Tetsha Anto Akina Ɔtɛkɛta wa Pudipudi
1 Kânga mboyewɔ oma lo ‘wedja, wauhu, weuhu w’anto ndo w’ɛtɛkɛta’ efula, Ɛmɛnyi wa Jehowa wekɔ anto wele kâmɛ, mbut’ate nkumbo ka mɛtɛ k’anto l’ɔnango ka l’andja w’otondo. (Eny. 7:9) Ɔsɔ ekɔ dikambo dia diambo efula l’andja wa nshi nyɛ ɔnɛ wele la diatɔnelo. Lande na kasalema dikambo sɔ? Diɔ diekɔ lo salema diɛsɛ oma l’‘ɔtɛkɛta wa pudipudi’ wakatalongola.—Zef. 3:9.
2 Etombelo w’Ɛlɔlɔ Efula: Ele ɔtɛkɛta wa pudipudi? Vɔ wekɔ eokelo k’oshika k’akambo wa mɛtɛ watanema l’Ɔtɛkɛta wa Nzambi wendana la Jehowa ndo l’asangwelo wakinde, djekoleko akambo wa mɛtɛ wendana la Diolelo diaki Nzambi. Oko wakadite Yeso, akambo wa mɛtɛ asɔ mbishamaka lo tshimbo y’ɔlɔngɔswamelo wɛnama wa la nkɛtɛ, mbut’ate oma lo tshimbo y’“ɔhɔmbɔ wa kɔlamelo ndo wa kɛsɔ,” ndo etombelo wɛnama ele anto “w’oma l’ɛtɛkɛta tshɛ wa wedja” wekɔ lo mbɔtɔ l’ɔtɛmwɛlɔ wa mɛtɛ.—Mat. 24:45, NW; Zek. 8:23.
3 Lam’eka anto ɔtɛkɛta wa pudipudi, vɔ tshutshuyamaka dia mbɔtɔnganyiya nsɛnɔ yawɔ l’ɛlɛmbɛ wa Jehowa. Vɔ mbekaka dia “nduwanyema lu yimba ndu lu tukanyi kame.” (1 Kor. 1:10) Wetshelo waki Nzambi mbakimanyiyaka nto dia monga la lɔkɛwɔ l’ɔlɔlɔ ndo la pudipudi, dia tondjaka ɛtɛkɛta wa mɛtɛ, djekoleko lam’ewoyawɔ anto akina lokumu l’ɔlɔlɔ. (Tito 2:7, 8; Heb. 13:15) Etshikitanu wa diambo ɛsɔ tombolaka Jehowa.
4 Oko ɛnyɛlɔ, pami kɛmɔtshi kakasambishama lokumu l’ɔlɔlɔ oma le opandjudi ɔmɔtshi aki la wembola efula, wele nde akakondja ekadimwelo awɔ tshɛ oma lo Bible. Oko wakandatshutshuyama la kɛnɛ kakandoke, nde akamɛ mbeka Bible mbala hiende lo lomingu ndo mbɔtɔ lo nsanganya. Nde akâmbe lo mɛna woho ɔnɛ wakawolongola l’ɔngɛnɔngɛnɔ efula lo Mbalasa ka Diolelo, kânga mbaki anto efula l’atei awɔ la nkoho yotshikitanyi. Kombeta ndoko edja, nde la wadɛnde wakasale etshikitanu lo nsɛnɔ yawɔ ndo wakabatizama. Oma k’etena kɛsɔ nde ambokimanyiya oko anto akina 40 dia vɔ kambɛ Jehowa, mbidja ndo ase nkumbo kande efula. Kânga mbasowande l’ɛkɔmɔ, nde akamɛ kamba oko ombatshi mboka atete ndoko edja.
5 Tetsha Anto Akina: Akambo weta l’andja ɔnɛ tshutshuyaka anto efula wele la losembwe dia nyomɔsɛdingola tokanyi ndo nsɛnɔ yawɔ. L’ɛnyɛlɔ ka Yeso, sho pombaka monga la nsaki ka mbakimanyiya. Wembwelo w’eshika ndo wekelo wa Bible wekɔ ohomba dia kimanyiya anto wele la losembwe dia vɔ mbeka ɔtɛkɛta wa pudipudi.
6 Yoho mɔtshi ya tatɛ sawola l’anto wele la wesanu ele mbeka la wɔ Bible lo tshena pe ka soko. (km 5/02 1) Onde wɛ ambohembaka sala dikambo sɔ oka? Lam’ayalɔngɔsɔlayɛ dia kalolɛ onto, sɔna mbɔtwɛlɔ kɛmɔtshi kɔtɔnɛ l’onto akɔ oma lo dikatshi di’okotsha di’Olimu Aso wa Diolelo wa Ngɔndɔ ka Ntondo 2002. Mbɔtwɛlɔ efula ya lo dikatshi di’okotsha sɔ tokimanyiyaka dia tɔlɔnganya sawo mbala kakɔ ɔtɔi otsha lo biukubuku Katɔlɔmba kana otsha lo dibuku Ewo. Hemba mbɔtwɛlɔ kakɔ dimɛna woho wa tɔ kokimanyiya dia wɛ mimɔ esadi eto oma lo mbɔtwɛlɔ otsha l’ɔkɛtshanyelo w’odingɔ ɔmɔtshi. Sɔna divɛsa ɔtɔi kana ahende oma l’odingɔ dia mbadia la kɛtshanya, ndo lɔngɔsɔla wombola ɔmɔtshi dia kumiya sawo. Vɔ wayokokimanyiya dia ndjeta lo odingɔ okina etena kayoyowembola nto.
7 Ekambi wa Jehowa wekɔ lo nongola ɛtshɔkɔ efula lo woho wekawɔ ɔtɛkɛta wa pudipudi. Nyɛsɔ tokimanyiya anto akina l’etete tshɛ dia vɔ sangana kâmɛ la so dia ‘tɛndɛlɛ lokombo la Jehowa’ ndo lo ‘mbokambɛ dihɛka lo dihɛka.’—Zef. 3:9.