“Lende Akokami Tana Wonya?”
1 Ngasɔ mbayakiyanya efula ka l’atei aso, nɛ dia nsɛnɔ yaso ndola l’akambo efula wa sala. Anto mbutaka dia wonya mbele ɛngɔ koleki ohomba ndo koleki mondo. Lâsɔ lende akokaso tana wonya wa sala akambo wele mɛtɛ ohomba oko, mbadia ndo mbeka Ɔtɛkɛta wa Nzambi na?—Fil. 1:10.
2 Kɛnɛ koleki ohomba ele aha nyanga dia kondja wenya efula, koko mbeya kɛnɛ kahombaso sala la wenya wele laso. Sho tshɛ tekɔ la wenya 168 lo lomingu, sho mbetshɛka wenya oko 100 dia ndala la kamba olimu. Lâsɔ, ngande wakokaso kamba la wenya wotshikadi lo yoho yoleki dimɛna? Efeso 5:15-17 tolakaka dia kɛndakɛnda ‘aha oko dinginya, kele oko akanga a yimba, lo ndjatshungwɛ etena k’ɔlɔlɔ, dia shihodia lolango la Jehowa.’ Kɛsɔ mɛnyaka ohomba wa kamba dimɛna la diaaso tshɛ diele laso dia sala akambo wele ohomba lo washo wa Jehowa.
3 Yeso akɛdika nshi yaso nyɛ la nshi ya Nɔa. (Luka 17:26, 27) Anto wa lo nshi shɔ wakayashaka efula l’akambo wa lo lɔsɛnɔ la lushi la lushi. Koko Nɔa akatane etena ka sɛla wato wa woke wa mamba ndo ka sambisha. (Heb. 11:7; 2 Pet. 2:5) Ngande wakawakondja etena na? Ele lo mbetsha lolango laki Nzambi la ntondo ndo lo mbokitanyiya lo sala akambo ‘oko akandawatela.’—Etat. 6:22.
4 Kakɔna Kahomba Mbeta lo Dihole dia Ntondo? Yeso akate ate: “Untu hayala la lumu ne dia ma tu, Keli ayuyala la lo ne dia aui tshe watumba uma l’unyo wa [Jehowa].” (Mat. 4:4) Lomingu tshɛ, sho nongolaka “mbu ya nde [ya lo nyuma] lu tena diayo.” (Luka 12:42) Dia sho kondja wahɔ oma lo mbo ya ndɛ shɔ, sho pombaka monga l’ekongelo ka wadielo ndo ka wekelo w’onto ndamɛ ka mbala la mbala dia shihodia awui akɔ tshɛ. Lowando lele laso lo kɛnɛ kendana la mbo ya ndɛ ya lo nyuma totshutshuyaka di’aha ndjilɛ l’ehatohato kana lowango lowango oko watongaka onto atalawɔ ko atale diangɔ dia l’emunyi. Koko, lɔ totshutshuyaka dia sho mbɔsa etena ka mbeka ndo ka shihodia akambo wa lo nyuma.
5 Olelo wa diangɔ dia lo nyuma koka tosha lɔsɛnɔ la pondjo. (Joa. 17:3) Vɔ mbasungana mbɔsa dihole dia ntondo l’ekongelo kaso ka lushi la lushi. Onde sho kokaka tana etena ka mbadiaka Bible ndo ka nɔngɔsɔlaka nsanganya y’Akristo? Eelo, sho koka kitana. Lo sala ngasɔ, tayokondja “difutu dia wuki” diaya oma lo mbeya ndo sala lolango la Nzambi.—Osam. 19:7-11.