Diaaso dia Lânde dia Keketshanya
1 Ndoko lushi ɔtɔi leta aha l’Ɛmɛnyi wa Jehowa pomana l’ehemba wa mbetawɔ kawɔ. Oko weyande di’etena ka tshitshɛ keto kambotshikalɛ, Diabolo ekɔ lo sala la wolo tshɛ dia nanya kɔlamelo yaso otsha le Jehowa. (Eny. 12:12) Ekɔ ohomba efula sho ‘tetemala kondja nkudu oma le Nkumadiɔndjɔ, nkudu k’oma lo wolo ande’ woho wa sho “mbeya nshikikala lu lushi la kolo, la memala lam’ayu[to]shidiya akambu aku tshe.”—Ef. 6:10, 13.
2 Osanganelo wa l’asekaso ambetawudi ekɔ yɛdikɔ yakɔshi Jehowa dia tokimanyiya woho wa sho kondja ekeketshelo. Ɔpɔstɔlɔ Paulo akashihodia ohomba wa dikambo sɔ. Nde akakombolaka dia sangana l’anango w’Akristo dia vɔ ‘keketshanya’ ndo ‘tshikala nge.’ (Romo 1:11, 12) Dia tokeketsha woho wa sho salaka lolango la Nzambi, Olui-Walɔmbɔla akɔshi yɛdikɔ yoludi la ngandji ya tosha diaaso dia keketshanya lo losanganya la distrikɛ layaye lele l’ɔtɛ a dui ɔnɛ “Apandjudi wa Diolelo Wele l’Ohetoheto.”
3 Tonge Lawɔ dia Sho Kondja Wahɔ: Toyadje oyango wa mbɔtɔ lo nshi yakɔ shato ya losanganya. ‘Tayokondja wahɔ’ efula naka sho komaka la ntondo k’osambo wa mbɔtwɛlɔ ndo tshikalaka polo lo mbuta “Amɛ” ka l’otema ɔtɔi lo dɔmbɛlɔ dia ndjihelo. (Is. 48:17, 18) Anto efula wayonga l’ohomba wa takonge elimu awɔ dimɛna la ntondo woho wa vɔ mbeya mbɔtɔ lo nshi yakɔ shato ya losanganya. Lo mɛtɛ, ondo ayonga wolo di’owandji ayɛ w’olimu kosha dikimɔ dia wɛ mbɔtɔ lo losanganya, koko tekɔ l’eshikikelo dia Jehowa ayotokimanyiya dia sho sala lolango lande. (1 Joa. 5:14, 15) Naka tatasale dikambo sɔ, kete ɔnɛ ekɔ etena ka ndjalɔngɔsɔla woho wa tana dikuta dia futa mutuka kana dia talɛka lo mboka, ndo ka nɔngɔsɔla diangɔ dia tɔlɛ lɛnɛ ayototohanga, aha la fɔnya ɔnɛ akambo asɔ wayosalema aha la sho ndjalɔngɔsɔla. Sho koka ndjashikikɛ dia Jehowa ayɔtshɔkɔla welo wadjaso dia mbɔtɔ lo nshi yakɔ shato ya losanganya.—Tuk. 10:22.
4 Tokanyiya Ekeketshelo Kayototolongola: Onde wɛ atataka l’ɔkɔngɔ wa losanganya lɔmɔtshi la distrikɛ wate: “Ɔsɔ mɛtɛ aki losanganya la dimɛna efula lo nsanganya tshɛ yamomɔtɔ!” Lande na kakayaoke ngasɔ? Ekɔ ngasɔ nɛ dia oko weso anto wele bu kokele, sho mbeyaka nɛmba efula polo ndo lo ndjaoka dia tekɔ l’ohomba w’ekeketshelo ka lo nyuma. (Is. 40:30) Kadiyɛso kɛmɔtshi akate ate: “Andja ɔnɛ nɛndjakami, koko nsanganya kimanyiyakami dia nyomoleka mbidja yimba nto l’akambo wa lo nyuma ndo yɔ mbishakami ekeketshelo ka lo nyuma kemi l’ohomba. Mɛnamaka dia ekeketshelo kɛsɔ ndjaka wonya wemi latɔ mɛtɛ ohomba efula.” Ondo ndo wɛ mbatoyaokaka ngasɔ.
5 Sho nongolaka ekeketshelo kahombama aha tsho oma l’asawo kana ɛkɔnya wasalema, koko ndo oma l’akambo akina wakeketsha lonyuma wa lo losanganya. Ɔnangɛso ɔmɔtshi akate ate: “Dimi mɛtɛ ngɛnangɛnaka yoho ya hwe ndo ya dimɛna yalembetshiyama atɔndɔ wa lo Bible lo nsanganya. Dramɛ toshaka wetshelo efula wɛnya woho wa sho kondja wahɔ lo bɛnyɛlɔ di’edjedja, oyadi di’amɛna kana dia kɔlɔ. Otombelo w’ekanda w’eyoyo ekɔ dikambo dimɔtshi diatomokongɛka l’asolo walomɔlomɔ, ndo dimi tɔngɛnangɛnaka ekanda ɛsɔ efula lam’atomokalolaka la ngelo.”
6 Nsanganya ya weke yekɔ yɛdikɔ y’ohomba efula y’oma le Jehowa lo “tena dia wulu” diasɛnaso nɛ. (2 Tim. 3:1) Yɔ tokimanyiyaka dia sho ndjela dako diakasambiyama diata ɔnɛ: “Nyosene, nyushikikali lu mbetawo, nyutshaki uku apami, nyukikitali.” (1 Kor. 16:13) Lâsɔ nyɛsɔ tosale tshɛ dia mbɔtɔ lo tenyi diakɔ tshɛ dia losanganya ndo keketshanya lo nyuma lo losanganya la distrikɛ lele l’ɔtɛ a dui ɔnɛ “Apandjudi wa Diolelo Wele l’Ohetoheto”!
[Kiombo ya lo lɛkɛ 3]
Toyalɔngɔsɔlɛ dia Mbɔtɔ lo Nshi Yakɔ Shato
■ Tɔlɔmbɛ dikimɔ le owandji aso w’olimu.
■ Tɔlɔngɔsɔlɛ woho wa tɔsɛna lo ngelo kasalema losanganya.
■ Tombe dikuta dia futa mutuka ndo dia talɛka lo mboka.