Etena konga anto bu lawakawɔ
1. Naa okakatanu ɔmɔtshi waleka pomana laso etena katombaso l’esambishelo ka lo soko la soko?
1 Lo ahole efula, ekɔ lo taleke monga wolo dia tana anto lawakawɔ. Lo “tena dia wulu” nɛ, anto efula pombaka kamba wenya efula dia ndjakotshɛ ehomba wa lo lɔsɛnɔ. (2 Tim. 3:1) Anto amɔtshi mbeyaka monga bu la ngelo nɛ dia wakatshwe toyanga falanga kana la tasembolaka ekolo. Ngande wakokaso sambisha anto asɔ lokumu l’ɔlɔlɔ?
2. Ngande wakokaso ndjashikikɛ dia tayokalola l’ahole tshɛ waki anto komonga lawakawɔ?
2 Katofundake awui wele ohomba: Dui dia ntondo dia sala ele funda ahole wele anto bu lawakawɔ. Dui sɔ di’ekɔ ohomba efula naka wɛ sambishaka l’ɛtshi kayɛ ka nkɛtɛ mbala la mbala. Onde wɛ fundaka lokombo la shinga, numɛlɔ ka ɛtshi ka nkɛtɛ kakawakosha, lokombo layɛ ndo datɛ? Wɛ koka kondja diaaso dia ndjofunda awui akina etena kakalolayɛ kana kakalola opandjudi okina dia tenda anto waki komonga lawakawɔ. Lam’akomiyayɛ esambishelo, ohɔ dia mbisha ɔnɛ lakanga ɛtshi ka nkɛtɛ alapɔlɔ, ndo tokalolake dia tenda wanɛ waki komonga lawakawɔ naka nde hakosha dikimɔ dia sala dikambo sɔ. Kamba la dikatshi dikina dia funda nkombo y’anto tshɛ wɛnya nsaki wayoyokalola dia towaenda.
3. Naa alako amɔtshi wamboshama wakoka tokimanyiya dia tana anto waki komonga lawakawɔ?
3 Hemba kalola lo wonya okina: Ondo anto amɔtshi waki komonga lawakawɔ la yanyi mbeyaka tanema la ngelo l’akɔlɔ kana lo wikɛndɛ. Onde wɛ hakoke nɔngɔsɔla ekongelo kayɛ dia wɛ kalola lo wonya okina woleki dimɛna le wɔ? (1 Kor. 10:24) Naka hakoke, kete wɛ koka mbutɛ opandjudi okina wakoka kalola lo wonya okina dia nde tenda anto waki komonga lawakawɔ. Ko naka aha ɔsɔku, kete wɛ koka fundɛ wanɛ waki komonga lawakawɔ kana nyanga dia sawola la wɔ lo telefɔnɛ. Apandjudi wele la hemɔ yahawasha diaaso dia sambisha lo soko la soko koka ngɛnangɛna kokimanyiya lo dikambo sɔ.
4. Ɛnyɛlɔ kakɔna kɛnya ohomba wa kalola lo ahole waki anto komonga lawakawɔ?
4 Dikambo dimɔtshi diakete mɛnyaka ohomba wa sala la wolo dia mɛnana la wanɛ waki komonga lawakawɔ. L’ɔkɔngɔ wa apandjudi kalola mbala ko mbala ɛnɔnyi esato w’etondo lo luudu lɔmɔtshi, vɔ wakayotanaka kanga luudu. Koko, etena kɛsɔ tshɛ mama kɛsɔ akakongaka dia Ɔmɛnyi wa Jehowa ɔmɔtshi ndja ko vɔ ndjotatɛ wekelo wa Bible wakandatatɛ la ntondo ka nde monɔ lo dihole diayande.
5. Etena kakɔna kakokaso mbuta dia onto amboshidiya la kindjakindja ɛtshi kande ka nkɛtɛ?
5 Shidiya la kindjakindja ɛtshi kayɛ ka nkɛtɛ: Etena kakɔna kakokaso mbuta dia onto amboshidiya la kindjakindja ɛtshi kande ka nkɛtɛ? Mbala efula, ekɔ naka onto akadje welo lo yɛdikɔ yakoka dia sawola la onto ɔmɔtshi l’oseka luudu tshɛ. Mbeyaka monga dimɛna tshika traktɛ kana periodikɛ kɛmɔtshi k’edjedja lo ahole wele anto bu lawakawɔ la yewo tshɛ, djekoleko lo bɛtshi dia nkɛtɛ diahasambishama mbala la mbala. Pombaka shidiya la kindjakindja ɛtshi ka nkɛtɛ lo ngɔndɔ nyɛi. Oma lâsɔ ɛtshi ka nkɛtɛ pombaka mendama dia okambi wendana la bɛtshi dia nkɛtɛ funda awui w’eyoyo lo alapɔlɔ wakinde.
6. Lande na kahombaso sala la wolo dia mbewoya onto tshɛ la l’ɛtshi kaso ka nkɛtɛ lokumu l’ɔlɔlɔ?
6 Sho kombolaka dia anto efula kondja diaaso dia mbeya woho wa tɛndɛ lokombo la Jehowa ndo dia vɔ shimbamɛ. (Romo 10:13, 14) Dui sɔ mendanaka ndo la wanɛ wahonge lawakawɔ etena kasambishaso lo luudu la luudu. Oko ɔpɔstɔlɔ Paulo, nyɛsɔ tonge la nsaki ka “[mbewoya] lukumu l’ololo la ngandji ka mamba ka [Nzambi].”—Etsha 20:24.