Jehowa Sunganaka Mɛtɛ Tombwama
Dambo dia Dikɔlɔ dia Nkumadiɔndjɔ Diayosalema Ngɔndɔ ka Nɛi 16
1 Ɔnɛ eko etena kahombaso sambisha efula lam’ele totasukana otsha lo datɛ dia Ngɔndɔ ka Nɛi 16, 2003. La dikɔlɔ sɔ tayohɔ nyɔi kaki Yeso, tayosangana kâmɛ la miliyɔ y’atɛmɔdi w’anyaso wa l’andja w’otondo dia tombola lokombo la Jehowa. Jehowa sunganaka nongola lotombo laso tshɛ l’ɔtɛ wa woshasha wa mamba wa tshungo. Oma l’ekimanyielo ka woshasha ɔsɔ, nde ayotshulwɛ anto w’okitanyiya ɛtshɔkɔ wa mamba. L’otema ɔtɔi, sho tambosanganya awui aso la dui di’omembi w’esambo lakembe ate: “[Jehowa] keli wuki, ndi kukuki ntumbwama efula.”—Osam. 145:3.
2 Ɔnɛ ekɔ etena ka kana yimba l’ɔlɔlɔ waki Nzambi ndo lo lowando lahombaso monga lalɔ otsha le Jehowa lo woho wakandatome “On’andi etoi la kete, dia shu ndjala la lumu uma le ndi.” (1 Joa. 4:9, 10) Naka tayɔsɛdingola Dambo dia Dikɔlɔ dia Nkumadiɔndjɔ la dilɛmiɛlɔ tshɛ, kete diɔ diayotɛnya dia “[Jehowa] keli kanga ngandji ka shikaa, ndu kele usambi, . . . eli too la ngandji ka shikaa.” (Osam. 145:8) Lo mɛtɛ, tshungo ekɔ yoho yoleki tshɛ yakɛnya Jehowa ngandji kande otsha le anto tshɛ. (Joa. 3:16) Naka sho kana yimba lo ngandji kakatoke Nzambi ndo lo kɔlamelo yaki la Yeso, kete tayotshutshuyamaka dia tombola Jehowa. Tayowotombolaka pondjo oma lo ngandji kande ka mamba kakandatɛnya lo tosha diaaso dia kondja lɔsɛnɔ la pondjo.—Osam. 145:1, 2.
3 Tokimanyiya Anto Akina dia Tombola Jehowa: Lowando lele laso lo woshasha waki Nzambi wa tshungo woleki tshɛ ɔlɔlɔ totshutshuyaka dia mbeta anto akina dia ndjosangana kâmɛ la so dia tombola Jehowa. Omembi w’esambo akafunde oma lo wolo wa nyuma k’ekila ate: “Vo wayuhwanaka di’ololo aye waheyama mvuta, ndu wayandulaka sambu kaye k’ololo.” (Osam. 145:7) Paka l’ɔnɔnyi wetshi oto, Ɛmɛnyi wa Jehowa wa l’andja w’otondo waketsha wenya a tango ndekana miliyara l’olimu w’esambishelo. Etombelo akɔna wakawakondja na? Lo mingu tshɛ, yɛdikɔ ya l’atei atei y’anto ndekana 5100 wakabatizamaka dia mɛnya djembetelo ya ndjakimɔ kawɔ le Jehowa. Lofulo l’anto 15597746 la wanɛ wakɔtɔ lo Eohwelo wele l’atei awɔ miliyɔ ndekana 9 watatatɛ tombola Jehowa oko apandjudi wa lokumu l’ɔlɔlɔ mɛnyaka di’ohamelo w’efula wayonga lo nshi yayaye! Oko weso apandjudi wa Diolelo, sho ngɛnangɛnaka diɛsɛ diele laso dia sambisha lokumu l’ɔlɔlɔ ndo dia kadimola etema w’anto akina otsha le Jehowa, le Ɔnande, ndo lo Diolelo.
4 Yoho y’ɔlɔlɔ ya keketsha anto akina dia tombola Jehowa ele mbaelɛ dia ndjosangana laso lo Dambo dia Dikɔlɔ dia Nkumadiɔndjɔ. Onde wɛ ambofunda nkombo y’anto wayoyelɛ ndo y’anto akina wayonga l’ohomba wa we mbaohola lushi ndo wonya wayosalema Eohwelo kɛsɔ? Onde wɛ ambosha anto tshɛ wele lo listɛ layɛ akatshi wa leeta? Naka wɛ atasale dikambo sɔ, kete sala tshɛ dia mbasha akatshi wa leeta lɔsɔ lo yema ya nshi yambotshikala nyɛ. Kimanyiyawɔ dia vɔ shihodia oyango wa dambo sɔ. Lushi lɔsɔ, konge suke dia nongolaka anto wayoya. Woke dia wambolongwama dimɛna, eyanyawɔ l’anto akina ndo andolawɔ lo woho wambowoya lo dambo sɔ.
5 Wɔtwɛlɔ wa lo Eohwelo koka keketsha eyoyo dia pama lo nyuma. Ombeki ɔmɔtshi wa Bible waki la hemɔ kelɛwɔ post-traumatique, hemɔ kakonya onto di’akambo amɔtshi wa kandji wakete mboyɛ lo wɔɔngɔ oko lo dɔ akaye lo Eohwelo, kânga mbele l’ɔtɛ wa hemɔ kɛsɔ aki wolo le nde dia tshɔ l’ahole wotshumanyi anto efula. Lam’akawawombola ɔnɛ ngande wakayɛnyi losanganya lɔnɛ, nde akate ate: “Ɔsɔ aki losanganya la mamba, mbut’ate ɔsɔ aki otsho wotshikitanyi l’etsho ekina tshɛ, ndo dimi laki lawɔ.” Tatɛ oma lâsɔ, nde akatatɛ mbɔtɔ lo nsanganya tshɛ ya l’etshumanelo.
6 Oma l’Ɔkɔngɔ wa Eohwelo: Kakɔna kakokaso sala dia kimanyiya anto wayasha l’akambo wa mɛtɛ dia koma anto watombola Jehowa? Dikumanyi pombaka kotola yambalo le anto w’eyoyo wayɔtɔ lo Eohwelo ndo nyanga woho w’apandjudi wakoka towaembola kam’ayeta Eohwelo dia towaohola awui w’ɔlɔlɔ wakaweke ndo wakawɛnyi. Anto amɔtshi l’atei awɔ mbeyaka kombola mbeka Bible. Pombaka nto mbaelɛ oya lo nsanganya tshɛ ya l’etshumanelo yasalema lomingu la lomingu, nɛ dia wɔtwɛlɔ wa lo nsanganya wa mbala la mbala koka pamia ewo kawɔ ka Bible.
7 Tɛdikɔ tambɔsama dia keketsha wanɛ wetsha ngɔndɔ ɔtɔi kana ngɔndɔ shamalo aha la kimɔ alapɔlɔ w’esambishelo dia vɔ mbɔtɔka lo nsanganya mbala la mbala. Naka dikumanyi wambokɔlɔmba dia kimanyiya onto lahayosambisha dia nde tatɛ sambisha nto, kete onga suke dia sala dikambo sɔ. Ndjakiyanya yoho shɔ dikambo di’anangɛso mbɔtɔnɛka la kɛnɛ katɔlɔmba ɔpɔstɔlɔ Paulo ɔnɛ: “Okone lam’ekisu la etena k’ololo, tutshelaki antu tshe ololo, djekaleka le embetawudi.”—Ngal. 6:10.
8 Nyɛsɔ sho tshɛ todje welo wa lânde dia monga lo Eohwelo kayosalema Ngɔndɔ ka Nɛi 16. Hatokoke pandja diaaso dioleki ekila sɔ dia tombola Jehowa. Eelo, ɛlɔ kɛnɛ ndo pondjo la pondjo, nyɛsɔ totombolake Jehowa dikambo di’elimu ande wa mamba!—Osam. 145:21.