Unis grâce à l’enseignement divin — Ɔsɛdingwelo wa Nkumbo ka Mɛtɛ Kele Kamɛ k’Anto l’Ɔnango
Omendji w’otshimbedi ɔmɔtshi akatshindɛ opandjudi ɔmɔtshi dia teka Bible la womoto laki atɔtɔka kânga lushi lo nsanganya ya l’etshumanelo. Omendji akalɔmbɛ womoto ɔsɔ dia ndjenda bandɛ vidɛo Unis grâce à l’enseignement divin. Lomingu lakɔ womoto ɔsɔ akɔtɔ lo losanganya lɔmɔtshi ndo akate dia nde aki l’ɔngɛnɔngɛnɔ efula dia monga lɔkɔ. Bonde kakonge bandɛ vidɛo kɛsɔ l’etombelo w’amɛna esadi eto ngasɔ na? Womoto ɔsɔ akambe lo woho wakɛnyaka bandɛ kɛnɛ kamɛ kaso k’anto l’ɔnangɔ kɛnama l’atei w’andja ɔnɛ woludi l’awui wa ngala ndo la lohetsho.—Joa. 13:35.
Enda bandɛ kɛnɛ dia mɛna ndo monga la ki ndo la ngandji kele l’Ɛmɛnyi wa Jehowa wa lo nkɛtɛ k’otondo. Oma lâsɔ ko wɛ kana yimba la wembola ɛnɛ:
(1) Lande na ɔtɛ a dui w’ɔnɛ: “Wetshelo Waki Nzambi” aki ɔtɛ a dui wakasunganaka lo nsanganya ya weke yakasalema l’ɔnɔnyi 1993-1994?—Mika. 4:2.
(2) Etombelo akɔna wakonge l’akambo wa mɛtɛ wa lo Bible le nkumbo mɔtshi? Etombelo akɔna wamonga l’akambo ako le nkumbo kayɛ hita?
(3) Bonde kele ekɔ ohomba mbetshama oma le Jehowa?—Osam. 143:10.
(4) Naa weho w’ekakatanu wahomba tondoya dia ndjalɔngɔsɔla otsha lo nsanganya ya weke ya wedja efula?
(5) Ngande wakayɛnyi woho wakakotshama awui wa l’Osambu 133:1 ndo wa lo Mateu 5:3 lo nsanganya ya weke y’Akristo yakayɔtɔ?
(6) Naa djembetelo ya lo sɛkɛ yɛnya etombelo wa weke waki la wetshelo waki Nzambi?—Eny. 7:9.
(7) Naa lofulo lakaleke woke lahatongaka l’Akristo wa mɛtɛ wakabatizama na?
(8) Ɛtɛkɛta akɔna waki Mika, Petero, ndo Yeso wakotshama l’atei w’Ɛmɛnyi wa Jehowa?
(9) Kakɔna kakoshikikɛ dia nkumbo k’anto wele kamɛ ndo l’ɔngɛnɔngɛnɔ kema oko dɔ di’anyanya?
(10) Onto akɔna ayoyɛnya bandɛ vidɛo kɛnɛ ndo, lande na?
L’ɔkɔngɔ wa nde menda bandɛ vidɛo kɛnɛ, kadiyɛso kɛmɔtshi akate lo tshena pe ate: “Bandɛ vidɛo kɛnɛ ayokimanyiya dia nyomoleka kanyiyaka dikambo di’efula k’anangɛso l’akadiyɛso w’Akristo wa l’andja w’otondo wakambɛ Jehowa la kɔlamelo wony’ɔnɛ. . . . Kamɛ kaso k’anto l’ɔnango ekɔ mɛtɛ dikambo di’oshinga wolo!”—Ef. 4:3.