Onde Etshumanelo Kanyu Kekɔ l’Ɛtshi ka Nkɛtɛ ka Woke?

¹ Yeso akasambisha efula l’Isariyɛlɛ w’edjedja l’ɛtshi ka nkɛtɛ ka woke efula, mbut’ate tatɛ l’esomba wa la Judeya polo lo tosamba ta la Ngalileya. (Mako 1:​38, 39; Luka 23:⁠5) Sho lawɔ koka la sambisha anto efula lokumu l’ɔlɔlɔ lo yɛdikɔ yɛdimi l’akoka aso. (Mako 13:10) Koko olimu ɔsɔ mbeyaka monga olimu wa wolo. Lande na?

² Tshumanelo efula diekɔ la bɛtshi dia nkɛtɛ diele lo tosamba tanganyi mbala mɔtshi lo nkama ya kilɔmɛtɛlɛ. Tshumanelo di’ɛtɛkɛta w’angɛndangɛnda mbeyaka kamba l’osomba wa woke wele l’anto efula dia nyanga anto watɛkɛta ɔtɛkɛta awɔ. Kakɔna kakokaso sala dia kimanyiya anto wadjasɛ lo bɛtshi dia nkɛtɛ dia weke dia ngasɔ dia vɔ mbeka akambo wa mɛtɛ wendana la Jehowa, la Yeso, ndo la Diolelo?

³ Toyalɔngɔsɔlɛ Dimɛna: Omendji w’olimu nde l’okambi w’olimu wendana l’okahanyelo wa bɛtshi dia nkɛtɛ pombaka menda dimɛna welo wasala ase etshumanelo dia vɔ nyomoleka sala kɛnɛ koleki dimɛna. Ondo nyu mbeyaka nkongɛ nshi ya Samalo mɔtshi ya lânde, etena kakoka apandjudi efula monga la diaaso dia sambisha lushi l’otondo. Etena kakambanyu lo bɛtshi dia nkɛtɛ di’etale, nyoyalɔngɔsɔlɛ dia sambisha lushi l’otondo ndo naka kokaka nyu mbeyaka mɛmba yangɔ ya tɔlɛ la midi. Otshikitanyi la woho wokonyosalaka, nyu mbeyaka sangana la pindju ka pɛɛ woho wa kondja etena ka munda lɔkɛndɔ dia koma l’ɛtshi kahombanyu sambisha kana sala losanganya l’otsha l’esambishelo suke la dihole diahomba sambishama. Tanyongake anto efula l’olui di’aha anto amɔtshi tshɛlɛwa. Nyoyalɔngɔsɔlɛ dia sambisha lo tosamba lo nshi y’ɔwɔ, etena kele bu mvula ndo yanyi y’efula.

⁴ Wanɛ wasambisha l’ɔtɛkɛta w’angɛndangɛnda hawotetsha wenya wetshetsha naka vɔ monga la nkombo ndo l’adrɛsɛ ndo la kartɛ k’ahole wadjasɛ anto watɛkɛta ɔtɛkɛta awɔ. Nyɔlɔngɔsɔlɛ bɛtshi dia nkɛtɛ woho wa djui yasambisha membola anto tshɛ wele l’ahole asɔ.

⁵ Nyoyashikikɛ dia nyekɔ la nambo k’ɔlɔlɔ k’ekanda. Naka nyekɔ lo sambisha l’ɛtshi ka nkɛtɛ kahaleke kindjakindjama, kete ayonga dimɛna tshika traktɛ kana numɛlɔ kɛmɔtshi ka periodikɛ k’edjedja lo mvudu yahanyatanyi anto. Naka traktɛ Onde Wɛ Nangaka Nyomeya Akambo Efula wa lo Bible? kekɔ l’ɔtɛkɛta anyu, kete nyokisha onto tshɛ lahomana lanyu ndo nyokitshike lo mvudu yahanyatanyi anto.

⁶ Nyokambe Kâmɛ: Dia kamba dimɛna lo bɛtshi dia nkɛtɛ dia weke, ekɔ ohomba di’ase etshumanelo tshɛ kamba lonya lo lonya. Naka ekɔ ohomba nyu tshɔ la mituka, mitutu, kana akalo efula, nyu mbeyaka kimanyiyana dia somba esasɛ kana diangɔ dikina dia lɔkɛndɔ. Pombaka monga la shɛnɔdi ya dimɛna etena kasawolanyu l’onto ɔmɔtshi letawɔ dia nyu tɛkɛta. Nyohɔke wonya tshɛ dia nyu pombaka nyanga dia membola anto tshɛ wele l’ɛtshi ka nkɛtɛ kasambishanyu, ndo nyokane anto watatshu lanyu. Naka nyekɔ lo nanga taloya sawo l’onto ɔmɔtshi lɛnya nsaki, kete nyu mbeyaka mbutɛ anto watatshu lanyu dia vɔ tetemala la sambisha l’ahole akina woho wa nyu ndjayela lo dihole dia vɔ nyokongaka.

⁷ Nyoyalɔngɔsɔlɛ dimɛna dia tenda anto tshɛ wakɛnya nsaki. Lâdiko dia adrɛsɛ, nyoyange dia kondja numɛlɔ ya telefɔnɛ y’anto wɛnya nsaki woho wa nyu ndjotetemala sawola la wɔ lo telefɔnɛ. Naka etadimbo wa lo tosamba bu la nkombo, kana mvudu bu la numɛlɔ, kete nyoyange dia nembetɛ dimɛna kana sanga woho wa nyu ndjeya ndjokalola dia ndjɛnana l’onto lakɛnya nsaki.

⁸ Tekɔ mɛtɛ la diɛsɛ dia lânde dia kitanyiya dako diaki Yeso diata ɔnɛ: “Lam’ayunyukuma l’usumba kana lu ngelu tshe, kanyuyangi untu lukuki nyulungula”! (Mat. 10:11) Mɛtɛ Jehowa ayɔtshɔkɔla welo wadjanyu oko wayashanyu la lolango l’olimu wa dimɛna ɔnɛ!