka Jehowa dia nde tshɔkɔla welo wadjayɛ dia pamia olimu ayɛ. (Romo 12:11, 12) Nde koka kokimanyiya dia wɛ mbɔsa tɛdikɔ ta lomba dia mbeya tshikitanya ekongelo kayɛ. (Jak. 1:5) Naka wɛ kema la nsaki kɛsɔ, kete lɔmba Jehowa dia nde kokimanyiya dia wɛ tana ɔngɛnɔngɛnɔ l’olimu w’esambishelo.—Luka 10:1, 17.
8. Ngande wele kamba l’awui wele lo Tukedi 15:22 kokaka kokimanyiya dia wɛ kamba olimu w’ombatshi mboka wa tshanda?
8 Nyosawole lo nkumbo dia oyango wa kamba olimu w’olimu w’ombatshi mboka wa tshanda. (Tuk. 15:22) Ondo ose nkumbo ɔmɔtshi koka monga ombatshi mboka wa tshanda la osukɔ w’ase nkumbo akina. Sawola la anto akina wa lo etshumanelo dia nsaki kayɛ ka monga ombatshi mboka, djekoleko wanɛ wele la awui wele oko wayɛ. Dui sɔ mbeyaka pamia ɔngɛnɔngɛnɔ ayɛ wa kamba olimu w’ombatshi mboka wa tshanda.
9. Ngɔndɔ yakɔna yakokayɛ sɔna dia kamba olimu w’ombatshi mboka wa tshanda?
9 Etena kasɛdingolayɛ ekongelo kayɛ k’awui wa lo nyuma lo ɔnɔnyi w’olimu w’oyoyo, etena kakɔna kayoyonga l’akoka wa kamba olimu w’ombatshi mboka wa tshanda na? Naka wɛ kambaka olimu wakɔsɛ wenya efula kana wɛ ntshɔka la kalasa, kete wɛ mbeyaka menda ngɔndɔ yele la lushi lɔmɔtshi la fɛtɛ kana la nshi ya samalo la ya lomingu tshanu. Ɛnyɛlɔ, Ngɔndɔ ka divwa, ka dikumi l’ahende, ka sato, ndo k’enanɛi ayonga la nshi ya samalo la ya mingu tshanu. Ngɔndɔ ka tanu kekɔ la nshi ya samalo tshanu ndo ka samalo kekɔ la nshi ya mingu tshanu. Naka wɛ ekɔ la ekakatanu ɛmɔtshi wa lo demba, kete enda ngɔndɔ yele nshi mongaka dimɛna. Wɛ mbeyaka kamba olimu w’ombatshi mboka lo ngɔndɔ kakakongɛ omendji w’otshimbedi dia ndjembola etshumanelo kanyu. Lo wembwelo ande, wɛ mbeyaka monga la diɛsɛ dia mbɔtɔ lo etenyi ka ntondo ka losanganya lasala omendji w’otshimbedi la ambatshi mboka wa pondjo. Lam’ele ɔnɔnyi wayaye Eohwelo kayosalema Ngɔndɔ ka sato 22, Ngɔndɔ ka sato, ka nɛi ndo ka tanu ayonga ngɔndɔ y’amɛna ya kamba olimu w’ombatshi mboka wa tshanda. L’ɔkɔngɔ wa wɛ sɔna ngɔndɔ kakombolayɛ kamba olimu w’ombatshi mboka wa tshanda, sala ekongelo kayokokimanyiya dia wɛ kotsha wenya walɔmbama.
10. Kakɔna kakokayɛ sala naka wɛ kema l’akoka wa kamba olimu w’ombatshi mboka wa tshanda?
10 Oyadi wɛ mɛnaka dia wɛ kema l’akoka wa monga ombatshi mboka wa tshanda l’ɔnɔnyi w’olimu wayaye, wɛ koka tetemala monga la yimba y’ombatshi mboka. Tetemala sala kɛnɛ tshɛ kakokayɛ sala l’esambishelo, l’eshikikelo dia Jehowa ngɛnangɛnaka welo wadjayɛ l’otema ɔtɔi l’olimu ande. (Ngal. 6:4) Sukɛka ndo keketshaka wanɛ wele l’akoka wa kamba olimu w’ombatshi mboka wa tshanda. Ondo wɛ kokaka tshikitanya ekongelo kayɛ dia sambisha lushi lokina la lo lomingu la wanɛ wele ambatshi mboka.
11. Lande na kahombaso salaka akambo la shamanya?
11 Ekambi waki Jehowa shihodiaka ohomba wa sala akambo la shamanya. Tekɔ l’olimu wa sala, mbuta ate sambisha lokumu l’ɔlɔlɔ. Nsɛnɔ y’anto yekɔ lo wâle ndo etena kambotshikala kekɔ tshitshɛ. (1 Kor. 7:29-31) Ngandji kokaso Nzambi ndo wanyaso anto ayototshutshuya dia sho sala kɛnɛ tshɛ kakokaso sala lo olimu w’esambishelo. Lo mbidja welo ndo lo ndjalɔngɔsɔla dimɛna, tayokoka kamba olimu w’ombatshi mboka wa tshanda kânga ngɔndɔ ɔtɔi lo ɔnɔnyi w’olimu wayaye. Eelo, ɔsɔ ekɔ mɛtɛ oyango wa dimɛna efula!